Nangkibala da kuasa nu Yesus
20
1 Sino odow gili, gu da Baloi nu Yampuon, Yesus nangajal da ulun suang am napasuku da Kabol Onsoi intad da Yampuon. Datong nu katua-katua nu imam am gulu-gulu Taulat, baya da pamimpin-pamimpin nu ulun Yahudi gu da intokon gino, 2 am ilo minagu da Yesus, “Balee bai damon, atu intad nu kuasa pinakai-Mu nangalaku deeno, am atu ulun nanaak Juun da kuasa gino?” 3 Taam nu Yesus dilo, “Aku poyo angkibala damiun, balee bai Dakon, 4 atu intad nu kuasa ni Yohanes amaptis, intad da Yampuon ki atau intad da ulun?”5 Bagu ilo nangkuuwalo, am ininagu, “Minagu po itakau, kuasa gino intad da Yampuon, Oyo minagu maapo ditakau, ‘Kulo kau kaa mintopot di Yohanes?’ 6 Tapi minagu po itakau, kuasa gino intad da ulun, sajoo nu ulun giatu agabobol ditakau da baatu, sobop ilo mintopot di Yohanes gino ulun nabi.” 7 Bagu ilo tinumaam da Yesus, “Kaano akai apaanai.”
8 Dagu kono nu Yesus bagu dilo, “Kono poyo deeno, Aku po kaano guang amala damiun, atu intad nu kuasa pinakai-Ku nangalaku deeno.”
Angumpama kono da ulun-ulun pinakalaja da kabun nu bua nu anggul
9 Bagu Yesus nabasalita da umpama da ulun suang giatu, “Sino ulun namagima da kabun nu bua nu anggul, am oyo namansuk da ulun-ulun pinakalaja no angulus da kabun gino. Bagu oyo inakow da ondo ka pagun am inudong nabuoi deeno. a 10 Am da woktu nu musim no bagu angalap da asil nu kabun nu bua nu anggul gitu, bansuko no ulipon no muoi da ulun pinakalaja no giatu li, angalap da asil nu kabun no kabaata, am naakin joo. Tapi ulipon binansuk no gitu li binubuk-bubuk nu ulun pinakalaja no giatu li, am poolio loyo ingkaa nangubit ka keeti po. 11 Bagu ulun kayampu da kabun gitu poyo, namansuk da ulipon no bookon, tapi ulipon no gitu poyo pinakooyu lo am bubuuki, bansuko lo inuli kaa bagu nangubit da atu-atu. 12 Bagu poyo ulun kayampu da kabun gitu namansuk da ulipon no katalu gitu. Tapi ulipon no katalu gitu poyo binuukan lo suku nadaanan nu ulun-ulun pinakalaja no da kabun gitu, am tapidi loyo da limow nu kabun.
13 Suku bagu ulun kayampu da kabun gitu minagu, ‘Atu ngaku bagu lakuonku gitu aii? Gino poyo, utuson kuno anak inumpadaku gitu. Totop noyo logoon lo.’ 14 Tapi woktu nu ulun-ulun pinakalaja no giatu nagilong da anak nu ulun kayampu da kabun gitu, nangkuuwalo bagu ilo, dagu kolo, ‘Anak no gitu nga maapo akaalap da alata ni yama no gitu. Ayu potoyon takau noyo, gama nu alata ni yama no gitu takau bagu kayampu.’ 15 Bagu ilo nanapid da anak gitu gu da limow nu kabun gitu am potoyo loyo bagu.” Yesus nangkibala da ulun-ulun gu deetu, “Jadi, atu bagu lakuin nu tuan kayampu da kabun nu bua nu anggul gitu dilo? 16 Totop nyokon matong am agapatoi da ulun-ulun pinakalaja no da kabun nu bua nu anggul giatu li, am amalasaya poyo da kabun no gitu kalajeen nu ulun bookon.” Pongo nu ulun suang giatu nangkinoog da umpama gitu, dagu kolo “Kaanyo kon kono deeno!” 17 Bagu Yesus nagilong dilo am ininagu, “Kono poyo deeno, atu lati nu ayat nu kitob gitu?
‘Batu pongo tinapidan nu tukang bangunan, pongo najadi bagu da batu apanting apakotog da bangunan.’ b
18 Atu yak ulun adatu intad da sawat akeentup da batu gino, totop noyo aansul, am atu yak ulun eentupan nu batu gino, totop nyopo asasoi.”
19 Bagu gulu-gulu Taulat giatu baya da katua-katua nu imam giatu, balusaha anakub da Yesus da woktu gino li poyo, sobop ilo apaanai, ilo nga kuon nu Yesus da umpama gitu. Tapi angkalaa nopo ilo da ulun suang giatu.
Amayal da pajak da kayisal
20 Jadi gulu-gulu Taulat baya da katua-katua nu imam tulus-tulus agiilong da Yesus. Ilo nanaak da uwong am namansuk da ulun ansiigo am agisaansalu ajadi da ulun apaanai, bagu ilo maapo bisa angajolot da Yesus da atu kibaleen lo Joo, am Yesus bagu naakin lo da gubelnul bakuasa gama No ukumon.
