Yakuba 'diba kpíʔile//Yusufu jaala mɛ́ bèle
48
1 Kele gálì kàduʔumɛ gè, a pe 'ki juu Yusufu mɛ́ nɛ́ jo: «Muɔ tuu wiī yaawa.» A Yusufu 'wi jaala siin kɔ́ri bèle, Manase nɛ́ Ɛfirayimi ní wè, a pe 'kɛ́ Gozɛni tɛ́nimɛ mɛ́ bè. 2 A pe 'ki juu Yakuba mɛ́ wè nɛ́ jo: «Muɔ jaa Yusufu wi nyɛ́nì pɛn bè ba muɔ wéli.»A Isirayɛli 'wi ŋɔri ti mìɛni pínɛ nɛ̀ yɛ̀ wi yasinɛgɛ nɛ̄ gè, nɛ̀ tɛ́ni.
3 Á Yakuba sí Yusufu síɛri wè nɛ́ wi yɛ: «Ŋɔri Ti Mìɛni Kulocɛliɛ wi 'wìi tìɛ mi nɛ̄ Luzi tiʔɛ nī gè, Kanaa kùlo mɛ́ lè, nɛ́ diba taʔa wè mi nɛ̄a 4 nɛ́ mi yɛ: ‹Ki n'gɛ, m'bé pìsiʔi tɛ́ni gè muɔ nɛ̄, bè muɔ kpíʔile siɛnmɛfɔli, bè ki kpíʔile muɔ kò siɛnfeliniʔɛyɛfɔli. M'bé kùlo náà kɛn lè muɔ kàduʔumɛ siimɛ mɛ́ bè, ni bé kò yeli woli lɛ̀lɛ ó lɛ̀lɛ nī.›
5 «Píra ŋáà nī wè, muɔ jaala siin bálì pe 'sii Ezipiti kùlo nī lè sɛ́ni mi 'pɛn wè, m'bé peli líɛ pe‑ kò mi wuulo, Manase nɛ́ Ɛfirayimi ní wè, bɛ̀ Wurubɛni nɛ́ Simɛyɔ tíɛlɛ wèb. 6 A bìli kɛ́nì sii bàli pe kàduʔumɛ gè, peli pe bé kò muɔ wuulo. Manase nɛ́ Ɛfirayimi kɔrigɔ kire nī peli míɛni bé pe kɔrigɔ liʔɛlɛ taa gèle.
7 «Nɛ́ ki cɛ́n bà mi yé kɔ́n Mɛsopotamii kùlo mɛ́ lè, a Arasɛli 'kùu koligo nɛ̄ gè, Kanaa kùlo nī lè, a ki 'mi fungo cúʔɔ gè mi nī. Kire yé kpíʔile nɛ̀ ki yaʔa miì cé fìɛ nɔ̀ Efirata kàʔa nɛ̄ gèʔ. A mi 'wi tɔ́n Efirata koligo nɛ̄ gè.» Kire kàʔa ki míʔɛ kire pe 'ye Betilɛmi wè pàngɛ gè.
8 Bà Isirayɛli 'Yusufu jaala nyaa bèle, a wi 'wi yúgo nɛ́ jo: «Báli bīɛlɛ bàli bèle ?»
9 A Yusufu wi sí siɛnnugoro kɛn dè wi tuu mɛ́ wè nɛ́ wi yɛ: «Mi jaala bīɛlɛ, bàli Kulocɛliɛ wi 'kɛn mi mɛ́ Ezipiti kùlo nī lè.»
A Isirayɛli sí jo: «‑Pe sìʔɛrɛ náʔa mi mɛ́, mi nɛ muɔ fiɛn wī, kire ga buu mi‑ diba kpíʔile wè pe mɛ́.»
10 Bɛ̀ liɛrɛ ti yé Isirayɛli nyapigele fùrɔ gèle nɛ̀ kúɔ wè, wiì cé ń'nɛ̀ puu nɛ nyaʔa cɛ̀ngɛʔ. A Yusufu wi 'wi jaala sìʔɛrɛ bèle nɛ̀ kpɔni wi nɛ̄, a pe tuuliʔɛ ki 'pe wáa nɛ̀ mígi, nɛ̀ pe suɔn suɔn gàangbuʔulo nɛ̄ gèle, 11 nɛ́ ki juu Yusufu mɛ́ wè nɛ́ jo: «Mi sì yé ki cɛ́n m'bága muɔ yiʔɛ nyaa gèʔ, á Kulocɛliɛ kɛ́nì ki yaʔa a mi 'muɔ pìile nyaa.»
