Tamari nɛ́ Zuda siɛnrɛ dī dàa dè
38
1 A ki pɛ́nì nyaa kire lɛ̀lɛ nī lè, a Zuda 'wàli nɛ̀ láʔa wi siinyɛninɛ nɛ̄ bèle, nɛ̀ sɛ́nì kò nàguɔ wáà ní ŋàa pe 'puu nɛ yeri Yira wè, Yira ŋáà wi yé kɔ́n Adulami kàʔa mɛ́ gè. 2 Nàguɔ wáà 'puu baa kire kàʔa nī gè, ŋàa pe 'puu nɛ ye Suwa wè; Kanaa wuu wi 'puu. A Zuda pɛ́nì wi póri nyaa wè, a wi 'wi líɛ cɛliwɛ, nɛ̀ wi nyɔ́gɔ saʔa nī. 3 A wi 'laala taa nɛ̀ nàgabile sii, a Zuda 'pùɔ wi míʔɛ le gè nɛ wi yeri Eri. 4 A wi ń'nɛ̀ laala láà taa nɛ̀ nàgabile sii, a pùɔ wi yàa 'wi míʔɛ le gè nɛ wi ye Wona. 5 A wi ń'nɛ̀ laala láà taa cígini nɛ̀ nàgabile sii, a pùɔ wi yàa wi ń'nɛ̀ míʔɛ le gè nɛ wi ye Sela. Kire lɛ̀lɛ nī lè Zuda yé kɛ́ Kezivi kàʔa mɛ́ gè.6 Bà lɛ̀lɛ láà pɛ́nì kúɔ wè, a Zuda 'cɛliwɛ líɛ nɛ̀ kɛn wi jaapeliwe mɛ́ wè, ŋàa pe 'puu nɛ yeri Eri wè. Pe 'puu nɛ cɛliwɛ yeri wè Tamari. 7 Nɛ̀ ki yaʔa Eri wè, Zuda jaapeliwe wè, wi yé puu fungbɛngɛfɔli Yewe yiʔɛ mɛ́, a Yewe sí wi kpúu.
8 A Zuda sí ki juu Wona mɛ́ wè nɛ́ wi yɛ: «Ma lakicuɔ líɛ wè, muɔ luɔ cuɔ wè, majo bɛ̀ ki 'yɛli bè kpíʔile gè; ma pìile sii wi nɛ̄, kire ga buu muɔ luɔ wi míʔɛ ki fǎga tɔ́nʔa.»
9 Bɛ̀ Wona cé ki cɛ́n pìile bálì piyě ga puu wire wuulo bèleʔ, a wi gbɛ́nɛ jíin saʔa nī gè nɛ́ lakicuɔ ní wè, wi nɛ̂ wi nàguɔmɔ luʔɔ wo gè dàala nɛ̄ lè. Wiì puu nɛ caa bè pìile sii lakicuɔ nɛ̄ wèʔ pe‑ puu wire luɔ wuuloʔ. 10 Gàa wi 'puu nɛ kpínʔini gè ki yé pii Yewe yiʔɛ mɛ́, a Yewe sí wire míɛni kpúu.
11 A Zuda sí ki juu Tamari mɛ́ wè, lakicuɔ wè, nɛ́ jo: «Te waa ma sa kò lakicaʔa nɛ̄ gè muɔ tuu kpáa mɛ́ gè, fúɔ bè taa mi jaa Sela wi ba liɛ.» Nɛ̀ ki yaʔa Zuda 'puu nɛ ki sɔ̀ngí wi fungo nī gè, nɛ́ jo: «Kiì yɛli mi jaa Sela wi ba kùu cíginiʔ bɛ̀ wi lɔbilɔ tíɛlɛ bèle.» A Tamari wi 'kɛ́ nɛ̀ sɛ́nì kò wi tuu kpáa mɛ́ gè.
