Mulit-mulit nu Yesus Nangotom da gandum da odow Maayo nu ulun Yahudi
6
1 Sino odow gili, woktu nu odow Maayo nu ulun Yahudi, Yesus baya da mulit-mulit No inakow nanseel da umo nu gandum. Mulit-mulit No gitu nangotom da gandum. Ilo nanibak da gandum gino da tanilu lo, am akano lo. a 2 Tapi sino takula-takula ulun Palisi ininagu dilo, “Kulo akau nangalanggal da ukum nu agama da odow Maayo?”3 Bagu Yesus minagu dilo, “Kaano ki akau namasa da atu kinalaja ni Daut,b woktu no baya da ulun-ulun inaya joo neetil? c 4 Oyo inumpos da Baaloi Sambayang nangalap da luti pongo pinasamba da Yampuon am akano no, taaki no poyo da ulun-ulun inaya joo, peegitu am imam-imam yak bisa aangkan deeno.” d
5 Yesus minagu dilo poyo, “Anak Manusia gino Maangun bakuasa da odow Maayo!”
Yesus napalawo da panyakit nu ulun da Odow Maayo nu ulun Yahudi
6 Sino odow Maayo bookon poyo, Yesus inumpos da nalom nu baloi sambayang gitu, am nangajal. Gu deetu sino ulun inatoi da tanilu pamidis. 7 Gulu-gulu Taulat baya da ulun-ulun Palisi naguyum da kasalaan nu Yesus, nu sino likin no Yesus apalawo da panyakit nu ulun da odow Maayo. Gino intokon lo apasala Joo maapo. 8 Tapi Yesus apaanai da pikilan lo, dagu Kono bagu da ulun inatoi da tanilu pamidis gitu li, “Bool, lumuat am mimpilik kono da unod gino!” Siga nu ulun gitu bagu, linumuat am inimpilik. 9 Dagu Kono poyo dilo, “Angkibala Aku damiun, atu ki bisa kalajeen da odow Maayo? Angalaku da onsoi ki atau angalaku da alaat? Anyalamot da nyawo nu ulun ki atau amatoi joo?” 10 Pongo gino Yesus nangalilig da kuliling lo sajoo, am ininagu da ulun nadualan gitu, “Tuuyinmu tanilumu!” Tuuyi nu ulun gitu tanilu no, am siga nu panyakit no nalawo.
11 Am nalagaai no ilo. Pangkuuwalo bagu ilo da atu lakuon lo da Yesus.
Yesus Nagipag da Apulu Duo Lasul
12 Sino po da woktu gili, lakow nu Yesus da tiidong. Solonolonom Yo nabasambayang da Yampuon. 13 Paas payung nu odow bagu, ipagi No mulit-mulit No giatu muoi Joo. Bagu Yo namili da apulu duo ulun, inipagan No da Lasul, ilo gitu no ulun-ulun tinaakan No da kuasa apasuku da Kabol Onsoi. 14 Oyo gino, i Simon iningalanan No di Pitulus, i Andilias pagaka ni Simon, i Yakobus am i Yohanes, i Pilipus am i Baltolomius, 15 i Matius am i Tumas, i Yakobus anak ni Alpius, am i Simon sinabit da ulun Selot, 16 i Yudas anak ni Yakobus, am i Yudas Iskaliot nangulalaat da Yesus.
Yesus nangajal baya da napalawo da panyakit nu ulun suang
17 Bagu Yesus baya da mulit-mulit No tinumuun intad da tiidong, nabalanti da intok agaana. Gu deetu, linumulud suang nu mulit-mulit No baya da ulun suang bookon. Ilo inatong intad da sajoo nu alial nu Yudia, Yelusalem, am intad da maligi nu tingkayu nu Tilus baya da Sidon. 18 Ilo inatong guang angkinoog da Yesus, baya da ampolok da panyakit lo palawoon No. Ulun-ulun sinulodon nu alingu-alingu alaat giatu poyo, ampolok akisila da alingu-alingu alaat giatu Joo. 19 Am sajoo nu ulun giatu balusaha anongoi Joo, sobop sino kuasa sumila intad da inan No. Am sajoo nu panyakit lo nalawo.
Baabala Asonong baya da Palingatan
20 Bagu Yesus nagilong da mulit-mulit No am ininagu,
“Asonong no akau ulun-ulun munsikin,
sobop Yampuon Laja gino kayampu damiun.
21 Asonong no akau deeno gitu eetil,
sobop akau aasug maapo.
Asonong no akau antangi,
sobop akau gino akaadak maapo.
22 Asonong no akau kalaagayan nu ulun, kaa talimoon nu ulun, am uyayon nu ulun sobop akau maya da Anak Manusia. e 23 Ulun nabi-nabi paguulu poyo linaku kono deeno. Asonong no pinyawo mi, sobop maayo balos mi da sulga maapo. f
24 Tapi aduso no akau ulun-ulun babayag deeno gitu,
sobop akau pongo nakaalap da kasanangan mi.
25 Aduso no akau deeno gitu aasug,
sobop akau maapo eetil.
