Siɛnnɛ nàʔagoligo wori dè
(5.1–6.27)
Siɛnnuʔɔnɔ wori dè
5
1 A Yewe ń'nɛ̀ ki juu Misa mɛ́ nɛ́ jo: 2 «Muɔ bé ki juu bè gbɛ̀ngɛ Isirayɛli siɛnnɛ mɛ́ bèle, pe 'yɛli bè césɛngɛ yaabiimɛfɔlilɔ yige bèle bùguro nī dè, nɛ́ siɛn ó siɛn ní ŋàa wī luʔɔ nɛ yigi wi mɛ́ wi fìɛrɛ tiɛyɛ nī yè, nɛ́ a siɛn ó siɛn 'cò nɛ̀ taa kpúu wáà nɛ̄ wè nɛ̀ wìi núʔɔ Yewe yiʔɛ mɛ́ gè. 3 Nàguɔ wī yo, cɛliwɛ wī yo, yeli bé pe yige bùguro kàduʔu mɛ́ gè kire ga buu pe fǎga bùguro núʔɔ dèʔ, dàa sunʔɔmɔ nī mi yē wèa.»4 Bà sí ki 'puu a Isirayɛli siɛnnɛ pe 'ki kpíʔile. A pe 'pe yige bùguro nī dè majo bɛ̀ Yewe cé ki juu Misa mɛ́ wè. Bɛ̀ sí pe 'ki kpíʔile.
Kacuʔɔlɔ cuɔnrigɛnmɛ bè
«A ki 'nyaa nàguɔ kire ga laa cɛliwɛ wi 'kakolilo kpíʔile siɛn wáà nɛ̄ wè, a wiì sín wè Yewe yiʔɛ mɛ́ gèʔ, kire siɛn wi bè wìi kpíʔile kolimɔfɔli. 7 Wi 'yɛli bè yéri ki kapiile nɛ̄ lè, bé sí ki felige núgo gè bè kɛn gàa wi 'cúʔɔ gè, bé ni ki felige tílaya tiɛyɛ kogunɔwuʔu taʔa ki nɛ̄. Wi bé ti mìɛni pínɛ bè kɛn siɛn mɛ́ wè ŋàa mɛ́ wi 'koli wè.
8 «A ki sí nyaa majo siɛn wi 'kùu wè, a siɛn ŋáà wi narigɛ wuu wáà ní wè baaʔ bè ki yɛrɛ líɛ dè, kolimɔfɔli wi bé pɛn nɛ́ ti ní bè pa ti kɛn Yewe mɛ́ wè, kire 'jo kacuɔnriwɔ mɛ́ wè. Nɛ̀ taʔa ki nɛ̄ wi 'yɛli bè sìnbapɔli caa bè kɛn kacuɔnriwɔ mɛ́ wè, ŋàa ní wi bé kàsulugosuɔ kakuɔrɔ kúɔ dè bè kapiile láʔa kolimɔfɔli nɛ̄ wè.
9 «Kpuʔɔrɔ ó kpuʔɔrɔ dáà Isirayɛli siɛnnɛ pe yé kɔ̀n nɛ̀ kɛn dè, dàa dī wàlidɛngɛrɛ Yewe mɛ́ wè, tire yē kacuɔnriwɔ wire wori, ŋàa mɛ́ pe 'ti kɛn dè. 10 Kacuɔnriwɔ ó kacuɔnriwɔ mɛ́ pe 'yawalidɛngɛrɛ dáà kɛn dè, tire bé puu wi wori.»
A nàguɔ nɛ káala wi cuɔ nɛ̄ wè
«Ki n'gɛ gàa yeli bé kpíʔile cɛliwɛ nɛ̄ wè ŋàa wiì sín wi pɔli mɛ́ wèʔ nɛ́ kolimɔ kpíʔile bè, 13 nɛ̀ ki yaʔa siɛn sì wi nyaa wèʔ.
