Yesus da tingkuangon ni Pilatus
23
1 Libos gino sajoo nu ulun da nalom nu sidang pangadilan gino inimpilik, am ubito lo Yesus da tingkuangon ni Pilatus. 2 Gu deetu ilo nanyuu Joo, dagu kolo, “Ulun gitu pongo namalid da bangsa mai. Oyo amokot da ulun kaa amayal da pajak da Kayisal, sobop dagu Kono, Oyo gitu Klistus Laja.”3 Bagu i Pilatus nangkibala da Yesus, “Monong Kow ki gitu kunu laja nu ulun Yahudi?” Taam nu Yesus, “Okow kabaata no ininagu.” 4 Dagu ni Pilatus da katua-katua nu imam baya da sajoo nu ulun suang giatu, “Kaano aku nakatamu ka doono kuon po kasalaan nu Ulun gitu, intok angukum Joo.”
5 Tapi ilo bakin amakasa bonsoi poyo, dagu kolo, “Oyo amokot da sajoo nu ulun nu Yudia da ajalan No, intad da Galilia am suku da gitu.”
6 Nangkinoog da dagu gitu, i Pilatus nangkibala, “Ulun gitu, ulun nu Galilia ki?” 7 Am woktu no napaanai da Yesus gitu intad da alial nu kuasa ni Elodes, bansuko no ilo angubit Joo nangadop di Elodes, am woktu gino poyo Elodes sino da Yelusalem.
Yesus da tingkuangon ni Elodes
8 Paas Elodes nakeelong da Yesus, oyo nasonong bonsoi. Sobop leed noyo nakadingog da mudil nu Yesus am guang agilong Joo, da Oyo nangalaku da katulayan. 9 Asuang poyo kibaleen ni Elodes Joo, tapi kaano ka doono kuon po tinaam nu Yesus joo.
10 Katua-katua nu imam baya da gulu-gulu Taulat giatu poyo inaju da tingkuangon ni Elodes, am nanyuu bonsoi da kasalaan aagat di Yesus. 11 Bagu Elodes baya da palajulit-palajulit no nangalalagai baya da naguyai Joo, am pakayo lo-Yo da pakayan juba nu laja, bagu Elodes namansuk nangubit Joo napaduli di Pilatus. 12 Am intad da odow gili bagu, Elodes baya di Pilatus nagonsoi, sobob ilo duo gitu li nabamusu.
Yesus pinaduli poyo da tingkuangon ni Pilatus
13 Bagu i Pilatus nangalulud da katua-katua nu imam baya da pamimpin-pamimpin nu ulun Yahudi am ulun suang, 14 Dagu kono dilo, “Akau pongo nangubit da Ulun gitu dakon, am minagu Oyo gitu amalid da lakyat. Deeno gitu, da tingkuangon mi dakon pongo namalisa Joo, tapi kaano ka doono kuon po kalaatan natamuku, linaku No kono da sinuu mi Joo gitu. 15 Gino po duang ni Elodes. Sobop oyo poyo napaduli Joo nanduli damon. Ulun gitu, kaano Yo nangalaku ka doono kuon po kalaatan, apantos ukumon da ukuman matoi. 16 Sobop gino dakon maapo amubuk Joo bagu Yo bibasonku.” [ 17 Sobop paat da ilau nu Paska, i Pilatus alus amibas da doono ulun pongo sinipil.]
18 Tapi sajoo nu ulun linumulud deeno nampaluap, “Potoyon Yo, i Balabas yak bibason damon!” 19 i Balabas gino sinipil sobop kalaatan no agapu am agapatoi da ulun da nalom nu kuta.
20 i Pilatus igondo poyo ininagu dilo da dagu maayo, sobop oyo guang amibas da Yesus. 21 Tapi ilo totop ampaluap, dagu kolo, “Salipon yak Oyo! Salipon yak Oyo!” 22 Dagu ni Pilatus da katalu kali no dilo, “Atu sibonol no kalaatan linaku nu Ulun gitu? Kaano ka doono kuon po kasalaan natamuku Joo, da Oyo apantos ukumon matoi. Am dakon maapo amubuk Joo, bagu Yo bibasonku.”
23 Tapi ilo tulus-tulus ampaluap, anuntut da Yesus totop salipon, am sampoi luap nilo gitu tinuus ni Pilatus. 24 Bagu i Pilatus nangalap da kaputusan nu ukuman matoi da Yesus, kono da kaguang nu ulun-ulun suang giatu. 25 Am oyo amibas da ulun pinolok lo, oyo gino ulun pinoompos da nalom nu sipil gitu sobop agapu am agapatoi da ulun. Bagu Yesus tinaakan no dilo anuus da atu yak kaguang lakuin lo Joo.
Yesus ubiton salipon
26 Bagu Yesus inubit lo da intok anyalip Joo. Gu da putaangan nu daalan, ilo nakaamot da ulun beengalan di Simon, baasol intad da Kilene, dabagu inatong intad da limow nu kuta. Togongo loyo pakasee, pasaani lo salip gino da limaawo no, am inaya da inaaling nu Yesus.