21 Ulun-ulun binansuk lo giatu bagu nangkibala da Yesus, “Gulu, akai apaanai da sajoo nu dagu am inajal-Mu gino bonol. Okow angajal da sibonol-bonol no da mudil nu daalan nu Yampuon da sajoo nu ulun, kaano ampili bulu. 22 Kono poyo deeno, anulut da atulan nu agama takau, bisa ki akai amayal da pajak da Kayisal atau kaano?”
23 Tapi Yesus apaanai da laat nu pikilan lo, gino sobop no Yesus ininagu dilo, 24 “Peele mi bai gulu Dakon uwong dinal gino, gumbol baya da tulisan nu atu ki sino deeno?” Taamo nilo, “Gumbol baya da tulisan nu Kayisal.” 25 Dagu bagu nu Yesus dilo, “Kono poyo deeno, naakin minyo da Kayisal atu alus naakin mi joo, am naakin mi da Yampuon atu alus naakin mi Joo!” 26 Am kaano bagu ilo bisa angajolot da Yesus da atu dinagu No dilo gitu, da tingkuangon nu ulun suang giatu. Nasobop no ilo da nangajaawap No dilo gitu, am kaano bagu ilo nakeenagu.
Ulun Saduki angkibala da mudil nu ulun matoi padulion pakaayagon
27 Datong bagu nu takula-takula ulun Saduki da Yesus. Ilo gitu ingkaa mintopot da ulun matoi padulion pakaayagon, am ilo angkibala da Yesus, c 28 “Gulu, Musa nanulis da palinta gitu ditakau, ‘Sino po ulun kuusoi matoi, am kaano anak no, pagaka no kuusoi alus angandu da andu nu aka no gitu li, gama nu pagaka no inatoi gitu li maal da sulut.’ d 29 Naa, sino ulun tulu agaka gitu. Kinatuan gitu nangandu da doono daanu am siga no inatoi, tapi kaano anak no. 30 Bagu daanu gitu inandu nu ali nu ulun inatoi gitu li, tapi ulun nangandu gitu inatoi poyo, am kaano poyo maal da anak. 31 Bagu daanu gitu poyo inandu nu ali no katalu am gino-gino yak tulus kajadian no suku da ali katulu. Ilo sajoo inatoi am kaano nakaalap da sulut, 32 sampoi po bagu daanu gitu inatoi poyo. 33 Son kono nu daanu gitu li bagu? Atu da tulu ulun nangandu joo gitu li, ajadi da andu no da odow nu ulun matoi padulion pakaayagon? Sobop tulu ulun gitu li pongo nangandu joo.” 34 Taamo ilo nu Yesus, “Ulun-ulun aayag deeno gitu agandu am paganduon, 35 tapi ilo inanggop apantos akaalap da bayag onsoi da odow sangilan am pakaayagon anduli, ilo maapo ingkaano agandu am paganduon. 36 Sobop ilo gitu maapo kaano matoi bagu, kono da maleekot-maleekot kaa bisa matoi. Am ilo gitu poyo anak-anak nu Yampuon, sobop ilo gitu pongo pinakaayag padulio. 37 Mudil nu ulun matoi pakaayagon padulio gino, i Musa kabaata pongo namala deeno, kono da pongo neelong no gu da puod nu duuy alaang gino, am Maangun minagu, ‘Dakon gitu no Yampuon ni Yabalaham, Yampuon ni Isak, am Yampuon ni Yakup.’ e
38 Jadi Oyo gino bokon ka Yampuon nu ulun matoi, tapi Yampuon nu ulun aayag. Sobop da tingkuangon nu Yampuon, sajoo nu ulun giano aayag.”
39 Woktu lo nangkinoog da dagu nu Yesus gino, takula-takula gulu Taulat giatu minagu, “Gulu, nangajaawap-Mu gino paas noyo bonsoi.” 40 Sobop kaano bagu ilo asiog angkibala da Yesus.
Yesus baya da Daut
41 Bagu Yesus ininagu poyo dilo, “Son kono nu ulun bisa minagu da Mesias gino Anak sulut nu laja Daut? 42 Sobop Daut kabaata yak minagu da mudil nu Mesias gino, da nalom nu kitob Masmul kono da gino,
‘Yampuon pongo ininagu da Maangunku,
Antudung Kono da sood da pamidis-Ku,f g
43 sampoi lakuin-Ku pagapu-pagapu-Mu gino
angaku awali Juun.’
44 Jadi, laja Daut yak minagu Mesias gino Maangun no, koson kono bisa anyabit da Mesias gino poyo anak sulut no?”
Yesus nanaak da baabala ati-ati da gulu-gulu Taulat
45 Woktu nu ulun suang nangkinoog da dinagu nu Yesus gino li, Yesus minagu da mulit-mulit No, 46 “Ati-ati no akau da gulu-gulu Taulat. Sobop ilo gino asiiga makow anjeet amakai da babadu juba abuat, am asiiga no ilo logoon gu da pasal, am asiiga antudung da sood da panguulu da baloi sambayang, am da intokon nu ulun-ulun logoon antudung da kinalamayo. h 47 Ilo gino poyo agaakal baya da angalampas da baloi nu daanu-daanu nabalu giatu, am ilo anutub da kalaatan lo gino da basambayang abuat. Ilo gino totop maapo antalimo da ukuman aagat bonsoi.”