Yesus angajal basambayang
11
1 Sino woktu gili Yesus nabasambayang gu da doono intokon. Woktu No pongo nabasambayang, sino doono mulit No ininagu, “Maangun, Patiluo bai akai da basambayang kono di Yohanes napatilu da mulit-mulit no.” 2 Dagu bagu nu Yesus dilo, “Basambayang kapo kono da gino lakow no,‘Ama, gama no nu ingalan-Mu pakasawaton mai,
sobop ingalan-Mu alisi.
Matong no kalajaan-Mu amimpin damon.
3 Sukupon Muno inakano mai tukid odow.
4 Ampunin Muno dusa mai,
sobop akai gitu po angampun da ulun-ulun akasala damon.
Peen-Mu pansigee iman mai alawo da woktu mai jajabin.’ ”
5 Dagu No poyo dilo da umpama, “Son nu sino doono ulun da suang mi gitu, muoi da payung nu lonom da baloi nu dangan no, am oyo minagu, ‘Ibuy, pootangi bai gulu aku da inakanomu, 6 sobop sino danganku makow da aalud am inapit da baloiku, bagu kaano kon inakano pamaakanku joo gitu.’ 7 Kaano pokon ulun da nalom nu baloi gino guang minagu, ‘Ii okow gitu, angasow koyak dakon! Kaano ki okow nakeelong da tobon gino da oyo tinutuban? Aku baya da anak-anakku pongo noolong, kaano aku guang lumuat am anaak da atu pinolokmu gitu!’
8 Dakon minagu damiun, aagat panat pinyawo no guang lumuat am anaak da atu pinolok nu ulun gitu, bial pokon ulun gitu dangan no. Tapi totop yak oyo lumuat am anaak da atu pinolok nu ulun gitu, sobop ulun gitu kaano yo ooyu ampolok tulus-tulus joo.
9 Gino sobop no, Aku minagu damiun poyo, Ampolok kano, akau maapo totop naakin. Uyumon mi, akau maapo totop akatanga. Katukon mi tobon, tobon gino maapo bukeen damiun. 10 Sobop atu yak ulun ampolok, oyo maapo naakin, am atu yak ulun aguyum, oyo maapo akatanga, am atu yak ulun angatuk da tobon, tobon gino maapo bukeen joo. 11 Sino ki doono yama da suang mi gitu, anaak da niipo da anak no, nu ampolok yo da papeet, 12 atau anak no ampolok joo da talu am naakin no bagu da tingangeet? Kaano kan! 13 Jadi akau alaat gitu yak, apaanai anaak da onsoi da anak-anak mi, labi po Yama da sulga giiyo apaanai anaak da onsoi. Oyo guang anaak da Alingu Alisi da atu yak ulun guang ampolok Joo.”
Yesus baya da Beelsebul
14 Sino odow gili, Yesus napasila da seetan gino intad da ulun nabubo. Ulun gitu kaano yo bisa minagu bagu linaku nu seetan gino. Pongo nu seetan gino sinumila intad da ulun gitu, pakenagu no bagu, am nasobop no suang nu ulun giatu bagu. 15 Tapi, da suang nu ulun giatu, sino ulun minagu, “Oyo bisa apasila da seetan, amakai da kuasa nu Beelsebul,a Seetan Maayo gino.” b
16 Sino po ulun bookon guang angajajab da Yesus. Jadi ilo ampolok Joo, angalaku da katulayan, taanuan No intad da Yampuon. c 17 Tapi Yesus apaanai da atu pinikil lo, bagu Yo ininagu dilo, “Sino po doono kalajaan oopak da nalom nu kulumpuk-kulumpuk, bagu ilo agaapu agaangit doono am doono, kalajaan gino totop nyo aansul. Am ulun pongo nangulaamin, bagu ilo agaapu agaangit doono am doono, totop nopo ilo ansuuwai. 18 Gino po duang nu kalajaan nu Seetan Maayo. Sino po doono kulumpuk agaapu agaangit da kulumpuk bookon, kalajaan gino totop noyo aansul po? Dakon minagu kono deeno, sobop dagu kami, 19 Aku gitu apasila da seetan amakai da kuasa nu Beelsebul. Kono poyo deeno, atu kuasa pinakai nu ulun-ulun mi apasila da seetan gitu? Ulun-ulun mi gino no kabaata, ajadi da akim mi maapo. Ilo guang amukti da dagu mi gino, kaano yo bonol. 20 Dakon apasila da seetan gitu amakai da kuasa nu Yampuon, am gino no bukti nu Yampuon pongo nanimpuun ajadi da Laja da unod mi.”
