Fànʔa kajuʔulo gálì ke nyu sínnɛ wori nɛ̄ dè
19
1 A Yewe 'ki juu Misa mɛ́ nɛ́ jo:2 «Ma siɛnrɛ dáà juu dè Isirayɛliyé mɛ́ bèle:
«Yeli sí yɛli bè puu tiɛlɛ fùn, nɛ́ ki cɛ́n mi Yewe, yeli Kulocɛliɛ wè, mi yē tiɛlɛ fùna.
3 «Siɛn ó siɛn 'yɛli bèri wi yàa nɛ́ wi tuu kpóri wèb, siɛn ó siɛn 'yɛli bè mi cɛndɛniyɛ cò yè cɛ̀ngɛc. Mi yē Yewe, yeli Kulocɛliɛ wè.
4 «Ye fǎga taʔa kulocɛlɛlɛ bálì nɛ̄ pe wè yafiɛn wèʔd, ye fǎga timɔri yasungo káà fáala kpíʔileʔe. Mi yē Yewe, yeli Kulocɛliɛ wè.
5 «A yeli nɛ yanyige yakɔnrɔ kaara kɔ̀ngí dè Yewe mɛ́ wè, ye- ki kpíʔile kɛnmɛ bíì nɛ̄ wi bé fɔ̀li ki nɛ̄ gè. 6 Kire kaara ti 'yɛli ye- ti káa cɛnnugo gè, kire ga laa ki kpìɛnduu gè. Dàa ti bé kò bè cɛnyɛ taanri kúɔ yè, ki 'yɛli pe- tire sórigo. 7 A siɛn 'yanyige yakɔnrɔ kaara káa dè cɛnyɛ taanriwuʔu nɛ̄ gè, ti nyɛ́nì kò yanuʔɔrɔ Yewe yiʔɛ mɛ́; wiǐ fɔ̀li ti nɛ̄ʔ. 8 Siɛn ŋáà wi 'ti káa dè, wi kolimɔ pi bé tuu wi nɛ̄, nɛ́ ki cɛ́n yakɔnrɔ kaara dáà dī wàlidɛngɛrɛ Yewe mɛ́ wè, wi nyɛ́nì ti faʔa. Pe bé kire siɛn yige péwu wi siɛnnɛ sunʔɔmɔ nī bè.
9 «A yeli kɛ́nì yeli siiye yaliire líɛ dè, muɔ 'yɛli bè yaliire táà yaʔa siʔi kanyuɔyɔ nɛ̄ yè; muɔ sì yɛli bè yaliikɛniyɛ líɛ yèʔ nyàa nɛ̄ muɔ 'fìʔɛ yèʔf. 10 Bɛ̀ ki bé puu míɛni a muɔ kɛ́ni ɛrɛzɛn yasɛnrɛ cuu dè muɔ siʔi nī gè. Muɔ sì yɛli bè koli bè siʔi fùgu gè tɔliyɔ siinʔ bè yasɛnrɛ cuɔ dè dàa nɛ̄ muɔ 'tóri dèʔ, muɔ sì yɛli bè yasɛnrɛ jó dè dàa ti 'wo dàala nɛ̄ lèʔ. Muɔ 'yɛli bè ti yaʔa fuunmɔfɔlilɔ nɛ́ nabɔnminɔ mɛ́ bèle. Mi yē Yewe, yeli Kulocɛliɛ wè.
11 «Ye fǎga kàyuugo kpíʔileʔg. Ye fǎga finɛ daʔa yeli siɛnnyɛni wáà nɛ̄ʔ, kire ga laa bè wi fáanniʔh. 12 Ye fǎga finɛ bè kàli mi míʔɛ nɛ̄ gèʔ; a yeli 'kire kpíʔile gè, yeli bé yeli Kulocɛliɛ míʔɛ faʔa gè. Mi yē Yewei.
13 «Ma fǎga fùrɔgɔ niʔɛ gè muɔ siɛnnyɛni nɛ̄ wèʔ, ma fǎga yakaa yùu wi mɛ́ʔ. Muɔ baakuɔwɔ wi cɛngɛ sàri wiì yɛli bè kpìɛnmɛ tuu bè muɔ mɛ́ʔj. 14 Ma fǎga dɛ́ngɛ wáa wè dùnɔ nɛ̄ wèʔ, ma fǎga yakaa tɛ́ngɛ fúɔn wi yiʔɛ mɛ́ gè wi- kúrugo ki nɛ̄ʔ. Muɔ 'yɛli bèri muɔ Kulocɛliɛ fìʔɛ́ wè. Mi yē Yewek.
