Palsambaan nu doono daanu nabalu munsikin
21
1 Paas Yesus tinumingaa, Oyo nagilong da ulun-ulun babayag napoompos da palsambaan nilo da nalom nu pati palsambaan da Baloi nu Yampuon. 2 Oyo nagilong poyo da doono daanu nabalu munsikin napoompos da duo kuping uwong isin da nalom nu pati palsambaan gino. 3 Bagu Oyo ininagu, “Aku minagu damiun, ileen mi daanu nabalu gitu, oyo nanaak labi asuang intad da sajoo nu ulun bookon giatu. 4 Sobop sajoo nu ulun giano nanaak da palsambaan, intad da labi nu alata lo gino. Tapi daanu nabalu gitu, bial no munsikin, oyo namupus nanaak da uwong isin no gitu, intad da kakulangan no, am oyo nanaak da sajoo nu sino joo.”Baloi nu Yampuon maapo buyuson
5 Sino takula-takula ulun nagiinagu son kono nu koonsoi nu Baloi nu Yampuon gino. Ilo naansayan da baatu oonsoi-onsoi baya da sajoo onsoi pasambeen da Yampuon. Dagu nu Yesus dilo, 6 “Sino maapo gino woktu no, sajoo neelong mi gitu totop buyuson am kaano ka doono po baatu asusun, akatatang da intok no gitu.”
Mudil nu aduol da lasa
7 Bagu mulit-mulit nu Yesus nangkibala Joo, dagu kolo, “Gulu, sangilan nu kajadian gino? Am son kono nu taanuan no, da paas nu kajadian gino maapo?”
8 Taam nu Yesus, “Ati-ati no akau, gama mi kaano palidon. Sobop asuang ulun matong maapo, amakai da ingalan-Ku am minagu, ‘Aku nga Oyo,’ am ‘Woktu nu odow kiamat gino, guang amaad.’ Peen mi pintopot dilo am bayee ilo. 9 Am akadingog kapo da kabol nu bapolong am ulun angaapu, peen mi pakatikog. Sobop sajoo nu kajadian gino alus sino gulu, tapi bokon ka gino lati no, odow kiamat gino sino noyo.”
10 Yesus minagu poyo dilo, “Bangsa doono agapu da bangsa bookon, am kalajaan doono agapu da kalajaan bookon. 11 Gu da suang nu intokon totop maapo sino kajadian guyu, panyakit angadalig baya da eetilan, am sino taanuan baya da kajadian-kajadian apatikog intad da kawanan.
12 Tapi sajoo nu kajadian gino kaapo ajadi, akau takubon am sikseen gulu maapo. Akau adilon da baloi-baloi sambayang baya da poonsopon da sipil, am akau poyo patingkuangon da laja-laja am panguasa-panguasa sobop akau inaya Dakon. 13 Tapi gino no woktu mi apasuku da Kabol Onsoi intad da Yampuon. 14 Sobop gino, pakotogon mino pinyawo mi, peen mino kalaabo atu alus daguon mi akiinsuup da dili mi kabaata. a 15 Sobop Aku kabaata maapo, anaak damiun da dagu-dagu ikmat, gama nu pagapu-pagapu mi, kaa bisa angapu da atu daguon mi. 16 Am akau gino maapo kulalaaton nu matuo mi, pagaka-pagaka mi, kalualga mi, am dangan-dangan mi, baya da takula-takula ulun da suang mi gitu potoyon. 17 Am akau maapo totop kalaagayan nu sajoo nu ulun, sobop akau inaya Dakon. 18 Tapi sanguat abuk da ulu mi po, kaano yo alawo. 19 Asabol kapo am totop akotog pinyawo mi, bayag mi maapo totop salamot.”
Mudil nu Yelusalem buyuson
20 Yesus minagu poyo, “Akeelong kapo da kuta nu Yelusalem kupungon nu palajulit-palajulit, puanamin mi gitu am, kaanyo abuoi amaad nyo gino buyuson. 21 Paat da woktu gino maapo, ulun-ulun sino da Yudia alus agiidu da tiidong, am ulun-ulun da nalom nu kuta gino alus angidu da kuta gino, am ilo da limow nu kuta, peen unsop da nalom nu kuta. 22 Sobop gino no woktu nilo ukumon am atu pongo tinulis da nalom nu Kitob Baabala nu Maangun gonopon. b 23 Aduso no daanu-daanu agali am apatiti da anak laagang da woktu gino! Sobop duol nu lasa bonsoi-bonsoi matong maapo da negeli gitu, am Maangun angukum da bangsa gitu. 24 Ilo poyo maapo totop matoi da mato nu gayang, am ubiton sipilon gu da intok nu sajoo nu bangsa bookon. Yelusalem kikidawin nu bangsa-bangsa bookon ingkaa akoolig da Yampuon, sampoi woktu nu bangsa-bangsa gino tinantu nu Yampuon dilo gonopon.”
Kadatangan nu Anak Manusia baya da Angumpama kono da toon nu ala
25 Yesus minagu poyo, “Am sino maapo taanuan eelong mi da mato nu odow am bulan baya da butitin. Am gu da tana gitu, bangsa-bangsa totop angkalaa am abingung angadop da nawok nu tingkayu. c 26 Ulun angkalaa sitanga matoi angadop da atu yak kajadian angintup maapo da tana gitu, sobob sajoo nu panguasa da kawanan gino, mingkuli amaguguyu. 27 Paat da woktu gino no, ulun akeelong Dakon, Anak Manusia gino matong da nalom nu goon, baya da sajoo nu kuasa maayo bonsoi, alaang amasiat-amasiat. d 28 Sino po kajadian-kajadian gino matong maapo, peen mi pangkalaa, sobop woktu mi salamaton amaad noyo.”
29 Bagu Yesus nabasalita dilo da umpama gitu. “Palatio nga toon ala gino atau toon bookon giano. 30 Akeelong kapo da puun nu toon-toon giano analantad, akau apaanai kabaata, gino musim nu alasu amaad noyo. 31 Gino po duang no, nu akeelong kau da kajadian-kajadian gino, puanamin mi am, woktu nu Yampuon matong ajadi da Laja gino, amaad noyo. 32 Dakon minagu damiun, sajoo nu kajadian-kajadian gino kaapo ajadi, nu ulun-ulun aayag deeno gitu kaapo matoi. 33 Kawanan baya da tana gitu totop alawo maapo, tapi atu yak daguon-Ku kaano yo alawo.”
Baabala gama bajaga-jaga
34 Yesus minagu poyo, “Jageen mino dili mi, gama nu pinyawo mi ingkaano asibuk balamai am anginum da inumon akaawuk, am tulus-tulus alaabo da bayag mi, am kaano akau asiap da odow nu Maangun matong gino, aliiyang matong damiun. 35 Sobop odow gino maapo matong kono da joolot, aliiyang matong angajolot da sajoo nu ulun da tana gitu. 36 Bajaga-jaga kau no, am ambeet basambayang, gama mi akotog angapu da sajoo nu kajadian gino, am gama mi bisa mimpilik da woktu mi adilon da tingkuangon nu Anak Manusia.”