«A ki sí nyaa nàguɔ wáà pɛ́nì cɛliwɛ ŋáà yùu wè nɛ̀ taa nɛ̀ ki yaʔa wi pɔli wiì ki cɛ́n gèʔ, á cɛliwɛ wi 'wìi núʔɔ Yewe yiʔɛ mɛ́ làrimɛ nī bè, nɛ́ míɛni kinyaafɔli wè baa wèʔ bà pe míɛni sì wi còʔ ki kpíʔilediʔɛ nī gèʔ, 14 a yejaʔa kɛ́nì wi pɔli cò wè, á wiī nɛ káala kpuʔɔ wi cuɔ wi tánʔagɛnmɛ nɛ̄ bè, a ki pɛ́nì nyaa kányiʔɛ gī wi 'wìi núʔɔ wè, a ki sí nyaa kányiʔɛ bɛ̀ʔ, wiì 'wìi núʔɔ wèʔ, 15 nàguɔ ŋáà wi bé wi cuɔ kɔ́ri wè bè pɛn kacuɔnriwɔ kúrugu wè, bé sí pɛn nɛ́ kpuʔɔrɔ ní dè, dàa ti yē ɔrizi míige juubaanyɛni tílaga gè. Wiì yɛli bè sùnmɔ wo ti nɛ̄ʔ, nɛ́ míɛni wiì yɛli bè wusuna cìiliwe le ti nīʔ, nɛ́ ki cɛ́n yejaʔa yakɔngɔ gī, dìgire yakɛngɛ gī, bè kolimɔ sɔ̀ngirɔ tìrige dè.
16 «Kacuɔnriwɔ wi bé cɛliwɛ kɔ́ri wè bè yérige Yewe yiʔɛ mɛ́ gè, 17 bé lawalidɛngɛgɛ kúu kàjɔli nī lè, bé sí tárigɛ koli dàala nɛ̄ lè Kòridiʔɛ laamɛ nī bè, bè le luʔɔ nī gè. 18 Bà wi kɛ́nì cɛliwɛ yérige wè Yewe yiʔɛ mɛ́ gè, kacuɔnriwɔ wi bé nzìire sáʔala dè cɛliwɛ nɛ̄ wè, bé sí dìgire yakɔngɔ le gè wi mɛ́ kadaʔala nī gèle; tire yē yejaʔa yakɛngɛ. Kacuɔnriwɔ wè, wire bé luʔɔ sìsorigo líɛ gè, kire gáà gī dɛ́ngɛ juudaʔa luʔɔ gè.
19 «Bà kacuɔnriwɔ wire bé cɛliwɛ ŋàʔana wè, bè jo wi- ki kàli: ‹A ki 'nyaa nàguɔ wáà wiiyɛ sì muɔ yùu nɛ́ cò muɔ nɛ̄ wèʔ, nɛ́ míɛni muɔ sì mìɛ núʔɔ Yewe yiʔɛ mɛ́ gèʔ nɛ̀ kolimɔ kpíʔile muɔ pɔli mɛ́ wèʔ, ma suɔ dɛ́ngɛ ŋáà mɛ́ wè ŋàa luʔɔ sìsorigo ki tari gè. 20 A ki sí tɔ̀ni nɛ̀ nyaa muɔ nyɛ́nì koli muɔ pɔli mɛ́ wè nɛ̀ kɛ́ nàguɔ wáà wiiyɛ kúrugu wè, nɛ̀ sɛ́nì mìɛ núʔɔ baa wè, nɛ́ ki cɛ́n kire nàguɔ ŋáà wi wè muɔ pɔliʔ nɛ́ sí muɔ yùu wè...›
21 «Kire tiʔɛ nī gè kacuɔnriwɔ wi bé séli bè dɛ́ngɛ juu wè bè taʔa cɛliwɛ nɛ̄ wè bé jo: ‹Yewe wi- ki yaʔa muɔ- puu fìɛ ŋáà siɛnnɛ pe béri nyu wè lɛ̀lɛ líì nī pe béri dɛ́ngɛ siɛnrɛ nyu dè béri kàlí de tari siɛnnɛ nɛ̄ bèle ! Yewe wi- ki kpíʔile muɔ siimɛdɛngɛ ki cúʔɔ muɔ nī, bé sí muɔ liyɛ fiɛ yè ! 22 Luʔɔ gáà ki dɛ́ngɛ tari wè, ki- jíin muɔ liyɛ nī yè bè muɔ liyɛ fiɛ yè bé sí muɔ siimɛdɛngɛ cúʔɔ gè !›
