Yesus Napalawo da Panyakit nu Ulipon nu Katua nu palajulit nu Loma da Kapelnaum
7
1 Pongo nu Yesus nangajal da ulun suang, umpos No da kuta Kapelnaum. 2 Gu da intokon gitu sino katua nu palajulit nu Loma maal da ulipon inumpada no bonsoi, nadualan guang matoi. 3 Woktu nu katua nu palajulit gitu nangkinoog da kabol nu Yesus gu da Kapelnaum, oyo namansuk da pamimpin-pamimpin nu ulun Yahudi muoi da Yesus akimaasi apalawo da panyakit nu ulipon no gitu. 4 Woktu nilo nakasuku da Yesus, ilo nakimaasi bonsoi Joo, dagu kolo “Gulu, tulungin Muno gulu katua nu palajulit gitu, oyo apantos tulungin-Mu. 5 Sobop oyo gitu apaanai da bangsa takau am pongo namangun da baloi sambayang mai.”6 Lakow nu Yesus bagu nambaaya dilo. Woktu nilo guang nakasuku da baloi nu katua nu palajulit gino, bansuko no dangan-dangan no namala da Yesus, “Gulu, peen Munyo kasusa muoi da baloiku, kaano aku apantos antalimo Juun. 7 Sobop dakon kabaata kaano asiog tumingkuang Juun. Jadi minagu Koyak maapo uliponku gitu alawo no panyakit no. 8 Sobop dakon kabaata sino pamimpinku da sawatku, alus aku maya da ukum no, am da liwiku sino poyo palajulit, alus yo maya da ukumku. Amansuk po aku da palajulitku, ‘Makow kono!’, makow nyo, am amansuk po aku da palajulit bookon, ‘Muoi kow!’, muoi nyo. Am amansuk aku da uliponku, ‘Kalajeen muno gitu!’, kalajeen nonyo.”
9 Pongo nu Yesus nangkinoog da bilin gino, nasobop Nyopo da katua nu palajulit gino. Bagu Yo nangalilig da ulun suang inaya Joo giatu am ininagu, “Dakon minagu damiun, kaano Aku nakajajab nakeelong da buoi gitu, da ulun nu Islael mintopot kono da katua nu palajulit nu Loma gitu!”
10 Libos gino, panduli bagu nu ulun-ulun binansuk nu katua nu palajulit gitu da baloi no, am ilong lo nalawo no panyakit nu ulun ulipon gitu li bagu.
Yesus napakaayag nanduli da anak nu daanu nabalu da kuta Nayin
11 Kaanyo nabuoi da libos nu kajadian gino li, lakow nu Yesus gu da kuta beengalan da Nayin. Mulit-mulit No baya da ulun suang giatu nambaaya Joo. 12 Woktu lo guang nakasuku da kiing nu kabang nu daalan nu kuta gitu, sino ulun-ulun giatu sinumila intad da kuta nanampuyung nangitod da bangkai. Ulun inatoi gitu anak kuusoi, anak tunggal nu daanu nabalu. Asuang po ulun-ulun nu kuta gitu inaya da daanu nabalu gitu. 13 Paas Maangun Yesus nakeelong da daanu gitu, nakaasi no-Yo joo, am ininagu, “Peenmu pantangi, Minan!” 14 Bagu Yesus inimaad da bangkai tinampuyungan gitu am nanongoi joo, siga nu ulun-ulun nanampuyung da bangkai gitu nagobos. Yesus minagu, “Uu mamulok, Dakon amansuk juun lumuat kono, anduli kono aayag!” 15 Luat nu mamulok pongo inatoi gitu li nanduli naayag, nantudung am ininagu. Bagu Yesus namansuk da mamulok gino inuoi di ina no.
16 Nangkalaa no bagu suang nu ulun giatu am nasobop. Bagu ilo tulus-tulus namuji da Yampuon giiyo. Dagu kolo, “Sino no bagu ulun nabi maayo bakuasa bonsoi pongo inatong da unod takau, am Yampuon giiyo pongo inuoi anyalamot ditakau, umat No.”
17 Naago no bagu kabol linaku nu Yesus da sajoo nu alial nu Yudia, baya da alial bookon da kiing no.
Yesus baya di Yohanes Pambaptis
18 Woktu ni Yohanes Pambaptis nakaalap da kabol da sajoo nu kajadian gino li intad da mulit-mulit no, 19 ipagi no duo ulun intad dilo am namansuk dilo inakow nangkibala da Maangun, “Okow ki ulun matong jinanji nu Yampuon gino atau agalung yak ki akai da ulun bookon?”
20 Paas ulun saaduo gitu nakasuku da Yesus, dagu kolo, “Yohanes Pambaptis namansuk damon nangkibala Juun, Okow ki kunu ulun matong jinanji nu Yampuon gino atau agalung yak ki akai da ulun bookon?”
21 Woktu gino li Yesus napalawo da panyakit nu ulun suang am napasila da alingu-alingu alaat intad da ulun sinulodon am mato nu ulun-ulun nabolow poyo pinakatool No. 22 Jadi, Yesus tinumaam dilo, “Makow kano anduli di Yohanes, baleen miyo, da atu neelong mi am nadingog mi, ‘Ulun nabolow nakatool, ulun nabangkong nakalakow, ulun nangkudong nalawo da panyakit, ulun nabingung nakadingog, ulun inatoi nanduli naayag, baya da ulun munsikin pinasuku da Kabol Onsoi intad da Yampuon.’ a 23 Am asonong no pinyawo nu ulun totop mintopot Dakon.”
