KAMUS NU KITOB BAABALA NU MAANGUN
Alingu Alisi, Alingu nu Maangun Roh Kudus, Roh Tuhan Maangun Yampuon, taatalu da nalom nu doono, oyo gino Yama, Anak, am Alingu Alisi. Alingu Alisi gitu, sabiton da Alingu nu Maangun Yampuon, Alingu nu Maangun, am Alingu nu Yesus (Salita nu Lasul-Lasul 16:7). Oyo sabiton poyo da panulung nu ulun, apalakow da kalaja nu Yesus gama nu ulun salamaton (Yohanes 14:16-26). Sajoo nu ulun mintopot da Yesus udongon nu Alingu Alisi gitu. Alingu Alisi gitu, buliin nu Maangun Yampuon mudong da nalom nu pinyawo nu ulun mintopot. Am Oyo apakotog da janji No ditakau da Oyo apakaayag anduli ditakau da odow numagu (Loma 8:11; 2 Kolintus 1:22; 5:5; Epesus 1:13; 4:30). Kalajeen nu Alingu Alisi gitu, tinulis da nalom nu Kitob Yohanes 1:33; 3:5-8; 6:63; 7:37-39; 14:15-17, 26; 15:26; 16:7-15; 20:21-23.
Alisi Kudus, Suci, Bersih Maangun nu Yampuon giiyo Alisi, kaano anggilad da suang nu pongo pinajadi No, am Oyo bakuasa da sajoo pongo pinajadi No. Oyo bakuasa poyo da saajo nu alingu am sajoo nu aayag da dunia baya da sulga. Oyo totop bonol am kaano da dusa. Ulun-ulun baya da sajoo nu biinawo gino daguon da alisi, gino lati no ulun baya da biinawo gino pinili kusus angalayani da Maangun nu Yampuon. Biinawo gino kaano bisa pakayon sambalang. Ulun bapanyakit kudong am daanu nagipus kaano bisa maya basambayang, sobop inanggop alidok. Ilo alus pilulu po balisi, bagu bisa maya basambayang kono da atulan nu agama Yahudi.
Amuji Memuji Amuji gitu amakai da kabang minagu da dagu kaansayan, pintol, onsoi, pangol baya da apaanai da ulun atau Yampuon nu bayag gitu.
Anak Manusia Anak Manusia Ingalan galal pinakai nu Yesus. Oyo nangingalan da dili No kabaata. Maangun Yampuon napeelong da nabi Danel doono ulun utusan kono da *Anak Manusia* tinaakan da kuasa amalinta da sajoo nu dunia sampoi da buoi-buoi nu odow (Danel 7:13-14). Lati no deetu tumuju da Maangun Yesus. Maangun Yesus minagu da Anak Manusia da Oyo gitu kabaata binansuk nu Maangun Yampuon inatong anyalamot da ulun-ulun intad da ukuman nu dusa lo (Malkus 10:45). Anak Manusia anggilad lati no da Mesias atau Klistus (Yohanes 12:34). Yesus minagu da mudil nu dili No Anak Manusia, gama nu gitu akasimuni lati no da ulun-ulun kaa antalimo Joo.
Anak nu Yampuon Anak Allah Galal pinakai nu Yesus da ingalan No, Oyo gitu intad da Yampuon. Oyo gitu inatong ajadi da ulun, bokon ka intad da asil nu nantamil kuusoi am daanu. Maangun Yampuon nu bayag gitu nangutus da Yesus, Anak No anyalamot da ulun (Yohanes 3:16). Yesus poyo Laja, sulut nu Daut. Woktu nu Yesus binaptis, Maangun Yampuon minagu da Yesus intad da kawanan, “Gitu No Anak inumpada-Ku, Okow No napasonong da pinyawo-Ku” (2 Samuel 7:14; Lukas 1:31-33). Ulun nu Islael poyo sabiton da anak nu Maangun Yampuon, sobop ilo gitu no pinili nu Maangun Yampuon ajadi da umat No (Kalualan 4:22). Ulun mintopot da Klistus, ilo poyo sabiton da anak nu Maangun Yampuon (Yohanes 1:12-13; Loma 8:14, 29; Galatia 3:26-27; 4:6-7; Epesus 1:5; 1 Yohanes 2:1-2).
Anggul Anggur Doono masom tuumuu, tanamin nu ulun nu Yahudi da kabun lo. Puun no kono da bakag dumilit am akabua. Bua no aamis akanon, am bisa poyo timug no inumon (Yohanes 2:3-10).
Angumpama Mengumpamakan, Perumpamaan Gitu no pakayon nu Yesus angajal da ulun-ulun da jomon No, oyo gino sonto nu salita. Salita gitu, salita kono da bayag sangodow-ngodow am atu yak ambeet eelong nu mato. Tapi salita gitu angajal da mudil nu Maangun Yampuon, ulun, am bookon. Yesus ambeet angajal da umpama son kono nu mudil nu bayag da nalom pamalintahan No ajadi da Laja.
Anyamba Menyembah Angalaku da atu yak alus lakuon, gino taanuan nu ulun gino angalogo da saambeen no. Masom-masom yak pakuan nu ulun, son kono nu mudil lo anyamba. Sino aginatud tinumuad, sino poyo anyolob da kulban pasambeen, sino poyo amuji da sambeen.
Atulan nu Musa Aturan Musa, Hukum Taurat, Hukum Tuhan Limo kitob baabala atulan nu Musa tinulis no, oyo gino kitob Kajadian, Kalualan, Imamat, Bilangan, baya da Ulangan. Atulan gitu alus bayeen nu ulun mintopot da Maangun Yampuon. Intad da sajoo nu atulan gitu, apulu palinta nu Yampuon ooligan baya da apanayan bonsoi (Kalualan 20:2-17).