27 Suang nu ulun inaya da inaaling nu Yesus. Da suang lo gitu, sino daanu-daanu nantangi noopus Joo. 28 Tapi Yesus linumiow dilo am dagu Kono, “Uu daanu-daanu nu Yelusalem! Peen mi tangio Aku. Tangion mino dili mi kabaata baya da anak-anak mi! 29 Sobop da woktu nu aduol da lasa, sino maapo ulun minagu, ‘Asonong no daanu angkulad am buanakan no kaano yo nakajajab nagipus, am gatas no kaano yo tiniti nu laagang.’ 30 Paat da woktu gino no, ulun aduol da lasa bonsoi minagu maapo da tidong-tidong, ‘Luyuin am langkupin no akai!’ am da tiidong-tiidong, ‘Timbunin no akai!’ a 31 Sobop toon aayag yak kaano yo apantos lakuin nu ulun kono deeno, labi alaat poyo lakuon lo da toon apua!” 32 Am sino po duo ulun inubit lo, kaduo-duo no gitu panjahat. Ilo duo ukumon matoi anggilad-gilad da Yesus.
Yesus salipon
33 Pakasuku nilo da intokon beengalan da Tangkulak, ilo nanyalip da Yesus baya da duo panjahat gino, doono da sood da pamidis am doono da sood da keet nu Yesus. 34 Bagu Yesus ininagu, “Ama, ampunin-Mu ilo, sobop kaano ilo apaanai da atu linaku lo.” Bagu palajulit-palajulit giatu nabasuit aguyum da atu ulun akaalap da pakayan nu Yesus da suang nilo gitu. b 35 Ulun-ulun suang inimpilik deeno am nakeelong da sajoo nu kajadian gino. Pamimpin-pamimpin nu ulun Yahudi angalalagai Joo, dagu kolo, “Uuy bai, ulun bookon salamaton No. Ilee takau bai ka bisa Yo anyalamot da dili No kabaata, nu monong-monong Oyo gitu Laja anyalamot pinili nu Yampuon.” 36 Palajulit-palajulit giatu poyo nangalalagai Joo. Ilo inatong nanaak da timug nu anggul oosom Joo, 37 am ininagu, “Monong Kopo Laja nu ulun Yahudi, salamaton Muno dili-Mu kabaata!” 38 Sino poyo tinulis lo da salip da sawat nu ulu No, “Gitu no Laja nu Ulun Yahudi.”
39 Doono ulun panjahat sinalip da kiing No gitu, naguyai Joo. Dagu kono, “Okow kat kunu Klistus, Laja Anyalamot, salamato bai dili-Mu kabaata baya damon!” 40 Tapi panjahat bookon gitu nangadagu joo, dagu kono, “Peenmu da dagumu gitu. Kaano ki okow angkalaa da Yampuon, sodongkon okow kabaata antalimo da ukuman anggilad kono Joo? 41 Itoduo gitu apantos ukumon, sobop toduo antalimo da balos no kono da mudil nu kalakuan to. Tapi Ulun gitu kaano kalaatan linaku No.” 42 Dagu kono bagu da Yesus, “Uu Yesus, ingoton-Mu aku, nu matong Kow ajadi da Laja.” 43 Dagu nu Yesus joo, “Dakon minagu juun, odow gitu po okow ambaya Dakon da nalom nu Pildaus.”c
Yesus inatoi
44 Kila-kila jam apulu duo payung nu odow, siga bagu nu mato nu odow linumawo. Sajoo nu alial gino nalonom bonsoi, suku da jam talu oyo amee. 45 Keen panyiili da Baloi nu Yampuon neensang unod no nansuuai saaduo. d 46 Bagu Yesus nampaluap da dagu maayo, “Uu Ama, da nalom nu tanilu-Mu naakin-Ku nyawo-Ku.” Libos No ininagu deeno, patoi No bagu. e 47 Woktu nu katua nu palajulit nakeelong da kajadian gino, oyo namuji da Yampuon am dagu kono, “Monong-monong no Oyo gitu ulun bonol!” 48 Am kapongo nu sajoo nu ulun suang nakeelong da kajadian gino, ilo sajoo inuli am nabasonsol baya da nagabubuk da inan lo. 49 Sajoo nu ulun nakoolig da Yesus, oyo gino daanu-daanu inaya Joo intad da Galilia, inimpilik intad da aalud nagilong da sajoo nu kajadian gino. f
Yesus linobong
50 Sino bagu ulun beengalan di Yusup. Ulun gitu ulun batugas da Pangadilan nu Agama nu Yahudi. Oyo gitu poyo ulun bonol am onsoi da pinyawo, 51 am agalung da woktu nu Yampuon amalinta ajadi da Laja. Bial po oyo gitu ulun Pangadilan nu Agama, tapi kaano yo satuju da kaputusan nu Pangadilan Agama gino. Oyo gitu baasol intad da kuta Alimatia da negeli nu Yudia. 52 Oyo inakow tinumingkuang di Pilatus am nampolok da bangkai nu Yesus gino naakin joo. 53 Am libos oyo nanuun da bangkai nu Yesus intad da salip gino, napo no, didiliti bungkuso da keen apulak, bulii no-Yo lobongo da luang nu batu gu da tiidong, am lobong gitu kaa poyo pinakai nangalabangan da bangkai. 54 Odow gino po odow Jumat, am odow Maayo nu ulun Yahudi amaad noyo. 55 Daanu-daanu inatong nambaaya da Yesus intad da Galilia, inaya di Yusup nagilong da lobong gino. Ilo poyo nagilong koson kono nu bangkai nu Yesus buliin da nalom nu lobong. 56a Bagu ilo inuli am nanyiap da malanyung panguumau lo da bangkai nu Yesus.
Yesus nanduli naayag
56b Paat da odow Maayo nu ulun Yahudi gino, kaano ilo angkalaja anulut da ukum nu agama lo. g