12 Bà ki yé kɛ́nì mɔgɔ gè, a Zuda cuɔ wè Suwa póri wè, a wi 'kùu. Bà Zuda 'kùugo kpíʔile gè nɛ́ kúɔ gè, a wi 'kɛ́ Timina kàʔa mɛ́ gè bé sa siɛnnɛ wéli bèle, bàli pe 'puu nɛ wi sìnbasiire nɛ́ síkasiire kùnú dè. Wi nàgori ŋáà pe 'puu nɛ ye Yira wè, Adulami kàʔa wuu wè, wire cé pínɛ nɛ́ wi ní. 13 A wàa pɛ́nì ki juu Tamari mɛ́ nɛ́ wi yɛ: «Muɔ labɔtuu wi n'ŋɛ, wi waa Timina kàʔa mɛ́ bè sa sìnbasiire nɛ́ síkasiire kùnu dè.» 14 A Tamari wi 'wi lakicaʔa bururo fòri dè nɛ̀ tɛ́ngɛ, nɛ́ fɛ̀ni tíʔɛ nɛ̀ wi yiʔɛ mígele gè, nɛ́ kɛ́ nɛ̀ sɛ́nì tɛ́ni Enayimi jíinmɛ mɛ́ bè, baa Timina kàʔa koligo nɛ̄ gè. Ki 'nyaa Tamari wi yé ki cɛ́n Sela wi 'liɛ nɛ̀ nɔ̀ cetɛngɛmɛ; piyè sí wire kɛn wi mɛ́ wire puu wi cuɔʔ.
15 A Zuda pɛ́nì wi nyaa, nɛ́ jo dùʔɔ nàjaacuɔ wī, nɛ́ ki cɛ́n wi yé wi yiʔɛ mígele gè nɛ́ fɛ̀ni ní wè. 16 A Zuda sí sìʔɛrɛ nɛ̀ kpɔni wi nɛ̄, bɛ̀ wi 'puu koligo táanni gè, nɛ́ jo: «‑Mi yaʔa mi kɛ́ nɛ́ muɔ ní muɔ saʔa mɛ́ gè.» Nɛ̀ ki yaʔa wiì cé ki cɛ́n wire jaa cuɔ wire wīʔ.
A cɛliwɛ wi sí wi yɛ: «Gáa muɔ bé kɛn m'mɛ́ a mi 'kò muɔ mɛ́ wè ?»
17 A wi 'jo: «M'bága mi síkaduʔu síkayɛlilɛ láà tórigo náʔa muɔ mɛ́.»
A cɛliwɛ wi 'jo: «Ao. Muɔ bé gbɛ̀ fìɛ yaʔa náʔa lé m'mɛ́, fúɔ bè taa muɔ ba ni kɛn ?»
18 A Zuda sí jo: «Fìɛ ŋíi felige muɔ nɛ caa mi‑ yaʔa náʔa ?»
A cɛliwɛ wi 'jo: «Sèmidinnɛ náà nɛ̄ muɔ míʔɛ ki yē sɛbɛgɛ gè, nɛ́ ni màʔana ní lè, nɛ́ kpògo gáà gī muɔ kɔli ní gè, ma tire yaʔa náʔa m'mɛ́.»
A Zuda wi 'ti kɛn wi mɛ́, nɛ́ jíin wi kúrugu, a cɛliwɛ wi 'laala taa.
19 A Tamari wi 'yɛ̀ nɛ̀ kɛ́, nɛ̀ sɛ́nì fɛ̀ni sáʔala wè ŋàa wi yé mígele yiʔɛ nɛ̄ gè, nɛ́ wi lakicaʔa burudo líɛ dè nɛ̀ le.
20 A Zuda wi kɛ́nì wi nàgori Yira tun wè, Adulami kàʔa wuu wè, wi sa síkayɛlilɛ kɛn lè wi‑ sí wire yɛrɛ suɔ dè cɛliwɛ mɛ́ wè, dàa wire cé yaʔa baa wi mɛ́ dè ti‑ puu fìɛ wè. Wiì sɛ́nì cɛliwɛ nyaa wè baaʔ. 21 A wi sí nàguɔlɔ yúgo bèle bàli pe 'puu baa ki tiʔɛ nī gè, nɛ́ jo: «Sé nàjaacuɔ ŋáà wi yē, ŋàa wi 'puu náʔa tɛ́niwɛ Enayimi koligo nɛ̄ gè?»