15 «Ye fǎga kàyuʔu juu nɛ́ sìnzinmɛ níʔ. Fǎga tànʔa kɛn siɛnciɛwɛ mɛ́ wè wi cíɛmɛ kɛnmɛ nɛ̄ bèʔ, fǎga tànʔa kɛn míɛni siɛnkpuɔwɔ mɛ́ wè wi kpuɔmɔ kɛnmɛ nɛ̄ bèʔ. Muɔ 'yɛli bè muɔ siɛnnyɛni kàyuʔu juu gè nɛ́ sínmɛ níl.
16 «Ma fǎga de nyaari de mári bè siɛn wáà míʔɛ cúʔɔ yeli siɛnnɛ sunʔɔmɔ nī bèʔ. Fǎga kaala láà juu daʔa muɔ siɛnnyɛni nɛ̄ wèʔ pe- wi kpúuʔ. Mi yē Yewe.
17 «Fǎga muɔ siinyɛni yaʔa wi 'muɔ biɛn muɔ fungo nī gèʔ a wi 'kaala láà kpíʔile nàa niì nyuɔ lèʔ. Muɔ 'yɛli bè juu nɛ́ muɔ siɛnnyɛni ní wè, kire ga buu muɔ fǎga kolimɔ taa wire kɛnmɛ nɛ̄ kire kaala nɛ̄ lèʔm. 18 Muɔ fǎga de caa bè muɔ fuʔɔ tɔ́n gèʔ, fǎga míɛni kaala cò siɛn kúrugu muɔ siɛnnɛ sunʔɔmɔ nī bèʔ. Nɛ̀ ki yaʔa muɔ 'yɛli bè muɔ siɛnnyɛni woli yaʔa lè ni- muɔ dɛ́ni kɛnmɛ bíì nɛ̄ muɔ mìɛ dɛ́ni wè. Mi yē Yewen.
19 «Mi fànʔa kele gèle, yeli 'yɛli bè ke cò. Muɔ yajuuro nī dè, dàa ti wè felinugo gèʔ, fǎga ti yaʔa ti- sii tìi nɛ̄ʔ. Muɔ siʔi nī gè, yaliifeliye siin nyáà yi wè nuyɔ yèʔ, fǎga ti pínɛ bè tánʔaʔ. Ma fǎga burugo káà le gàa pe 'tìin nɛ́ jèsii feliye siin ní yèʔo.
20 «A nàguɔ wáà 'sùkulocuɔ cɛ́n cɛliwɛ wè, nɛ̀ ki yaʔa kire sùkulocuɔ wè, pe yé wi tìɛ nɛ̀ kúɔ nàguɔ wáà nɛ̄ wè, a kire nàguɔ wiì fìɛ wi fùgu nɛ̀ suɔ wèʔ nɛ́ míɛni wi kàfɔli wiì cé fìɛ wi yaʔa wi sùkulomɔ nɛ̄ bèʔ, ŋàa wi 'wi cɛ́n cɛliwɛ wè wi 'yɛli bè wali nyuɔ káà sàri. Bɛ̀ piyè cé fìɛ cɛliwɛ yaʔa wè sùkulomɔ nɛ̄ bèʔ, kire nɛ̄ piyě pe kpúuʔ. 21 Kire nàguɔ wi bé pɛn nɛ́ sìnbapɔli ní Kpàlidiʔɛ Kpátaʔa wìile mɛ́ lè, bè pa wi kɛn Yewe mɛ́ wè, kolimɔ kakuɔrɔ. 22 Kacuɔnriwɔ wi bé kàsulugosuɔ baara kúɔ dè wi mɛ́ Yewe yiʔɛ mɛ́ gè nɛ́ kolimɔ kakuɔrɔ sìnbapɔli ní wè, bà wi kapiʔile kàsulugo ki bé suɔ kapiile náà wi 'kpíʔile lè.
