Kapiʔile sàri wori dè
20
1 A Yewe 'ki juu Misa mɛ́ nɛ́ joa:2 «Ma siɛnrɛ dáà juu dè Isirayɛli siɛnnɛ mɛ́ bèle:
«A ki 'nyaa Isirayɛliyé wuu wáà wī á kire bɛ̀ʔ nabɔnwɔ ŋáà wī tɛ́niwɛ Isirayɛli kùlo nī lè, siɛn ó siɛn ŋáà wi 'wi pùɔ wáà kpúu nɛ̀ kɛn Mɔlɔki yasungob mɛ́ gè, pe 'yɛli pe- wi kpúu wī. Kùlo siɛnnɛ pe bé wi wáa nɛ́ kàdari ní dè fúɔ wi 'kùu. 3 Mi wè, m'bé kàduʔu wáa wi mɛ́ bé wi yige péwu wi siɛnnɛ sunʔɔmɔ nī bè. Nɛ́ ki cɛ́n wi nyɛ́nì wi pùɔ wáà kpúu nɛ̀ kɛn Mɔlɔki yasungo mɛ́, kire ki 'mi saawalidɛngɛgɛ núʔɔ gè nɛ̀ mi tiɛlɛfun míʔɛ faʔa gè.
4 «A ki yē kùlo siɛnnɛ pe 'nyapigele tɔ́n ki kaala nɛ̄ lè, piyè yakaa juu gàa siɛn wi 'kpíʔile gèʔ, bà wi 'wi pùɔ wáà kpúu wè nɛ̀ kɛn Mɔlɔki yasungo mɛ́ gè, a piyè kire siɛn kpúu wèʔ, 5 mi Yewe wè, m'bé kàduʔu wáa kire siɛn mɛ́ wè nɛ́ wi narigɛ ní gè, bè wi yige péwu wi siɛnnɛ nī bèle, wire nɛ́ bàli pe mìɛni pe wúɔ nɛ́ wi ní bèle, nɛ̀ kò bɛ̀ nàjaacɛlilɛ tíɛlɛ bèle nɛ pìye kanʔa Mɔlɔki yasungo mɛ́ gè.
6 «A siɛn wáà sɛ́nì cɛ́li wàa mɛ́, ŋàa wi luʔɔ ŋu kúbilo mɛ́ bèle á kire bɛ̀ʔ goriyiliwe mɛ́ wè, nɛ̀ sɛ́ni kanuʔɔrɔ kpínʔini nɛ́ pe ní bèle, m'bé kàduʔu wáa kire siɛn mɛ́ wè bé wi yige péwu wi siɛnnɛ sunʔɔmɔ nī bè.
7 «Yeli 'yɛli bè yìye wàli dɛ́ngɛ m'mɛ́ bè puu tiɛlɛ fùn, nɛ́ ki cɛ́n mi yē Yewe, yeli Kulocɛliɛ wè.
8 «Yeli 'yɛli bè mi fànʔa kele cò gèle bèri ke kpínʔini. Mi Yewe wè, mi wī mi 'yeli wàlí nɛ tɛ́ngi yeli- puu mi wuulo.
9 «A siɛn ó siɛn 'wi tuu faʔa á kire laa wi yàa wè, pe 'yɛli pe- wi kpúu wī. Wi sìsiɛn wolo kapiile ni bé tuu wi nɛ̄c.
10 «A nàguɔ wáà 'wi siɛnnyɛni cuɔ cɛ́n cɛliwɛ wè, ki nàguɔ wè nɛ́ cɛliwɛ ní wè, pe 'yɛli pe- pe kpúu wīd.
11 «A nàguɔ wáà 'wi tuu cuɔ wáà fáala cɛ́n cɛliwɛ wè, wi 'fìɛrɛ tɔ́n wi tuu nɛ̄ wè. Pe 'yɛli pe- pe siin kpúu bèle; pe siin sìsiɛn wolo kapiile ni bé tuu pe nɛ̄e.
12 «A nàguɔ wáà 'wi jaa cuɔ cɛ́n cɛliwɛ wè, pe 'yɛli pe- pe siin kpúu bèle. Pe nyɛ́nì tètii kaala kpíʔile; pe siin sìsiɛn wolo kapiile ni bé tuu pe nɛ̄f.
13 «A nàguɔ wáà 'sínɛ nɛ́ nàguɔ wáà ní majo cɛliwɛ wī, pe siin pe nyɛ́nì kafunnɔ kpíʔile. Pe 'yɛli pe- pe kpúu wī; pe siin sìsiɛn wolo kapiile ni bé tuu pe nɛ̄g.
14 «A nàguɔ wáà 'pórifɔli nɛ́ wi yàa líɛ cɛlilɛ bèle, kapiigbuʔɔ gī. Nàguɔ nɛ́ cɛlilɛ siin ní bèle, pe 'yɛli pe- pe kpúu bè pe sórigo kàsun nī, kire ga buu kapiigbuʔɔ gáà ki- yiri yeli sunʔɔmɔ nī bèh.
15 «A nàguɔ wáà 'sínɛ nɛ́ yajuʔu ní, pe 'yɛli pe- wi kpúu, bé yajuʔu kpúu gè míɛni. 16 A cɛliwɛ wi 'wìi kɛn yawiʔi mɛ́ gè nɛ̀ sínɛ nɛ́ ki ní wè, muɔ 'yɛli bè cɛliwɛ kpúu wè nɛ́ yajuʔu ní gè; pe siin sìsiɛn wolo kapiile ni bé tuu pe nɛ̄i.
