Yesus napalawo poyo da panyakit da odow Maayo nu ulun Yahudi
14
1 Sino po odow Maayo gili, Yesus inatong da baloi nu doono ulun, katua nu ulun-ulun Palisi naangkan deeno. Sajoo nu ulun sino deeno amuaya bonsoi-bonsoi Joo, agilong da atu kalajeen No. 2 Siga nu ulun nadualan nadintungan da kalayam baya da tanilu no gitu inatong da Yesus, am pilik no da tingkuangon No. 3 Bagu Yesus ininagu da gulu-gulu Taulat baya da ulun-ulun Palisi sino deeno, dagu Kono, “Anulut da ukum nu agama takau, bisa ki apalawo da panyakit nu ulun da odow Maayo atau kaano?” 4 Kaano ulun-ulun giatu tinumaam. Bagu Yo nanongoi da tanilu nu ulun nadualan gitu, napalawo da panyakit no am namansuk joo inakow.5 Libos gino, Yesus minagu poyo dilo. “Sino po likin nu doono ulun da suang mi gitu maal da anak atau sapi no, bagu yo akoompos da tulungan maayo batimug paas da odow Maayo, kaano yoki buniton pasilee paat da odow gino poyo?” a 6 Am kaano ka doono ulun po bisa tinumaam nangapu da dagu nu Yesus gitu.
Intokon nu ulun logoon am ingkaa logoon
7 Gu da baloi gitu Yesus nagilong sino tamu-tamu namili nantudung da intok nu ulun logoon. Gino intok no, Oyo basalita da umpama gitu dilo, 8 “Sino po ulun angundang damiun da kinalamayo nu kawin, peen mi pantudung da intok nu ulun logoon, sobop sino keeli poyo ulun bookon inundang labi logoon intad damiun. b 9 Am gama nu ulun angundang damiun gino, ingkaa matong am minagu, ‘Akiampun aku juun, intokonmu gitu sino ulun antudung.’ Bagu akau ooyuan, am pakasa bagu akau makow antudung da intok nu ulun kaa logoon gino. 10 Tapi, undangon kapo nu ulun gino, antudung kano da intok nu ulun kaa logoon gino. Ulun angundang damiun gino keeli, matong damiun am minagu, ‘Dangan ayu, antudung kono da intok nu ulun logoon giiyo.’ Kono deeno akau maapo logoon da tingkuangon nu sajoo nu tamu bookon. 11 Sobop atu yak ulun apakasawat da dili no, numaapo oyo pakaliwion. Am atu yak ulun apakaliwi da dili no, numaapo oyo pakasawaton.” c
Atu ulun alus undangon
12 Am Yesus ininagu poyo da ulun nangundang Joo, “Angundang kopo da ulun aangkan da baloimu, da oyo oodow atau da oyo lonom, peenmu pangundang da dangan-danganmu atau pagaka-pagakamu baya da kalualgamu atau pangkiing nu baloimu ulun babayag yak. Sobop ilo maapo bisa amalos angundang juun poyo, am okow po akaalap da balos no. 13 Tapi angundang kopo da ulun aangkan, undangon muno ulun-ulun munsikin, ulun-ulun babaalingow, ulun-ulun abangkong am ulun-ulun abolow. 14 Am okow maapo bolokoton, sobop kaano atu-atu pamaalos lo juun. Am okow maapo akaalap da balos no da odow nu ulun-ulun bonol padulion pakaayagon.”
Angumpama kono da mudil nu ulun-ulun asuang da alasan
15 Woktu nu doono ulun intad da tamu-tamu giano nangkinoog da dagu nu Yesus gino noli, dagu kono da Yesus, “Oontung no bonsoi maapo, ulun aangkan ambaaya da Yampuon, paat Yo matong ajadi da Laja!” 16 Tapi Yesus minagu da ulun gino, “Sino ulun nanyiap da ilau maayo, am oyo nangundang da ulun suang. 17 Nagonop no woktu nu ilau gino, ulun gitu namansuk da ulipon no, makow amala da sajoo nu ulun inundang no, am minagu dilo, ‘Matong kano, sajoo no nasiap noyo!’ 18 Tapi ilo sajoo, doono am doono akiampun. Timpuun gitu minagu da ulipon gitu, ‘Dakon dabagu yak nangalid da tana, am dakon alus makow agilong. Akiampun yak aku deeno.’ 19 Ulun bookon minagu, ‘Deeno yak nga aku gitu nangalid da limo pasang sapi maganuy, am dakon alus makow agilong da sapi giano angkalaja. Akiampun yak aku.’ 20 Gitu po dagu nu ulun doono gitu, ‘Deeno yak libosku nangguulung, kaano aku bisa akadatong.’ 21 Uli bagu nu ulipon no gitu am namala da tuan no. Siga nu tuan no gitu inangit bonsoi, am ininagu da ulipon no gitu, ‘Atikas kono makow da sajoo nu daalan maayo baya da daalan luumoot da kuta. Ubiton muno ulun munsikin giano, ulun babaalingow, ulun abolow, am ulun abangkong.’
22 Lakow kono no bagu nu ulipon no gitu, am nanduli ininagu da tuan no, ‘Tuan, palintamu pongo noyo linakuku, tapi intokon gitu asuang po akusung.’
23 Dagu kono bagu nu tuan gitu da ulipon no gitu, ‘Makow kono po da sajoo nu daalan maayo baya da daalan luumoot da limow nu kuta. Pakaseen muno ulun-ulun da giiyo matong, gama nu baloiku gitu apanu nu ulun. 24 Sobop Aku minagu damiun, kaano ka doono ulun po intad da ulun pongo inundangku giano li maapo, aangkan da inakano da ilauku gitu.’ ”
Sajoo alus tatangin nu ulun maya da Yesus
25 Libos gino, ulun suang giatu inaya inakow nambaaya da Yesus. Bagu Yesus linumiow am ininagu dilo, 26 “Sino po ulun matong Dakon, tapi oyo labi angumpada di yama no, ina no, andu no, anak-anak no, pagaka-pagaka no kuusoi baya da daanu, am labi angumpada poyo da nyawo no kabaata, kaano yo bisa ajadi da mulit-Ku. d 27 Atu yak ulun kaa guang anyaan da salip no am maya Dakon, kaano yo bisa ajadi da mulit-Ku. e
28 Sino po ulun da suang mi gitu guang amangun da doono manalaf, kaano yoki gulu antudung angitung da biaya no, am gama no apaanai asukup ki uwong no atau kaano? 29 Sobop kaapo apongo no manala no gino bonsoyo, sodongkon dasal no pongo binonsoi no, totop no sajoo nu ulun nagilong da kalaja no gino, angalalagai am akaadak joo. 30 Am ilo poyo maapo minagu, ‘Ulun gitu animpuun amangun, tapi kaano yo bisa amongo apajadi.’
31 Atau, sino po ulun laja guang makow bapolong angapu da laja bookon, kaano yoki gulu mampanguulu antudung am bapikil, animbang ka akotog ki oyo gitu, maal da apulu libu palajulit, angapu da pagapu no maal da duom pulu libu palajulit? 32 Apaanai poyo da oyo kaa akotog, oyo totop amansuk da utusan no ampolok badamai da woktu nu pagapu no masi aalud. 33 Gino po duang mi gitu. Guang kapo ajadi da mulit-Ku, sajoo sino damiun gino, alus gino gulu tatangin mi.