23 «A yeli kɛ́nì jíin kùlo nī lè, a yeli 'tiire cɔ́ri dàa ti béri sɛngi dè, a ti kɛ́ni sɛngi dè, yeli 'yɛli bè ti tɔ́ri majo dàa ti wè cìilide dèʔ Yewe yiʔɛ mɛ́ gèʔ yiʔɛlɛ taanri sunʔɔmɔ nī bè; yeli sì yɛli bè tàa káa ti nīʔ. 24 Yiʔɛlɛ sicɛriwoli nɛ̄ lè, yeli 'yɛli bè ti yasɛnrɛ ti mìɛni kɛn Yewe mɛ́, ti bé kò wàlidɛngɛrɛ wi gbùʔɔrilɔ wuʔu nɛ̄ gè. 25 Yiʔɛlɛ kogunɔwoli nɛ̄ lè, yeli bé gbɛ̀ ti yasɛnrɛ káa dè. Bà ki bé kpíʔile dí yeli tiire yasɛnrɛ ti de niʔɛgi yeli mɛ́. Mi yē Yewe yeli Kulocɛliɛ wè.
26 «Yeli sǐ ga tíi kaara káaʔ dàa nī sìsiɛn ki yē gèʔ. Siɛn sì yɛli bè nyaa yeli sunʔɔmɔ nī ŋàa wi dìɛlɛ baara kúu dèʔ kire ga laa ŋàa wi dàrimiʔɛ cáanri gèʔp. 27 Yeli fǎga de yeli gbandeliye síire kùnú dèʔ, ye fǎga de báʔajuɔ lìʔɛgɛlɛ kùnú gèleʔ. 28 Yeli sì yɛli bè jérigele kpúɔn yeli céri nɛ̄ dè kùugo kɛnmɛ nɛ̄ʔ. Yeli sì yɛli bè yeli céri súu dè nɛ́ yakaa níʔq. Mi yē Yewe.
29 «Muɔ sì yɛli bè muɔ póri kpíʔile wè nàjaacuɔ bè wi faʔaʔ, kire ga buu kùlo ni fǎga nyì nàjaara nɛ̄ dèʔ nɛ́ kapiigbuʔɔ nɛ̄ gèʔr.
30 «Yeli 'yɛli bè mi cɛndɛniyɛ cò yè cɛ̀ngɛ, béri tɔ́ri nɛ́ mi saawalidɛngɛgɛ ní gè. Mi yē Yewes.
31 «Ye fǎga kɛ́ wàa mɛ́ ŋàa wi luʔɔ ŋu kúbilo mɛ́ bèleʔ á kire bɛ̀ʔ ŋàa wī goriyiliwe wèʔ. Ye fǎga cɛ́li pe mɛ́ bè yìye núʔɔ nɛ́ pe níʔ. Mi yē Yewe yeli Kulocɛliɛ wèt.
32 «Muɔ bé yɛ̀ siɛnliɛwɛ nzìifiirefɔli yiʔɛ mɛ́ gè, ma kpuʔɔrɔ taʔa liɛwɛ nɛ̄ wè. Muɔ béri fìʔɛ́ muɔ Kulocɛliɛ nɛ̄ wè. Mi yē Yewe.
33 «A nabɔnwɔ wáà pɛ́nì tɛ́ni nɛ́ yeli ní kùlo nī lè, ye fǎga de wi wuʔɔʔu. 34 Kire nabɔnwɔ ŋáà wī tɛ́niwɛ yeli sunʔɔmɔ nī bè, yeli béri wi tɔ́ri kùlo ni wuu; muɔ bé wi woli yaʔa lè ni- muɔ dɛ́ni kɛnmɛ bíì nɛ̄ muɔ mìɛ dɛ́ni wè. Nɛ́ ki cɛ́n yeli tíimɛ kíni nɛ̀ puu nabɔnminɔ Ezipiti kùlo nī lè. Mi yē Yewe, yeli Kulocɛliɛ wè.
35 «Yeli sì yɛli bèri kolimɔ kpínʔiniʔ a yeli nɛ yɛrɛ tɔ́nminɔ dè nɛ ti pári dè, ti tɔnigɛnnɛ yo, ti lúbugogɛnnɛ yo, ti kpúʔɔgɛnnɛ yov. 36 Yɛrɛ tɔ́nminɔ culolo pe 'yɛli bè sìɛn bè sín, yeli culo timɔnyigele ke 'yɛli bè sìɛn bè sín, gbɔngbonyiɛyɛ yi 'yɛli bè sìɛn bè sín, yakuunyiʔɛnɛ ke 'yɛli bè sìɛn bè sín. Mi yē Yewe yeli Kulocɛliɛ; mi wī mi 'yeli yige Ezipiti kùlo nī lè.
37 «Yeli bé mi fànʔa kele ke mìɛni cò, nɛ́ mi kàyuʔujuuro ní dè, bèri ti kpínʔini. Mi yē Yewe.»