17 «A nàguɔ wáà 'wi siinyɛni líɛ wè, ŋàa wī wi tuu póri wè, á kire bɛ̀ʔ ŋàa wī wi yàa póri wè, a wi 'wi cɛ́n cɛliwɛ wè, a cɛliwɛ míɛni wi 'yéri ki nɛ̄ gè, kire yē fìɛrɛ kaala. Pe 'yɛli bè pe yige péwu pe siɛnnɛ nyaamɛ nɛ̄ bè. Bɛ̀ nàguɔ wi nyɛ́nì wi siinyɛni cɛ́n wè cɛliwɛ wè, wi bé wi kolimɔ pi tugoro tugo dèj.
18 «A nàguɔ wi 'cɛliwɛ nyɔ́gɔ saʔa nī wi gbélige lɛ̀lɛ nī lè, pe 'yɛli pe- pe siin yige bèle péwu pe siɛnnɛ sunʔɔmɔ nī bè, nɛ́ ki cɛ́n wi nyɛ́nì cɛliwɛ wi gbélige tiʔɛ nyaa gè, a cɛliwɛ wire 'tí a wi 'ki tiʔɛ nyaa gè. Pe 'yɛli bè pe siin wàli bèle bè yige pe siɛnnɛ sunʔɔmɔ nī bèk.
19 «Muɔ yàa laayirinyɛni ŋáà wī cɛliwɛ wè, kire ga laa muɔ tuu laayirinyɛni ŋáà wī cɛliwɛ wè, muɔ fǎga wi cɛ́n cɛliwɛʔ. Nɛ́ ki cɛ́n a nàguɔ wi 'wi siinyɛni cɛ́n wè cɛliwɛ wè, pe siin pe bé pe kolimɔ pi tugoro tugo dèl.
20 «Wi tuu laayirinyɛni ŋáà wī cɛliwɛ wè, a nàguɔ wi 'wi cɛ́n cɛliwɛ wè, wi nyɛ́nì fìɛrɛ wáa cɛliwɛ wire pɔli nɛ̄ wè. Pe kapiile ni bé tuu pe nɛ̄: pe bé kùu pìile sìndaa nīʔ.
21 «A nàguɔ wáà 'wi laayirinyɛni cuɔ líɛ wè, kire yē kanuʔɔnɔ. Wi nyɛ́nì fìɛrɛ wáa wi laayirinyɛni nɛ̄ wè; piyě pìile taaʔm.
22 «Yeli 'yɛli bèri mi fànʔa kele ke mìɛni cògí nɛ́ mi kàyuʔujuuro ti mìɛni ní dè, bèri tári de yɛligi nɛ́ ti ní. Kire ki bé tí kùlo náà mɛ́ mi je yeli tórigo bèle yeli sa tɛ́ni ni nī lè niǐ ga tíi yeli tùgu bè wáaʔ. 23 Kùlo siɛnnɛ bálì mi bé cìra yeli yiʔɛ mɛ́ gè, ye fǎri tári de yɛligi nɛ́ pe fànʔa kele ní gèleʔ. Nɛ́ ki cɛ́n ni siɛnnɛ pe 'puu nɛ kele gálì ke mìɛni kpínʔini gèle, kire nɛ̄ pe kò m'mɛ́ laabiri yɛgɛ.
24 «Mi nyɛ́nì ti juu yeli mɛ́ nɛ́ jo: ‹Yeli tíimɛ ye bé pe dàala taa lè kɔrigɔ. Mi tíimɛ m'bé ni kɛn yeli mɛ́ ni- kò yeli woli, kùlo náà nī nɛ̀yirimɛ nɛ́ sárigɛ kiī nɛ fúu gè !› Mi yē Yewe, yeli Kulocɛliɛ wè, ŋàa wi 'yeli wàli nɛ̀ yige kùlogolo siɛnfeliye sunʔɔmɔ nī bèn.
25 «Kire nɛ̄ yeli 'yɛli bèri wàlimɛ kpínʔini nɛ́ yajuuro ní dè dàa dī cìilide nɛ́ dàa dī núʔɔrɔ dè, nɛ́ yafinide ní dè dàa dī núʔɔrɔ nɛ́ dàa dī cìilide dè, kire ga buu yeli fǎga yìye kpíʔile Yewe kanabiɛnnɛ yɛrɛʔ dáà ti mìɛni kɛnmɛ nɛ̄ bè dàa mi 'tìɛ nɛ́ jo tiī núʔɔrɔ dèʔ: nyàʔayɛrɛ nī dè, nɛ́ yajuuro nī dè, nɛ́ yafinide nī dè, nɛ́ yafulolido nī dèo.
26 «Yeli 'yɛli bè puu tiɛlɛ fùn, wàlidɛngɛlɛ mi mɛ́, nɛ́ ki cɛ́n mi Yewe, mi yē tiɛlɛ fùn; mi 'yeli wàli nɛ̀ yige kùlogolo siɛnfeliye sunʔɔmɔ nī bè, yeli- puu mi wuulo.
27 «A nàguɔ wáà kire ga laa cɛliwɛ wáà yē nɛ luʔɔ ŋu kúbilo mɛ́ bèle, á kire bɛ̀ʔ a wi yē goriyiliwe wè, pe 'yɛli pe- wi wáa pe- kpúu nɛ́ kàdari ní dè. Wi sìsiɛn wolo kapiile ni bé tuu wi nɛ̄p.»