A pe sí wi yɛ: «Weli sì nàjaacuɔ cɛ́n náʔa tiʔɛ gáà nī gèʔ.»
22 A Yira 'koli nɛ̀ pɛn nɛ́ pɛ́nì ki juu Zuda mɛ́ wè nɛ́ jo: «Miì sɛ́nì wi nyaa baaʔ. Ki tiʔɛ nàguɔlɔ pe sí cɛ́ni jo dí peli sì nàjaacuɔ cɛ́n baa kire tiʔɛ nī gèʔ.»
23 A Zuda sí jo: «Wi‑ kò baa nɛ́ ti ní kìɛ ! A kire 'laa, siɛnnɛ pe bága de weli tíʔɛ. Gìi mi 'cɛ́n gè, mi nyɛ́nì muɔ tun síkayɛlilɛ ní lè, muɔ sì sɛ́nì cɛliwɛ nyaa wè baaʔ.»
24 Yeye taanri kàduʔumɛ gè, a pe pɛ́nì ki juu Zuda mɛ́ nɛ́ jo: «Tamari wè, muɔ jaa cuɔ wè, wi nyɛ́nì nàjaara kpíʔile; laala cɛ yē baa wi nɛ̄.»
A Zuda sí jo: «Paa wi cò pe yige kàʔa nī gè, pe‑ wi sórigo wiiwe !»
25 Bà pe 'cɛliwɛ cò wè nɛ̀ yige kpànʔanɛ gè, a wi 'siɛn tun wi‑ sa ki juu wire labɔtuu mɛ́ wè, «Yɛrɛ dáà dī mi mɛ́ dàa dè, kire siɛn wire woli nī laala lè.» A wi ń'nɛ̀ jo pe‑ wi yúgo: «Ŋáa wori dī yɛrɛ dáà dè: sèmidinnɛ náà nɛ̄ muɔ míʔɛ ki yē sɛbɛgɛ gè, nɛ́ màʔana ní lè, nɛ́ kpògo gáà ní gè ?»
26 A Zuda 'wi yɛrɛ wéli dè nɛ̀ cɛ́n, a wi 'jo: «Cɛliwɛ ŋáà wi 'sín nɛ̀ tóri mi tíimɛ nɛ̄. Nɛ́ ki cɛ́n mi sì yéri ki nɛ̄ nɛ̀ wi kɛn mi jaa Sela mɛ́ wèʔ, bɛ̀ mi yé ki juu kɛnmɛ bíì nɛ̄ bè.» A pe 'wi yaʔa, piyè ń'nɛ̀ kapiile kpíʔile wi nɛ̄ʔ. Zuda míɛni sì ń'nɛ̀ wi nyɔ́gɔ saʔa nīʔ.
27 Bà cɛliwɛ wi sii lɛ̀lɛ ni pɛ́nì nɔ̀ lè, a pe 'ki nyaa ŋɔ̀rɔ ti 'puu, pìile bèle. 28 A wi pɛ́nì je sii wè, a wàa 'wi kɔli yige gè, a cesiijowo wi 'wi kɔli cò gè, nɛ́ jèsiinyiɛwɛ puɔ wi kɔli nɛ̄ gè, nɛ́ jo: «Ŋàa wire wi 'yigi péliwe wè.» 29 Nɛ̀ sí ki yaʔa, gàa ki pɛ́nì kpíʔile gè, a pùɔ wi 'koli nɛ̀ kɔli nyɔ́gɔ gè, á siinwuu wire 'yiri. A cesiijowo wi 'jo: «Je muɔ sí koligo múgu gè wī !» A pe 'wi míʔɛ le gè Perezib (ki kɔri wire wī: koligo múgu). 30 Kire kàduʔumɛ a pìfinʔɛ gíì ki 'yiri wire ŋáà nɛ̄ pe yé jèsiinyiɛwɛ puɔ wè. A pe 'wi míʔɛ le gè nɛ́ jo Zera (ki kɔri wire wī: nyìɛwɛ, kire ga laa, ŋàa wi 'nyíʔɛnɛ wè).