Kàyuʔujuugɛnmɛ wori dè
23
1 A Yewe ń'nɛ̀ ki juu nɛ́ jo: «Fǎga siɛn siɛnrɛ lúʔu bèri ti nyu de máriʔ, dàa ti wè kányiʔɛ gèʔ. Muɔ fǎga wúɔ nɛ́ siɛnpiiwe ní bé finɛ bè tànʔa kɛn wi mɛ́ʔ. 2 Fǎga taʔa siɛnniʔɛmɛ nɛ̄ bè a ki 'nyaa piyē nɛ caa bè kapiile kpíʔile wèʔ; kàyuʔujuudiʔɛ nī gè, fǎga wúɔ nɛ́ siɛnniʔɛmɛ ní bè bé finɛʔ a ki 'nyaa piyē nɛ caa bè tànʔa ŋáʔana gè bè suɔ wèʔ. 3 Fǎga puɔ fuunmɔfɔli nɛ̄ wèʔ bé tánʔa kɛn wi mɛ́ a ki 'nyaa wi 'finɛ wèʔ.4 «A muɔ 'muɔ leguu wi nùɔ nyaa wè, kire ga laa wi sèfɛnnɛ lè, nàa ni 'pùunni lè, ma ni kɔ́ri ma sa kɛn wi mɛ́. 5 A muɔ 'muɔ leguu wi sèfɛnnɛ nyaa lè a tugoro ti 'lúbugo ni nɛ̄ lè a ni 'tuu lè, fǎga wàli bè tóri kayɔbigɔ káà nɛ̄ bé ni yaʔaʔ. Ma wi sáʔa wi- wi sèfɛnnɛ yɛ̀gɛ lè bè yérige nɛ́ tugoro ní dè.
6 «Kàyuʔujuudiʔɛ nī gè, a fuunmɔfɔli wi 'yɛli nɛ́ gìi ní gè, muɔ fǎga cíi ki nɛ̄ wi mɛ́ʔ; kiì yɛli muɔ tànʔa suɔ gè wi mɛ́ʔ. 7 Fǎga wúɔ nɛ́ káfinɛvinɛnɛ ní bèle kaala láà nɛ̄ʔ nàa ni wè kányiʔɛ gèʔ; ye fǎga kàyuʔu juu siɛn nɛ̄ bè wi kpúu ŋàa wiì kaala kpíʔile lèʔ nɛ́ ŋàa wi yē siɛnsinwɛ wèʔ. Nɛ́ ki cɛ́n mi Kulocɛliɛ wè, mi wè nɛ tànʔa kanʔa siɛnpiiwe mɛ́ wèʔ ŋáà wi 'kaala náà kpíʔile lèʔ. 8 Fǎga ki yaʔa siɛn sa yakaa nùʔɔrɔ bè kɛn muɔ mɛ́ʔ, nɛ́ ki cɛ́n yanuʔɔzuɔrɔ tiī nɛ siɛn kpínʔini fúɔn, wi nɛ̌ de nyaʔaʔ; ti nɛ̂ siɛnsinwɛ nyuɔ tɔ́n gè kányiʔɛjuʔu nɛ̄ gèʔ.
9 «Fǎga wuʔɔgɔ taʔa nabɔnwɔ nɛ̄ wè ŋàa wi yē tɛ́niwɛ yeli sunʔɔmɔ nī bè, nɛ́ ki cɛ́n yeli tíimɛ yeli nyɛ́nì ki cɛ́n gìi wuʔɔgɔ ki kpínʔini nabɔnminɔ nɛ̄ bèle; yeli tíimɛ 'puu nabɔnminɔ nɛ̀ pínɛ Ezipiti kùlo nī lèa.»
Cɛnŋɔdaaya nɛ́ baara sìnguɔ yiʔɛlɛ kàyuʔujuuro dè
10 «Yiʔɛlɛ kɔlini sunʔɔmɔ nī bè, muɔ bé siʔi fáli gè, bè ki yaliire líɛ dè. 11 Nɛ̀ ki yaʔa kɔlisiinwoli nɛ̄ lè, muɔ bé ki yaʔa kágorigo, muɔ sǐ ki fúngɔrigɔ yàa gèʔ; ki bé puu baara sìnguɔ yiɛlɛ. Fuunmɔfɔlilɔ bálì bīɛlɛ muɔ siɛnnɛ sunʔɔmɔ nī bè, peli pe béri fúngɔrigɔ yàá gè; nyàʔayɛrɛ ti béri sɛnrɛ káa dè dàa fuunmɔfɔlilɔ peli bé yaʔa dèb. Muɔ 'yɛli bè ki kpíʔile míɛni nɛ́ muɔ ɛrɛzɛn siʔi ní gè, nɛ́ muɔ wolivi tiire siʔi ní gè.
