Angawa amatoi da Yesus
22
1 Da woktu gili, Odow Ilau nu Luti Kaa da Tapai Kumambang, oyo gino odow Paska nu ulun Yahudi, pongo amaad. a 2 Katua-katua nu imam baya da gulu-gulu Taulat giatu angawa, koson kolo amatoi da Yesus, sobop ilo angkalaa da ulun suang.Yudas nangulalaat da Yesus
3 Bagu Seetan Maayo inumpos da nalom nu pinyawo ni Yudas. Yudas gitu poyo iningalanan di Iskaliot, doono ulun intad da apulu duo mulit giatu. 4 Lakow kono no bagu ni Yudas inuoi da katua-katua nu imam baya da katua-katua amaajaga da Baloi nu Yampuon am nangkuuwalo dilo, koson kono angulalaat da Yesus. 5 Naanja bonsoi no bagu ilo am nampookot nanaak joo da uwong. 6 Yudas nangayuu da kaputusan lo gitu, am intad da woktu gino noli bagu, oyo naguuyum da woktu no, koson kono angulalaat da Yesus, am ulun suang giatu kaano apaanai deetu.
Anyiap da inakano nu Paska
7 Am nagonop no bagu Odow Ilau nu Luti Kaa da Tapai Kumambang, oyo gino odow intok nu ulun alus anyumbali da kiiyum domba da inakano nu Paska. 8 Bagu Yesus namansuk di Pitulus baya di Yohanes, dagu Kono, “Makow kano anyiap da inakano nu Paska gino, akanon takau.” 9 Dagu kolo Joo, “Atu intok nu kaguang-Mu, siapon mai?” 10 Taamo No dilo, “Munsop kapo da nalom nu kuta gino, akau gino maapo akatamu da doono ulun angubit da silik boodan da timug. Maya kau joo da baloi unsopon no. 11 Am baleen mi da tuan nu baloi gino, ‘Gulu angkibala juun, atu intok-Ku aangkan da inakano nu Paska ambaaya da mulit-mulit-Ku?’ 12 Bagu ulun gino maapo, apatilu damiun da intok maayo gu da sawat nu baloi batingkot, pongo alangkap am gino no intok mi anyiap da sajoo no.” 13 Lakow kolo no bagu da binansuk nu Yesus gitu dilo, am ilo nakeelong monong-monong kono da atu dinagu nu Yesus dilo gino noli. Bagu ilo nanyiap da inakano nu Paska.
Yesus naangkan nambaaya da mulit-mulit No
14 Paas no bagu woktu no, Yesus nantudung naangkan nambaaya da lasul-lasul No. 15 Dagu Kono dilo, “Kaguang nu pinyawo-Ku gitu lan aangkan ambaaya damiun da inakano nu Paska gitu, da Aku kaapo aduol da lasa. 16 Sobop Dakon minagu damiun, kaano bagu Aku akaakan deetu, sampoi lati nu aangkan gitu pineelong da woktu nu Yampuon amalinta ajadi da Laja.” 17 Bagu Yo nangalap da doono galas boodan da timug nu anggul am nabasambayang basukul, am ininagu, “Noo, napon mi gitu, inumo am bagio da suang mi. 18 Sobop Dakon minagu damiun, intad deeno gitu, kaano bagu Aku anginum da timug nu anggul gitu sampoi da woktu nu Yampuon ajadi da Laja gonopon.” 19 Bagu Yo nangalap da luti, nabasambayang basukul, tubingo-tubingo No luti gino am naaki dilo, dagu No, “Gitu no inan-Ku, tinaakan-Ku damiun. Lakuin mi gitu gama mi akapuonom Dakon.”
20 Gino po pinakuan No da galas, da ilo pongo naangkan da luti. Dagu Kono, “Galas boodan da timug nu anggul gitu, gitu no daa-Ku sinoodan pangadaawak dabagu damiun. b 21 Tapi ileen mi, tanilu nu ulun nangulalaat Dakon sino nambaaya Dakon da mija gitu. c 22 Sobop Anak Manusia gino maapo matoi kono da pongo tinantu nu Yampuon, tapi aduso no ulun angulalaat Joo!” 23 Bagu ilo nangkibala da doono am bookon, atu ulun nangalaku da suang lo gitu kono da pongo dinagu No gitu.
