24
1 Tapi, kapongo nu odow Maayo gino, woktu nu maad tawang da odow minggu, sino takula-takula daanu inakow da lobong nu Yesus nangubit da umau malanyung pongo siniap lo.2 Ilee lo batu nanuutub da lobong gitu naluid nyo bagu. 3 Woktu lo inumpos, kaano ilo nakatamu da bangkai nu Maangun Yesus gino. 4 Ilo inimpilik am nasinuutan da kajadian gino. Siga yak bagu nu ulun saaduo gitu inimpilik da kiing lo, pakayan lo gitu nalaang namasiat-namasiat. 5 Ilo gitu po bagu nangkalaa bonsoi am ilo naginatud tinumungob. Tapi ulun saaduo gitu bagu minagu dilo, “Kulo kau paguyum Joo, da Oyo naayag intad da suang nu ulun pongo inatoi? 6 Kaano Yo da gitu. Oyo pongo nanduli naayag. Akeengot kaki da atu pongo dinagu No damiun, da woktu No da Galilia li? a 7 Dagu Kono, ‘Oyo gino Anak Manusia alus takubon nu tanilu nu ulun-ulun badusa baya da salipon, am padulion aayag da odow katalu da Oyo pongo inatoi.’ ”
8 Pakeengot lo bagu da atu pongo dinagu nu Yesus. 9 Am libos lo nanduli intad da lobong, ulito lo bagu sajoo nu kajadian gino da apulu doono mulit baya da mulit-mulit bookon. 10 Daanu-daanu giatu, oyo gino i Malia intad da Makdala, am i Yohana, i Malia ina ni Yakobus. Am sino poyo daanu-daanu bookon dangan lo giatu, namala da kajadian gino da lasul-lasul.
11 Tapi nos nu lasul-lasul giatu dinagu nu daanu-daanu giatu ansaluk, am kaano ilo mintopot da dinagu nilo.
12 Tapi i Pitulus linumuat am natikas-tikas inakow da lobong gino. Woktu no nagilong da nalom, keen yak bagu neelong no. Bagu yo inakow, am nasiinutan bonsoi baya da tulus-tulus angkibala da nalom nu pinyawo no da kajadian gino.
Yesus napeelong da dili No da daalan tumuju da Emaus
13 Paat da odow gili poyo, duo ulun intad da mulit-mulit bookon nu Yesus inakow inuoi da doono pagun, beengalan da pagun Emaus. Pagun gitu balud no intad da Yelusalem kila-kila apulu doono kilu. b 14 Am ilo poyo agiinagu da daalan da sajoo nu kajadian pongo najadi da Yesus. 15 Woktu lo agiinagu gitu am angkuuwalo, datong yak nu Yesus kabaata inimaad dilo, am inakow nambaaya dilo. 16 Tapi sino nanyilung da mato lo, sampoi ilo kaa nakoolig Joo.
17 Yesus minagu dilo, “Atu ukuukumon mi da lakow mi gitu?” Siga lo nabalanti inakow, am mudil nu ayu lo agulid.
18 Sino doono ulun da suang lo gitu beengalan di Kliopas, tinumaam Joo, “Ulun dabagu Kow ki gitu, sampoi Okow kaa apaanai da kajadian da takula-takula odow gitu li da Yelusalem tu?”
19 Dagu No bagu dilo, “Atu kajadian gino?”
Ilo tinumaam, “Waa, Yesus ulun Nasalet gino ulun nabi. Atu yak lakuin No am daguon No bakuasa bonsoi da tingkuangon nu Yampuon baya da sajoo nu ulun nu bangsa mai. 20 Tapi Yesus gitu pongo tinaakan nu katua-katua nu imam baya da pamimpin-pamimpin mai da pamimpin nu bangsa nu Loma, gama No ukumon matoi, am ilo pongo nanyalip Joo. 21 Bagu paguulu gili akai miman, da Oyo no matong amibas da bangsa nu Islael. Am odow gitu no odow katalu intad da sajoo nu kajadian gino. 22 Takula-takula daanu dangan mai pongo napatikog damon. Ilo nadonom bonsoi inakow da lobong No, 23 am kaano ilo nakatamu da bangkai No. Bagu ilo inatong nangubit da kabol, da ilo gitu nakeelong da maleekot-maleekot. Maleekot giatu namala dilo da Oyo pongo nanduli naayag. 24 Am sino takula-takula ulun dangan mai poyo inakow da lobong gino am nagilong, ka monong dagu nu daanu-daanu giano li, tapi kaano ilo nakeelong Joo.”
25 Bagu Yesus ininagu dilo, “Ee akau ulun buduk! Kaliwot no liwo mi mintopot da sajoo nu dinagu nu ulun nabi-nabi! 26 Akau sibonol no apaanai da Mesias gino alus aduol da lasa bonsoi gulu, libos gino bagu Yo logoon am antalimo da kuasa amalinta anggilad-gilad da Yampuon.”
