Baabala nu Yesus da mulit-mulit da mudil nu kalakuan nu ulun Palisi
12
1 Woktu nu ulun balibu-libu nasuang nanduumun am nansiilot, Yesus nanimpuun nangajal da mulit-mulit Noyak, “Ati-ati kau da kalakuan nu ulun-ulun Palisi. Sobop kalakuan lo bisa yak bakambang da suang mi gitu, kono da tapai apakambang. Ilo gino ulun agisaansalu onsoi da pinyawo, peegitu am alaat kalakuan lo. a 2 Ingkaano tutubin gino, ingkaa bukeen, totop yo bukeen maapo. Am ingkaano bunion gino, ingkaa eelong, totop yo eelong maapo. b 3 Gino po duang nu atu daguon mi da oyo lonom, totop adingog maapo da oyo oodow. Am atu sosoton mi da talingo nu ulun da nalom nu kamal alapot, totop ogoon no intad da taap nu baloi da ulun suang.4 Dakon minagu damiun, Uu dangan-dangan-Ku, peen mino pangkalaa da ilo amatoi damiun! Ilo gino bisa yak amatoi da inan mi, tapi kaano ilo bisa angalaku da bookon labi intad deeno. 5 Dakon guang amala damiun atu ulun alus kalaanan mi. Angkalaa kano da Yampuon! Sobop Oyo gino bakuasa bokon ka bisa amatoi da inan yak, tapi Oyo gino po bisa anapid da ulun da apuy nalaka. Naa, puanamin mi gitu am, Yampuon yak alus kalaanan mi!
6 Maanuk pilit yak kaano logo no. Paalidin nu ulun, limo maanuk gino logo no duo uwong luumoot bonsoi. Tapi kaano ka doono po lupanin nu Yampuon dilo. 7 Gino po duang mi. Suang nu uwat nu abuk miyak eetung No. Sobop akau gitu labi alogo intad da suang nu maanuk pilit giano. Gino sobop no, peen mi pangkalaa!
8 Kinoogon mi gitu bonsoi-bonsoi am, Atu yak ulun angaku Dakon da tingkuangon nu sajoo nu ulun, Anak Manusia po maapo angaku joo da tingkuangon nu maleekot-maleekot nu Yampuon. 9 Tapi atu yak ulun ingkaa angaku Dakon da tingkuangon nu sajoo nu ulun, totop yo numaapo ingkaa akuin nu Anak Manusia da tingkuangon nu maleekot-maleekot nu Yampuon.
10 Sino po ulun minagu am angapu da Anak Manusia, am akiampun poyo totop yo ampunin maapo. Tapi sino po ulun aguyai da Alingu Alisi, kaano yo ampunin maapo. c
11 Am sino po ulun anakub damiun, ubiton no akau da baloi sambayang atau pamalinta-pamalinta baya da panguasa-panguasa, am adilon, peen mino kalaabo son kami akiinsuup da dili mi am atu alus daguon mi dilo. d 12 Sobop paas da woktu gino maapo, Alingu Alisi angajal damiun da atu yak alus daguon mi dilo.”
Angumpama kono da ulun babayag buduk
13 Sino doono ulun intad da suang nu ulun giatu ininagu da Yesus, “Gulu, bansuko bai pagakaku kinatuan gino, antiad da alata tinatangan ni yama mai gino.” 14 Taamo nu Yesus, “Uu pagaka, atu ulun namalasaya Dakon najadi da akim am antiad da alata mi gino? Kaano kan!”
15 Dagu nu Yesus poyo da sajoo nu ulun da intok gitu, “Ati-ati no akau, peen mi abaaluson da alata! Sobop kaayagan nu ulun, kaano yo lumansan da kakayaan no.”
