8
1 A Yewe ń'nɛ̀ ki juu Misa mɛ́ nɛ́ jo: «-Ki juu Arawɔn mɛ́ wè, kàgbiile náà nī wi kɔli nī gè, wi- ni sìɛn lakoligboliyo nɛ̄ yè, nɛ́ lakoliyo nyáà siɛnnɛ pe 'túgu yè, nɛ́ pìndiʔɛlɛ ní gèle, wi- kpìile yige bèle pe- jíin Ezipiti kùlo nī lè.»2 A Arawɔn 'wi kɔli sáʔa gè Ezipiti kùlo luɔyɔ nɛ̄ yè, a kpìile pe 'yiri nɛ̀ Ezipiti kùlo le lè a ni 'nyì. 3 A nìnyuʔɔnigɔfɔlilɔ peli míɛni kpìile pálì yige nɛ́ pe dìʔɛ ní gè, nɛ̀ nyɔ́gɔ Ezipiti kùlo nī lè.
4 A Farawɔn 'Misa nɛ́ Arawɔn yeri, nɛ́ jo: «Ye- Yewe náari wè, kire ga buu wi- kpìile láʔa bèle mi nɛ́ mi siɛnnɛ nɛ̄ bèle. Bà m'bé Isirayɛli siɛnnɛ yaʔa bèle pe- kɛ́ bè sa kakuɔrɔ yajuuro kpúu dè Yewe mɛ́ wè.»
5 A Misa 'ki juu Farawɔn mɛ́ nɛ́ jo: «Muɔ nɛ̄ kpuʔɔrɔ ti yē bè lɛ̀lɛ láà tìɛ nàa nī m'bé náari muɔ mɛ́, nɛ́ muɔ siɛnkpolilo ní bèle, nɛ́ muɔ kùlo siɛnnɛ ní bèle, kire ga buu Yewe- kpìile kpúu bèle bè yige yeli saaya nī yè, sɛnrɛ ti sí kò baa Niili cáʔa nī gè.»
6 A Farawɔn sí jo: «Mbànʔa.»
A Misa 'jo: «Ki bé kpíʔile bè yɛli nɛ́ dàa ní muɔ 'juu dè, kire ga buu muɔ ki cɛ́n yakaa wè bile nɛ̀ wúɔ nɛ̀ yɛli nɛ́ Yewe weli Kulocɛliɛ ní wèʔ. 7 Kpìile pe bé líili muɔ nɛ̄, nɛ́ muɔ saaya ní yè, nɛ́ muɔ siɛnkpolilo ní bèle nɛ́ kùlo siɛnnɛ ní bèle. Sɛnrɛ ti sí kò baa Niili cáʔa nī gè.»
8 A Misa nɛ́ Arawɔn pe 'núgo Farawɔn táanni, a Misa sɛ́nì Yewe náari nɛ́ jo wi- kpìile yige bèle bàli wi yé nyɔ́gɔ Farawɔn kúrugu wè bè wi wuʔɔ wè.
9 A Yewe 'ki kpíʔile gàa Misa yé náari gè. A kpìile pe 'kùu saaya nī yè, nɛ́ kpáaya nī yè nɛ́ siiye nī yè.
10 A pe 'ti koli nɛ̀ ti gbuʔulo gbuʔulo tìi nɛ̄. A kùlo ni 'kò nɛ númɔ. 11 Bà Farawɔn 'ki nyaa kele ke 'puu nɛ nyuʔɔ nɛ waa gèle, a wi ń'nɛ̀ wi nàzɔn gbɛ̀n wè; wiì lúʔu pe mɛ́ʔ, nɛ̀ yɛli nɛ́ gàa ní Yewe cé juu gè.
Wuʔɔgbuʔɔ taanriwuʔu gè: nàfiɛn wè
12 A Yewe 'ki juu Misa mɛ́ nɛ́ jo: «-Ki juu Arawɔn mɛ́ wè, wi- kàgbiile yɛ̀gɛ lè wi dàala kpúɔn lè. Cúbugo ki bé yɛ̀ bè kò nàfiɛna Ezipiti kùlo nī lè.»
13 A pe 'ki kpíʔile bɛ̀. A Arawɔn wi 'kɔli yɛ̀gɛ gè nɛ́ kàgbiile ní lè nɛ̀ dàala kpúɔn lè, a cúbugo ki 'yɛ̀ nɛ̀ kò nàfiɛn nɛ̀ tɔ́n siɛnnɛ nɛ́ yajuuro nɛ̄ dè. A cúbugo ki mìɛni 'yiʔɛ nɛ̀ kò nàfiɛn Ezipiti kùlo nī lè.
14 A nìnyuʔɔnigɔfɔlilɔ pe 'ki kpíʔile nɛ̀ wéli nɛ́ pe dìʔɛ ní gè, pìye jáa nɛ̀ nàfiɛn wáà yigeʔ. A nàfiɛn wi 'tɛ́ni siɛnnɛ nɛ̄ bèle nɛ́ yajuuro ní dè, nɛ̀ ti mìɛni tɔ́n.
15 A nìnyuʔɔnigɔfɔlilɔ pe 'ki juu Farawɔn mɛ́ nɛ́ jo: «ʔá! Kulocɛliɛ kɔli kakpiʔilile nī náà lè díɛʔ !» Kire nɛ́ ki mìɛni a Farawɔn wi 'wi nàzɔn gbɛ̀n wè, wiì lúʔu Misa nɛ́ Arawɔn mɛ́ʔ, nɛ̀ yɛli nɛ́ gàa ní Yewe cé juu gè.