24 Pongo nu ulun binansuk ni Yohanes giatu inakow, tulus no bagu Yesus minagu da ulun suang giatu da mudil ni Yohanes. Dagu Kono, “Atu neelong mi da lapangan nu agis gino? Agilong da tuumuu kulion nu libut ki? Kaano kan! 25 Atu ilongon mi deeno? Agilong da ulun amakai da pakayan onsoi ki? Kaano kan, sobop ulun amakai da pakayan onsoi gino, intokon no gu da baloi maayo udongon nu laja. 26 Jadi akau inakow atu inilong mi? Agilong kau ki da ulun nabi? Yuu, monong. Dakon minagu damiun, Yohanes gino bokon ka ulun nabi biasa yak. 27 Sobop Yohanes Pambaptis gitu no kuon nu ayat nu kitob gitu,
‘Gitu no ulun inutus-Ku, mampanguulu Juun,
oyo maapo anyiap da daalan-Mu da tingkuangon-Mu!’ b
28 Dakon minagu damiun, da sajoo nu ulun inipus da dunia gitu, kaano ka doono po labi maayo intad di Yohanes, tapi ulun luumoot bonsoi da suang nu umat nu Kalajaan nu Yampuon labi maayo intad joo.”
29 Sajoo nu ulun suang baya da ansiingil da pajak giatu nangkinoog da dagu No gitu, ilo no ulun-ulun pongo mintopot da Yampuon am dagu No gino bonol, ilo poyo pongo binaptis ni Yohanes. c 30 Tapi ulun Palisi baya da Gulu Taulat giatu, kaano ilo guang antalimo da dagu nu Yampuon da dili lo. Kaano ilo guang baptison ni Yohanes.
31 Bagu Yesus minagu poyo, dagu Kono, “Son Kaku angumpama da ulun-ulun nu jomon deeno gitu aii? Atu panggiladon-Ku dilo? 32 Ilo gitu kono da anak-anak nantudung bakulumpuk-kulumpuk da pasal, kulumpuk doono antataam ampaluap da kulumpuk bookon,
Damon anyampuy da suling damiun, tapi kaano akau guang angalang,
damon banyanyi da nyanyian agulid, tapi kaano ilo antangi.
33 Gino po duang ni Yohanes Pambaptis da oyo inatong, kaano akau nantalimo joo. Kaano yo naangkan da luti baya da nanginum da timug nu anggul, dagu kami, sinulodon noyo nu seetan. 34 Bagu Anak Manusia inatong, oyo aangkan am anginum, am dagu kami, Oyo abaaluson am eenum-inum, am dangan nu ulun ansiingil da pajak am ulun badusa. 35 Tapi ikmat nu Yampuon binukti panyatee da sajoo nu ulun inaya da ikmat nu Yampuon gino.”
Yesus da Baloi ni Simon
36 Sino ulun Palisi beengalan di Simon. Oyo nangundang da Yesus naangkan. Yesus inatong da baloi no nantudung am naangkan. 37 Da kuta gino sino poyo daanu naago da ulun badusa. Paas daanu gino nakadingog da Yesus naangkan da baloi nu ulun Palisi gino, datong no nangubit da buutul pualamd boodan da malanyung. e 38 Bagu yo inimpilik da inaaling nu Yesus inimaad da kalayam No am nantangi. Siga nu misa no inotok da kalayam nu Yesus, piidi no bagu da abuk no am siumo no kalayam No am lingio no malanyung da kalayam nu Yesus.
39 Paat nu ulun Palisi nangundang da Yesus nagilong da kajadian gino, oyo minagu da nalom pinyawo no, “Monong po ulun gitu ulun nabi, totop Yo apaanai atu daanu nanongoi Joo gitu, sobop daanu gitu daanu badusa.”
40 Bagu Yesus ininagu joo, “Simon, sino guang daguon-Ku juun gitu.”
“Gulu, ngam Kamu no,” kono ni Simon. 41 Yesus nabasalita, “Sino duo ulun nabootang da ulun apaawutang da uwong. Ulun doono gitu nabootang limo latus uwong dinal am doono gitu poyo nabootang limom pulu uwong dinal. 42 Kaduo-duo nu ulun gitu kaano nakabayal da utang lo. Tapi, utang nilo inapus no. Joo, atu ki ulun labi angumpada da ulun napootang da uwong da ulun saaduo gitu? Ulun nabootang asuang ki atau nabootang keeti?”
43 Taam ni Simon, “Am anulut dakon, ulun asuang da utang gino li.” Dagu nu Yesus, “Monong no nga dagumu gino.” 44 Bagu Yesus nagilong da daanu gitu am ininagu di Simon, “Ileenmu daanu gitu? Aku inumpos da baloimu, tapi kaano okow nanaak da timug Dakon pamaagu da kalayam-Ku. Tapi daanu gitu pongo nangalisi da kalayam-Ku da misa no, am napakapua da kalayam-Ku da abuk no. 45 Kaano okow nantalimo Dakon am nanyium da ilan-Ku, tapi daanu gitu kaano yo balanti anyium da kalayam-Ku da woktu-Ku sino da gitu. 46 Kaano okow nangumau da ulu-Ku, tapi daanu gitu pongo nangalingi da umau malanyung da kalayam-Ku. 47 Sobop gino Aku minagu juun, suang nu dusa nu daanu gitu pongo inampun. Gino intok no asuang kaasi kaansayan linaku no. Gino po ulun inampun keeti da dusa am keeti po kaasi kaansayan linaku no.”
48 Bagu Yesus ininagu da daanu gino, “Dusamu pongo nyo inampun.”
49 Am ulun-ulun bookon nantudung naangkan nambaaya da Yesus minagu da nalom nu pinyawo lo, “Atu ngaku Oyo gitu? Nos No keeli ka bisa Yo angampun da dusa?”
50 Tapi Yesus ininagu da daanu gino, “Sobop okow mintopot Dakon, salamot no okow, makow kono da pinyawo asonong.”