Fànʔa kajuʔulo gálì ke nyu kacuɔnrilɔ cìilimɛ wori nɛ̄ dè
21
1 A Yewe 'ki juu Misa mɛ́ nɛ́ jo: «Ma siɛnrɛ dáà juu dè kacuɔnrilɔ mɛ́ bèle, Arawɔn jaala bèle:«Kacuɔnriwɔ wáà fǎga wìi núʔɔʔ wi siɛnnɛ sunʔɔmɔ nī bèʔ bè cò bè taa kpúu wáà nɛ̄ʔ, 2 fúɔ macɛn a ki 'nyaa wi narigɛ wuulo bálì pe 'kpɔni wi nɛ̄ bèle, wire wáà wī: wi yàa wè, nɛ́ wi tuu ní wè, nɛ́ wi jaa ní wè, nɛ́ wi póri ní wè, nɛ́ wi laayirinyɛni ŋáà wī nàguɔ wè. 3 Nɛ́ míɛni wi laayirinyɛni ŋáà wī sinboriwo, nàguɔ sìnjɛ́n nī wè, ŋàa wi 'kpɔni wi nɛ̄ bɛ̀ wi fìɛ cepɔrigɔ kpíʔile gèʔ, a wi 'kùu wè, wi bé gbɛ̀ wìi núʔɔ wire kɛnmɛ nɛ̄. 4 Wire ŋáà wī kàfɔli wè, wi siɛnnɛ sunʔɔmɔ nī bè, wi fǎga wìi núʔɔʔ, bè faʔara wáa wìi nɛ̄ʔa.
5 «Kacuɔnrilɔ pe fǎga de tiʔile kɔ̀ngí pe nyùyɔ nɛ̄ yèʔ; pe fǎga de gbandeliye síire kùnú dèʔ; pe fǎga de jérigele kpúɔn pe céri nɛ̄ dèʔb. 6 Pe 'yɛli bè puu wàlidɛngɛlɛ pe Kulocɛliɛ mɛ́ wè; pe fǎga Kulocɛliɛ míʔɛ faʔa gèʔ. Nɛ́ ki cɛ́n peli bèle, piyē nɛ yakɔnrɔ kanʔa dè Kulocɛliɛ mɛ́, kakuɔrɔ yaliirec dáà kàsun ki sórigi dè, Yewe wori dè. Kire nɛ̄ pe 'yɛli bè puu wàlidɛngɛlɛ pe Kulocɛliɛ mɛ́ wè.
7 «Nàjaacuɔ wè, kire ga laa ŋàa nàguɔ 'fáanni nɛ̀ wi caa wè, kire ga laa ŋàa nàguɔ wi 'wáa wè, kacuɔnriwɔ wiǐ gbɛ̀ kire cuɔ ŋáà líɛ wè wi cuɔʔ. Nɛ́ ki cɛ́n kacuɔnriwɔ wiī wàlidɛngɛwɛ wi Kulocɛliɛ mɛ́ wè. 8 Siɛn ó siɛn yeli nī bèle, wi 'yɛli bè kacuɔnriwɔ tɔ́ri wè wàlidɛngɛwɛ Kulocɛliɛ mɛ́, nɛ́ ki cɛ́n wiī nɛ kakuɔrɔ yaliire kanʔa dè yeli Kulocɛliɛ mɛ́ wè. Yeli 'yɛli bèri wi nyaʔa wàlidɛngɛwɛ tiɛlɛ fùn m'mɛ́, nɛ́ ki cɛ́n mi Yewe wè, mi yē tiɛlɛ fùn; mi wī mi nɛ yeli wàlí nɛ tɛ́ngi m'mɛ́ yeli- kò tiɛlɛ fùn.
9 «A ki 'nyaa kacuɔnriwɔ póri wáà, wi 'wìi faʔa nɛ́ nàjaara kpíʔile dè, wi tuu wè wire wi nyɛ́nì faʔa; pe 'yɛli pe- wi kpúu bè wi sórigo kàsun nī.
10 «Kacuɔnrilɔ kàfɔli wè, wire ŋáà wi 'kpúʔɔ wi siinyɛninɛ sunʔɔmɔ nī bè, nɛ́ wire ŋáà nɛ̄ pe yé siɛnnyiɛnɛgɔn sùnmɔ wo bè nyùgo nɛ̄ gè, nɛ́ siɛntɛngɛ kakuɔrɔ kele kpíʔile gèle wi nɛ̄ kire ga buu wi de burudo wàlidɛngɛrɛ nii dè, wire wè, wi fǎga wi nzìire yaʔa dè nyaʔamidɛʔ kire ga laa bé wi burudo cɛnminɛ dèʔd. 11 Kacuɔnrilɔ kàfɔli wi fǎga sìʔɛrɛ kpɔni kpúu wáà fáala nɛ̄ʔ. Wi fǎga wìi núʔɔʔ a ki cɛ́nì nyaa wi tuuʔ kire ga laa wi yàa wèʔ. 12 Wi fǎga yiri saawalidɛngɛgɛ nī gè bè wi Kulocɛliɛ saawalidɛngɛgɛ núʔɔ gèʔ, nɛ́ ki cɛ́n wi yē wàlidɛngɛwɛ bɛ̀ pe yé wi Kulocɛliɛ siɛnyiɛnɛgɔn sùnmɔ wo bè wi nɛ̄ wè. Mi yē Yewe.