Wuʔɔgbuʔɔ sicɛriwuʔu gè: gbùu wè
16 A Yewe ń'nɛ̀ juu Misa ní nɛ́ jo: «Yɛ̀ sínbiniwuuro nī dè, mari waa Farawɔn yiʔɛ mɛ́ gè lɛ̀lɛ líì nī wi bé kɛ́ luʔɔ mɛ́ gè. Ma ki juu wi mɛ́ ma jo: ‹Ti n'dɛ dàa Yewe 'juu dè: -Mi siɛnnɛ yaʔa bèle pe- kɛ́ bé sa mi gbùʔɔrɔ. 17 A muɔ sí cíi, muɔ sì pe yaʔa a pe 'kɛ́ wèʔ, bà m'bé gbùu yige wè muɔ kúrugu, nɛ́ muɔ siɛnkpolilo ní bèle, nɛ́ kùlo ni siɛnnɛ ní bèle. Wi bé jíin muɔ saaya nī yè. Bà Ezipiti siɛnnɛ pe mìɛni saaya yi bé nyì gbùu nɛ̄ wè, wi bé dàala ni mìɛni tɔ́n. 18 Kire cɛngɛ gè m'bé wàlimɛ kpíʔile Gozɛnib tɛ́nimɛ nī bè, baa mi siɛnnɛ pe yē bèle. Kire tiʔɛ nī gè gbùu wáà sǐ ga tíi nyaa baaʔ, kire ga buu muɔ- ki cɛ́n mi Yewe wè, mi yē kùlo náà nī lè. 19 M'bé wàlimɛ nyɔ́gɔ mi siɛnnɛ nɛ́ muɔ siɛnnɛ sunʔɔmɔ nī bè. Mbànʔa sí gī ki fìɛ ŋáà wi bé séli.› »
20 A Yewe 'ki kpíʔile gàa wi yé juu gè. A gbùuniʔɛwɛ pɛ́nì jíin Farawɔn saʔa nī gè nɛ́ wi siɛnkpolilo saaya nī yè, nɛ̀ Ezipiti kùlo ni mìɛni cúʔɔ.
21 A Farawɔn 'Misa nɛ́ Arawɔn yeri nɛ́ jo: «Yeri waa ye sa yajuuro kpúu dè, ye- yeli Kulocɛliɛ gbùʔɔrɔ wè náʔa kùlo nī lè.»
22 A Misa sí wi yɛ: «Kiǐ gbɛ̀ kpíʔile mmɛ gèʔ. Nɛ́ ki cɛ́n weli sǐ gbɛ̀ kakuɔrɔ yajuuro kpúu dè Yewe weli Kulocɛliɛ mɛ́ wèʔ, nɛ́ ki cɛ́n Ezipiti siɛnnɛ pe kanabiɛnnɛ nī. A weli sɛ́ni Yewe gbùʔɔrɔ́ wè, níɛ yajuuro kpúu dè Ezipiti siɛnnɛ pe nyaamɛ nɛ̄ bè, gàa ki 'pe biɛn gè, pe bé weli wáa bè kpúu nɛ́ kàdari ní. 23 Weli 'yɛli bè cɛnyɛ taanri tánʔana tánʔa waama kùlo nī lè, bè kakuɔrɔ yajuuro kpúu dè Yewe weli Kulocɛliɛ mɛ́ wè, bɛ̀ wi 'ki juu weli mɛ́ gè.»
24 A Farawɔn sí jo: «M'bé yeli yaʔa yeli kɛ́ yeli bè sa kakuɔrɔ yajuuro kpúu dè Yewe yeli Kulocɛliɛ mɛ́ wè, waama kùlo nī lè. Gìi sí gī baa gè, ye fǎga kɛ́ liilige díɛʔ ! Ye míɛni ye- náari mi mɛ́.»
25 A Misa sí wi yɛ: «A mi 'yiri náʔa muɔ tiʔɛ nī gè, m'bé sa Yewe náari wè. Mbànʔa gè, gbùu wi bé líili muɔ nɛ̄, muɔ Farawɔn wè nɛ́ muɔ siɛnkpolilo ní bèle nɛ́ kùlo ni siɛnnɛ ní bèle. Gàa sí ki 'kpúʔɔ gè, Farawɔn, muɔ fǎga ní weli fáanni bé cíi bé jo Isirayɛli siɛnnɛ pe fǎga kɛ́ bè sa kakuɔrɔ yajuuro kpúu dè Yewe mɛ́ wèʔ.»
26 A Misa 'yiri Farawɔn tiʔɛ nī gè nɛ̀ sɛ́nì Yewe náari wè. 27 A Yewe 'Misa náarigɛ lúʔu gè, nɛ̀ ki kpíʔile gàa Misa yé náari gè. A wi 'gbùu láʔa wè Farawɔn nɛ̄ wè nɛ́ wi siɛnkpolilo ní bèle, nɛ́ kùlo ni siɛnnɛ ní bèle. Gbùupile nigbe sì cɛ́nì kòʔ kùlo nī lè. 28 Kire nɛ́ ki mìɛni, a Farawɔn 'wi nàzɔn gbɛ̀n wè. Wiì ń'nɛ̀ Isirayɛli siɛnnɛ yaʔa bèle a pe 'kɛ́ʔ.