Angumpama kono da pagawai asuang da akal
16
1 Yesus ininagu da mulit-mulit No, “Sino ulun babayag gitu maal da pagawai angulus da alata no. Sino ulun bookon namala da ulun babayag gitu, pagawai no gitu namongo da uwong no. 2 Bagu ulun babayag gitu nagipag da pagawai no gitu am ininagu joo, ‘Aku pongo nakadingog da atu pongo kinalajamu, jadi naakinmu lapulan alangkap dakon, koson kamu nangulus da alataku, am intad deeno gitu kaano kow bagu ajadi da pagawaiku.’3 Dagu kono bagu nu pagawai no gitu da nalom nu pinyawo no, ‘Atu bagu alus kalajeenku deeno gitu aii? Tuanku pongo napalanti da kalajaku. Anyangkul yak aku, kaano aku akotog. Agisantali aku, ooyu no aku. 4 Naa, apaanai aku no atu alus lakuonku. Paas aku pabalantion da kalajaku, sino ulun maapo guang antalimo am apoodong dakon da baloi lo.’ 5 Bagu pagawai gitu nagipag da doono-doono ulun nabootang da tuan no. Dagu kono da ulun timpuun gitu, ‘Ee, takula utangmu da tuanku?’
6 Taam nu ulun gitu, ‘Salatus baluka umau nu jeetun.’
Dagu nu pagawai gitu da ulun gitu, ‘Godo sulat nu utangmu. Antudung kow, tulisinmu atikas-tikas deeno gitu sulat nu utangmu, limom pulu baluk nu umau yak bagu.’
7 Bagu oyo ininagu da ulun kaduo gitu, ‘Ee, takula utangmu?’
Taam nu ulun gitu, ‘Salatus pikulb gandum.’
Dagu nu pagawai gitu, ‘Godo sulat nu utangmu. Tulisinmu deeno gitu poyo, sulat nu utangmu bagu, balum pulu pikul yak.’
8 Pongo nu tuan gitu napaanai da atu linaku nu pagawai no gino noli, bagu yo namuji da pagawai no asaaluk gitu, sobop asuang akal no. Kono poyo deeno, anak-anak nu dunia gitu labi asuang akal nilo, anulung da dili lo kabaata, intad da anak-anak nu alaang.
9 Dakon minagu damiun, pakayon mino Mamonc kakayaan nu dunia gitu, akaalap da dangan anulung damiun da tana gitu. Kaa poyo numaapo akatulung damiun, akau totop talimoon da intokon mudong, suku da buoi nu odow.”
Apokot da nalom nu kalaja luumoot
10 Yesus minagu poyo, “Atu yak ulun apokot da nalom nu kalaja-kalaja luumoot, oyo poyo totop apokot da nalom nu kalaja-kalaja maayo. Am atu yak ulun kaano bonol da nalom nu kalaja-kalaja luumoot, oyo kaano bonol poyo da nalom nu kalaja-kalaja maayo. 11 Jadi, kono da kakayaan nu dunia gitu yak, akau kaano bisa pinalasaya angulus deeno, atu ulun guang amalasaya damiun da kakayaan sibonol no da sulga? 12 Am kaano po akau apokot angulus da alata nu ulun bookon, atu ulun guang anaak damiun da alata mi kabaata?
13 Kaano ka doono ulun ulipon po, bisa angkalaja da saaduo tuan. Sobop oyo gino maapo, labi angumpada da doono tuan intad da bookon. Oyo gitu poyo maapo, labi apokot da tuan doono intad da bookon. Gino po duang mi, kaano akau bisa ajadi da ulipon nu Yampuon am ajadi poyo da ulipon nu kakayaan nu dunia gitu.” d
14 Sajoo dinagu nu Yesus gitu, nadingog nu ulun-ulun Palisi, ulipon nu uwong giatu, bagu ilo nakaadak Joo. 15 Dagu nu Yesus dilo, “Akau gitu tulus-tulus apabonol da dili mi, am balusaha onsoi eelong nu ulun, tapi Yampuon apaanai da udan nu pinyawo mi. Sobop atu inilong nu ulun gino apanting, kaano yo apanting da mato nu Yampuon.
