i Sakius
19
1 Yesus gitu poyo inunsop da kuta Yeliko, am inakow tulus nanseel da kuta gino. 2 Gu da kuta gitu, sino doono ulun katua nu ulun-ulun ansiingil da pajak, beengalan di Sakius. Oyo gitu poyo ulun babayag. 3 Oyo balusaha agilong koson kono nu mudil nu Yesus gino, tapi kaano yo bisa akeelong, sobop ulun suang giatu nakasili Joo, am i Sakius gitu aliwi ulun no. 4 Bagu yo nampanguulu nansimul da ulun suang giatu, am kono po nanakod da toon ala gitu, agilong da Yesus guang anseel deetu.5 Woktu nu Yesus nakasuku da intokon nu toon ala gitu, ilee No da sawat am ininagu, “Sakius, atikas kono tumuun, sobop da odow gitu, Dakon alus mudong da baloimu.” 6 Kono po bagu ni Sakius natikas-tikas tinumuun am naanja nantalimo da Yesus da baloi no. 7 Tapi sajoo nu ulun nakeelong da kajadian gino, ampanguot am angawau, dagu kolo, “Aa, mudong Yo da baloi nu ulun badusa gino.” 8 Tapi woktu ni Sakius gu da baloi no, oyo inimpilik am ininagu da Maangun, “Maangun, sitanga intad da sajoo nu alataku gitu, numaapo naakinku da ulun munsikin. Am atu yak ulun pongo sinalukku, numaapo padulionku apat kali lipot.” 9 Dagu kono nu Yesus, “Odow gitu pongo najadi kasalamatan da ulun-ulun da nalom nu baloi gitu, sobop ulun gitu poyo sulut ni Yabalaham. 10 Am Dakon gitu, Anak Manusia matong aguyum am anyalamot da ulun-ulun badusa.”
Angumpama kono da uwong mina
11 Dagu kono poyo nu Yesus da sajoo nu ulun nangkinoog Joo da intokon gitu, da umpama dilo. Sobop da woktu gino noli Oyo guang akasuku da Yelusalem, am nos nilo Yampuon matong ajadi da Laja gino, atikas-tikas eelong lo da dunia gitu.
12 Bagu Yo nabasalita, “Sino ulun pangilan gitu, guang makow da negeli aalud, guang pajadion da laja deetu, am pongo gino bagu yo anduli. 13 Paat No guang makow, ipagi no doono-doono ulun ulipon no apulu gitu am naaki no ilo da sakuping-sakuping uwong mina, dagu kono, ‘Pakayon mino uwong gitu badagang sampoi da paatku anduli.’
14 Tapi ulun-ulun nu negeli no kabaata gitu alaagai joo. Pongo yo inakow da negeli aalud gino, bagu ilo namansuk da utusan ansunu joo, am minagu, ‘Kaano akai guang da ulun gitu ajadi da laja mai.’
15 Am pangilan gitu bagu najadi da laja, am panduli no bagu da negeli no. Bagu yo nagipag da ulipon-ulipon pongo tinaakan no da uwong mina giano li, agilong yo takula asil nu dagang nilo doono-doono.
16 Datong bagu nu ulun timpuun gitu joo am ininagu, ‘Tuan, uwong minamu doono gino noli nangasil noyo apulu uwong mina.’
17 Dagu kono da ulun gitu, ‘Onsoi bonsoi kalajamu gino, uu uliponku onsoi da pinyawo. Okow pongo satia da nalom nu kalaja luumoot, gino sobop no okow palasayeen ajadi da panguasa da apulu kuta.’ 18 Datong kono nopo nu ulun kaduo gitu am ininagu, ‘Tuan, uwong minamu doono gino noli nangasil noyo da limo uwong mina.’
19 Dagu kono da ulun gitu, ‘Yuu, kuaseen muno limo kuta gino.’
20 Bagu ulun bookon giatu poyo inatong am ininagu, ‘Tuan, kodo uwong minamu gili. Dakon pongo nanawi da nalom nu binis nu kaayin. 21 Sobop dakon angkalaa juun Tuan. Okow gitu ulun akotog da pinyawo. Okow angalap da atu bokon yampumu, am okow poyo angotom da atu kaano osokonmu.’ 22 Dagu kono da ulun gitu, ‘Uuy okow ulipon alaat! Dakon guang angadil juun, anulut da dagumu kabaata gino. Okow pongo apaanai, dakon gitu ulun akotog da pinyawo, angalap da atu bokon yampuku, am angotom da atu ingkaa inasokku. 23 Kono poyo deeno, kulo uwongku gino noli, kaa pinootangmu da ulun bookon gama no aganak? Am da woktuku anduli, aku angalap baya-baya da anak nu uwong gino.’ 24 Bagu yo ininagu da ulun-ulun inimpilik deeno, ‘Napon mi solod uwong mina doono gino noli, am naakin mi da ulun kayampu da apulu uwong mina gino.’ 25 Dagu kolo joo, ‘Tuan, oyo pongo sino da apulu uwong mina.’ 26 Taam no dilo, ‘Dakon minagu damiun, atu yak ulun pongo sino, naakin maapo poyo joo labi asuang. Tapi atu yak ulun ingkaa da atu-atu, anapon poyo maapo gino atu yak sino joo. a 27 Am deeno gitu, ubiton mino da sodo sajoo nu ulun-ulun kaa guang dakon ajadi da laja lo, am potoyon mino ilo da tingkuangonku!’ ”