12 A Yusufu wi 'pìile siin láʔa bèle wi tuu kágunyɔ nɛ̄ yèc, nɛ́ tuu nɛ̀ yiʔɛ cúbulo gè dàala nɛ̄ lè. 13 A Yusufu 'pìile siin cò bèle, nɛ́ Ɛfirayimi yérige wè wi kàliige mɛ́ gè, kire ki 'puu Isirayɛli kàmɛgɛ mɛ́ gè. Nɛ́ Manase líɛ wè nɛ̀ yérige wi kàmɛgɛ mɛ́ gè, kire ki 'puu Isirayɛli kàliige mɛ́ gè. A wi 'pe sìʔɛrɛ nɛ̀ kpɔni pe tuuliʔɛ nɛ̄ gè. 14 A Isirayɛli sí kiyɛ ŋáana yè nɛ̀ taʔa pe nɛ̄. A wi 'kàliige taʔa gè Ɛfirayimi nyùgo nɛ̄ gè, wire ŋáà wi 'puu cɔnifɔli wè, nɛ́ kàmɛgɛ taʔa gè Manase nyùgo nɛ̄ gè, wire ŋáà wi 'puu luɔfɔli wè.
15 A wi 'diba kpíʔile wè Yusufu mɛ́ nɛ́ jo:
«Kulocɛliɛ wi‑ diba taʔa wè
nàgabigele gálì nɛ̄ gèle,
Kulocɛliɛ ŋáà yiʔɛ mɛ́
mi tuuliɛyɛ yi 'tánʔa
nɛ̀ tóri yè,
Birayima nɛ́ Siaga ní wè.
Kire Kulocɛliɛ ŋáà wi 'puu
mi nàʔavɔli wè mi sìi
cɛnyɛ yi mìɛni nī yè,
16 nɛ́ Kulocɛliɛ tundunwɔ
ŋáà wi 'mi suɔ
kapiʔile mɛ́ gèle.
Wi‑ diba taʔa wè nàgabigele gálì nɛ̄ gèle,
kire ga buu siɛnnɛ
peri sɔ̀ngí de taʔa
nɛ́ mi míʔɛ ní gè,
nɛ́ mi tuuliʔɛ Birayima
wi míʔɛ ní gè,
nɛ́ mi tuu Siaga ní wè,
peli kɛnmɛ nɛ̄.
Pe‑ sii pe niʔɛ kùlo
ni mìɛni nī !»
17 Bà Yusufu 'ki nyaa wire tuu wi yé kàliige taʔa gè Ɛfirayimi nyùgo nɛ̄ gè, a ki 'wi fungo cúʔɔ gè. A wi 'wi tuu kɔli cò gè bè ki taʔa Manase nyùgo nɛ̄ gè sɛ́ni ki 'puu Ɛfirayimi nyùgo nɛ̄ gè. 18 A Yusufu 'ki juu wi tuu mɛ́ wè nɛ́ jo: «Aba yo, bà bɛ̀ʔ díɛʔ ! Nɛ́ ki cɛ́n ŋàa wī muɔ kàliige mɛ́ gè, wire wī luɔfɔli wè. Ma muɔ kàliige taʔa gè wire nɛ̄.»
19 A wi tuu wi 'cíi nɛ́ jo: «Mi nyɛ́nì ki cɛ́n, nɛ jaa. Mi 'ki cɛ́n wire míɛni bé kò siɛnfelige káà, bè míʔɛ taa. Nɛ̀ ki yaʔa wi cɔni wi bé kpúʔɔ bè tóri wi nɛ̄, wi cɔni pìile pe bé ba niʔɛ bè kò kùlogolo nìʔɛgɛlɛ.»
20 Kire cɛngɛ gè, a Yakuba 'diba kpíʔile wè pe mɛ́ nɛ́ jo: «Yeli ye mìɛni nigbe nigbe míʔɛ nɛ̄ gè, Isirayɛli siɛnnɛ pe béri diba kpínʔini wè pìye mɛ́ bé jo: Kulocɛliɛ wi‑ diba taʔa wè muɔ nɛ̄ majo bɛ̀ wi 'wi taʔa Ɛfirayimi nɛ̄ wè, nɛ́ Manase ní wè !» Bà ki 'kpíʔile a wi 'Ɛfirayimi kínige wè Manase yiʔɛ mɛ́.
21 A Isirayɛli sí ki juu Yusufu mɛ́ wè nɛ́ jo: «Ki 'kò cɛ̀ri m'bé kùu wī. Kulocɛliɛ wi bé puu nɛ́ muɔ ní. Wi bé yeli koli bè yeli tórigo baa yeli tobilo kùlo mɛ́ lè. 22 Mi wè, m'bé kàa fàri muɔ liɛlɛ nɛ̄ lè bè tóri muɔ lɔbilɔ wuʔu nɛ̄ gè, Sikɛmi tɛ́nimɛ báà mi 'suɔ nɛ́ mi tíimɛ kɔli ní gè Amɔri siɛnnɛ mɛ́ bèle nɛ́ mi kapiɛngbuɔn ŋɔsii ní wè nɛ́ mi sandali ní gè, m'bé kire tiʔɛ kɛn gè muɔ mɛ́.»