27 Bagu Yesus napatilu dilo da atu pongo tinulis da nalom nu Kitob Baabala nu Maangun, da mudil nu dili No kabaata, intad da kitob-kitob nu Musa am suku da sajoo nu kitob nu ulun nabi-nabi.
28 Paat lo duo namaad nakasuku da pagun tujuon lo, bagu Yesus inakow yak tulus, 29 tapi ilo duo nanagong Joo. Dagu kolo, “Mapit Kono mudong damon gulu, sobop odow gitu guang nyo alonom am mato nu odow gitu poyo guang nyo luminyob.” Bagu Yo inumpos inudong nambaaya dilo. 30 Woktu No nantudung naangkan nambaaya dilo, Oyo nangalap da luti, nabasambayang namolokot, bagu yo tinuubing No am naaki dilo. 31 Am woktu gino li po bagu, mato lo nabuka nakeelong Joo, am ilo po nakoolig Joo. Tapi Oyo nalawo intad da tingkuangon lo.
32 Dagu kolo da doono am doono bagu, “Kaa ki pinyawo taduo kinumuduutuk yak nasonong, da paat No ininagu ditakau da unod nu daalan gino li, da paat No napatilu da Kitob Baabala nu Maangun ditakau?”
33 Bagu ilo duo linumuat am nanduli da Yelusalem. Gu deeno ilo duo nantamu da apulu doono mulit giatu. Ilo gitu nantiimung baya da dangan-dangan lo. c 34 Dagu kolo duo bagu, “Monong, bonol no Maangun gino pongo nanduli naayag, am Oyo pongo napeelong da dili No di Simon.” 35 Bagu ulun saaduo gitu li po bagu nagiulit, da koson kono nu kajadian gino li dilo da daalan, baya da ilo nakoolig Joo da woktu No nanubing-nubing da luti.
Yesus napeelong da dili No da sajoo nu mulit No
36 Am woktu lo duo nagiulit da kajadian gino, siga yak nu Yesus inimpilik da unod lo am ininagu, “Tabi kaansayan damiun!” 37 Nakatikog no ilo sajoo am nangkalaa, nos lo Oyo gitu gampuan. 38 Tapi Oyo minagu dilo, “Kulo kau pakatikog am pinyawo mi kaa mintopot? 39 Ileen mi kon tanilu-Ku baya da kalayam Kutu. Aku no nga gitu. Tongoyon mi kon Aku am ileen mi, sobop gampuan gino kaano ansi no baya da tulang no, kono da atu pongo neelong mi Dakon.” 40 Woktu nu Yesus minagu dilo gitu, Oyo napeelong da tanilu No baya da kalayam No dilo. 41 Tapi kaano po ilo mintopot, sobop ilo nasobop am naanja bonsoi nakeelong Joo. Bagu Yesus nangkibala dilo, “Sino ki inakano mi deetu?” 42 Bagu ilo nanaak Joo da sangkolot papeet sinanga. 43 Anapo No papeet gino am akano da tingkuangon lo.
44 Oyo minagu dilo, “Gitu nga pongo dinagu-Ku damiun gili, da woktu-Ku sino nambaaya damiun, oyo gino, sajoo pongo tinulis da mudil-Ku gitu da nalom nu kitob nu Musa am kitob nu ulun nabi-nabi baya da kitob nu Masmul alus gonopon.” 45 Bagu Yesus namuka da pikilan lo, sampoi bagu ilo nakalati da Kitob Baabala nu Maangun. 46 Dagu Kono dilo, “Sino tinulis kono da gino, ‘Mesias gino alus aduol da lasa am anduli aayag da suang nu ulun pongo inatoi, da paat nu odow katalu da Oyo pongo inatoi.’ 47 Am da nalom nu kuasa nu ingalan No poyo, kabol gitu alus pasukuon mi da sajoo nu bangsa intad da Yelusalem, oyo gino, sajoo nu ulun alus akiampun am ampunon dusa-dusa lo nu Yampuon. 48 Akau gitu no sasi da sajoo nu kajadian gitu. 49 Numaapo, Aku angutus da Alingu Alisi damiun, kono da pongo jinanji ni Yama-Ku. Tapi akau alus mudong da kuta Yelusalem gitu sampoi akau langkapin da kuasa intad da Yampuon.” d
Yesus inasak da Sulga
50 Bagu Yesus nangubit dilo sinumila da kuta nu Yelusalem suku da maad nu Betania. Gu deeno, Oyo nangakat da tanilu No, bagu Yo namolokot dilo. e 51 Am woktu No namolokot dilo, Oyo kinumakat kabaata inuli da sulga. 52 Bagu ilo naginatud nanyamba Joo, am inuli da Yelusalem baya da pinyawo lo nasonong bonsoi. 53 Ilo gitu po bagu, totop sino da nalom nu Baloi nu Yampuon am tulus-tulus namuji da Yampuon.