Angumpama kono da kiiyum domba nalawo
15
1 Paat da odow gili, asuang ulun ansiingil da pajak giatu, baya da ulun-ulun badusa inuoi da Yesus guang angkinoog Joo. a 2 Ulun-ulun Palisi baya da gulu-gulu Taulat giatu apanguot. Dagu kolo, “Uuy bai, antalimo Yo da ulun-ulun badusa am aangkan ambaaya dilo.”3 Bagu Yo minagu da umpama gitu dilo, 4 “Sino po ulun da suang mi gitu maal da kiiyum domba salatus, am alawo doono da domba giatu, kaano yoki uyumon no? Oyo totop angidu da domba no siam pulu siam gino da intokon lo aginakan da lapangan batuumuu, am makow aguyum da domba no nalawo gino li suku atanga no.
5 Am atanga nopo domba no gino, totop noyo aanja. Am domba no gino napon no, saani bulii da limaawo no, am ubiton no bagu muli. 6 Am suku kono bagu da baloi no, oyo agipag da dangan-dangan no giano, baya da ulun-ulun pangkiing no da baloi. Am oyo minagu dilo, ‘Ayu, balamai-lamai takau no, sobop dombaku nalawo gino li, natanga kunyo bagu.’ 7 Aku minagu damiun, gino po duang nu sulga, labi aanja nu sino doono ulun akiampun da dusa no am anduli da daalan nu Yampuon, intad da siam pulu siam ulun bonol gino, ingkaa bapalulu akiampun.”
Angumpama kono da uwong isin dilham natatow
8 Bagu Yesus basalita poyo, “Sino po daanu maal da uwong isin dilham apulu, am alawo doono da uwong no giatu, kaano yoki uyumon no? Oyo totop apakalaang da palita no, am amampas da baloi no, baya da balusaha aguyum da uwong isin no natatow gino li, suku atanga no. 9 Am atanga nopo bagu uwong isin natatow gino li, oyo agipag da dangan-dangan no am ulun-ulun pangkiing no da baloi, am minagu dilo, ‘Balamai-lamai takau no, sobop uwong isinku natatow gino li, natanga kunyo bagu.’ 10 Aku minagu damiun, gino po duang nu maleekot-maleekot nu Yampuon, ilo aanja sobop doono ulun badusa pongo nakiampun da dusa no am anduli da daalan nu Yampuon.”
Angumpama kono da anak nalawo
11 Yesus ininagu poyo, “Sino ulun gitu maal da anak kuusoi saaduo. 12 Dagu nu anak no puusan gitu di yama no, ‘Ama, naakin muno dakon deeno gitu bataku da alata takau gino.’ Bagu yama no nantiad da anak no saaduo gitu da bata lo kabaata-kabaata da alata no. 13 Ondo ka odow anak no puusan gitu napaalid da alata pongo tiniad ni yama no gitu li. Am oyo inakow linumatau da ondo ka pagun aaluud. Gu da pagun intokon no linumatau gitu, oyo namongo da uwong no baya da agisoosonong. 14 Kapongo bagu sajoo nu uwong no giatu, datong bagu nu musim nu bitil da pagun intok no inudong gitu, am nakabaaya noyo neetilan. 15 Bagu yo inakow am nangkalaja da ulun nu pagun intokon no gitu. Ulun intokon no nangkalaja gitu namansuk joo da umo amajaga da bolok no. 16 Neetilan no bonsoi anak puusan gitu li, sampoi guang aangkan da akan nu bolok giatu bagu. Tapi kaano ka doono ulun po anaak joo da inakano. 17 Nasadal bagu oyo gitu da mudil nu bayag no am dagu kono da nalom nu pinyawo no, ‘Uutsa, gu da intokon ni yama kupo liga deetu asuang ulun angkalaja, baya da akadoyok no liga inakano lo deeno. Tapi da gisodo, inatoi aku no da bitil. 18 Lumuat aku no solod, makow muli di yamaku am minagu joo maapo, Ama, nabadusa no aku da Yampuon baya juun. 19 Kaano bagu aku apantos ipaginmu da anakmu. Pajadion muno aku da ulun baansukonmu.’ 20 Bagu yo linumuat am inuoi di yama no.
Woktu no inuli gitu, aalud poyo neelong noyo ni yama no. Nakaasi no yama no joo, bagu yama no nansimul nanamu joo, am sikomo noyo umpodo siumo.
21 Dagu kono bagu nu anak no gitu di yama no, ‘Ama, pongo nabadusa aku no da Yampuon baya juun. Kaano bagu aku apantos ipaginmu da anakmu.’
22 Tapi yama no gitu minagu bagu da ulipon no giatu, ‘Atikas kau muoi da gitu, ubiton mi babadu onsoi bonsoi, babaduon miyo am siinsingo baya da sapatuo poyo. 23 Libos gino, angalap kau da anak nu sapi antilomok am sumbalion mi. Bagu takau aangkan balamai-lamai. 24 Sobop anakku gitu li kono da pongo inatoi am nanduli naayag, am pongo nalawo, natanga kunyo nanduli.’ Am ilo nabalamai-lamai bagu.
25 Tapi anak no kinatuan gitu, gu yo da umo. Woktu no inuli am namaad suku da baloi lo, kinoogo no alamai bagu baloi lo gitu. 26 Bagu yo nagipag da doono ulun ulipon ni yama no gitu, am nangkibala joo, ‘Kulo ilo nabalamai da baloi mai gitu?’
27 Dagu nu ulipon ni yama no gitu joo, ‘Yalimu pongo inuli, am yamamu namansuk damon nanyumbali da anak nu sapi antilomok. Oyo naanja sobop yalimu pongo natanga, am inilong no yalimu gino totop yak oyo salamot.’
28 Siga bagu nu anak kinatuan gitu inangit bonsoi, am kaano yo guang mumpos da baloi lo gitu bagu. Sila bagu ni yama no am namaanai joo nangubit inumpos. 29 Tapi oyo minagu di yama no, ‘Ama, ileenmu aku gitu, bamusim-musim buoi no aku nangkalaja juun. Atu yak palinteenmu dakon, tuuson kuyak. Am kaano ka doono po anak nu kambing tinaakanmu dakon, pakayonku balamai-lamai baya da dangan-danganku. 30 Tapi anakmu gino, dabagu inuli gitu, pongo namongo da alatamu nambaaya da sundol-sundol giano, am okow ama, nanyumbali da anak nu sapi antilomok, tinaakanmu joo.’