Angumpama kono da daanu nabalu baya da akim
18
1 Yesus minagu da umpama gitu poyo dilo, gama nilo akalati bonsoi da ilo basambayang, am gino totop lakuin lo tulus-tulus.2 Dagu Kono, “Sino doono akim da doono kuta gitu. Kaano yo angkalaa da Yampuon, am kaano yo paladuli ka doono ulun po. 3 Gu da kuta gitu poyo, sino po doono daanu nabalu. Oyo akansang muoi da akim gitu am minagu, ‘Aman, insuupin muno aku da aku agadu da ulun pagapuku am.’ 4 Pansigee yak oyo gulu nu akim gitu. Tapi, dagu kono bagu da nalom nu pinyawo no, ‘Gama kuyak kaa angkalaa da Yampuon am kaa paladuli da doono ulun, 5 am sobop daanu nabalu gitu tulus-tulus anyusa dakon, gino poyo insuupin kunyo, gama no kaa tulus-tulus muoi anyusa dakon bagu.’ ”
6 Dagu kono nu Maangun, “Pikilon mi nga atu dinagu nu akim alaat da ingkayau gino li! 7 Kaano ki Yampuon anginsuup da ulun-ulun umat No kabaata, oodow alonom basambayang ampolok akitulung Joo? Am sino ki Oyo apansiga da ulun da oyo kaapo anulung dilo? Kaano kan! 8 Dakon minagu damiun poyo, Oyo totop atikas anginsuup dilo. Tapi, da woktu nu Anak Manusia gino matong, sino ki Oyo maapo akatamu da ulun-ulun mintopot Joo da tana gitu?”
Angumpama kono da ulun Palisi baya da ulun ansiingil da pajak
9 Yesus nabasalita poyo da umpama gitu, pinatuju No da takula-takula ulun angaku da dili lo bonol am apaliwi da ulun bookon. 10 Dagu nu Yesus, “Sino duo ulun inakow basambayang da Baloi nu Yampuon. Doono gitu ulun Palisi, am bookon ulun ansiingil da pajak.
11 Ulun Palisi gino inimpilik kabaata am basambayang da nalom pinyawo no kono da gino, ‘Uu Yampuon, dakon basukul Juun, sobop dakon gitu kaano kono da ulun bookon. Bokon ka ulun palampuk, bokon ka ulun alaat, bokon ka ulun ansaawa, am bokon ka kono da ulun ansiingil da pajak gitu. 12 Dakon bapuasa duo kali saminggu, am aku anaak da pelpuluhan intad da asil nu kalajaku.’
13 Tapi ulun ansiingil da pajak gitu, inimpilik alud-alud intad da sajoo nu ulun deeno. Kaano yo asiog antingaa da kawanan. Am sambil agabubuk da inan no kabaata, oyo minagu, ‘Uu Yampuon, akimaasi aku no Juun, ulun badusa gitu.’
14 Dakon minagu damiun, Da woktu nu ulun ansiingil da pajak gitu inuli da baloi no, oyo no ulun bonol tinalimo nu Yampuon am bokon ka ulun Palisi gino noli. Sobop atu yak ulun apakasawat da dili no, numaapo oyo pakaliwion. Am atu yak ulun apakaliwi da dili no, numaapo oyo pakasawaton.” a
Yesus namolokot da anak-anak
15 Sino ulun-ulun inatong nangubit da anak-anak no luumoot da Yesus, bagu Yesus nanongoi namolokot dilo. Nagilong deeno, mulit-mulit No inangit da ulun-ulun giatu. 16 Tapi Yesus nagipag da anak-anak giano, bagu Yo ininagu, “Gama yak nu anak-anak giatu matong Dakon, am peen mi popolo ilo. Sobop ulun-ulun kono deetu no, ulun aayag maya da palinta nu Yampuon, Laja lo. 17 Aku minagu damiun, atu yak ulun ingkaa antalimo da Yampuon ajadi da Laja no, kono da anak luumoot gitu, kaano yo bisa ajadi da umat No.”
Ulun babayag apagon ajadi da umat pinalinta nu Yampuon
18 Sino ulun pamimpin nu Yahudi gitu nangkibala da Yesus, dagu kono, “Gulu apaanai, atu alus lakuonku da akaalap da bayag onsoi, da buoi nu odow?”