Baaloi Sambayang Kemah Suci, Kemah Pertemuan Baaloi intokon nu ulun nu Yahudi basambayang baya da sambayang, da woktu lo inakow bakuliling da lapangan nu agis, da jomon nu nabi Musa naayag namimpin dilo sinumila intad da Mesil. Baaloi pinabonsoi nu Maangun da Musa, binonsoi intad da bahan alogo, tinaapan da kaayin (Kalualan 25:8-9; 26:1-37; 39:32-43; 40:17-25). Baaloi gitu bisa baluyin-baluyin nu ulun nu Islael sampoi da pamalintahan ni Salomo. Woktu ni Salomo napongo namangun da Baloi nu Yampuon, sajoo nu alat-alat da baaloi binonsoi ni Musa kaano yo bagu pinakai lo.
Babadu juba Baju jubah Babadu juba gitu, pakayon nu ulun Yahudi. Babadu gitu abuat intob da mato nu kalayam.
Baloi nu Yampuon Bait Allah, Bait Suci Baloi intokon nu ulun nu Yahudi antiimung basambayang. Baloi nu Yampuon gitu, binangun nu laja Salomo da musim 960 kaapo musim masehi. Ilo biasa no munsop da kaapul nu baloi gitu. Ulun amimpin apasamba yak bisa munsop da nalom. Musim 586 kaapo musim masehi, Baloi nu Yampuon gitu inansul nu palajulit nu bangsa Babel. Tapi musim 515 kaapo musim masehi, binangun nanduli nu Selubabel. Woktu nu musim 19 kaapo musim masehi, Baloi gitu binonsoi nu laja Elodes labi maayo. Kono da pinasuku nu Yesus, Baloi nu Yampuon inansul da musim 70 masehi. Baloi gino doono yak, sino da baloi gino gu da kuta Yelusalem yak. Gu da nalom nu Baloi nu Yampuon gitu sino duo intokon,
1. Intokon alisi bonsoi. Kaano ulun bisa mumpos da nalom intok gino, Imam Maayo nu agama Yahudi yak.
2. Intokon alisi. Suang nu imam angawakil da ulun Yahudi mumpos da nalom intok gino. Gu da Baloi nu Yampuon sino apat kaapul,
a. Kaapul intokon nu suang nu imam.
b. Kaapul intokon nu suang nu kuusoi nu Yahudi.
c. Kaapul intokon nu suang nu daanu nu ulun Yahudi.
d. Kaapul intokon nu suang nu ulun bookon ka ulun Yahudi.
Kaapul numul doono gino amaad bonsoi da Baloi nu Yampuon. Kaapul numul apat gino, kaapul aalud bonsoi intad da Baloi nu Yampuon.
Baloi Sambayang Rumah ibadat, Sinagoge Baloi gino kaano anggilad da Baloi nu Yampuon. Baloi gitu asuang da alial nu Islael. Baloi gitu ambeet pakayon nu ulun Yahudi balajal am angajal da kitob tinulis nu Musa, ulun basunot, ulun bakawin, am pagaluludan.
Baptison, Amaptis Dibaptis, Membaptis Pakayon da amaptis gitu, oyo gino timug. Lati nu timug gitu, taanuan da dusa pongo inampun (Malkus 1:4). Baptison gitu poyo, baalati da taanuan takau maya da Maangun, am taanuan da itakau pongo doono da nalom nu Yesus Klistus, sobop Oyo pongo naayag nanduli intad da kapatayan No (Loma 6:3-4). Da nalom nu kitob baabala nu Maangun, sino lati amaptis poyo da Alingu Alisi. Gitu lati no Alingu Alisi bakuasa da bayag nu ulun am oyo gino antalimo da kuasa intad da Yampuon kabaata. Sino po baptison da apuy, gino lati no baptison da nalom nu duol nu lasa anguji da iman.
Bapuasa Berpuasa Agadot da bitil kaa aangkan am anginum, agadot da tiok nu pinyawo. Lati nu ulun nu Yahudi bapuasa oyo gino, ilo angalogo da Maangun Yampuon. Ilo angalaku deetu, basonsol ilo da pinyawo lo da ilo pongo nangalaku da dusa. Pagulidan lo da ilo akaalap da duol da lasa atau sino abangkayan, gama nilo bisa ampolok akitulung da Maangun da paat lo akaalap da duol nu lasa.
Bayag onsoi da buoi nu odow Hidup Kekal Bayag kaa panai apongo. Bayag intok asonong bonsoi suku da buoi nu odow. Bayag gitu tinaakan nu Maangun Yampuon. Bayag da dunia gitu suku da buoi no da sulga. Ulun mintopot, bayag no maapo ambaaya da Maangun Yampuon tulus-tulus. Ulun ingkaano mintopot, numaapo bayag no da nalaka (Danel 12:1-3). Lasul Paulus minagu da jemaat da Kolintus, inan nu sajoo nu ulun mintopot da Yesus inatoi, tapi Maangun Yampuon napaduli dilo aayag, inan nilo bagu ajadi da inan lohani (1 Kolintus 15:35-54).
Beelau da Paska, Odow Paska Hari Paskah Paska gino, odow nu ulun Yahudi angingot da woktu nu akion lo binibas, da ilo inalap da ulipon nu ulun Mesil. Da woktu gino li, Yampuon guang amatoi da sajoo nu anak kinatuan kuusoi da tana nu Mesil. Tapi ulun nu Islael binansuk ilo nu Yampuon anyumbali da anak nu kiiyum domba, daa no piidin da tiang nu tobon nu baloi lo. Woktu nu maleekot nagapatoi, nakeelong da daa gino, nanseel yak oyo (Kalualan 12:1-51). Paska da nalom nu bahasa Iblani, lati no *anseel*. Sampoi deeno gitu ulun nu Yahudi atu yak intok lo, totop beelau maayo da paska satiap musim. Ilau nilo gino anyumbali da domba am akanon. Tapi itakau ulun Klisten deeno gitu, beelau da Paska, angingot da Yesus naayag nanduli intad da kapatayan No.
Butas Maayo Danau Butas gitu kono da timug nu doom maayo, gu da alial nu gana yak intok no.
Domba Domba Domba gitu, kiiyum babulu akapal angaangkan da tuumuu. Kiiyum gitu anggilad da kambing. Kiiyum gitu apanting da adat nu ulun Yahudi, bisa akanon am pasambeen da Maangun Yampuon anulut da palinta No.
