Yirile 22

1 A ń'nɛ̀ ki juu mɛ́ nɛ́ jo: «A wàa 'kàyuuwo cò pìlige nī gè a wi 'jíin wàa saʔa nī gè, a siɛn wi 'wi kpúɔn a wi 'kùu wè, ŋàa wi 'wi kpúɔn á wi 'kùu wè, ki siɛn wiì siɛnkpuu kapiile kpíʔileʔ. 2 A ki sí nyaa ki 'kpíʔile kpìɛnmɛ ní bè nɛ̀ tuu nɛ̀ kúɔ wè, ŋàa wi 'wi kpúɔn a wi 'kùu wè, ki siɛn wi nyɛ́nì siɛn kpúu wī; ki fuʔɔ ki bé tɔ́n wi mɛ́.

«Kàyuuwo wi 'yɛli wi- ki sàri gàa wi 'yùu gè. A yakaa wè wi mɛ́ wèʔ, pe bé wire tíimɛ pári sùkulomɔ nɛ̄, bè ki sàri gàa wi 'yùu gè. 3 A pe 'wi cò nɛ́ yajuʔu ní gè wiʔi wi kɔli nī gè, gàa wi 'yùu gè, a ki 'nyaa nùɔ wī yo, kire ga laa sèfɛnnɛ yo, kire ga laa sìnbuɔ yo, á kire bɛ̀ʔ síkpuɔ wè, wi bé ki feliye siin sàri gàa wi 'yùu.»

Lɔri cògɛnmɛ kàyuʔujuuro dè

4 «A wàa 'kɛ́ bàa yajuuro nàʔa nɛ́ kɛ́nì ti yaʔa a ti 'jíin wàa siʔi nī kire ga laa siɛn wi siʔi nī gè, a ti 'siɛn wi siʔi káa gè, wi 'yɛli bè ki fuʔɔ tɔ́n gè siɛn mɛ́ wè nɛ́ wi tíimɛ siʔi yaliicɛ̀nrɛ ní dè kire ga laa wi ɛrɛzɛn siʔi yasɛnjɛ̀nrɛ ní dè.

5 «A wàa nɛ sìnjuuro sórigi wi siʔi nī gè, a kàsun ki 'cò nɛ̀ sɛ́nì fali ŋìi wi siʔi nī gè nɛ̀ wi yaliire sórigo dè dàa ti 'tíin tire nɛ̄ dè, a kire ga laa dàa pe 'líɛ nɛ̀ ti gbuʔulo dè, á kire bɛ̀ʔ siʔi ki mìɛni gè, a ki 'nyaa mmɛ gè, ŋàa wi 'kàsun le gè, wi 'yɛli bè ki fuʔɔ tɔ́n gè gàa ki 'súʔu gè.

6 «A wàa kɛ́nì wali kɛn wi cɛ́nvɔli mɛ́ nɛ́ jo wi wi- tɛ́ngɛ wè, á kire ga laa kire siɛn wi kɔliyɛgɛ gè, a ki pɛ́nì nyaa a pe 'ki yùu baa wi saʔa nī gè, a pe 'kàyuuwo cò wè, kàyuuwo wi 'yɛli bè ki feliye siin sàri. 7 A ki sí nyaa kàyuuwo wiì taa nɛ̀ cò wèʔ, ki 'yɛli saʔafɔli wi- kɛ́ Kulocɛliɛ yiʔɛ mɛ́ gè, wi sa kàli wí jo wire tíimɛ wire kɔli sì taʔa wire cɛ́nvɔli wi yɛgɛ nɛ̄ gèʔ nɛ̀ ki líɛʔ.

8 «A siɛnnɛ siin nɛ túngu yakaa nɛ̄ nɛ́ jo peli wuʔu gī gè, a ki 'nyaa nùɔ, kire ga laa sèfɛnnɛ, á kire bɛ̀ʔ sìnbuɔ, kire ga laa síkpuɔ, dùʔɔ fɛ̀ni, yɛgɛ ó yɛgɛ gáà ki 'pùunni gè, a ki 'nyaa siɛnnɛ siin nɛ túngu ki wuʔu nɛ̄ gè, a ŋìi 'jo wire wuʔu gī, a wàa 'jo wire wuʔu gī, pe mìɛni siin pe 'yɛli pe- pɛn Kulocɛliɛ yiʔɛ mɛ́ gè. Kulocɛliɛ bé pa káfinɛgɛfɔli tìɛ wè. Kire siɛn wi bé ki feliye siin sàri ŋìi mɛ́ wè.