Aduso no akau deeno gitu akaadak,
sobop akau maapo agulid am antangi.
26 Aduso no akau pujion nu sajoo nu ulun, sobop paguulu poyo akion mi namuji da ulun nabi-nabi alaat.”
Umpadeen mi pagangit mi
27 “Tapi angkinoog kapo Dakon deeno gitu, Dakon minagu damiun, Umpadeen mi pagangit mi, onsoi kau da ulun angulalaat damiun. 28 Ampolok kau da bolokot da ulun anyumpa damiun, sambayang kau da ulun aguyai damiun. 29 Sino po ulun anampal da ilan mi doono, pataanon mi poyo ilan mi sampilang. Am sino po ulun angalampas da babadu juba mi, gama noyak poyo angalampas da babadu mi bookon. 30 Sino po ulun ampolok damiun, anaak kau. Sino po ulun angalampas da biinawo mi, peen mi poloko dulio. 31 Lakuin mi da ulun bookon kono da pongo linaku lo damiun. g
32 Am kono da akau angumpada da ulun angumpada damiun yak, atu kaansayan linaku mi? Sobop ulun-ulun badusa bisa yak po angalaku kono deeno. 33 Kalau akau apaanai da ulun apaanai damiun yak, atu kaansayan linaku mi? Ulun-ulun badusa yak bisa po kumuo deeno. 34 Kalau akau apasuali da ulun bookon am miman da oyo anduli damiun, atu kaansayan linaku mi? Sobop ulun-ulun badusa po, angalaku kono deeno, miman da oyo anduli. 35 Tapi akau alus angumpada da pagangit mi am onsoi dilo. Akau alus apasuali, am peen mi miman da oyo anduli. Kono deeno, akau maapo akaalap da balos no da sulga, am akau bagu ajadi da anak-anak nu Yampuon Asawat Bonsoi. Sobop, Yampuon onsoi da pinyawo da ulun kaa apaanai batalimokasi, am ulun-ulun alaat. 36 Kono poyo deeno koonsoyon mi pinyawo mi, kono di Yama takau, Oyo gino onsoi da pinyawo.”
Angadil
37 “Peen mi panyuu kamumulingau, akau po kaano suuwin nu Yampuon. Peen mi pangukum sambalang, akau po kaano ukumon nu Yampuon. Ampunin mi, akau po ampunon nu Yampuon. 38 Anaak kau, akau po naakin nu Yampuon. Naakin nu Yampuon gino, kono da ukulan onsoi am adodot, ugogon andabi asood. Sobop ukulan pakayon mi da ulun bookon, gino po pakayon nu Yampuon angukul damiun.”
39 Am Yesus basalita da umpama dilo, “Koson kono nu ulun abolow amayud da ulun abolow poyo? Kaa ki ilo duo akoonsop da luang? h
40 Kaano mulit labi intad da gulu no, tapi mulit apongo atamot da sakula no, oyo bagu anggilad da gulu no. i
41 Kulo ki akau akeelong da pias nu toon da nalom nu mato nu dangan mi, sodongkon toon baluti da nalom nu mato mi kabaata kaano yo eelong mi? 42 Son kami minagu da dangan mi, ‘Uu pagaka, pasileeku nga pias nu toon da nalom nu matomu, sodongkon toon baluti da nalom nu matomu gino kaano yo eelongmu?’ Ee akau ulun agisaansalu onsoi da pinyawo, paguuluonmu gulu pasilee toon baluti gino intad da matomu, bagu matomu abanta akeelong am bisa apasila da pias nu toon gino intad da mato nu danganmu.”
Puun nu toon baya da bua no
43 “Sobop, puun nu toon ingkaa onsoi, kaano po bua no onsoi, gino po puun nu toon onsoi angasil da bua onsoi. 44 Sobop puun-puun nu toon ooligan intad da bua no. Gino po puod nu duuy, kaano ulun angupu da bua nu ala, am intad da duuy-duuy poyo, kaano ulun angupu da bua nu anggul. j
45 Jadi lati no, ulun onsoi da pinyawo, onsoi nopo kalakuan no, sobop pinyawo no onsoi. Ulun alaat da pinyawo, alaat nopo kalakuan no, sobop pinyawo no alaat. Am atu yak daguon nu kabang no intad da nalom nu pinyawo no.”
Duo masom nu dasal
46 “Kulo akau agipag da ingalan-Ku, ‘Maangun, Maangun, peegitu am akau kaano angalaku da daguon-Ku?’ 47 Atu yak ulun matong Dakon, angkinoog am angalaku da dagu-Ku, 48 oyo gino anggilad da ulun apapilik da baloi, angkali analom, amuluy da batu da dasal no. Datong kono nu losob am timug maayo, baloi gino kaano yo napula, sobop dasal no akotog. 49 Tapi atu yak ulun angkinoog da dagu-Ku am kaano yo angalaku, oyo anggilad da ulun apapilik da baloi no da sawat nu tana ingkaa da dasal. Paas losob am timug maayo matong, baloi gino po bagu nasunsag.”