Lukas 13

Dusa baya da duol nu lasa

1 Woktu gili poyo, sino takula-takula ulun giatu nagiulit da Yesus, da mudil nu takula-takula ulun nu Galilia giatu pinatoi nu ulun-ulun binansuk ni Pilatus. Ilo pinatoi da woktu nilo napasamba da kiiyum kulban da Yampuon. 2 Yesus minagu dilo, “Ulun-ulun nu Galilia giano pinatoi kono deeno, nos mi gino bukti nilo labi badusa intad da sajoo nu ulun Galilia bookon? 3 Dakon minagu damiun, kaano! Tapi puanamin mi gitu am, kaano po akau akiampun da dusa-dusa mi am anduli da daalan nu Yampuon, akau sajoo gino maapo, totop matoi poyo kono dilo. 4 Gino po duang nu apulu balu ulun inatoi, natutukan nu manala da maad nu kolam Siloam nanutuk dilo, nos mi gino bukti nu dusa lo, labi maayo intad da sajoo nu ulun bookon inudong da Yelusalem? 5 Kaano! Saligondo poyo Aku minagu damiun, kaano po akau akiampun da dusa-dusa mi am anduli da daalan nu Yampuon, akau sajoo gino maapo, totop matoi poyo kono dilo.”

Angumpama kono da toon nu ala kaa anggawa

6 Bagu Yesus nabasalita da umpama gitu, “Sino ulun maal da toon ala da kabun nu bua nu anggul no. Paat da odow gili, lakow no naguyum da bua nu toon ala gitu, tapi kaano ka doono kuon po bua no neelong no. 7 Dagu kono poyo da ulun amaajaga da kabun no gitu, ‘Ilongo nga, pongo talu musim no aku inatong naguyum da bua nu toon ala gitu, tapi kaano aku nakeelong ka doono kuon po. Tagadon muyak toon gitu! Kaano po lati no tumuu da tana gitu!’ 8 Dagu nu ulun amaajaga da kabun no gitu, ‘Aman, gama noyak gulu tumuu da samusim gitu poyo. Kulilingon kunyo sangkulo tana da puun nu toon gitu gulu, am baalinku da pupuk. 9 Intad nu anggawa yo da musim doono tu, kaano po bagu, am tagadon noyo!’ ”

Yesus napalawo da panyakit nu daanu nabungkung da odow Maayo nu ulun Yahudi

10 Paat da odow Maayo, Yesus nangajal da doono baloi sambayang nu ulun Yahudi. 11 Gu deetu, sino daanu pongo apulu balu musim buoi no nadualan. Daanu gitu nadualan, sinulod nu alingu alaat sampoi yo nabungkung am kaano yo bisa mimpilik bonsoi. 12 Paas Yesus nagilong joo, ipagi No-yo am ininagu, “Minan, panyakitmu nalawo noyo.” 13 Bagu Yesus namuluy da tanilu No da sawat nu daanu gitu, am siga nu daanu gitu inimpilik bonsoi, am namuji da Yampuon. 14 Bagu katua nu baloi sambayang nu ulun Yahudi gitu inangit, sobop Yesus napalawo da panyakit nu ulun, paat da odow Maayo. Dagu kono da ulun-ulun deetu, “Onom odow itakau angkalaja. Matong kano da doono odow gino akilawo da panyakit mi. Peen mi datong da odow Maayo!” 15 Tapi taam nu Maangun joo, “Uuy akau ulun agisaansalu onsoi da pinyawo! Ulun yak angalabus da sapi atau keledai no, intad da kulung nu kiiyum am angubit sumila apeenum da odow Maayo. 16 Naa da gitu, sino doono daanu sulut ni Yabalaham, pongo apulu balu musim buoi no dinukug nu Seetan Maayo. Kaano yoki bisa gayadin intad da duukug no gino da odow Maayo?” 17 Paas Yesus ininagu kono deetu, nooyuan no bonsoi sajoo nu ulun alaagai Joo giatu, tapi sajoo nu ulun bookon nasonong nagilong da sajoo nu katulayan linaku nu Yesus.

