Yesus nangutus da tujum pulu ulun mulit No
10
1 Bagu Maangun namili da tujum pulu ulun mulit bookon am nangutus dilo saaduo-saaduo, mampanguulu Joo da sajoo nu kuta am gu da intok guang kuoyon No. 2 Dagu Kono dilo, “Otomon gino asuang, tapi ulun angotom gino keeti yak. Gino sobop no, ampolok kano da Ulun kayampu da umo gitu, amansuk da ulun angotom da umo No. 3 Naa, makow kano! Ingoton mi am, Dakon angutus damiun kono da anak nu kiiyum domba makow da unod nu kiiyum saligala asangit. a 4 Peen mi pangubit da ipuk-ipuk atau taas atau sandol baawis bookon. Peen mi pababual da ulun bookon da daalan, oongkut kau da ulion mi maapo. 5 Likin no, munsop kapo da doono baloi, paguuluin mi minagu, ‘Tabi kaansayan da sajoo nu ulun da nalom nu baloi gitu.’ 6 Am sino po ulun antalimo da daguon mi da nalom nu baloi gino, akaalap no ilo bonsoi-bonsoi da kaansayan. Am kaano po ilo antalimo da daguon mi, am anduli no kaansayan gino damiun. 7 Mudong kau yak da baloi nu ulun antalimo damiun. Atu yak paakanon lo damiun, akanon miyak. Sobop ulun angkalaja gino apantos antalimo da gaji. Peen udong deeno am udong deeno. 8 Matong kapo da doono kuta, am antalimo po ilo damiun, akanon miyak inakano taakin lo damiun, 9 am palawoon mi panyakit nu ulun-ulun nadualan da kuta gino, pasukuon mi da sajoo nu ulun da kuta gino, ‘Woktu nu Yampuon ajadi da Laja, amaad noyo.’ 10 Tapi munsop kapo da doono kuta, am kaano akau talimoon lo, kami yak am sumila da daalan maayo am minagu, 11 ‘Lidok nu kuta mi gitu sinumokot da kalayam mai, pampasin mai da tingkuangon mi, baala nga gitu damiun. Gama mi kaa antalimo damon, tapi puanamin mi gitu am, woktu nu Yampuon ajadi da Laja da unod mi, amaad noyo.’ 12 Dakon minagu damiun, da odow kiamat maapo, ukuman nu ulun-ulun da kuta gitu labi aagat tanggungon no intad da ulun-ulun nu kuta nu Sodom paguulu.”Ukuman nu Yampuon da ulun-ulun nu kuta kaa mintopot
13 “Aduso no akau ulun-ulun nu kuta nu Kolasim am kuta nu Batsaida! Gino lan duang nu ulun-ulun nu kuta nu Tilus baya da kuta nu Sidon, nakeelong da katulayan-katulayan linaku-Ku kono da neelong mi deeno gitu, totop nopo ilo akiampun anduli da daalan nu Yampuon am basonsol. b 14 Woktu nu odow kiamat maapo, ukuman nu ulun-ulun nu Tilus baya da Sidon labi alangka tanggungon no intad damiun. 15 Am akau ulun-ulun nu kuta nu Kapelnaum, nos mi, paasakon kau maapo da sulga? Kaano, tapidin akau da apuy nalaka maapo!” c
16 Bagu Yesus minagu da mulit-mulit No, “Atu yak ulun angkinoog damiun, angkinoog nopo ilo gino Dakon. Tapi atu yak ulun anyikag damiun, anyikag nopo ilo gino Dakon. Am atu yak ulun anyikag Dakon, anyikag nopo ilo Joo nangutus Dakon.” d
Tujum pulu ulun mulit nu Yesus nanduli
17 Bagu tujum pulu ulun mulit nu Yesus giatu nanduli nasonong bonsoi am dagu kolo, “Maangun, seetan-seetan po maya da palinta mai, woktu mai namalinta dilo amakai da ingalan-Mu.”
18 Yesus tinumaam dilo, “Dakon pongo nakeelong da Seetan Maayo nadatu intad da kawanan kono da ganit. 19 Kinoogon mi gitu bonsoi-bonsoi am! Aku pongo nanaak da kuasa damiun, bisa angidau da niipo baya da tingangeet, am amutul da sajoo nu kakatagan nu pagapu mi seetan, am kaano ka doono po bisa anyilaka damiun. e 20 Aanja no akau, bokon ka alingu alaat giatu yak maya da palinta mi, tapi ingalan mi pongo noyo tinulis da sulga.”