9 «A wàa 'sèfɛnnɛ kɛn wi cɛ́nvɔli mɛ́ wi- ni cò lè, kire ga laa nùɔ, kire ga laa sìnbuɔ, á kire bɛ̀ʔ síkpuɔ, a kire 'laa yajuʔu ó yajuʔu, a ki pɛ́nì nyaa a ki 'kùu, dùʔɔ ki 'kpɔli, á kire bɛ̀ʔ pe 'ki yùu, a siɛn sì ki nyaa wèʔ, 10 bè kàsii kúɔ wè, ŋàa wi yé yajuʔu cò gè, wi bé míʔɛ nɛ̄ gè bé jo wire kɔli kiì nɔ̀ yajuʔu nɛ̄ gèʔ. Yajuʔufɔli wè, wi 'yɛli wi- tɛ́ngɛ wi siɛnrɛ nɛ̄ dè; kiì nyaa fànʔa ŋìi wi- ki sàri wi mɛ́ʔ. 11 A ki sí nyaa pe 'yajuʔu yùu gè wi kpáa mɛ́ gè, wi bé ki sàri ki kàfɔli mɛ́ wè. 12 A ki 'nyaa nyàʔayɛgɛ káà ki 'yajuʔu cò gè, ki siɛn wi 'yɛli wi- pɛn nɛ́ yajuʔu ki káagoriro ní dè bè pa ki tìɛ kányiʔɛ gī nyàʔayɛgɛ nyɛ́nì ki cò. A kire 'kpíʔile gè, wiǐ yafiɛn sàri kire kàfɔli mɛ́ wèʔ.

13 «A wàa sɛ́nì yajuʔu náari wi tɛ́ninyɛni mɛ́ wè, a ki sɛ́nì nyaa yajuʔu ki 'kpɔli a kire ga laa nɛ kúu gè, a ki 'nyaa ki kàfɔli wi wè baa wèʔ, ŋàa wi 'ki náari gè, wi 'yɛli wi- ki sàri. 14 A ki sí nyaa ki kàfɔli wi 'puu baa wè, ŋàa wi 'ki náari gè wiǐ yafiɛn sàriʔ. A ki sí nyaa majo lɛ̀lɛ líì nī siɛn wi cé ki náari gè, wi yé yakaa sàri gè, kire wali wi bé yajuʔu fuʔɔ tɔ́n gè.»

Siɛnnɛ kakpiʔiligele kàyuʔujuuro dè

15 «A nàguɔ wáà sinboriwo fáanni ŋàa wiì fìɛ nàguɔ cɛ́nʔ, nɛ́ kɔnifɔli wè wi mɛ́ wèʔ, a wi 'sínɛ nɛ́ wi ní wè, wi 'yɛli bè cepɔrigɔ yɛrɛ kɔ̀n dè, bé wi líɛ wi- kò wi cuɔ. 16 A ki sí nyaa tuufɔli wi 'cíi péwu nɛ́ je wire sì je wi kɛn wèʔ, wi bé ki wali sàri wè ŋàa pe cî dàli nɛ̀ sàri wè, nàguɔ sìnjɛ́n sinborilo wuu wè.

17 «Yeli sì yɛli bè dìɛjuɔ yaʔa wè wi- kò sìi nɛ̄.

18 «A siɛn wáà sínɛ nɛ́ yajuʔu ní bɛ̀ cɛliwɛ tíɛlɛ wè, ki 'yɛli pe- wi kpúu wī.

19 «A siɛn wáà nɛ kakuɔrɔ yajuuro kpúu kulocɛliɛ wáà wiiyɛ mɛ́ bè yakaa sun nɛ̀ yiri nigbe nī wè, ki 'yɛli pe- kire siɛn cúʔɔ wè bè wi yige baa péwu.