Dusa Dosa Kalakuan alaat angapu da baabala atau palinta nu Yampuon. Gino lakuon am pikilon lumisang da kaguang nu Maangun Yampuon.
Elia Elia Doono ulun nabi nu Yampuon, nabi naayag paguulu. Kaano inatoi, kinumakat kabaata inuli da sulga pinakuan nu Yampuon (2 Laja-Laja 2:11). Nabi Elia naago, sobop oyo asuang nangalaku da katulayan intad da Maangun Yampuon. Maangun Yampuon minagu da Oyo angutus da nabi Elia da nalom nu dunia gitu poyo (Maliyaki 3:1-4, 4:5-6). Woktu nu ulun Yahudi nakeelong di Yohanes Pambaptis, ilo bapikil oyo gino nabi Elia inatong nanduli (Malkus 6:14-15). Anulut da ulun Yahudi, ilo mintopot da Elia gino totop anduli matong da odow kadatangan nu Laja Anyalamot (Matius 17:10-11). Yesus ininagu, Yohanes Pambaptis gino no namagonop da janji nu Elia matong anduli gino (Matius 17:11-13).
Elodes Herodes Elodes gino laja nu Loma batugas namimpin da alial nu Yudia. Da nalom nu Paljanjian Dabagu sino apat ulun beengalan di Elodes. Doono Elodes Maayo namalinta da woktu nu Yesus inipus. Oyo gitu namansuk namatoi da sajoo nu anak kuusoi umul duo musim suku da anak-anak laagang da Betlehem (Matius 2:1-12; Lukas 1:5).
Gabilil Gabriel Ingalan doono maleekot bansukon nu Maangun Yampuon. Da nalom nu Paljanjian Leed, oyo napeelong da dili no di Danel (Danel 8:16; 9:21). Da nalom nu Paljanjian Dabagu, oyo gitu inutus nu Maangun Yampuon, namala di Jakalia da andu no Elisabet nagali (Lukas 1:11-20). Oyo gitu poyo namala di Malia da oyo nagali, sampoi da i Malia agipus da Yesus (Lukas 1:26-27).
Galasa Gerasa Gitu doono kuta da apulu kuta beengalan da Dekapolis, onom pulu kilumitil intad da butas maayo nu Galilia.
Galilia Galilea
1. Ingalan nu alial da Islael da sampilang utala.
2. Ingalan butas maayo da Islael, sinabit poyo da butas maayo Genesalet am sinabit poyo da butas maayo Tibelias (Lukas 5:1; Yohanes 6:1; 21:1).
Gampuan Hantu, Roh orang mati Gampuan gino kono da baada, kaano ansi no baya da tulang no. Da jomon nu Yesus, asuang ulun bapikil ulun matoi ajadi da gampuan. Sajoo nu ulun matoi mintopot da Yesus, totop muli da sulga mudong ambaaya da Maangun Yampuon. Atu yak ulun kaa mintopot da Yesus, oyo mudong da intok nu aduol da lasa (Lukas 16:19-31; 23:43).
Gandum Gandum Tuumuu gandum gitu, kono da bilod umbang no, tanamin da umo atau kabun. Gitu no inakano puunon bonsoi nu ulun nu Yahudi. Gandum gitu asuang tanamin da Islael, sino poyo tinanom da negeli bookon. Gandum gitu gilingon ajadi da tupung. Tupung gitu bonsoyon da luti, gino no inakano nilo.
Gubelnul Gubernur Ulun maayo amalinta da doono alial, oyo gino alial nu Polopinsi.
Gulu Taulat Ahli Taurat Ulun asawat da sakula, apaanai angajal da atulan nu Musa, ajalon lo da ulun. Gulu Taulat giatu, sampiduo intad da ulun Palisi, am sampiduo poyo intad da ulun Saduki. Da jomon nu Yesus, sino taatalu tugas kalajeen nilo,
1. Anyalin da kitob tinulis ni Musa.
2. Angajal da kitob tinulis ni Musa.
3. Anaak da baabala da ulun, gama nilo bisa maya da atulan kitob tinulis ni Musa da nalom nu bayag nilo tukid odow.
Imam Imam Da jomon nu Musa sampoi da jomon nu laja Salomo, imam gitu ulun intad da sulut nu Yalun pinili nu Maangun Yampuon angalayani da Baaloi Sambayang. Da jomon nu Yesus, ilo angalayani da Baloi nu Yampuon gu da Yelusalem. Imam sino talu tingkot, oyo gino Imam Maayo agama nu Yahudi, Katua nu imam, am baya da imam-imam. Kalaja nilo apasamba da kiiyum sumbalion da mesba, intok anyolob da pasambeen da Maangun Yampuon, angajal da atulan intad da Yampuon am amolokot da ulun. Ilo gitu pilion intad da ulun nu suku Lewi (Lukas 10:31-32; Iblani 9:6; 10:11).
Imam Maayo Imam Besar Imam Maayo gino doono ulun yak, pilion intad da sulut nu Yalun ajadi da pamimpin nu katua-katua nu imam, am atu yak matoi gantion nu ulun dabagu. Da nalom samusim, igondo yak oyo munsop da nalom nu Intok Alisi Bonsoi, apalakow da pasambeen da pangampunan da dusa no kabaata baya da dusa nu ulun suang (Iblani 9:7). Deeno gitu Yesus Klistus kono da Imam Maayo naayag suku da buoi-buoi no (Iblani 4:14; 5:10). Imam Maayo baya da katua-katua nu imam, ilo gino poyo ulun nu Pangadilan Agama nu Yahudi.
Iman, Mintopot Iman, Percaya Lati nu iman gitu, mintopot bonsoi da atu kaapo palna neelong. Mintopot da Maangun Yampuon gino, baalati mintopot da atu dinagu nu Maangun Yampuon am guang angalaku da dinagu nu Maangun Yampuon gino.
Kabol Onsoi Kabar Baik, Injil
1. Kabol gitu amala da Yesus gino Laja anyalamot am amala poyo da koson kono nu pamalintahan nu Yampuon ajadi da Laja, pangajalan No, kapatayan No, am padulion No aayag intad da kapatayan No.