12 «Muɔ bé baara cɛnyɛ kɔlini cégboli nī lè; kɔlisiinwuʔu nɛ̄ gè muɔ 'yɛli bè ŋɔ́ bè taa, kire ga buu muɔ nùɔ wè, nɛ́ muɔ sèfɛnnɛ ní lè, pe- míɛni ŋɔ́ daa, nɛ́ muɔ baakuɔcuɔ wi jaa wè, nɛ́ nabɔnminɔ ní bèle peli- míɛni gbɛ̀ ŋɔ́ daac.
13 «Yeli bé ki cò cɛ̀ngɛ bè kele gálì ke mìɛni kpíʔile gàli mi 'juu gèle. Yeli sì yɛli bè kulocɛliɛ wáà wiiyɛ míʔɛ yeriʔ ŋàa wi wè mi Yewe wèʔ. Kiì cɛ́nì yɛli pe- ga ki lúʔu yeli nyuɔyɔ nī yè wīʔ.»
Fundaanra tánʔagbuʔɔlɔ taanri gèle ke juudiʔɛlɛ wori dè
14 «Tɔliyɔ taanri yiɛlɛ nī lè, muɔ ŋáà wī mi wuu wè, muɔ bé tánʔagbuɔlɔ tánʔa lè bè mi gbùʔɔrɔ.
15 «Muɔ 'yɛli bèri Sìnvarifun Búru Fundaanra tánʔagbuɔlɔ kpínʔini lè. Cɛnyɛ kɔlisiin sunʔɔmɔ nī bè, muɔ béri sìnvarifun búru káa wè, majo bɛ̀ mi 'ki juu nɛ̀ gbɛ̀ngɛ yeli mɛ́ bèle, bè yɛli nɛ́ lɛ̀lɛ náà ní mi 'tìɛ lè Yaliire Puru yeged nī gè. Nɛ́ ki cɛ́n kire yege kire nī yeli cé yiri Ezipiti kùlo nī lèe.
«Siɛn sì yɛli bàga pɛn mi mɛ́ kiyɛ ní yè waayaʔ.
16 «Muɔ 'yɛli bè Yaliipelide Líɛ Lɛ̀lɛ Fundaanra tánʔagbuɔlɔ kpíʔile lèf; ki bé puu lɛ̀lɛ líì nī yeli 'yaliipelide líɛ dè. Ŋùʔɔ kúɔmɔ mɛ́ bè, a yiɛlɛ ni 'kpàri lè, muɔ bé Yaliire Líɛ Lɛ̀lɛ Fundaanra tánʔagbuɔlɔg kpíʔile lè, a muɔ kɛ́nì muɔ siʔi yaliire nyɔ́gɔ dè nɛ̀ kúɔ wè. 17 Tɔliyɔ taanri yiɛlɛ nī lè, yeli nàguɔlɔ pe mìɛni 'yɛli pe- pɛn mi yiʔɛ mɛ́ gè, mi ŋáà wī Kàfɔli Yewe wè.
18 «A muɔ kɛ́nì yajuʔu káà kpúu bè Yewe gbùʔɔrɔ wè, muɔ sì yɛli bè ki sìsiɛn pínɛ gè nɛ́ yakaa ní gàa ki 'nyaʔami nɛ́ sìnvari ní dèʔ. Nɛ́ míɛni a muɔ 'yajuʔu kpúu bè mi gbùʔɔrɔ wè, muɔ sì yɛli bè cɛngbuʔɔ kaara sùnmɔ páà tɛ́ngɛ pi- suɔnʔ.
19 «Muɔ bé muɔ siʔi yaliipelide líɛ dè bè pɛn nɛ́ ti ní Yewe saʔa mɛ́ gè, wire ŋáà wī muɔ Kulocɛliɛ wè.
«Muɔ sì yɛli bè síkapile ni yàa yírimɛ líɛ bè, bè ni suʔɔʔh.»
