Takula-takula baabala
17
1 Yesus minagu da mulit-mulit No, “Sino yak lakow nu apadusa da ulun. Tapi aduso no ulun apadusa da ulun bookon poyo. a 2 Labi onsoi batu nu gulinganb dukugin da liog no, tapidi yo lasadi da nalom nu tingkayu. Intad po maapo da oyo apadusa da doono ulun intad da suang nu ulun alami da iman giatu. 3 Gino sobop no, ati-ati no akau angajaga da dili mi kabaata! Sino po pagaakamu angalaku da dusa, baleenmu am popolon muyo, am sino po basonsol poyo, ampunin munyo po. c 4 Am sino po sala no juun tulu kali sangodow am oyo po tulu kali anduli juun am minagu, ‘Akiampun aku juun,’ okow po totop angampun joo.” d5 Dagu kono nu lasul-lasul giatu da Maangun, “Maangun pakotogon-Mu iman mai.”
6 Taamo ilo nu Maangun, “Sino po iman mi kono da kaayo nu umi nu sesawi luumoot gitu, akau bisa minagu da puun nu toon ala gitu, ‘Abubul kono am ambaluy da tingkayu,’ oyo totop maya da palinta mi.”
Tuan baya da Ulipon
7 Bagu Yesus nangajal da mulit-mulit No poyo, “Sino po likin no da suang mi gitu doono ulun maal da ulipon angkalaja da umo atau amaajaga da kiiyum domba, am woktu nu ulipon gitu anduli intad da umo, apantos ki tuan no gitu minagu da ulipon no gitu, ‘Ayu, gitu kow aangkan?’ 8 Kaano kan! Totop yo minagu da ulipon no gitu, ‘Siapon muno inakanoku, am pakayan da awakmu gino totop dukugin da ogot-ogot, layaninmu aku sampoi aku pongo aangkan am anginum. Libos gino bagu okow aangkan am anginum.’ 9 Am ulipon gitu po, kaano apantos antalimo da dagu talimokasi intad da tuan no, da woktu no pongo nangalaku da atu binansuk joo. 10 Gino po duang mi gitu. Woktu mi pongo nangalaku da sajoo nu pinakalaja damiun, gama mi minagu kono deeno, ‘Akai gitu ulipon yak, kaa da lati am kaa apantos daguon talimokasi. Akai angkalaja yak da atu alus kalajeen mai.’ ”
Apulu ulun Nangkudong
11 Woktu nu Yesus inakow inuoi da Yelusalem, Oyo inaya da lolot nu Samalia am Galilia. 12 Paas Yo inumpos da doono pagun, datong nu apulu ulun nabapanyakit da kudong giatu tinumamu Joo. Intad da aalud ilo inimpilik, 13 am tulus-tulus ampaluap, “Yesus! Gulu! Akimaasi akai no Juun!” 14 Siga nu Yesus nagilong dilo am ininagu, “Makow kano, peeleen mino inan mi da imam-imam.” Buoi lo inakow da daalan, siga bagu nu panyakit lo gitu nalawo. 15 Sino doono ulun da suang lo giatu, ilee no nalawo no bagu panyakit no gitu, panduli no bagu da Yesus, am napasawat da ingalan nu Yampuon da dagu maayo. 16 Bagu yo naginatud tinumungob da tingkuangon nu Yesus, am oyo batalimokasi Joo. Ulun gitu ulun nu Samalia. 17 Bagu Yesus minagu, “Waa, apulu ulun kat gili pongo nalawo da panyakit gino li. Atu bagu ulun siam gino noli? 18 Kaano ki da suang lo gino li nanduli batalimokasi da Yampuon? Ulun Samalia gitu yak ki?” 19 Bagu Yesus minagu da ulun gitu, “Mimpilik am makow kono. Sobop okow mintopot Dakon, panyakitmu pongo nalawo bagu.”
Kadatangan nu Yampuon ajadi da Laja
20 Sino takula-takula ulun Palisi angkibala da Yesus, “Sangilan nu Yampuon gino matong ajadi da Laja?”
Taam nu Yesus dilo, am dagu Kono, “Yampuon Laja gino matong, kaano taanuan no, kono da eelong nu ulun, 21 am kaano ulun bisa minagu kono deetu, ‘Ee, ilee mi nga oyo, sino yo da gitu,’ atau ‘sino yo da giiyo!’ Sobop Yampuon Laja gino sino noyo damiun.”
22 Pongo gino, Yesus minagu da mulit-mulit No, “Sino woktu no gino maapo, akau guang monong-monong agilong da Anak Manusia matong, bial sangodow panat, kaano akau bisa akeelong Joo. 23 Am sino po maapo ulun minagu damiun, ‘Ee, ilee mi nga oyo, sino yo da gitu,’ atau ‘sino yo da giiyo!’ Peen mi lakow deeno paguyum Joo. 24 Sobop woktu nu Anak Manusia matong maapo, anggilad da ganit amasiat intad da lompong nu kawanan doono akasuku da lompong nu kawanan bookon. 25 Tapi Oyo gitu, alus antalimo da suang nu duol nu lasa gulu, am Oyo kaano talimoon nu ulun nu jomon deeno gitu. 26 Am da woktu nu Anak Manusia matong maapo, umbang no kono da woktu ni Nuu naayag paguulu. e 27 Ulun-ulun da woktu ni Nuu naayag, ilo aangkan am anginum, baya da agandu am paganduon. Kono deeno yak tulus-tulus mudil lo, sampoi da woktu ni Nuu inumpos da padaau bapangku. Liiyang yak bagu nu losob inatong nangaluus dilo sajoo. f 28 Gino po duang nu ulun-ulun da woktu ni Lot naayag paguulu. Ilo aangkan am anginum, baya da apaalid am angalid, ilo po antanom am amangun da baloi. g 29 Tapi da woktu nu Lot inakow sinumila da kuta Sodom, liiyang yak bagu nu baa baya da apuy gitu, nadatu intad da kawanan, kono da dasam nangaluus dilo sajoo. 30 Jadi, gino po maapo duang nu odow nu Anak Manusia apeelong da dili No. 31 Sino po ulun gu da sawat nu taap nu baloi, peen no tuun am angalap da biinawo no da nalom nu baloi. Gino po duang nu ulun gu da umo, peen no panduli da baloi. h 32 Ingoton mi atu kajadian alaat pongo tinalimo nu andu ni Lot! i 33 Atu yak ulun guang anagong da nyawo no, alawo maapo nyawo no. Tapi atu yak ulun alawo da nyawo no, oyo maapo anyalamot da nyawo no kabaata. j 34 Aku minagu damiun, da woktu alonom, sino maapo duo ulun noolong da doono puungkau, doono ulun anapon am bookon tatangin. 35 Sino poyo duo ulun daanu ambaya amagiling da gandum, doono ulun anapon am bookon tatangin.”