16 Bagu Yesus basalita da umpama gitu, “Sino doono ulun babayag, tana no gitu asuang asil no. 17 Dagu nu ulun gitu da nalom nu pinyawo no, ‘Kaano bagu intokku anawi da asil nu tanaku gitu. Son kaku bagu deetu aii?’ 18 Bapikil yo poyo bagu am minagu, ‘Naa, gitu no guang lakuinku. Baaloiku gitu bonsoyonku poyo, gantionku da baaloi labi maayo. Gitu no panawianku da gandum baya da alataku bookon giano.’ 19 Libos gino, minagu aku da pinyawoku kabaata, ‘Asonong kono! Asuang no bagu alatamu gitu, kaano yo panai apongo, bamusim-musim panat buoi no keeli. Jadi, kaano bagu aku asusa angkalaja, aangkan anginum yak bagu kalajeenku gitu, am agisosonong.’ 20 Tapi Yampuon minagu joo, ‘Uuy po okow ulun buduk! Lonom gitu okow maapo matoi. Jadi atu bagu akaalap da alata pongo linuludmu gino li?’ 21 Gino no duang nu ulun balusaha ajadi da ulun babayag da dili no kabaata, tapi kaano yo balusaha ajadi da ulun babayag da mato nu Yampuon.”
Mintopot yak da Yampuon
22 Bagu Yesus minagu da mulit-mulit No, “Gino sobop no Dakon minagu damiun, Peen mi kalaabo da bayag mi, atu akanon mi, am atu pakayon mi. 23 Sobop bayag gitu labi apanting intad da inakano am inan gitu labi apanting intad da pakayan. 24 Pikilon mi nga suang nu maanuk bangkaak giano. Kaano ilo antanom, kaano ilo angotom, am kaano po ilo maal da baaloi intok no anawi da asil nu tana gino. Tapi ilo gitu totop naakin nu Yampuon da inakano. Akau poki bagu labi maayo logo mi intad da maanuk-maanuk giano. 25 Sino ki da suang mi gitu pinyawo no alaabo, bisa apakabuat da umul no keeti panat? Kaano kan! 26 Luumoot kono deeno yak, kaanyo bisa kalajeen mi. Naa, kulo kau kalaabo? 27 Pikilon mi nga siingat tumuu da katanaan gino. Kaano yo bisa apakoonsoi da siingat no kabaata, tapi totop yak oyo onsoi ileen. Dakon minagu damiun, Laja Salomo ulun babayag am logoon gino yak, kaano yo amakai da pakayan onsoi kono da koonsoi nu siingat gino. e 28 Jadi, tuumuu da umo gino yak, da odow gitu oyo sino, nunsuab yo tapidin da nalom nu apuy, tapi totop yo pialeen nu Yampuon. Akau poki bagu labi pialeen nu Yampuon intad da tuumuu gino. Yampuon gino totop animulig damiun, uuy bai akau ulun kaa mintopot!
29 Jadi, kono poyo deeno, peen mi kalaabo atu akanon baya da inumon mi am peen nyo kasusa pinyawo mi. 30 Sajoo no gitu olowon nu ulun-ulun ingkaa mintopot da Yampuon da dunia gitu. Tapi Yamamu totop apaanai da akau bapalulu da sajoo no gino. 31 Gino sobop no balusaha kano, pajadion mino Yampuon gino ajadi da Laja da bayag mi, am Oyo maapo angaduang da sajoo no gino damiun.
32 Ee akau domba-domba-Ku keeti gitu, peen mi pangkalaa! Sobop Yama da sulga, Oyo no Laja asonong da pinyawo namolokot damiun.
33 Paalidin mino sajoo alata mi am naakin mi uwong no da ulun munsikin. Siapon mi bagu ipuk-ipuk ingkaa bisa alusok, da buoi nu odow da sulga, intok mi anawi da alata mi. Alata gino kaano yo bisa tokowon am kaano yo alusok kokoton nu lipos. 34 Sobop atu yak intok nu alata mi gino, pinyawo mi po totop sino deeno.”
Basiap am Bajaga-jaga
35 Dagu nu Yesus poyo, “Basiap no akau kono da ulipon gino. Da woktu oodow, ogot-ogot da awak no totop dukugin no, am da woktu olonom, palita no totop alaang. f 36 Basiap no akau kono da ulipon gino, da woktu no agalung da tuan no muli intad da kinalamayo nu kawin. Muli po tuan no am angatuk da tobon, tobon gino totop bukeen no. g 37 Mintopot kau nga lai, boontung no ulipon giatu, paat nu tuan no apaanai da ilo totop basiap agalung da oyo muli. Sobop tuan gitu maapo basiap amansuk da ulipon no giatu antudung am aangkan, bagu yo angalayani dilo. 38 Am gino lan duang nu ulipon giatu eelong nu tuan no gitu, totop ilo angalaku kono deeno da woktu nu payung lonom atau da maad tawang, boontung no ilo. 39 Tapi kinoogon mi gitu bonsoi-bonsoi am, sino po tuan nu baloi apaanai da ijam takula ulun matong antakow, totop noyo amajaga da baloi no gino, alaa da oyo takawin. h 40 Gino po duang mi, totop kano basiap am bajaga-bajaga, sobop Anak Manusia matong gino kaano woktu no apanayan mi.”