2. Kabol Onsoi intad da Yampuon gitu, tinulis da kitob Matius, Malkus, Lukas, baya di Yohanes da nalom nu Paljanjian Dabagu.
Kapelnaum Kapernaum Kapelnaum gino ingalan nu kuta, asuang da papeet, sino da maligi utala da butas maayo Galilia, intok nu palajulit nu Loma amaajaga da ulun ansiingil da pajak da alial gino.
Katulayan Keajaiban, Mujizat Maangun Yampuon giiyo atulai. Buoi nu Yesus nangajal da dunia gitu, nasuang no katulayan linaku No. Sonto no, napakaayag nanduli da ulun pongo inatoi, inakow da sawat nu timug, napalawo da panyakit nu ulun.
Kayisal Kaisar Kayisal gitu laja maayo nanguasa da kalajaan nu Loma. Sampiduo ulun nu Loma anganggop da laja maayo gino kono da Maangun. Ulun-ulun nu Yahudi kinuasa nu ulun nu Loma da woktu nu bayag nu Yesus da dunia gitu. Oyo gitu pamimpin maayo da sajoo nu alial nu Loma, munsop po deetu Yudia baya da Galilia. Kayisal namalinta da woktu gino li Kayisal Agustus (31 kaapo musim masehi suku da 14 pongo nu musim masehi, ileen da Lukas 2:1). Kapongo yo namalinta, gantii yo nu Kayisal Tibelius namalinta da jomon ni Yohanes Pambaptis baya di Yesus (14-37 kapongo nu musim masehi).
Keledai Keledai Keledai gitu kiiyum, ambeet pakayon nu ulun nu Yahudi angubit da biinawo lo am panuumpangan nu ulun makow da aalud.
Kemenyan Kemenyan Pulut nu toon aamis owow no da oyo solobon. Kemenyan gitu pakayon nu ulun nu Yahudi anyamba da Maangun, anulut da adat nilo (Kalualan 30:34-37; Iblani 9:4). Kemenyan gitu poyo pinakai nu laja-laja oyo gino ulun majus, nanyamba da Yesus da woktu No inipus (Matius 2:11).
Kitob Baabala nu Maangun Kitab Suci, Alkitab Buku intok nanulis da palinta nu Maangun Yampuon. Kitob Baabala nu Maangun sino duo masom, oyo gino Kitob Paljanjian Leed baya da Kitob Paljanjian Dabagu. Paljanjian Leed gino 39 kitob tinulis ni Musa baya da ulun nabi-nabi bookon, kaapo Yesus inatong da dunia gitu. Da nalom nu Paljanjian Leed gitu, sino Paljanjian nu Yampuon da Yabalaham suku da sulut no (Kajadian 17:1-8). Maangun Yampuon poyo nangada da Paljanjian da ulun nu Islael da Musa (Ulangan 29:10-15). Yampuon poyo nangada da Paljanjian da laja Daut (2 Samuel 7). Kitob Paljanjian Leed tinulis da musim 1500-400 kaapo musim masehi. Paljanjian Dabagu gitu 27 kitob tinulis nu mulit-mulit nu Yesus baya da lasul-lasul bookon. Da nalom nu Paljanjian Dabagu gitu, Yampuon nangada da Paljanjian Dabagu da ulun da Yesus Klistus (2 Kolintus 3:6-8; Iblani 7:18-19, 22; 8:6-12; 9:15; Galatia 4:21-31).
Kudong Kusta Panyakit nu kungkung da inan kalaanan. Inan nu ulun apanu nu piilat. Ulun gitu kaano yo bisa tumungu da ulun bookon, am kaano yo bisa maya sambayang, sobop ilo lalangon basambayang, am sampuluin da intokon kaa tumungu da ulun nu pagun. Oyo alus minggalud da ulun bookon, atau kalualga no, am amakai da pakayan asumping-sumping. Ulun apilat nu panyakit kudong, bisa ooligan intad da kungkung nu inan no oompot nu piilat, baya da abuk no lumulus. Oyo poyo amakai da lunsing am ampaluap, “Alidok, alidok” nu gu yo da jambatan, gama nu ulun bisa apaanai da oyo ulun napilat nu kudong, am ulun bagu agiliw anseel da intokon gino.
Laja Daut Raja Daud Laja nu suku nu Islael, akion ni Yusup, naayag takula-takula latus musim da woktu nu Yesus kaapo inatong da dunia gitu. Laja Daut gitu poyo, akion nu Yesus. Maangun Yampuon nabajanji joo, da sulut no gitu totop ajadi da laja suku da buoi-buoi nu odow.
Laja Salomo Raja Salomo Laja Salomo gitu, anak ni laja Daut, najadi da laja nu Islael. Oyo gitu aago da ulun babayag baya da apintol baikmat, pinakuan nu Maangun Yampuon.
Lapangan Batuumuu Padang Berumput Alial maayo batuumuu am aluas, intokon nu kiiyum angaangkan da tuumuu kono da kiiyum domba.
Lapangan nu Agis Padang Pasir Tana aluas baagis, gu deetu kaano tuumuu baya da toon. Alial gitu apua am batiidong. Timug baya da tuumuu da intok gitu keeti yak bonsoi. Kaano ulun atotop mudong deetu, tapi ulun-ulun ambeet adingog da salita nu nalom nu Kitob Baabala nu Maangun, sino no ulun inudong deeno minjakin-minjakin yak. Bangsa nu Islael palna nabakuliling deetu apat pulu musim, tumuju da tana jinanji nu Maangun Yampuon dilo. Am Daut palna nagidu deetu da woktu nu laja Saul guang amatoi joo.
Lasul Rasul Lasul gino, ulun binansuk nu Yesus Klistus apasuku da kabol onsoi intad da Yampuon. Kabol alus pasukuon lo gitu, oyo gino amala da Yesus Klistus nanduli naayag intad da kapatayan No. Sobop lasul giatu pongo nanyasi da sajoo nu najadi da Yesus (Salita nu Lasul-Lasul 1:21-22, 26). Lasul gino poyo apasuku da ajalan nu Klistus da ulun maya Joo (Salita nu Lasul-Lasul 2:42; Epesus 2:20). Ulun inaya da Maangun Yesus, ilo najadi da lasul timpuun (Matius 10:1-4). Paulus poyo sinabit da lasul, sobop oyo pongo nakeelong da Yesus, am Yesus poyo napeelong da dili No joo (Salita nu Lasul-Lasul 9:1-2).