21 Dagu No poyo dilo da umpama, “Sino po ulun akotog amajaga da baloi no kabaata, alangkap da sinapang, totop nopo sajoo nu alata no salamot. 22 Tapi sino po ulun bookon labi akotog intad joo am bisa angawali joo, totop lampason no sajoo nu sinapang no, bagu yo agatiad da atu linampas no gino noli.
23 Gino po duang nu ulun ingkaa ambaya Dakon, baalati angapu yo Dakon. Am atu yak ulun ingkaa angalulud da ulun ambaaya Dakon, baalati oyo gino apansuuwai dilo.” d
Alingu alaat nanduli
24 Bagu Yesus minagu poyo, “Sino po alingu alaat sumila intad da doono ulun, alingu alaat gino bakuliling da intokon nu apua, aguyum da intokon agobos. Am woktu no kaano nakatanga, dagu kono bagu, ‘Anduli no aku da baloi pongo iniduanku gino li.’ 25 Lakow nu alingu alaat gino, am ilong no da ulun iniduan no gino li kono da baloi alisi am naatul. 26 Bagu yo inakow nagubit-gubit da tulu alingu alaat bookon, labi alaat intad joo. Ilo inunsop da nalom nu ulun gino am inudong deeno. Jadi mudil nu ulun gitu bagu, labi alaat intad da timpuun li bagu.”
Atu Asonong
27 Paas Yesus ininagu dilo, sino doono daanu da suang nu ulun giatu ininagu da Yesus, “Asonong no daanu nagipus am napatiti Juun.”
28 Am taam nu Yesus, “Monong gino. Tapi labi asonong po ulun angkinoog am angalaku da dagu nu Yampuon.”
Taanuan ni Yunus
29 Paat nu ulun suang dinumumun, dagu nu Yesus bagu, “Ulun-ulun nu jomon deeno gitu alaat. Ilo ampolok da doono taanuan katulayan,e tapi kaano po naakin dilo, taanuan nu nabi Yunus yak. f 30 Sobop kono di Yunus najadi da taanuan katulayan nu ulun-ulun nu kuta nu Niniwe paguulu, gino po Anak Manusia maapo ajadi da taanuan katulayan nu ulun-ulun nu jomon deeno gitu. g
31 Woktu nu odow kiamat maapo, daanu latu intad da salatan nu negeli gitu aayag anduli ambaaya da ulun-ulun nu jomon deeno gitu. Oyo ajadi da sasi, amala da kalaatan nu ulun-ulun nu jomon deeno gitu. Sobop da paguulu li, daanu latu gitu inatong intad da intokon aalud bonsoi, guang angkinoog da ikmat inajal nu laja Salomo. Puanamin mi gitu am, deeno gitu sino ulun labi maayo intad di Salomo da gitu! h
32 Woktu nu odow kiamat maapo poyo, ulun-ulun nu kuta nu Niniwe paguulu anduli aayag baya da ulun-ulun nu jomon deeno gitu. Am ilo ajadi da sasi, amala da kalaatan nu ulun-ulun nu jomon deeno gitu. Sobop ulun-ulun nu kuta nu Niniwe pongo nakiampun am anduli da daalan nu Yampuon, woktu lo nangkinoog da baabala nu Maangun pinasuku ni Yunus. Tapi da intok gitu am deeno gitu sino ulun labi maayo intad di Yunus!” i
Alaang baya da Alonom
33 Yesus minagu poyo, “Kaano ulun anyikit da palita, buliin no da saau nu baloi no atau tutubin no da bilit. Totop buliin no sanguti da sawat, bagu sajoo nu ulun mumpos da nalom nu baloi gino, akeelong da alaang gino. j
34 Mato takau gitu kono da palita nu inan takau. Onsoi po mato takau gitu, alaang nopo sajoo nu inan takau, tapi alaat po mato takau gitu, alonom nopo sajoo nu inan takau. k
35 Gino sobop no balusaha kano alaang, am alaang sino damiun gino kaano yo bagu alonom. 36 Alaang po sajoo nu inan takau gitu, am kaano ka keeti po alonom, totop no sajoo nu inan takau gitu poyo alaang atawang, kono da palita apakalaang ditakau.”
