Yesus nangutus da apulu duo mulit No
9
1 Sino odow gili Yesus nagipag nangalulud da apulu duo mulit No. Naaki No ilo da kakatagan baya da kuasa apasila da alingu-alingu alaat am apalawo da panyakit. 2 Pongo gino utuso No ilo bagu inakow apalawo da panyakit nu ulun adualan, am apasuku da kabol nu Yampuon, Oyo gitu no Laja. 3 Dagu nu Yesus dilo, “Peen mi pangubit da atu-atu da lokowon mi, peen mi pangubit da suukud, taas, inakano, uwong am baya da babadu pansalinan mi. a 4 Sino po ulun antalimo damiun da baloi no, mudong kano gulu deeno suku da akau angidu da kuta gino. 5 Am sino po ulun ingkaa antalimo damiun, sumila kano da kuta gino am pampasin mino kaau da kalayam mi. Gitu ajadi da taanuan nu Yampuon guang angukum dilo.”b6 Am lakow kolo no bagu, nabakuliling da sajoo nu pagun-pagun apasuku da Kabol Onsoi intad da Yampuon am apalawo da panyakit nu ulun adualan da suang nu intokon gino.
Elodes baya di Yesus
7 Woktu ni Elodes namalinta da alial nu Galilia, pakadingog yo da sajoo nu kabol linaku nu Yesus gino. Nasusa no pikilan no bagu, sobop sino ulun ininagu, Yohanes Pambaptis naayag nanduli. c 8 Sino po ulun minagu, nabi Elia inulag nanduli, am sino poyo ulun minagu sino no ulun nabi intad da nabi-nabi paguulu nanduli naayag. 9 Tapi Elodes minagu, “Pongo no nga liga ulun binansukku nanotok da liog ni Yohanes. Atu po bagu Oyo gitu? Nasuang no bagu kabol nadingogku gitu.” Gino intokon ni Elodes, aguuyum da lakow no kumagamot da Yesus.
Yesus nanaak da inakano da limo libu ulun
10 Panduli nu lasul-lasul giatu bagu da Yesus, am nagiulit Joo, da sajoo nu kinalaja lo. Ubito bagu ilo nu Yesus inakow nagidu da kuta beengalan da Batsaida. Ilo yak kabaata deetu.
11 Tapi napanayan no bagu nu ulun suang giatu intokon lo, bagu ilo inaya da Yesus. Oyo nantalimo dilo am nangajal da Yampuon gino Laja, baya da napalawo da panyakit nu ulun adualan.
12 Woktu nu odow guang alonom, kuoi nu apulu duo lasul gitu da Yesus am ininagu Joo, “Gulu, intokon gitu asaagit. Bansukon Muno ulun suang giatu makow da pagun-pagun amaad deetu, gama lo aguyum da intok mudong am aangkan.”
13 Tapi taamo ilo nu Yesus, “Akau alus amakan dilo!”
Taam nilo, “Sino damon gitu limo luti am saaduo papeet yak. Makow ki akai angalid da inakano da ulun suang giatu?” 14 Sobop gu deetu, sino kila-kila limo libu ulun kuusoi.
Bagu Yesus minagu da mulit-mulit No, “Bansukon mi ulun suang giatu antudung bakulumpuk, kila-kila limom pulu ulun doono kulumpuk.”
15 Mulit-mulit nu Yesus giatu nangalaku da atu dinagu nu Yesus dilo. 16 Pongo gino Yesus nangalap da limo luti am saaduo papeet gino. Bagu Yo nantingaa da kawanan am nabasukul da Yampuon. Am Oyo namial nanubing-nubing da luti gino am nanaak da mulit-mulit No, bagio lo bagu da ulun suang giatu. 17 Naasug no bagu ilo sajoo. Am mulit-mulit nu Yesus nangalulud da sowog nu inakano lo gitu apulu duo buuduy.
i Pitulus nangaku da Yesus gino Laja Anyalamot
18 Sino odow gili woktu ni Yesus nabasambayang kabaata, am mulit-mulit No giatu inuoi Joo. Bagu Yesus nangkibala dilo, “Anulut da dagu nu ulun suang, atu ki Aku gitu?” 19 Dagu kolo, “i Yohanes Pambaptis. Sino po minagu, ‘Elia,’ am sino ulun minagu poyo, ‘Sino no doono ulun nabi nanduli naayag intad da nabi-nabi paguulu li.’ ” d
20 Yesus angkibala poyo dilo, “Anulut damiun, atu Aku gitu?”
Dagu ni Pitulus, “Okow no Laja Anyalamot intad da Yampuon giiyo.” e
21 Bagu Yesus namopol dilo, peen balee da ulun bookon, da Oyo gitu Laja Anyalamot.
Yesus ininagu da mudil nu duol nu lasa baya da kapatayan No
22 Am Yesus minagu poyo, “Anak Manusia alus ananggung asuang da duol nu lasa, am sikagin nu pamimpin-pamimpin baya da katua-katua nu imam am gulu-gulu Taulat maapo, bagu potoyon am padulion aayag da odow katalu da Oyo pongo inatoi.”