41 Dagu ni Pitulus, “Maangun, akai ki kuon-Mu da umpama gitu, atau sajoo nu ulun ki poyo?”
42 Taamo nu Maangun, “Atu ki ulipon nu baloi satia am kalakuan no onsoi gino? Oyo gitu no, ulun pinalasaya nu tuan no amimpin da ulipon-ulipon bookon am anaak da inakano da woktu lo guang aangkan. 43 Boontung no katua nu ulipon gino, apanayan nu tuan no angalaku da kalaja no da woktu nu tuan gino matong. 44 Dakon minagu damiun, mintopot kau nga lai, katua nu ulipon gino maapo pinalasaya nu tuan gino amaajaga da sajoo nu alata no. 45 Tapi, dagu kono nu katua nu ulipon gino da nalom nu pinyawo no, ‘Tuanku gitu kaano yo muli,’ libos gino bubuuki no sajoo nu ulipon-ulipon bookon, bagu yo aangkan, anginum am agook. 46 Ileen mi gitu am, tuan no gitu muli maapo da woktu nu odow kaa sinangka-sangka no, baya da ijam takula ingkaa apanayan no. Am katua nu ulipon gino potoyon no am ukumon aagat baya da ulun-ulun ingkaa bisa pinalasaya no.
47 Gino po duang nu ulipon apaanai da kaguang nu tuan no, tapi kaano yo basiap am kaano yo angalaku da atu yak kaguang nu tuan no gino, totop yo bubuukin. 48 Tapi atu yak ulipon ingkaa apaanai da kaguang nu tuan no, am angalaku da kasalaan-kasalaan sampoi alus bubuukin, oyo numaapo akaalap da buubuk kaa aduol. Jadi, atu yak ulun naakin asuang, asuang nopo tuntuton joo. Am atu yak ulun asuang pinalasaya joo, labi asuang nopo tuntuton joo.”
Yesus nangubit da pansuuwayan
49 Yesus minagu, “Dakon matong angubit da apuy pansuuwayan da tana gitu. Am kaguang-Ku gitu, apuy pansuuwayan gino guang noyo alaang! 50 Tapi Aku alus baptison da nalom nu duol nu lasa, am asusa no pinyawo-Ku gitu bagu, agalung da kajadian gino. i 51 Nos mi Aku matong da tana gitu angubit da kaansayan? Kaano! Dakon minagu damiun, bokon ka kaansayan tapi pansuuwayan. 52 Intad deeno gitu, kalualga limo ulun totop agaangit. Talu ulun agaapu da duo ulun am duo ulun agaapu da talu ulun. 53 Ilo maapo agaangit, yama angapu da anak no kuusoi am anak kuusoi angapu di yama no. Ina angapu da anak no daanu am anak daanu angapu di ina no. Iwan daanu angapu da inuot no daanu am inuot daanu angapu da iwan no daanu.” j
Akalati da mudil nu jomon
54 Yesus minagu poyo da ulun suang, “Akeelong kapo da goon, masak intad da intok nu potoyon nu mato nu odow, dagu kami, ‘Uu guang dumasam,’ am monong no gino dumasam. k 55 Akeelong kapo da libut intad da salatan, dagu kami, ‘Uu alasu odow gitu maapo,’ am monong no gino alasu. 56 Uuy po akau ulun agisaansalu onsoi da pinyawo! Mudil nu tana baya da kawanan apaanai kau angalati. Kulo kau kaa apaanai angalati da mudil nu jomon deeno gitu?
57 Am kulo kau kabaata kaa apaanai da atu bonol am atu alus lakuin mi? l 58 Sino po ulun makow angadu damiun da pangadilan, balusaha kano badamai joo da woktu no da daalan. Sobop kaapo akau badamai joo, oyo maapo angubit damiun da tingkuangon nu akim, am akim anaak damiun da pulisi am akau gitu bagu poonsopon no da sipil. 59 Puanamin mi gitu am, kaano po akau amayal da taak mi, am kaano po akau akasila da sipil.”