Ligion Legion Ligion gitu, ingalan nu alingu alaat, sinumulod da ulun nu Galasa (Malkus 5:9, 15; Lukas 8:30). Oyo iningalanan deetu, sobop asuang alingu sinumulod da ulun nu Galasa gino. Ligion gitu ingalan nu palajulit nu Lomawi, suang nilo gitu kila-kila onom libu palajulit. Alingu alaat gino poyo asiiga bakulumpuk-kulumpuk (Lukas 8:2; Matius 12:45).
Maleekot Malaikat Maleekot da nalom nu bahasa Iblani lati no utusan. Maleekot gino kalaja no angalayani da Maangun Yampuon, angubit am apasuku da bilin nu Maangun Yampuon intad da dagu No (Bilangan 22:22-35, Lukas 1:11-20, 26-38; Matius 1:20-22). Maleekot angalaku atu kaguang nu Maangun Yampuon am angawakil da Maangun Yampuon. Ilo anyili da ulun Yahudi (Kalualan 14:19, 23:23, Masmul 34:7, 6:22). Maleekot poyo angukum da pagapu nu ulun mintopot da Maangun Yampuon (Kalualan 12:23, 29-30; Yesaya 37:36; Matius 13:49-50; Wahyu 14:14-20, 20:1-3).
Mamon Mamon gino, bahasa nu ulun Yunani, lati no kakayaan intob da dunia gitu yak.
Mesba Mezbah Da woktu nu Baloi nu Yampuon kaapo sino, ulun nu Yahudi amonsoi da dapuan intad da batu susunon da sawat no. Ilo anyolob da kiiyum sumbalion pasambeen lo da Maangun (Kajadian 8:20; 13:18). Da woktu lo sino da Baloi nu Yampuon bagu, panyaalaban da palsambaan binonsoi intad da toon, kono da mija linapis da timbaga. Mija gitu gu da kaapul nu Baloi nu Yampuon, intok anyolob da kiiyum sumbalion atau bookon, pasambeen lo da Maangun Yampuon (Kalualan 20:1-8; Matius 5:23-24; Wahyu 6:9).
Mesias, Klistus Mesias, Kristus Mesias atau Klistus gitu galal. Maangun Yampuon pongo nabajanji da laja Daut, doono ulun intad da sulut no suku da buoi no amalinta ajadi da laja (2 Samuel 7:16). Klistus gitu laja jinanji maapo amibas am anyalamot da ulun Yahudi. Da nalom nu bahasa Iblani sabiton da Mesias, bahasa nu Yunani sabiton da Klistus.
Mulit Murid Mulit gitu ulun maya balajal intad da doono gulu. Ilo balajal intad da atu dinagu, am balajal mudil kaayagan nu gulu no. Yesus namili da apulu duo ulun najadi da mulit No, tapi sino poyo ulun bookon inaya Joo. Sajoo nu ulun mintopot Joo, sabiton poyo da mulit nu Yesus. Yohanes am ulun Palisi poyo maal da mulit-mulit.
Musa Musa Musa naayag balatus musim da woktu nu Yesus kaapo inatong da dunia gitu. Oyo namimpin da bangsa nu Islael da woktu nu Maangun Yampuon namibas dilo intad da bangsa nu Mesil nangajaja dilo. Buoi nilo inakow intad da tana Mesil suku da tana Kanaan pongo jinanji, Maangun Yampuon nanaak da Musa apulu palinta am palinta-palinta bookon poyo. Musa nanulis da palinta gitu am nangajal da ulun nu Islael. Palinta nu Maangun Yampuon gino sino da nalom Kitob Baabala nu Maangun angatul da kaayagan nu ulun Islael.
Nabi Nabi Ulun pinili nu Maangun Yampuon apasuku da bilin atau atu daguon nu Yampuon. Da nalom nu Paljanjian Leed, asuang ulun sabiton da nabi, kono di Yesaya, Yelemia, Elia, Elisa am asuang nabi bookon poyo. Da nalom nu Paljanjian Dabagu, Yohanes Pambaptis sabiton poyo doono ulun nabi (Matius 11:9). Yesus poyo sabiton da ulun nabi, imam, am laja. Sino po ulun Klisten napasuku da baabala nu Maangun, sabiton lo poyo da nabi (Salita nu Lasul-Lasul 11:27-28; 13:1; 15:32; 21:8-10; 1 Kolintus 12:28; 14:29-33; Epesus 4:11).
Nalaka Neraka Intokon angukum da Seetan Maayo baya da anak bua no am ulun-ulun kaa mintopot da Yampuon. Gu deetu, ulun aduol da lasa bonsoi kaa panai apongo. Gu da nalaka gitu poyo sino apuy alaang, kaano yo panai alasa (Matius 25:41; Yudas 1:7; Wahyu 20:10-15).
Nubuat Nubuat Nubuat gino, bilin intad da Maangun baleen da ulun nabi, koson kono nu kajadian-kajadian da odow sangilan, am pasukuon bagu nu ulun nabi-nabi da ulun-ulun da dunia gitu atau tulisin lo.
Nuu Nuh Nuu gitu, ulun mintopot am maya da palinta nu Yampuon, namonsoi da padaau bapangku maayo. Inudanon no baya da andu no, anak no, inuot no, am baya da sajoo nu kiiyum da woktu nu dunia gitu napilat nu losob (Kajadian 6:8-9, 29; Matius 24:37-39; Iblani 9:4; Wahyu 8:3).
Odow Maayo nu Ulun Yahudi Hari Sabat orang Yahudi Odow gino odow sambayang nu ulun Yahudi. Itungon intad da mee nu odow Jumat, paas mato nu odow luminyob suku da mee nu odow Sabtu da mato nu odow luminyob. Odow gitu intok lo anyamba da Maangun Yampuon, am odow intok lo agobos da kalaja. Ulun Yahudi maya da atu tinulis nu Musa da atulan no. Ulun Yahudi kaano ilo bisa angkalaja da odow Maayo (Kajadian 2:2-3; Kalualan 20:8-11; 31:12-17).