Nangkuwaalan da Woktu Naangkan da Alonom
24 Siga bagu nu mulit-mulit nu Yesus giatu nabataangkal. Ilo nabataangkal gitu agiinsi da atu ulun alus inanggop maayo bonsoi da ingalan, da suang lo. d 25 Gino sobop no Yesus ininagu dilo, “Laja-laja nu bangsa-bangsa bookon ingkaa akoolig da Yampuon, amalinta da lakyat nilo maya da kaguang nilo kabaata. Am ulun-ulun panguasa giano guang po sabiton nu lakyat nilo da ulun apaanai. e 26 Tapi akau, peen mi kono deeno. Ulun maayo bonsoi da suang mi gitu alus ajadi kono da ulun luumoot, am ulun pamimpin alus poyo ajadi kono da ulipon. f 27 Sobop atu ki labi maayo, ulun antudung aangkan gino ki? Atau ulun ulipon angalayani da ulun antudung aangkan gino ki? Totop nokon ulun antudung aangkan gino kan! Tapi Dakon gitu sino da unod mi ajadi da ulipon. g 28 Am akau no, totop sino ambaaya Dakon da nalom nu duol nu lasa da sajoo intad nu linasa-Ku. 29 Gino intok ni Yama pongo nanaak Dakon da kuasa amalinta, gino po duang-Ku anaak damiun da kuasa gino. 30 Am akau gino maapo aanja aangkan am anginum samija Dakon, da woktu-Ku ajadi da Laja. Akau poyo antudung ajadi da laja-laja amalinta baya da angadil da apulu duo suku nu Islael. h
31 Simon, Simon, kinoogonmu, Yampuon giiyo pongo nangijin da Seetan Maayo nangajajab damiun, gama mi ansuuai kono da gandum oonsoi pansuuwayon kulit no. 32 Tapi Dakon pongo nabasambayang juun Simon, gama nu imanmu kaa lumulus, am anduli kopo Dakon, okow alus apakotog da iman nu pagaka-pagakamu.” 33 Taamo ni Pitulus, “Maangun, dakon basadia munsop da sipil am matoi antibalun Juun!” 34 Tapi Yesus minagu, “Dakon minagu juun Pitulus, da lonom gitu maapo, kaapo manuk mingkukuuk, okow pongo ansaluk talu kali ingkaa akoolig Dakon.” 35 Pongo gino, dagu Kono poyo dilo, “Woktu-Ku nangutus damiun gili, am kaano akau inijin-Ku nangubit da ipuk-ipuk, taas baya da sandol baawis bookon, kaano akau nakulangan da atu-atu kan?” i 36 Taamo nilo, “Kaano ka doono kuon po.” Yesus ininagu dilo poyo, “Deeno gitu, atu yak ulun sino da ipuk-ipuk alus ubiton no, gino po duang nu sino da taas. Am atu yak ulun ingkaano da gayang, alus balidin no da babadu juba no, pangaalid no da gayang. 37 Sobop Dakon minagu damiun, da ayat nu Kitob Baabala nu Maangun gino alus gonopon Dakon.
‘Oyo maapo inanggop kono da doono ulun panjahat.’
Am mudil nu dili-Ku kono da tinulis da nalom nu Kitob Baabala nu Maangun gino, ginonop nyo deeno tu.” j 38 Dagu kono nu mulit-mulit No, “Maangun, kodo gayang saaduo.” Taamo No ilo, “Sukup no gino.”
Yesus nabasambayang da Tiidong nu Jeetun
39 Bagu Yesus inakow da limow nu kuta, kono da kabiasaan No tumuju da Tiidong Jeetun. Mulit-mulit No poyo inaya Joo. 40 Pakasuku lo da intokon gitu, Oyo minagu dilo, “Basambayang kau, gama mi kaa badusa da paat mi jajabin.” 41 Bagu Yo inakow intad dilo, kila-kila balud no asuku bobolo da baatu, bagu Yo naginatud am nabasambayang, dagu Kono, 42 “Uu Ama-Ku, abuli po lan duol nu lasa, atu linasa-Ku deeno gitu kaaludon nyo Dakon. Tapi bokon ka maya da kaguang-Ku, maya da kaguang Muyak.” 43 Bagu doono maleekot intad da kawanan napeelong da dili no Joo, nanaak da kakatagan. 44 Oyo angkalaa bonsoi-bonsoi, am Oyo monong-monong basambayang. Umos No kono da daa tinumiis inotok da tana. 45 Pongo No nabasambayang, duli No da mulit-mulit No giatu, ilong No oolong ilo, sobop ilo agulid bonsoi. 46 Bagu Yo minagu dilo, “Kulo kau koolong? Lumuat kau am basambayang, gama mi kaa badusa da woktu mi jajabin.”