Angumpama kono da umi nu sesawi baya da tapai

18 Yesus minagu poyo, “Son Kaku angumpama da mudil nu Yampuon amalinta ajadi da Laja gino aii? 19 Oyo kono da umi nu sesawi luumoot bonsoi, anapon am payaton nu ulun da kabun no. Umi gino tumuu ajadi da puun nu toon maayo am maanuk-maanuk agibuunsalag da daan no.” 20 Am Oyo minagu poyo, “Son Kaku angumpama da Yampuon amalinta ajadi da Laja gino? 21 Oyo kono da tapai, napon nu doono daanu, kuluoto da nalom nu tupung talum pulu kilu sampoi kumambang.”

Atu ulun salamaton

22 Lakow bagu nu Yesus nabakuliling intad da kuta ka kuta, am pagun ka pagun. Gu da intokon giatu Oyo angajal da ulun am tulus inakow da Yelusalem. 23 Sino poyo ulun nangkibala Joo, “Maangun, keeti yak ki ulun salamaton maapo?” 24 Taam nu Yesus da ulun-ulun gu da intok gino, “Balusaha kano munsop da tobon asumpit gino. Aku minagu damiun, asuang ulun balusaha munsop, tapi kaano ilo bisa akoonsop. 25 Woktu nu tuan nu baloi gino pongo inimpilik am nanutub da tobon, akau gitu totop mimpilik da limow nu tobon am angatuk-ngatuk da tobon sambil minagu, ‘Aman, bukee bai tobon gitu damon!’ Am tuan nu baloi gino maapo tumaam, ‘Atu gua akau gitu? Kaano Aku apaanai atu intad mi!’ 26 Bagu akau tumaam, ‘Itakau kat nambaaya naangkan am nanginum gili, am Okow pongo nangajal da daalan-daalan nu kuta mai.’ 27 Tapi, totop yak Oyo gino minagu poyo damiun, ‘Kaano Aku apaanai atu intad mi inatong. Makow kano solod, uuy po akau pongo nangalaku da kalaatan!’ 28 Am akau gino maapo totop antangi, am aduol da lasa bonsoi, paat mi akeelong di Yabalaham, Isak am Yakup, baya da sajoo nu ulun nabi aanja da nalom nu Dunia Dabagu yampu nu Yampuon, sobop akau kabaata susugon pasilee. 29 Ulun-ulun intad da sajoo nu intokon da dunia gitu, matong maapo am ilo sajoo po antudung aangkan am anginum da nalom nu Dunia Dabagu yampu nu Yampuon. 30 Kinoogon mi gitu bonsoi-bonsoi am, sino maapo ulun akenaaling ajadi da ulun akapanguulu, am ulun akapanguulu ajadi akenaaling maapo.”

Yesus alus matoi da Yelusalem am akaasi da ulun-ulun nu Yelusalem

31 Paat da woktu gino li, datong nu takula-takula ulun Palisi am ininagu da Yesus, “Peen-Mu udong da gitu, iduin-Mu intok gitu, sobop Elodes guang amatoi Juun.” 32 Taamo ilo nu Yesus, “Makow kano am baleen miyo, Elodes ulun akal-akal gino, ‘Aku apasila da seetan am apalawo da panyakit nu ulun, da odow gitu baya da nunsuab. Am paat da odow katalu Aku guang amongo da kalaja-Ku.’ 33 Tapi Dakon totop makow da lokowon-Ku, da odow gitu am nunsuab baya da nulaas, sobop ulun nabi kaano yo apantos potoyon, nu kaano yo gu da Yelusalem. 34 Oodii damiun ulun nu Yelusalem! Akau pongo nagabobol da baatu namatoi da ulun nabi-nabi inutus damiun! Agiduli-duli Aku guang angalulud am anyilung damiun, kono da matuo nu manuk anyilung da anak-anak no da liwi nu alad no, tapi kaano akau guang. 35 Ileen mi gitu am, Yampuon kaano bagu amaya damiun. Tapi Dakon minagu damiun, intad deeno gitu, kaano akau akeelong Dakon bagu, sampoi da akau minagu maapo, ‘Bolokoton no Oyo matong, inutus da nalom nu ingalan nu Maangun!’ ”