Yesus sinambut linamai da Yelusalem
28 Am kapongo Yo ininagu da sajoo gino noli, lakow bagu nu Yesus nampanguulu dilo da Yelusalem.
29 Woktu No guang akasuku da kiing nu pagun Betpage baya da Betania gu da intokon beengalan da tiidong Jeetun, Oyo namansuk da duo ulun mulit No inakow nampanguulu Joo, dagu Kono, 30 “Makow kano da pagun da tingkuangon giiyo. Paas kau munsop deeno, akeelong kau gino maapo da doono kiiyum keledai amuda dinukugan. Keledai gino kaapo oyo palna inudanon nu ulun. Gayadin mi keledai gino am biton mi da gitu.
31 Am sino po ulun angkibala damiun, ‘Kulo gino labusi mi?’ Taamon miyak kono da gino, ‘Maangun bapalulu deetu.’ ”
32 Am lakow lo bagu kono da binansuk dilo gitu, am ilo nakeelong monong-monong kono da pongo dinagu nu Yesus dilo.
33 Woktu nilo namagayad da keledai gitu, dagu kono nu ulun kayampu da keledai gitu, “Kulo labusi mi keledai gino?” 34 Dagu kolo, “Maangun bapalulu deetu.”
35 Ubito lo keledai gino da Yesus, bagu ilo nangapin da babadu juba lo da bakulung nu keledai gitu, am nanulung napaasak da Yesus da sawat no.
36 Am gotong nu Yesus nantudung da keledai gitu, liliuti lo babadu juba lo da daalan.
37 Woktu No guang akasuku da Yelusalem, da intok nu daalan tumuun intad da tiidong Jeetun, woktu gino po bagu, sajoo nu mulit inaya Joo giatu naanja am namuji da Yampuon da dagu maayo, sobop sajoo nu katulayan pongo neelong lo. 38 Dagu kolo,
“Binolokot no Oyo inatong najadi da Laja da nalom nu ingalan nu Maangun,
asonong bonsoi da sulga am pujion no Yampuon da intokon guu da sawat bonsoi.” b
39 Takula-takula ulun Palisi nambaaya da ulun suang giatu minagu da Yesus, “Gulu, balee bai gulu mulit-mulit-Mu giatu mongow!” 40 Taamo No, “Dakon minagu damiun, kaapo ilo gitu minagu, baatu-baatu giatu maapo ampaluap.”
41 Am woktu nu Yesus amaad akasuku da Yelusalem, am nagilong da kuta gino, siga No nantangi. 42 Dagu Kono, “Oodii damiun ulun-ulun nu Yelusalem, apaanai kapo lan am akalati da odow gitu, da atu paluluon nu kasanangan mi bonsoi, tapi deeno gitu nabuni intad da mato mi. 43 Sobop sino maapo odow no gino, pagapu mi guang angupung damiun, bagu ilo anguliling damiun am amisok damiun da sajoo nu intokon. 44 Am ilo maapo amatoi damiun baya da sajoo nu panduduk mi, am kaano ka doono po batu tatangin nilo da pagal nu batu nu kuta mi. Sobop kaano akau apaanai sangilan nu Yampuon matong anyalamot damiun.”
Yesus nangalisi da Baloi nu Yampuon
45 Bagu Yesus inunsop da kaapul nu Baloi nu Yampuon, am bagu Yo nagasusug da sajoo nu ulun nabadagang deeno. 46 Dagu Kono dilo, “Sino tinulis, ‘Baloi-Ku gitu baloi intok basambayang.’ Tapi pinajadi mi bagu da buunsalag nu ulun palampuk!” c
47 Odow-odow yak Oyo angajal da Baloi nu Yampuon gitu. Katua-katua nu imam am Gulu-gulu Taulat, baya da pamimpin-pamimpin nu ulun-ulun Yahudi aguuyum ilo da lakow lo amatoi Joo. d 48 Tapi kaano ilo akatanga da lakow no, koson kolo amatoi Joo, sobop sajoo nu ulun asiiga Joo am guang angkinoog da daguon No.