Yesus Tinakub
47 Woktu nu Yesus ininagu gitu, datong nu kulumpuk nu ulun. Ilo binaya ni Yudas, doono mulit intad da apulu duo mulit nu Yesus. Bagu Yudas inuoi da Yesus am nanyium Joo. 48 Bagu Yesus minagu joo, “Uu Yudas, gitu ki siuman nu okow angulalaat da Anak Manusia?” 49 Woktu nu mulit-mulit No nagilong da atu guang lakuon lo da Yesus, ilo minagu, “Maangun, apuon mai no ilo da gayang gitu am?” 50 Bagu doono ulun intad dilo gitu namidis da talingo pamidis nu ulipon nu Imam Maayo da gayang sampoi nantees. 51 Tapi Yesus minagu, “Waa, waa, pee! Sukup no gino!” Bagu Yo nanongoi da talingo nu ulun gitu am napakoonsoi nanduli. 52 Bagu Yesus ininagu da katua-katua nu imam baya da katua-katua nu ulun amaajaga da Baloi nu Yampuon, am pamimpin-pamimpin nu ulun Yahudi inatong deetu anakub Joo. Dagu Kono, “Nos mi keeli nu panjahat Aku, sampoi akau inatong nangubit da gayang alangkap baya da buubuk? 53 Peegitu am, tukid odow yak Aku sino da unod mi, da nalom nu Baloi nu Yampuon, am kaano po akau anakub Dakon. Gitu no bagu paat mi anakub Dakon, am gitu no bagu kuasa nu alaat gino anguasa.” k
i Pitulus nagibaayilo ingkaa akoolig da Yesus
54 Bagu Yesus tinakub lo am ubito lo-Yo da baloi nu Imam Maayo. Am i Pitulus nansunu intad da inaaling. 55 Gu da unod nu kaapul gitu, apuy inulukan nu ulun am ilo nantudung nabakuliling deetu. i Pitulus gitu poyo inaya nantudung dilo. 56 Sino doono daanu ulipon nakeelong di Pitulus nantudung da kiing nu apuy gitu. Bagu yo nagilong nanimulig joo, dagu kono, “Ulun gitu deetu inaya da Yesus!” 57 Tapi i Pitulus nansaluk joo, dagu kono, “Kaano nga aku akoolig da ulun kuonmu gitu!” 58 Kaanyo nabuoi poyo, sino ulun bookon nakeelong joo, am ininagu, “Okow gitu dangan nilo!” Tapi i Pitulus minagu, “Waa, kaano! Bokon ka aku!” 59 Kila-kila sajam bagu, sino ulun bookon poyo ininagu da dagu maayo, “Monong liga ulun gitu dangan nu Yesus. Sobop oyo gitu poyo ulun Galilia!” 60 Tapi taamo ni Pitulus, “Bokon ka aku, kaano aku apaanai da atu kuonmu gitu!” Woktu ni Pitulus ininagu gitu, siga nu manuk iningkukuuk. 61 Bagu Yesus linumiow nagilong di Pitulus, am i Pitulus bagu nakapuonom da dagu nu Maangun joo, “Numaapo, kaapo manuk mingkukuuk da lonom gitu, okow pongo talu kali nagibaayilo ingkaa nakoolig Dakon.” 62 Kono po ni Pitulus bagu am sinumila da intok gino, am nantangi namasisikok.
Yesus da Pangadilan Agama nu Yahudi
63 Am ulun namajaga da Yesus giatu nangalalagai baya da nagabubuk Joo. 64 Bagu ilo nanutub da mato No da kaayin am nangkibala, “Bool, balee bai atu ulun namubuk Juun?” 65 Am asuang poyo dagu-dagu aguyai daguon lo Joo.
66 Paat da oyo suuwab bagu, pagaluulud pamimpin-pamimpin nu ulun Yahudi am katua-katua nu imam baya da gulu-gulu Taulat, sobop ilo gino ulun nu Pangadilan nu Agama Yahudi. Yesus ubiton adilon da tingkuangon lo. 67 Dagu kono nilo Joo, “Monong ki Okow Laja anyalamot jinanji nu Yampuon gino? Baleen-Mu damon!” Taam nu Yesus, “Baleen-Ku yo panat damiun deeno gitu, tapi kaano po akau mintopot. 68 Am kibaleen-Ku po akau, kaano po akau angajawap. 69 Tapi intad deeno gitu, Anak Manusia antudung noyo da sood nu pamidis nu Yampuon Nabakuasa Bonsoi.” 70 Dagu kolo sajoo bagu, “Kono poyo deeno, Okow noki Anak nu Yampuon?” Taam nu Yesus, “Akau kabaata no pongo ininagu deeno.” 71 Bagu ilo ininagu, “Naa, kaano bagu takau bapalulu da sasi, sobop pongo takau no nakadingog intad da kabang No kabaata.”