Angaajalo da Papeet Najadi da Angaajalo da Ulun
5
1 Sino odow gili, Yesus inimpilik da pulu nu butas maayo Genesalet. Ulun suang dinumumun Joo, guang angkinoog da ajalan No. Oyo gino, baabala nu Yampuon. a 2 Pakeelong Yo da duo padaau da maligi nu butas gino. Ulun angaajalo da papeet kayampu da padaau giatu pongo tinumuun da padaau lo, am nangalisi da jalo lo. 3 Asak nu Yesus da doono padaau, oyo gino padaau ni Simon, am namansuk di Simon nanyikag da padaau no keeti da tanga, kaanyo aalud da maligi nu pulu. Bagu Yo nantudung am nangajal da ulun suang intad da padaau.4 Pongo Yo nangajal, Oyo minagu di Simon, “Kabilonmu da intok analom am jaloonmu pangaalap da papeet.” 5 Taam nu Simon, “Gulu, solonolonom gitu li akai nangajalo, kaano akai nakaalap da atu-atu, tapi Okow namansuk dakon, am bayeen kunyo, dakon guang amajalo poyo.” b 6 Libos ni Simon baya da dangan-dangan no inaya da dagu nu Yesus nangkabil am nangajalo, pakaalap lo da papeet nasuaang bagu, sampoi jalo lo gitu guang eensang. c 7 Bagu ilo nangapoi-ngapoi nagipag da dangan-dangan lo, da padaau bookon akitulung. Datong nu dangan-dangan lo giatu bagu, udani lo padaau lo saaduo gitu da papeet sampoi guang luminyob. 8 Libos ni Simon Pitulus nagilong da kajadian gino, paginatud no tinumuad da tingkuangon nu Yesus. Am ininagu, “Maangun, makow Kono intad da tingkuangonku, sobop dakon gitu ulun badusa.” 9 i Simon minagu kono deeno, sobop oyo baya da sajoo nu ulun nambaaya joo nasobop. Ilo nakeelong da suang nu papeet naalap lo. 10 Gino po dangan-dangan ni Simon beengalan di Yakobus baya di Yohanes, ilo anak-anak ni Sebedeus nasobop poyo. Yesus minagu da Simon, “Peenmu pangkalaa, intad deeno gitu, okow ajadi da angaajalo da ulun.”
11 Pongo gino, Simon baya da dangan-dangan no napaasak da padaau lo giatu da pulu, ilo poyo nangidu da sajoo nu kalaja lo, am inaya da Yesus.
Yesus Napalawo da Panyakit nu Ulun Nangkudong
12 Sino odow gili Yesus gu da doono kuta. Gu da kuta gitu sino ulun nangkudong. Paas yo nakeelong da Yesus, paginatud yo am tinumuad. Oyo nakimaasi da Yesus, dagu no, “Gulu, guang Kopo apalawo da panyakitku gitu?”
13 Bagu Yesus nanuuy da tanilu No, nanongoi da ulun gitu, am ininagu, “Dakon guang, alawo no panyakitmu!” Siga nu panyakit kudong nu ulun gitu nalawo. 14 Bagu Yesus namopol da ulun gitu namala da kajadian gino da atu yak ulun, am dagu No, “Makow kono, peeleen muno inanmu da imam da panyakitmu gino pongo nalawo, am pasambeenmu bagu kulban da Maangun kono da binansuk nu Musa, gino no bukti apeelong da sajoo nu ulun da nalawaan nu panyakitmu.” d
15 Tapi kabol nu Yesus bakin buoi bakin aago, am suang nu ulun tulus-tulus matong nangkinoog da ajalan No am nampolok akilawo da panyakit lo. 16 Tapi Yesus tulus-tulus inakow da takula-takula intokon asaagit am basambayang.
Yesus Napalawo da Panyakit nu Ulun Nabangkong kaa akeengkuli
17 Paat da odow gili, woktu nu Yesus nangajal, sino takula-takula ulun Palisi oyo gino, ulun nanongoi da atulan nu Musa baya da Gulu Taulat oyo gino, gulu angajal da atulan nu Musa, nantudung nangkinoog Joo. Ilo inatong intad da sajoo nu pagun da alial nu Galilia baya da alial nu Yudia am Yelusalem. Kuasa nu Maangun sino da Yesus apalawo da panyakit nu ulun suang. 18 Bagu takula-takula ulun inatong nangubit da ulun nabangkong kaa akeengkuli, tinampuyungan lo da ayam intok no noolong. Ilo balusaha guang angubit mumpos da ulun gino da nalom nu baloi gitu am amuluy joo da tingkuangon nu Yesus. 19 Tapi asuang ulun da intokon gitu. Kaano ilo bagu bisa nangubit joo inumpos da baloi gino. Gino sobop no, ilo napaasak joo da taap nu baloi, bagu ilo nangalungkab da taap gino, am namulug joo baya da ayam no, da unod nu ulun suang, da tingkuangon nu Yesus. 20 Woktu ni Yesus nagilong da kaayo nu iman lo, Oyo minagu da ulun gitu, “Uu pagaka, inampun no dusamu.”