13 «Kacuɔnrilɔ kàfɔli wi 'yɛli bè sinboriwo líɛ ŋàa wi fìɛ nàguɔ kaala cɛ́nʔ. 14 Wi fǎga cɛliwɛ líɛ ŋàa wī lakicuɔ wèʔ, nɛ́ míɛni cɛliwɛ ŋáà wi pɔli wi 'wi yaʔa wèʔ, nɛ́ cɛliwɛ ŋáà nàguɔ 'fáanni nɛ̀ wi caa wè, nɛ́ ŋàa wi nàjaara kpínʔini dèʔ. Wi 'yɛli bè cɛliwɛ líɛ ŋàa wī nàguɔ sìnjɛ́n sinboriwo wè, wi siɛnnɛ sunʔɔmɔ nī bè, 15 kire ga buu wi fǎga faʔara pìile siiʔ wi siɛnnɛ sunʔɔmɔ nī bè. Mi yē Yewe ŋáà wiī nɛ kacuɔnrilɔ kàfɔli wàlí wè nɛ tɛ́ngi m'mɛ́ wi- puu tiɛlɛ fùn.»
16 A Yewe 'ki juu Misa mɛ́ nɛ́ jo:
17 «Ma siɛnrɛ dáà juu dè Arawɔn mɛ́ wè:
«Muɔ siimɛ pi kɛ̀ngɛlɛ ke mìɛni nī gèle, nàguɔ ŋáà wī kpɔliwɔ wè, wiì yɛli bè sìʔɛrɛ kpɔni bèri wi Kulocɛliɛ kakuɔrɔ yaliire kanʔa dèʔ. 18 Nàguɔ ó nàguɔ wī kpɔliwɔ wè, wiì yɛli bè sìʔɛrɛ kpɔni bè kacuɔnriwɔ baara kúɔ dèʔ: fúɔn yo, kire ga laa tamɔnigɔfɔli yo, nɛ́ ŋàa yiʔɛ ki 'ŋɛ́gɛ gè, nɛ́ ŋàa wi yaliige káà 'tɔni kàa nɛ̄ gèʔ, 19 nɛ́ nàguɔ ŋáà wī tɔligɔ 'kaa wi nɛ̄ gèʔ á kire bɛ̀ʔ kɔli 'kaa wi nɛ̄ gèʔ, 20 nɛ́ ŋàa wī dɛ̀nfɔli wèʔ, nɛ́ ŋàa wī siɛn máaminɛ lèʔ, nɛ́ ŋàa wī tiɛlɛ yē nyapile nɛ̄ lèʔ, nɛ́ ŋàa nɛ̄ tùʔu yē gèʔ, nɛ́ ŋàa nɛ̄ fìɛligɛ yē gèʔ, nɛ́ ŋàa wī juʔɔlɔ ke 'muʔɔrɔ gèleʔ.
21 «Kacuɔnriwɔ Arawɔn siimɛ wuu wáà fáala ŋàa wī nɛ́ kpɔlidiɛlɛ ní lè, wiì yɛli bè sìʔɛrɛ kpɔni bè yakɔnrɔ kɛn Yewe mɛ́ʔ dàa kàsun ki sórigi dèʔ; wi kpɔlidiɛlɛ lire kɛnmɛ nɛ̄ wiǐ gbɛ̀ sìʔɛrɛ kpɔni bèri kakuɔrɔ yaliire kanʔa wi Kulocɛliɛ mɛ́ wèʔ. 22 Nɛ́ ki yaʔa kakuɔrɔ yaliire dáà pe 'kɛn wi Kulocɛliɛ mɛ́ wè, wi bé gbɛ̀ ti káa, dàa dī yacɛ̀njɛnrɛ wàlidɛngɛrɛ dè, nɛ́ dàa dī yacɛ̀nrɛ wàlidɛngɛrɛ dè. 23 Nɛ̀ ki yaʔa wiì yɛli bè sìʔɛrɛ kpɔni gunbɔli fɛ̀ni nɛ̄ wèʔ kire ga laa bè sìʔɛrɛ kpɔni gbùʔɔrɔdiʔɛ yafanʔa nɛ̄ gèʔ, bɛ̀ ki nyaa kpɔlidiɛlɛ yē wi nɛ̄ wè. Wi fǎga mi saawalidɛngɛgɛe nɛ́ ki yɛrɛ ti mìɛni núʔɔ dèʔ, nɛ́ ki cɛ́n mi yē Yewe ŋáà wiī nɛ kacuɔnrilɔ wàlí bèle nɛ tɛ́ngi mìɛ mɛ́ wè.»
24 A Misa 'ki siɛnrɛ juu dè Arawɔn mɛ́ nɛ́ wi jaala ní bèle, nɛ́ Isirayɛli siɛnnɛ pe mìɛni ní bèle.