23 Pongo gino Yesus minagu da suang nu ulun deetu, “Atu yak ulun guang maya Dakon, kaano yo maya da kaguang no kabaata, anyaan da salip no tukid odow, am tulus-tulus maya Dakon. f 24 Atu yak ulun guang anagong da nyawo no, alawo maapo nyawo no. Tapi atu yak ulun alawo da nyawo no sobop oyo maya Dakon, oyo maapo anyalamot da nyawo no kabaata. g
25 Atu guna nu ulun akaalap da alata asuang da dunia gitu, tapi alawo nyawo no? Kaano guna no kan! 26 Atu yak ulun ooyu angaku Dakon, baya da daguon-Ku, Anak Manusia poyo maapo, ooyu angaku da ulun gino, da woktu No matong da odow sangilan da nalom nu kuasa No, baya da kuasa tinaakan ni Yama No am maleekot-maleekot alisi. 27 Dakon minagu damiun, da suang mi sino deetu, sino maapo ingkaa matoi, da oyo kaapo akeelong da Yampuon gitu Laja.”
Yesus namasiat da sawat nu tidong
28 Kila-kila balu odow pongo nu Yesus nangajal da sajoo nu pangajalan No gitu, Oyo nangubit di Pitulus, i Yohanes am Yakobus inasak da sawat nu tidong am basambayang. h 29 Paas Oyo nabasambayang deeno, siga nu ayu No nabaluy am babadu No napulak namasiat-namasiat. 30 Gu deetu sino duo ulun ininagu Joo, ilo gino i Musa baya di Elia. 31 Ilo duo nalaang namasiat-namasiat am nagiinagu da Yesus da kapatayan No numaapo da Yelusalem, kono da pongo tinantu nu Yampuon.
32 Tapi i Pitulus baya da dangan-dangan no noolong nalitoi, am woktu lo nakadat, ilong lo nalaang namasiat-namasiat no bagu Yesus, am duo ulun giatu inimpilik da kiing No. 33 Woktu nu duo ulun gitu guang makow angidu da Yesus, dagu ni Pitulus Joo, “Gulu, nasanangan no akai inudong da intokon gitu. Gama mai nyo amonsoi da taluukap doono Juun, doono di Musa, am doono poyo di Elia.” Tapi i Pitulus gitu kaano yo apaanai da atu dinagu no gitu.
34 Paas oyo ininagu gitu, siga nu goon inatong nanangkub dilo, nangkalaa no bagu ilo. 35 Pakadingog lo bagu da dagu da nalom nu goon gino, “Gitu no Anak-Ku pinili-Ku, kinoogon mi-Yo.” i
36 Pongo nu dagu gino nalawo, ilong lo bagu da Yesus, Oyo yak bagu doono, am kaano ilo nagiulit da sajoo nu kajadian neelong lo gino li da atu yak ulun.
Yesus napasila da alingu alaat intad da anak nadualan
37 Paas kono da odow nunsuab, woktu nu Yesus baya da talu Lasul No tinumuun intad da tidong, datong nu suang nu ulun giatu, tinumamu da Yesus.
38 Sino kuusoi gitu intad da ulun suang giatu nampaluap, “Gulu, ileen-Mu am tulungin-Mu anakku, sobop oyo yak doono anakku. 39 Sino yak woktu nu alingu alaat sumulod joo, siga nu anak gitu bagu nampaluap am inugog-ugog no inan no, bagu kabang no nabaputa. Alingu alaat gitu poyo tulus-tulus apakaduol joo am kaano guang sumila joo. 40 Pongo no aku nampolok da mulit-mulit-Mu apasila da alingu alaat gitu, tapi kaano po ilo bisa.”
41 Dagu bagu nu Yesus, “Ee, akau ulun ingkaa mintopot da kuasa nu Yampuon am napalid. Leed nokat Aku gitu inudong am asabol damiun, tapi akau kaano monong-monong mintopot Dakon. Bitonmu anakmu da gitu!”