«Bà cɛliwɛ wi bé ki juu bé jo: ‹Ki- taa ki puu bɛ̀ ! Ki‑ taa ki puu bɛ̀ !›
23 «Kacuɔnriwɔ wi bé dɛ́ngɛ siɛnrɛ dáà sɛbɛ dè sɛ̀ngɛ kaliwɛgɛ nɛ̄ gè, bé sí ti jíge láʔa lasorigo ní gè, 24 bé sí ki kɛn cɛliwɛ mɛ́ wè wi- lasorigo gbuɔ gè gàa ki dɛ́ngɛ tari wè. Dɛ́ngɛ juudaʔa luʔɔ gè, kire bé jíin wi nī bè funbiɛnrɛ kɛn wi mɛ́. 25 Bà kacuɔnriwɔ wi bé yejaʔa yaliire yakɛnrɛ suɔ dè cɛliwɛ wi kiyɛ nī yè, bé sí ti mìɛni yɛ̀gɛ naamɛ Yewe yiʔɛ mɛ́ gè bé kɛ́ nɛ́ ti ní gbùʔɔrɔdiʔɛ yafanʔa mɛ́ gè.
26 «Kacuɔnriwɔ wi bé kagbuunyiʔɛ nigbe kɔ̀n míige yakɛnrɛ nī dè ki- puu sɔ̀ngidaa wuʔu bé ki sórigo gbùʔɔrɔdiʔɛ nɛ̄ gè. Kire kàduʔumɛ, wi bé luʔɔ kɛn gè cɛliwɛ mɛ́ wè wi- ki gbuɔ.
27 «Bà wi 'luʔɔ kɛn gè wi- ki gbuɔ gè, kire bé ki yaʔa a ki yē wi nyɛ́nì wìi núʔɔ Yewe yiʔɛ mɛ́ gè nɛ̀ koli wi pɔli mɛ́ wè, dɛ́ngɛ juudaʔa luʔɔ ki bé jíin wi nī bè funbiɛnrɛ kɛn dè wi mɛ́: wi liyɛ yi bé fiɛ, wi siimɛdɛngɛ ki bé cúʔɔ. Bà cɛliwɛ ŋáà wi bé kò fìɛ ŋáà wori siɛnnɛ pe béri nyu dè lɛ̀lɛ líì nī pe dɛ́ngɛ tari wè.
28 «A ki sí nyaa cɛliwɛ wiì wìi núʔɔ wèʔ, wiī cìiliwe wè, cɛliwɛ ŋáà wi bé suɔ dɛ́ngɛ mɛ́ wè, bà wi béri pìile taʔa.
29 «Dàa tire dī fànʔa kajuulo lè yejaʔa wuʔu nɛ̄ gè, cɛliwɛ kɔli mɛ́ gè ŋàa wi 'wi pɔli yaʔa nɛ́ kanuʔɔrɔ kpíʔile nɛ́ nàguɔ wáà wiiyɛ ní wè, 30 kire ga laa nàguɔ kɔli mɛ́ gè ŋàa wī yejaʔa ki 'wi cò gè a wiī nɛ káala wi cuɔ nɛ̄ wè. Wi bé wi kɔ́ri bè yérige Yewe yiʔɛ mɛ́ gè dí kacuɔnriwɔ wi sí kele gálì kpíʔile gèle wi nɛ̄, gàli fànʔa kajuʔulo gálì ke 'juu gèle. 31 A kire 'kpíʔile gè, cɛliwɛ wi pɔli wiǐ kolimɔ taaʔ, nɛ̀ sí ki yaʔa cɛliwɛ ŋáà wi 'koli wè, wire bé wi kapiile tɔ̀ni taa wè.»