16 Atulan nu Musa baya da kitob nu ulun nabi-nabi totop balaku sampoi da woktu ni Yohanes Pambaptis naayag. Da woktu gino po Kabol Onsoi, oyo gino Yampuon gino Laja pasukuon tulus-tulus. Am sajoo nu ulun agipaalikot ajadi da umat pinalinta nu Yampuon, Laja lo. e 17 Labi aluoi kawanan baya da tana gitu luminyob intad po da doono ulup tinulis da nalom nu atulan nu Musa lawoon. f
18 Atu yak ulun anyuai da andu no, bagu yo agandu da daanu bookon, oyo gino ansawa. Am atu yak ulun agandu da daanu sinuayan nu andu no, oyo po ansawa.” g
Ulun babayag baya di Lasalus ulun munsikin
19 Bagu Yesus nabasalita da umpama gitu, “Sino ulun babayag bapakayan da pakayan oonsoi balogo, am bayag no onsoi bonsoi tukid odow. 20 Da kiing nu tobon nu baloi no, sino ulun munsikin bonsoi beengalan di Lasalus. Inan no napanu nu piilat nangkamunana. 21 Oyo neetilan bonsoi guang aangkan da inakano nadatu da mija nu ulun babayag gitu. Datong bagu nu asu nanila da piilat no. 22 Patoi bagu nu ulun munsikin gitu, bagu yo inubit nu maleekot-maleekot da intok nu ulun logoon da kiing ni Yabalaham.
23 Ulun babayag gitu po inatoi, bagu yo linobong. Am woktu no aduol da lasa bonsoi da nalom nu intokon nu ulun inatoi linulud, oyo nagilong da sawat. Am intad da aalud oyo nakeelong di Yabalaham baya di Lasalus da kiing no. 24 Bagu yo ininagu, ‘Ama Abalaham, akimaasi aku no juun. Bansukonmu i Lasalus antunuk da lompong nu tuulu no da nalom nu timug, bagu yo matong angalisa da dilaku, sobop aku nadualan bonsoi da nalom nu laang nu apuy gitu.’
25 Tapi dagu kono ni Yabalaham, ‘Abuuk, kaa ki akapuonom kow da okow pongo nantalimo da sajoo nu onsoi, da woktumu naayag, sodongkon i Lasalus gitu, nantalimo da sajoo nu alaat. Deeno gitu oyo asonong da gitu, am okow aduol da lasa bonsoi. 26 Intad deeno poyo, akai baya juun sino lolot nu lingkubang ingkaa bisa golobo. Atu yak ulun guang anggolob muoi da gitu, am anggolob da giiyo, kaano yo bisa akagolob.’ 27 Dagu kono nu ulun gitu, ‘Kono poyo deeno, aku ampolok juun ama, bansukon muno i Lasalus gitu muoi da baloi ni yamaku. 28 Sobop sino poyo limo ulun pagakaku. Baleen no ilo bonsoi-bonsoi, gama lo kaa akoonsop numagu da nalom nu intokon nu aduol da lasa gitu.’
29 Tapi dagu ni Yabalaham, ‘Ilo sino da kitob nu Musa baya da kitob nu ulun nabi-nabi. Gama nilo angalaku da atu tinulis da nalom nu kitob-kitob giano.’
30 Taam nu ulun gitu, ‘Kaano, ama Abalaham. Sino po ulun inatoi aayag anduli, muoi amala dilo, totop no ilo maapo akiampun da dusa-dusa lo am anduli da daalan nu Yampuon.’
31 Dagu kono nu Yabalaham joo, ‘Kaapo ilo angkinoog am angalaku da atu tinulis da nalom nu kitob nu Musa baya da kitob nu ulun nabi-nabi, bial pokon ulun inatoi anduli aayag, kaano po ilo guang palasaya.’ ”