42 Paas anak gitu inuoi inimaad da Yesus, alingu alaat gitu nangalapas joo da tana, sampoi inan no kinumotog am tumikog-tumikog. Tapi Yesus namagulotok da alingu alaat gitu am namansuk sinumila joo, am anak gitu po bagu nanduli noonsoi. Bagu Yesus namansuk da anak gino inuoi di yama no.
43a Nasobop no bagu sajoo nu ulun deeno nakeelong da katulayan nu kuasa nu Yampuon.
Gitu kaduo kali nu Yesus ininagu da mudil nu duol nu lasa baya da kapatayan No
43b Woktu nu sajoo nu ulun nasobop, nagilong da sajoo linaku nu Yesus, Oyo ininagu da mulit-mulit No, 44 “Kinoogon mi dagu-Ku gitu am, peen mi lupani dagu-Ku gitu, Dakon gitu Anak Manusia takubon maapo nu ulun-ulun panguasa.” 45 Tapi kaano ilo akalati da atu daguon No gitu, sobop Yampuon namuni da lati nu dagu nu Yesus gino. Am kaano po ilo asiog angkibala da lati nu dagu No gitu.
Atu ulun maayo da suang nu mulit-mulit nu Yesus
46 Paat da odow gili, mulit-mulit nu Yesus giatu nanjajaal. Ilo nanjaajaal gitu atu ulun maayo bonsoi da ingalan da suang lo gitu. j 47 Tapi Yesus apaanai da pinikil nilo. Bayudo No anak luumoot gitu am bulii No da kiing No. 48 Bagu Yo ininagu dilo, “Atu yak ulun asonong da pinyawo, antalimo da anak gitu da nalom nu ingalan-Ku, baalati oyo gino, antalimo Dakon. Am atu yak ulun asonong da pinyawo antalimo Dakon, baalati ulun gino po antalimo da Yampuon nangutus Dakon. Sobop atu yak ulun luumoot da suang mi gitu, gino no ulun maayo bonsoi.” k
Ulun bookon bokon nu mulit nu Yesus napasila da alingu alaat
49 Yohanes minagu, “Gulu, akai nakeelong sino ulun napasila da alingu alaat, namakai da ingalan-Mu. Bagu akai namopol da ulun gino, sobop oyo gino bokon ka intad ditakau.” 50 Bagu Yesus minagu joo, “Peenmu popolo ulun gino, sobop atu yak ulun kaano angapu damiun, baalati oyo gino dangan mi.”
Yesus baya da ulun Samalia
51 Guang agonop no woktu nu Yesus masak da sulga, Oyo nangalap da kaputusan inakow da Yelusalem. 52 Bagu Oyo namansuk da takula-takula ulun, makow mampanguulu Joo. Ulun binansuk No giatu inakow, am tinumuju da pagun nu ulun Samalia, anyiap da sajoo nu pinalulu nu Yesus. 53 Tapi ulun-ulun Samalia giatu kaa guang antalimo Joo, sobop tujuon nu lakow No gitu, tumuju da Yelusalem. 54 Woktu nu mulit No saaduo gitu, i Yakobus baya di Yohanes apaanai da Yesus kaano tinalimo nu ulun-ulun Samalia, ilo minagu, “Maangun, guang Kow ki da akai amansuk da apuy, tumuun intad da kawanan anyolob da ulun Samalia giatu?” l
Son kono nu lakow nu maya da Yesus
57 Woktu nu Yesus baya da mulit-mulit No gu da daalan, sino ulun minagu Joo, “Gulu, dakon guang maya Juun, atu yak lokowon-Mu.” 58 Yesus minagu joo, “Kiiyum saligala sino da luang intokon no mudong, am maanuk sino da buunsalag, tapi Dakon gitu Anak Manusia kaano intokon apadumpik da ulu.” 59 Dagu No poyo da ulun bookon, “Maya kow Dakon!”
Tapi ulun gitu minagu, “Gulu, ijinon-Mu gulu aku makow angalobong di yamaku am.”
60 Dagu poyo nu Yesus joo, “Gama nu ulun matoi gino angalobong da ulun matoi. Tapi okow, makow kono da intokon bookon am pasukuon muno kabol nu Yampuon, da Oyo gino Laja.”
61 Sino poyo ulun bookon minagu Joo, “Dakon guang maya Juun, Maangun. Tapi ijinon-Mu aku gulu palamisi da kalualgaku.” m
62 Tapi Yesus minagu joo, “Ulun pongo nabasiap nanyangkul da tana, kaano yo abuli agilong da inaaling. Gino po duang nu ulun pongo nabasiap maya Dakon, tapi agilong da inaaling, kaano yo apantos maya da nalom nu kalajaan nu Yampuon.”