19 Taam nu Yesus, “Kulo kow minagu Dakon apaanai? Kaano ka doono ulun po apaanai, Yampuon yak nga apaanai. 20 Okow totop apaanai da sajoo nu pinalinta nu Yampuon, ‘Peen pansawa, peen pamatoi, peen pantakow, peen pansaluk, am logoon muno yamamu baya di inamu.’ ” b
21 Dagu kono nu ulun gitu, “Sajoo nu palinta giano, binaya kunyo da woktuku masi lumalad li.”
22 Kinoogo nu Yesus dagu no gitu, dagu Kono bagu joo, “Sino poyo doono alus lakuonmu. Paalidin muno atu sino juun, am naakinmu uwong no da ulun-ulun munsikin, am okow totop akaalap da alata da sulga, libos gino matong kono da gitu am maya kow Dakon.”
23 Woktu nu ulun gitu nangkinoog da dagu gitu, nasusa no pikilan nu ulun gitu bagu, sobop oyo gitu ulun babayag bonsoi.
24 Yesus apaanai da pikilan nu ulun gitu. Gino intok no, Oyo ininagu, “Ilee nga, apagon no bonsoi ulun babayag ajadi da umat pinalinta nu Yampuon Laja no. 25 Sobop labi aluoi doono kiiyum unta munsop da luang nu lawos, intad da doono ulun babayag munsop da nalom nu Dunia Dabagu yampu nu Yampuon.”
26 Am ulun-ulun nakadingog da dinagu nu Yesus gitu minagu, “Kono poyo deeno, atu ulun bisa salamaton?”
27 Dagu nu Yesus, “Atu kaano bisa lakuon nu ulun, bisa lakuon nu Yampuon.”
Balos nu ulun maya da Yesus
28 Bagu i Pitulus ininagu, “Ilee nga akai gitu. Akai gitu pongo nanatang da sajoo sino damon am maya Juun.”
29 Dagu nu Yesus dilo, “Dakon minagu damiun, Atu yak ulun pongo nanatang da baloi no, andu no atau pagaka no, atau matuo no atau anak-anak no, sobop oyo nangalayani da Yampuon Laja no, 30 ulun gino totop akaalap balipot-lipot da balos no, da woktu nu deeno gitu, am da woktu nu odow sangilan, oyo totop akaalap da bayag onsoi da buoi nu odow.”
Gitu katalu kali nu Yesus ininagu da mudil nu duol nu lasa baya kapatayan No
31 Yesus nagipag da apulu duo mulit Noyak kabaata am ininagu, “Makow takau no deeno tu da Yelusalem. Gu da giiyo, sajoo nu tinulis nu ulun nabi-nabi da mudil nu Anak Manusia gino totop gonopon. 32 Oyo totop takubon maapo nu ulun bangsa-bangsa ingkaa akoolig da Yampuon, lalagayon, uyayon am tupayin. 33 Am ilo maapo anyiksa am amatoi Joo, paat da odow katalu da Oyo pongo pinatoi, Oyo anduli aayag.” 34 Tapi kaano ka doono ulun po nakalati da sajoo nu dinagu No gitu. Binuni lati nu dagu No gitu dilo, am ilo kaa apaanai da lati no.
Yesus napakatool da mato nu ulun nabolow da maad da Yeliko
35 Woktu nu Yesus guang akasuku da Yeliko, sino ulun santali nabolow nantudung da maligi nu daalan.
36 Woktu nu ulun gino nakadingog da ulun nasuang nanseel, oyo nangkibala, “Atu gino?”
37 Dagu nu ulun-ulun deetu joo, “Yesus ulun nu Nasalet gino nanseel.”
38 Bagu ulun nabolow gitu nampaluap, “Yesus Anak Daut, akimaasi aku no Juun!”
39 Ulun-ulun da panguulu giatu, inangit am namansuk joo mongow. Tapi totop yak oyo ampaluap, labi maayo poyo, “Anak Daut, akimaasi aku no Juun!”
40 Bagu Yesus nabalanti am namansuk da ulun namayud da ulun nabolow gitu inuoi Joo. Paas yo namaad da kiing nu Yesus, kibalee yo nu Yesus, 41 “Atu kaguangmu Dakon lakuin-Ku juun?”
Taam nu ulun nabolow gitu, “Maangun, dakon guang matoku gitu bisa akeelong.”
42 Bagu Yesus ininagu joo, “Akeelong no matomu bagu. Sobop okow mintopot Dakon, akatool no matomu bagu.”
43 Am woktu gino li po, oyo bisa akatool. Bagu yo inaya da Yesus sambil namuji da Yampuon. Sajoo nu ulun suang nakeelong da kajadian gino, ilo poyo namuji da Yampuon.