Baabala palingatan nu Yesus da ulun-ulun Palisi am gulu-gulu Taulat
37 Pongo nu Yesus nangajal, sino doono ulun Palisi nangundang da Yesus aangkan da baloi no. Am umpos No da baloi gitu, nantudung am naangkan.
38 Ulun Palisi gitu nagilong Joo am nasobop, sobop kaano Yesus gitu gulu namagu da tanilu No, maya da atulan nu agama nilo, kono yak am naangkan. 39 Tapi Maangun minagu da ulun Palisi gitu, “Ee akau ulun-ulun Palisi! Akau gitu angalisi da sood nu limow nu saanting baya da piinggan yak, tapi sood da nalom nu inan mi kabaata, kaano yo lision mi, peegitu am pinyawo mi alaat. 40 Uuy bai akau ulun-ulun buduk! Bokon ka sajoo no gino binonsoi nu Yampuon sood da limow yak, tapi sood da nalom poyo kan? 41 Kono poyo deeno, naakin mino udan nu piinggan mi am baya da udan nu saanting mi da ulun-ulun munsikin. Jadi, sajoo no gitu ajadi alisi damiun.
42 Aduso no akau ulun-ulun Palisi! Sobop akau tulus-tulus anaak da pelpuluhan da Yampuon, intad da sajoo nu masom-masom nu sayul am sajoo nu taanom nu kabun mi, tapi aadil am angumpada da Yampuon kaano linaku mi. Peegitu am, gino nga alus lakuin mi am bookon poyo totop linaku mi. l
43 Aduso no akau ulun-ulun Palisi! Sobop akau asalu antudung da intokon gu da panguulu nu baloi sambayang, baya da asalu no akau logoon da intokon nu ulun suang. 44 Am aduso no akau! Sobop akau kono da lobong kaano amakai da taanuan. Ulun-ulun kumidau da sawat no, kaano ilo apaanai. Siga kolo alidok bagu.”
45 Doono ulun intad da gulu-gulu Taulat giatu tinumaam Joo, “Gulu, Okow minagu kono deeno aguyai damon poyo.”
46 Tapi Oyo tinumaam, “Aduso no akau poyo, uuy gulu-gulu Taulat! Sobop akau gitu amakasa da ulun-ulun bookon, angalaku da atulan-atulan aagat binonsoi mi kabaata. Tapi akau ingkaa paladuli da duol nu lasa nu ulun bansukon mi gitu, am akau kabaata yak kaano angalaku kono deeno. 47 Aduso no akau, pongo namonsoi da lobong nu ulun nabi-nabi paguulu angalogo dilo, peegitu am ilo pinatoi nu akion mi kabaata. 48 Jadi akau no kabaata, angaku am nanuus da atu pongo linaku nu akion mi, namatoi da ulun nabi-nabi paguulu am binonsoi mino lobong lo. 49 Da woktu gino li, Yampuon baya da ikmat No pongo ininagu, ‘Nabi-nabi baya da lasul-lasul-Ku inutus-Ku, tapi sino intad dilo potoyon am aduol da lasa maapo.’ 50 Gino intok no, ulun-ulun nu jomon deeno gitu tuntuton maapo, sobop ulun nabi-nabi paguulu pongo pinatoi intad da woktu nu Yampuon namonsoi da dunia gitu, 51 oyo gino, intad da woktu ni Abel pinatoi, sampoi da woktu nu imam Jakalia pinatoi. i Jakalia gino pinatoi da lolot nu mesba baya da Baloi nu Yampuon. Dakon minagu damiun, sajoo no gitu tuntuton maapo intad da ulun-ulun nu jomon deeno gitu. m
52 Aduso no akau uuy gulu-gulu Taulat! Sobop kunsi nu tobon nu ulun akoolig da Yampuon, pongo noyo tinongoi mi, tapi akau kabaata kaano guang mumpos, am ulun guang mumpos popolon mi.”