Odow nu Ilau Luti Kaa da Tapai Kumambang Hari Raya Roti Tidak Beragi Mengembang Ilau tulu odow lakuon nu ulun Yahudi da woktu nilo pongo beelau da Paska. Ilo aangkan da luti kaa da tapai kumambang saminggu buoi no, ampuonom da ilo pongo sinumila intad da Mesil (Imamat 23:5-8).
Pajak Pajak Pajak gitu, uwong punguton nu pamalinta intad da ulun-ulun nu doono negala. Bahasa bookon da pajak gitu, bea.
Palsambaan Persembahan Palsambaan gitu, naakin da Yampuon. Bisa yo uwong, bisa yo kono da alata, bisa poyo kono da dili kabaata, am bisa poyo kono da bookon-bookon.
Pangalisian da libos agipus anulut da Atulan nu Musa Penyucian setelah melahirkan menurut Aturan Musa Anulut da atulan adat nu ulun Yahudi, daanu libos agipus inanggop alidok. Oyo alus angubit da kiiyum pasambeen da Maangun, bagu yo inanggop alisi (Imamat 12:4-8).
Pilatus Pilatus i Pilatus gitu, gubelnul nu Lomawi batugas amalinta da alial nu Yudia musim 26-36 musim masehi. Duo talu ulun nanulis da asol-usul nu bangsa nu ulun nu Yahudi da balatus-latus musim timpuun li. Ilo nanulis, i Pilatus gitu ulun pamimpin alaat da pinyawo, pamimpin kaa paladuli da Baloi nu Yampuon, baya da kaano maya da palinta nu agama nu ulun Yahudi.
Pildaus Firdaus
1. Da nalom nu Kitob Paljanjian Leed, sino doono kabun maayo ingalan no kabun Eden, namulian nu Maangun Yampuon di Yadam baya di Yawa (Kajadian 2:2-8).
2. Da nalom nu Paljanjian Dabagu, Pildaus gino, ingalan bookon nu sulga. Da nalom nu bahasa nu Pelsia, intokon nu alingu-alingu nu ulun mintopot da Yesus da oyo pongo matoi padulion pakaayagon (Lukas 23:43; 2 Kolintus 12:2-4; Wahyu 2:7).
Salip Salib Salip gitu toon basaampang lajakin da tana. Ulun Loma amakai deetu angukum sampoi matoi da ulun alaat. Yesus angumpama da ulun aduol da lasa da bayag no sobop oyo maya Joo, kono da ulun anyaan da salip.
Samalia Samaria Ingalan nu alial nu Yahuda nabalolot da alial nu Galilia (Yohanes 4:3-4). Asol nu ulun Samalia giatu, intad da sowog nu ulun nu Islael kaa nakabaya inukum da Babel. Ilo angandu am baandu da suku bookon, kaano bagu ilo asili nu ulun nu Islael, nandoongot no bagu suku lo. Adat baya da agama nilo bagu nambaluy, kaano bagu tinongoi lo adat baya da agama lo kabaata ulun nu Yahudi. Gino intok nu ulun nu Yahudi kaa doono ukum da ulun nu Samalia (2 Laja-Laja 17:24-41; Lukas 10:29-37; 17:11-19).
Seetan Maayo Iblis Seetan atau alingu alaat asuang, tapi pamimpin maayo atau katua no doono yak, oyo gino Seetan Maayo. Timpuun noli oyo gitu maleekot nu Yampuon, tapi oyo gitu nakumpow am nangapu da Yampuon, oyo guang apanggilad da dili no kono da Yampuon. Sampoi yo bagu dinatuan da dunia gitu, baya da maleekot-maleekot bookon inaya joo (2 Pitulus 2:4; Yudas 1:6). Oyo poyo apeelong da dili no kabaata najadi da niipo namokot di Yawa, namansuk nangupu da bua kaa bisa akanon lo, oyo gino bua kapaanayan da onsoi baya da alaat (Kajadian 3:1-6). Sampoi deeno gitu kalaja nu Seetan Maayo gino angajajab da suang nu ulun, gama kaa guang mintopot da Yesus am kaa guang maya da kaguang nu Maangun Yampuon. Tapi kuasa nu Seetan Maayo gitu awali noyo da kuasa nu Yesus (1 Yohanes 3:8). Da woktu nu dunia gitu kiamat maapo, kuasa nu seetan labi agawat, tapi totop yo po awali da kuasa nu Yesus. Am Seetan Maayo baya da anak bua no, tapidin da tingkayu nu apuy kaliwot da laang (Wahyu 19:11-21).
Seetan, Alingu Alaat Setan, Roh jahat Seetan atau alingu alaat mumpos da nalom nu ulun am angasow, bisa poyo apakaduol da lasa da ulun. Alingu alaat maal da kuasa, angajajab atau anyiksa da ulun. Oyo gitu asuang am maal da doono pamimpin atau katua sabiton da Seetan Maayo (Matius 25:41; Wahyu 12:9). Tapi Yesus labi bakuasa intad da sajoo nu seetan giano (Matius 28:18; Lukas 11:20-22; Loma 8:38-39; Epesus 1:21; Kolose 2:15; 1 Pitulus 3:22).
Siang nu Yoldan Sungai Yordan Siang nu Yoldan gitu, siang timug da tana nu Islael. Yohanes Pambaptis namaptis da Yesus da siang gitu (Malkus 1:5-9). Uud nu timug gitu intad da tidong Elmon, tinumiis nanseel da butas maayo nu Galilia, inalung da tingkayu beengalan da Tingkayu Matoi.
Sodom baya da Gomola Sodom dan Gomora Kuta Sodom baya da Gomola gitu gu da maligi nu Tingkayu Matoi. Kuta gitu inansul nu Maangun Yampuon da woktu ni Nuu naayag da Paljanjian Leed, sobop lakuon nu ulun nu kuta gitu alaat bonsoi, sampoi Yampuon nangalaku dilo kono deeno (Kajadian 19:24-29). Da nalom nu Paljanjian Dabagu, kuta gino sabiton poyo (Matius 10:14-15; 11:23-24; Lukas 17:28-29; Loma 9:29; 2 Pitulus 2:6; Yudas 1:7; Wahyu 11:8).