20 «Muɔ sì yɛli bè kapiile kpíʔile nabɔnwɔ nɛ̄ wèʔ, muɔ sì yɛli bèri fùrɔgɔ tari wi nɛ̄ʔ, nɛ́ ki cɛ́n yeli tíimɛ 'puu nabɔnminɔ kùlo nī lè. 21 Yeli sì yɛli bè fùrɔgɔ taʔa lakicuɔ nɛ̄ wèʔ nɛ́ círiwe ní wèʔ. 22 A yeli nɛ pe wàa wuʔɔ wè kɛnmɛ ó kɛnmɛ nɛ̄, a wi 'mi yeri wè mi- wi sáʔa wè, m'bé ki juu yeli mɛ́ kányiʔɛ nɛ̄ m'bé lúʔu wi mɛ́. 23 Bà mi fungo ki bé yɛ̀ kpuʔɔ yeli kúrugu, m'bé yeli kpúu nɛ́ kapiɛngbuɔn ŋɔnɔ ní lè. Yeli cɛlilɛ pe bé kò lakicɛlilɛ; yeli pìile pe bé kò círile míɛni.

24 «A muɔ 'fuʔɔ le mi gboli siɛn wáà nɛ̄, ŋàa wī baa nɛ́ muɔ ní nɛ ní fɔ̀ngɔfɔli wè, muɔ sì yɛli bè ki kpíʔile fuɔlebele tíɛlɛ bèleʔ; yeli sì yɛli bè tɔ̀ni taʔa wi fuʔɔ nɛ̄ gèʔ.

25 «A muɔ 'wàa burugbuʔɔ líɛ fuʔɔ sìndiʔɛ nī gè, muɔ 'yɛli bèri báan de ki kanʔa wi mɛ́ cɛngɛ ó cɛngɛ sɛ́ni cɛngɛnyɛni ni pa jíin lè, 26 nɛ́ ki cɛ́n kire yákuɔ gī wi mɛ́ bè wìi tɔ́n wiire nɛ̄ dè. Á kire bɛ̀ʔ gè, gáayɛgɛ ní wi bága wìi tɔ́n ? A ki pɛ́nì nyaa a wi 'yékpoli wáa mi kúrugu wè, m'bé lúʔu wi mɛ́, nɛ́ ki cɛ́n mi yē nyinidaaguugo Kulocɛliɛ.

27 «Muɔ sì yɛli bè siɛnpiire juu wáa Kulocɛliɛ nɛ̄ wèʔ. Muɔ sì yɛli míɛni bè muɔ siɛnnɛ pe kàfɔli wáà tiʔɛlɛʔ.

28 «Kiì yɛli muɔ de mɔgi bè muɔ siʔi yaliipelide kɛn dè mi mɛ́ʔ, nɛ́ muɔ ɛrɛzɛn luʔɔ ní gè gàa ki 'fúu wi fórigodiʔɛ nī gèʔ.

«Muɔ 'yɛli bè muɔ jaapeliwe láʔa wè bè kɛn m'mɛ́. 29 Bà muɔ bé ki kpíʔile míɛni nɛ́ muɔ nìɛyɛ ní yè, nɛ́ muɔ sìnbaara ní dè, nɛ́ muɔ síkaala ní bèle. Muɔ bé wi pìpeliwe yaʔa wè wi- kò cɛnyɛ kɔlisiin nɛ́ wi yàa ní wè; cɛnyɛ kataanriwuʔu nɛ̄ gè, muɔ bé wi láʔa bè kɛn mi Kulocɛliɛ mɛ́.

30 «Yeli bé puu siɛnnɛ bálì bīɛlɛ wàlidɛngɛlɛ mi mɛ́ bèle, kire nɛ̄ yeli sì yɛli bè yajuʔu káà kaara káaʔ dàa dī nyàʔayɛgɛ ki 'káa á dìi 'kò dèʔ. Ye- ti wáa pɔ̀nminɔ mɛ́.»