Yewe 'jo wire bé kò nɛ́ Isirayɛliyé ní bèle
20 «M'bé mi nyìʔɛnɛ tundunwɔ tórigo wè muɔ yiʔɛ mɛ́, muɔ ŋáà wī mi siɛnmɛ bè, wiri muɔ wéli koligo nɛ̄ gè, bè sa muɔ nyɔ́gɔ tiʔɛ nī gè gàa mi 'gbòbori muɔ mɛ́ gè. 21 Mari sɔ́migi mari lúru wi mɛ́ díɛʔ; ma fǎga cíi wi siɛnrɛ táà nɛ̄ʔ. Nɛ́ ki cɛ́n wiì je ga muɔ tuudiʔɛlɛ yaʔa gèle muɔ nɛ̄ʔ a muɔ wè nɛ lúru wi nɛ̄ wèʔ; mi míʔɛ kiī wi nɛ̄. 22 A muɔ sí nɛ wi siɛnrɛ lúru dè, níɛ ki kpínʔini dàa mi 'juu dè, m'bé puu muɔ leguulo pe leguu, bèri túngu nɛ́ bìli ní pe béri túngu nɛ́ muɔ ní wè. 23 Mi nyìʔɛnɛ tundunwɔ wi béri waa muɔ yiʔɛ mɛ́ bé sa muɔ nyɔ́gɔ Amɔriyé kùlo nī lè, nɛ́ Etiyé, nɛ́ Pereziyé, nɛ́ Kanaayé, nɛ́ Eviyé, nɛ́ Jebusiyé kùlo nī lè; m'bé pe mìɛni cúʔɔ.
24 «Muɔ sì yɛli bàga káguro cáan pe kulocɛlɛlɛ yiʔɛ mɛ́ gèʔ. Muɔ míɛni sì yɛli bèri pe sunguʔ; muɔ sì yɛli bàga kàa kpíʔileʔ gàa kùlo siɛnnɛ piyē nɛ kpínʔini gè. Muɔ cɛ́nì yɛli wī bè pe yasunro cúʔɔ dè, muɔ 'yɛli bè pe kàdɛnicɔriyɔ kpúɔn yè bè muʔɔrɔ nyàa pe 'kpíʔile pe sundiɛyɛ nī yè. 25 Muɔ 'yɛli bèri Yewe muɔ Kulocɛliɛ wire nigbe gbùʔɔrɔ́. A muɔ nɛ kire kpínʔini gè, m'bé diba taʔa wè muɔ yaliire nɛ̄ dè nɛ́ muɔ luʔɔ ní gè. M'bé yaama líili bè muɔ nɛ̄. 26 Cɛliwɛ sǐ ga tíi nyaa muɔ kùlo nī lèʔ ŋàa wi 'liyɛ cúʔɔ yèʔ, kire ga laa ŋàa wī sìndigicuɔ wèʔ. M'béri muɔ sìi niʔɛgi wè.
27 «M'bé fíɛgbuɔrɔ cáan siɛnnɛ nɛ̄ bèle muɔ yiʔɛ mɛ́ gè, bè siɛnnɛ pe mìɛni funyɔ nyaʔami yè, bàli tiʔɛ nī muɔ bé jíin wè; m'bé ki kpíʔile muɔ leguulo pe mìɛni béri fé muɔ yiʔɛ mɛ́. 28 M'bé dàsowuɔyɔ tórigo muɔ yiʔɛ mɛ́ yi béri siɛnnɛ cìrá bèle, Eviyé bèle, Kanaayé bèle, nɛ́ Etiyé ní bèle. 29 Miì je pe cìra yiɛlɛ nigbe sunʔɔmɔ nīʔ dí kùlo ni- sí kò waalaʔ, nyàʔayɛrɛ ti- sí niʔɛ kùlo nī lèʔ. 30 M'béri pe cìrá cɛ̀cɛ wī, fúɔ bè taa muɔ pa sii bè niʔɛ bè kùlo nyì lè bè ni taa kɔrigɔ.
31 «M'bé kùlo ni láʔagɛlɛ tìɛ gèle. Ke bé séli Nyàʔanivɛgɛ Tiire kuʔɔjii nɛ̄ wè fúɔ bè sa nɔ̀ Filisitiyé kùlo kuʔɔjiii láʔala nɛ̄ lè, bè ki líɛ Sinayii waama kùlo tiʔɛ nī gè fúɔ bè sa nɔ̀ Efirati cáʔa nɛ̄ gè. Nɛ́ ki cɛ́n m'bé kùlo ni siɛnnɛ pe mìɛni le muɔ kiyɛ nī yè; muɔ bé pe cìra yige muɔ yiʔɛ mɛ́ gè.