Sulga Sorga Sulga gitu, intokon onsoi bonsoi, intokon asonong bonsoi, pongo sinadia nu Maangun Yampuon da ulun-ulun mintopot Joo am maya da dagu No. Sulga gitu intokon nu Maangun Yampuon inudong. Yesus minagu, Maangun Yampuon gino Yama No da nalom nu sulga (Matius 6:1-9). Yesus kabaata inatong intad da sulga (Yohanes 6:38-42) am pongo nanduli da sulga (Lukas 24:51), numaapo Oyo matong anduli da dunia gitu intad da sulga (Lukas 21:27).
Sunot Sunat Maangun Yampuon amansuk da sajoo nu ulun nu Islael da sajoo nu anak kuusoi alus sinunot, gino no taanuan yampu No (Kajadian 17:9-14). Sunot gino, angotob da lompong nu kungkung nu kooyuan nu anak kuusoi anulut da agama nu Yahudi.
Tapai Ragi Tapai gitu, pamaaya da kue kuluoton apakambang da tupung. Tapai gitu inalap nu Maangun Yesus da umpama, da ajalan nu ulun Palisi amalid da ulun (Matius 16:6-12; Lukas 12:1; 1 Kolintus 5:6-8; Galatia 5:9). Tapai gitu poyo, inalap nu Maangun Yesus da umpama da mudil nu pamalintahan nu Yampuon bakambang da dunia gitu (Matius 13:33; Lukas 13:20-21).
Tiidong Jeetun Bukit Zaitun Tiidong gu da intokon nu alial solod da timul nu Yelusalem, da lipag nu Kidlon. Tiidong gitu poyo beengalan da Getsemani (Matius 26:36; Malkus 14:32; Lukas 22:39; Yohanes 18:1-2).
Toon Ala Pohon Ara Puun nu toon ala gitu tuumuu da tana nu Islael. Bua no akanon am bisa pajadion poyo da uwot da baloi. Puun nu ala gitu, duo kali yo anggawa da samusim. Bulan katalu badoon anangumbus, tapi sino no bua no luumoot bisa akanon. Bua no luumoot gitu ajadi da taanuan da bua no gitu maapo maayo am onsoi da bulan kabalu. Kaa poyo angkabua da bulan katalu, baalati kaanyo po anggawa da bulan kabalu.
Ulipon Budak, Hamba, Pelayan Ulipon gitu, ulun angkalaja ajadi da palayan da ulun bookon. Ilo angkalaja da ulun, kaano ilo gajion, sobop ilo pongo tinabus nu tuan lo. Ilo gitu ulun nawali da polong, pakaseen pakalajeen am ulun munsikin.
Ulun Amaajaga da domba Gembala Ulun amaajaga da kiiyum pialeen kono da domba gu da lapangan aluas batuumuu. Ulun gitu batugas amaakan da domba baya da amaayud da intokon batuumuu baya da batimug. Ilo poyo angajaga da domba gitu alaa tokowo nu ulun, baya da amaajaga da kiiyum bookon aangkan dilo.
Ulun Ansiingil da Pajak Pemungut Cukai Ulun ansiingil da pajak gitu sino noyo da paat nu bayag nu Maangun Yesus da dunia gitu li. Ulun ansiingil da pajak gitu, pagawai nu ulun Yahudi tapi ilo angkalaja da pamalinta nu kalajaan nu Loma. Ilo ansiingil da pajak labi asuang intad da pongo tinantu. Gino sobop no ulun Yahudi alaagai dilo. Ilo gitu inanggop nangalanggal da atulan nu agama baya da bangsa lo, jadi kaano ilo apantos anyamba da Yampuon.
Ulun Lewi Orang Lewi Ulun Lewi gitu, doono suku intad da apulu duo suku nu ulun nu Islael.
Da nalom nu Kitob Paljanjian Leed, Lewi sibonol no ingalan nu anak ni Yakup katalu (Kajadian 29:34). Sulut ni Lewi sabiton poyo ulun Lewi. Ilo pinili nu Yampuon angalayani Joo. Ilo anyiap da kulban palsambaan da Maangun Yampuon, am apalisi da Intok Alisi da Baloi nu Yampuon. Sino doono ulun sulut ni Lewi beengalan di Yalun. Oyo gitu no timpuun najadi da imam. Anulut da atulan nu Musa, ulun imam alus intad da sulut ni Yalun yak (Bilangan 3:1-13; 18:1-7).
Da nalom nu Kitob Paljanjian Dabagu, sino poyo doono mulit nu Yesus beengalan di Lewi, sabiton poyo di Matius (Malkus 2:18; Lukas 5:27; Matius 9:9).
Ulun nu Pangadilan nu Agama Yahudi Mahkamah Agama Yahudi Ulun giatu tujum pulu ulun suang lo. Ilo inanggop ulun aagol bonsoi da bangsa nu Yahudi. Ilo pinimpin nu Imam Maayo nu agama nu Yahudi. Kulumpuk nu ulun giano najadi da lambaga asawat da agama nu Yahudi, nangalap da kaputusan angukum am amibas da ulun.
Ulun Palisi Orang Farisi Ulun Palisi sino da suang lo ajadi da gulu-gulu agama nu Yahudi. Ilo apintol bonsoi am akotog maya da atulan tinulis nu Musa. Asuang atulan dinuangan lo poyo, ilo akotog maya da adat nu akion lo (Matius 15:1-20). Gino intok no ilo angapu da Yesus sobop kaano Yo maya da adat gino.
Ulun Saduki Orang Saduki Ulun Saduki gitu, sibonol no intad da sulut nu ulun Yahudi. Ilo gitu kaano po asuang, kila-kila latusan yak suang lo. Tapi ilo bakuasa da pamalintahan nu agama lo. Kaano ilo asusuk da ulun nu Palisi, sobop ulun Palisi gino maya da atulan tinulis ni Musa, am ilo poyo kaa guang antalimo am maya da atulan nu adat lo. Ulun Saduki kaano po ilo mintopot da maleekot gino sino. Am kaano po ilo mintopot da ulun inatoi anduli aayag (Lukas 20:27).