21 Tapi gulu-gulu Taulat baya da ulun-ulun Palisi giatu bapikil da nalom nu pinyawo lo, “Atu ngaku ulun asiog naguyai da Yampuon gitu? Kaano nga ka doono kuon po ulun bisa angapus da dusa, Yampuon yak nga bisa angapus da dusa.”
22 Tapi Yesus apaanai da atu pinikil lo, bagu Yo minagu dilo, “Kulo akau bapikil kono deeno? 23 Atu ki aluoi daguon, minagu da dusamu pongo inampun, atau minagu, mimpilik kono am makow kono? 24 Am deeno gitu Aku guang amukti damiun da dunia gitu, Anak Manusia bakuasa angampun da dusa.” Bagu Yesus minagu da ulun nabangkong kaa akeengkuli gitu, “Mimpilik kono, kakaton muno bito ayammu muli!”
25 Ulun gitu bagu inimpilik da tingkuangon nilo, am nangakat da intokon no noolong gitu li bagu, am inuli baya da namuji da Yampuon.
26 Sajoo nu ulun nasobop da kajadian gino li am namuji da Yampuon. Angkalaa bagu ilo am minagu, “Atulai nopo kajadian neelong takau da odow gitu li.”
Yesus Nagipag di Lewi Maya Joo
27 Pongo gino, Yesus sinumila intad da baloi gino am nagilong da ulun ansiingil da pajak, beengalan di Lewi, nantudung da intok no ansiingil da pajak. Yesus minagu joo, “Maya kow Dakon!” 28 Pilik ni Lewi am nangidu da sajoo nu kalaja no, am inaya Joo.
29 Libos gino, i Lewi nangada da ilau da baloi no, sobop oyo nangalogo da Yesus. Suang nu ulun ansiingil da pajak, am ulun-ulun bookon inaya naangkan da Yesus poyo. 30 Tapi Ulun-ulun Palisi baya da gulu-gulu Taulat giatu, kaano ilo asonong agilong da kajadian gino. Dagu kolo bagu da ulun-ulun inaya da Yesus giatu, “Kulo kau inaya naangkan am nanginum da ulun ansiingil da pajak am ulun badusa giatu?” e
31 Taamo ilo nu Yesus, “Ulun asihat kaano yo bapalulu da duktul, tapi ulun adualan yak. 32 Dakon matong bokon ka agipag da ulun-ulun bonol, tapi ulun-ulun badusa, ilo maapo akiampun da dusa-dusa lo am anduli da daalan nu Yampuon.”
Bapuasa
33 Ulun-ulun Palisi minagu poyo da Yesus, “Mulit-mulit ni Yohanes tulus-tulus bapuasa am basambayang, gino po mulit-mulit nu ulun Palisi. Tapi mulit-mulit-Mu, ilo aangkan am anginum.”
34 Yesus tinumaam dilo da umpama kono deeno, “Bisa ki akau amansuk bapuasa da dangan-dangan nu pangantin kuusoi, da kinalamayo nu kawin, sodongkon oyo gitu sino poyo dilo? Kaano kan. 35 Tapi sino maapo woktu no, pangantin kuusoi anapon intad dilo. Woktu gino no maapo ilo bapuasa.”
36 Bagu Yesus minagu dilo da umpama bookon, “Kaano ulun anampol da babadu leed da binis nu keen intad da babadu baguon. Sobop keen panampol da babadu baguon gino, kaano yo asusuk da babadu leed. 37 Gino po, kaano ulun angalingi da timug nu anggul baguon da nalom nu taas kungkung nu kiiyumf naleedon, sobop timug nu anggul gino maapo amadak da taas kungkung gino. Timug nu anggul gino atapidan am taas gino alusok. 38 Anggul baguon alus lingion da nalom nu taas kungkung nu kiiyum baguon poyo. 39 Am kaano ulun guang anginum da timug nu anggul baguon, nu pongo yo anginum da timug nu anggul leed, sobop totop oyo minagu, ‘Timug nu anggul leed gino aamis.’g”