Yesus naanja
21 Da woktu gino li po, Yesus naanja, sobop Oyo pinimpin nu Alingu Alisi. Am Oyo minagu, “Ama, Maangun nanguasa da kawanan baya da tana gitu. Dakon batalimokasi Juun, sobop sajoo no gitu kaa noyo pineelong-Mu da ulun-ulun tinaakan da kapanayan onsoi baya da apintol, tapi pineelong-Mu da ulun-ulun kaa da kapanayan baya da kaa da pintol. Gino no apasonong da pinyawo-Mu.”
22 Dagu kono nu Yesus poyo da ulun deetu, “Sajoo no gitu pongo noyo tinaakan ni Yama Dakon. Kaano ka doono ulun po apaanai da Anak gino, Yama yak. Gino po duang ni Yama, kaano ka doono ulun po akoolig Joo, Anak baya da ulun-ulun kinaguang Noyak akoolig di Yama.” f
23 Pongo gino, Yesus linumiow da mulit-mulit No da woktu lo kabaata, am ininagu dilo, “Asonong no sajoo nu mato nu ulun, pongo nakeelong da atu neelong mi deeno gitu. 24 Dakon minagu damiun kono deeno, sobop asuang ulun nabi baya da laja guang agilong da atu neelong mi deeno gitu, tapi kaano ilo nakeelong. Ilo guang angkinoog da atu kininoog mi deeno gitu, tapi kaano ilo nakadingog.”
Ulun Samalia onsoi da pinyawo
25 Sino odow gili, sino Gulu Taulat gitu guang angajajab da Yesus, pilik no am ininagu, “Gulu Yesus, son kaku angalaku am akaalap da bayag onsoi da buoi nu odow?” g
26 Yesus minagu joo, “Son kono solod nu Musa da atulan nono? Atu nabasamu deeno?”
27 Dagu nu gulu gitu da Yesus, “Musa minagu da atulan no, ‘Umpadeenmu Maangun, Yampuon nu bayag gitu, intad da pinyawomu, pikilanmu baya da sajoo nu bayagmu’ am ‘Umpadeenmu poyo sajoo nu ulun, kono da dilimu kabaata.’ ” h
28 Dagu nu Yesus joo, “Monong no nga ukummu gino. Lakuonmu am bayeenmu gino, okow gino maapo aayag.” i
29 Tapi, gulu gitu guang po apabonol da dili no kabaata, oyo minagu da Yesus, “Atu ulun sajoo kuon-Mu umpadeenku gitu gua?”
30 Bagu Yesus basalita joo, “Sino ulun kuusoi gitu intad da Yelusalem muli da Yeliko. Sajoo alata nu ulun gitu li inalap nu ulun alaat giatu, am bubuuki lopo oyo, sampoi ulun gitu guang matoi am pansigee loyak oyo da daalan.
31 Pakapaat nanseel ulun imam gitu, keelong no ulun binuukan gitu li, pagiliw yak oyo am inakow. 32 Gino po duang nu ulun Lewi gitu, nakeelong da ulun gino, ilee noyo, am pagiliw da sampilang nu daalan am inakow. 33 Libos gino, datong bagu nu doono ulun Samalia gitu, ilee no ulun gitu, nakaasi noyo joo. 34 Kuoi no imaadi yo, napo no lisio da timug nu anggul napilat joo gitu, am piidi no da umau, libos gino bongkoso no. Napo noyo paasaki da sawat nu kiiyum keledai no, ubito no da panginapan am uwoto noyo. 35 Kono nunsuab, oyo nanaak da uwong dinal da ulun kayampu da panginapan gitu, am dagu kono, ‘Uwotonmu gulu ulun gitu am, sino po uwongmu apakaimu da pangungkusmu da ulun gitu, gantiin kuyak da woktuku anduli.’ ”
36 Pongo nu Yesus nabasalita da Gulu Taulat gitu li, dagu kono bagu nu Yesus, “Joo, atu ulun onsoi da pinyawo da ulun taatalu gino noli?”
37 Dagu kono nu Gulu Taulat gitu li bagu, “Ulun nanulung, noonsoi da pinyawo gitu noli.”
Yesus minagu, “Naa, makow kono, kalajeen munyo nu kono yo deeno!”
i Malia baya di Malta
38 Yesus baya da mulit-mulit No inakow poyo am suku lo da doono pagun gitu. Gu da pagun gitu, sino doono daanu beengalan di Malta nangundang Joo da baloi no. j 39 i Malta gitu maal da pagaka daanu beengalan di Malia. i Malia gitu nantudung da kiing nu kalayam nu Maangun, am totop angkinoog da dagu No. 40 Tapi i Malta gitu kaliwot no ibut no, anyiap da sajoo nu naakin no da Yesus. Kuoi no da Yesus am ininagu, “Maangun, balee nga gulu i Malia gitu angindangan dakon. Ilee nga, dakon yak doono angalayani gitu.”