Ulun Selot Orang Zelot Ulun Selot gitu, intad da kulumpuk nu ulun Yahudi angaapu da pamalintahan nu Lomawi.
Unta Unta Unta gitu ingalan nu kiiyum udanon nu ulun da lapangan nu agis, atahan kaanyo atiinum.
Uwong Dinal Uang Dinar Uwong dinal gitu, uwong isin, mato nu uwong nu bangsa nu Loma, beengalan baya da bagumbol da kayisal. Doono uwong dinal gitu anggilad suang no da gaji nu ulun angkalaja songodow da jomon gino.
Uwong mina Uang Mina Uwong mina gino uwong amas, kila-kila logo no anggilad da 100 uwong dinal. 1 uwong mina gino gaji talu bulan nu ulun angkalaja da woktu gino.
Yabalaham Abraham Yabalaham ingalan intad da Yampuon (Kajadian 17:5). Ingalan no timpuun gitu li Yablam. Yabalaham naayag balatus-latus musim paguulu. Asol no intad da Ul-Kasdim gu da Mesapotamia Salatan. Maangun Yampuon namansuk joo inakow da negeli tinantu nu Maangun Yampuon joo. Maangun Yampuon namonsoi da paljanjian da Yabalaham. Oyo asabol am mintopot da paljanjian gino. Maangun Yampuon nabajanji da Yabalaham, da oyo maapo akaalap da sulut asuang. Bial po da woktu gino li kaano anak ni Yabalaham, tapi buoi-buoi bagu paat ni Yabalaham umul no salatus musim, Sala andu no bagu nagipus da anak kuusoi. Anak no gitu iningalanan no di Isak. Isak gitu ama ni Yakup, akion nu apulu duo suku da bangsa nu Islael. Yabalaham gitu mintopot bonsoi-bonsoi da Maangun Yampuon. Gino sobop no oyo ginalal da yama nu sajoo nu ulun mintopot. Yabalaham, yama nu sajoo nu ulun mintopot da Maangun Yesus (Loma 4:13-22). Yabalaham binolokot nu Maangun Yampuon bagu baya da sajoo nu ulun da dunia gitu (Kajadian 12:1-3; 15:5; 17:1-8).
Yakobus Yakobus Sino takula-takula ingalan Yakobus.
1. Yakobus anak ni Sebedeus. Oyo doono ulun mulit nu Yesus. Yohanes pagaka no (Matius 4:21; Malkus 5:37). Yakobus gitu pinatoi ni Elodes Aglipa da musim 44 Masehi (Salita nu Lasul-Lasul 12:2).
2. Yakobus anak ni Yalpius. Oyo poyo doono ulun mulit nu Yesus (Matius 10:2-4; Salita nu Lasul-Lasul 1:13).
3. Yakobus yama ni Yudas. Yudas gino mulit nu Yesus (Lukas 6:16). Saaduo mulit nu Yesus beengalan di Yudas, oyo gino Yudas anak ni Yakobus am Yudas Iskaliot, doono mulit nangulalaat da Yesus.
4. Yakobus ali nu Maangun Yesus, anak ni Malia baya di Yusup (Malkus 6:3). Da woktu nu Yesus nanduli naayag intad da kapatayan No, oyo mintopot bagu da Yesus am oyo najadi da pamimpin da jemaat da Yelusalem (Salita nu Lasul-Lasul 12:2, 7; 15:13; 21:18). Oyo poyo nanulis da sulat Yakobus da Paljanjian Dabagu (Yakobus 1:1).
Yakup Yakub Yakup gino, angkupu ni Yabalaham, anak ni Isak, ali ni Esau. Yakup poyo sabiton di Islael, asol nu apulu duo bangsa nu Islael.
Yampuon ajadi da Laja Allah menjadi Raja, Kerajaan Allah Kila-kila salibu musim da woktu nu Yesus kaapo inipus, Maangun Yampuon pongo nabajanji da laja Daut, oyo gino kalajaan No kaanyo panai apongo (2 Samuel 7:16). Tapi kila-kila apat latus musim kapongo nu pamalintahan nu laja Daut, ulun nu Yahudi ambeet pajajeen nu bangsa bookon bagu. Woktu nu jomon nu Yesus, ulun nu Yahudi da pamalintahan nu Maangun Yampuon kaa panai apongo. Yesus ininagu da dili Nono Laja jinanji nu Maangun Yampuon, Oyo no Laja amalinta. Pamalintahan nu Maangun Yampuon kuon No gitu, kaano yo anggilad da pamalintahan pinikil nu ulun Yahudi. Pamalintahan nu Maangun Yampuon sino da nalom nu pinyawo nu ulun maya am angaku da Yesus gino Laja no. Pamalintahan nu Maangun Yampuon pongo noyo sino da unod takau, tapi woktu nu Yesus matong ajadi da Laja, gino no intok akeelong da sajoo no.
Yelusalem Yerusalem Yelusalem gitu, doono kuta nu ulun Yahudi, intad da jomon nu laja Daut. Kuta gitu apanting, sobop intok pamalintahan lo baya da intok lo anyamba da Maangun Yampuon. Da jomon gitu poyo, sino Baloi nu Yampuon intok nilo nanaak da kulban pasambeen da Maangun.
Yohanes Pambaptis Yohanes Pembaptis Yohanes gitu, anak ni Elisabet baya di Jakalia. Yohanes batugas nanyiap da daalan, gama nu ulun antalimo da Yesus ajadi da Maangun anyalamot dilo (Lukas 1:13-17; 56-57). Yohanes apeengot da ulun-ulun gama lo asiap tumingkuang da atu yak lakuin nu Yampuon dilo (Matius 3:1-2; Malkus 1:4-8; Lukas 3:1-20). Yohanes poyo namaptis da sajoo nu ulun anatang da dusa nilo. Yesus ininagu, tugas ni Yohanes nanyiap da ulun gama lo antalimo da Maangun Yampuon ajadi da Laja lo.