Yesus jinajab da lapangan nu agis
4
1 Alingu Alisi nanyilung am namimpin da Yesus nangidu da siang nu Yoldan nangubit Joo da lapangan nu agis. 2 Gu deetu Oyo jinajab nu Seetan Maayo apat pulu odow buoi no. Gu deetu kaano Yo naangkan da atu-atu. Pongo apat pulu odow gino, neetil noyo.3 Bagu Seetan Maayo gitu minagu Joo, “Monong Kopo Anak nu Yampuon, pajadio bai baatu sodo da luti.”
4 Taamo yo nu Yesus, “Sino tinulis da nalom nu Kitob Baabala nu Maangun, ‘Ulun aayag gino bokon ka intad da inakano yak.’ ” a
5 Ubito poyo nu Seetan Maayo gitu da intokon asawat bonsoi, am sangkilop mato yak Seetan Maayo gitu napeelong Joo da sajoo nu kalajaan nu dunia. 6 Dagu nu Seetan Maayo gitu Joo, “Sajoo nu kuasa nu kalajaan baya da kakayaan nu dunia gitu naakinku Juun, sobop sajoo gitu tinaakan noyo dakon. Am dakon guang anaak da atu yak ulun asiiga maya da kaguangku. 7 Jadi anyamba Kopo dakon, naakinku sajoo no gitu Juun.”
8 Dagu bagu nu Yesus joo, “Da nalom nu Kitob Baabala nu Maangun sino tinulis, ‘Okow alus anyamba da Maangun, Yampuon, Oyo yak tokonmu satia!’ ” b
9 Ubito no poyo Yesus da Yelusalem, bulii no-Yo da bubuung nu Baloi nu Yampuon. Bagu yo minagu Joo, “Okow Anak nu Yampuon po? Tumunang Kow bai da liwi, 10 sobop sino tinulis da nalom nu Kitob Baabala nu Maangun, ‘Tantang Juun gitu, Yampuon guang amansuk da maleekot-maleekot No angajaga Juun. c 11 Am ilo guang anyambut Juun da tanilu lo da liwi, gama nu kalayam-Mu kaa akeentup da baatu.’ ”
12 Yesus tumaam, “Da nalom nu Kitob Baabala nu Maangun sino tinulis, ‘Peenmu pangajajab da Maangun, Yampuonmu!’ ” d
13 Pongo nu Seetan Maayo gitu aguuyum da lakow no nangajajab da Yesus, bagu yo inakow am agalung poyo da paat onsoi.
Yesus nanduli da Galilia
14 Pongo gino Alingu Alisi nanyilung am namimpin da Yesus nanduli da Galilia. Am naago no kabol No da sajoo nu alial gino. 15 Gu deetu, Oyo nangajal da baloi-baloi sambayang nu ulun Yahudi gitu, am sajoo nu ulun namuji Joo.
Yesus kaano tinalimo da Nasalet
16 Yesus inakow poyo da pagun No Nasalet, intokon No pinakaayo. Paat da odow Maayo, oyo gino odow sambayang nu ulun Yahudi, anulut da kabiasaan No, Oyo inakow da baloi sambayang. Oyo inimpilik guang amasa da Kitob Baabala nu Maangun. 17 Oyo tinaakan da kitob tinulisan nu nabi Yesaya am bukee No, sino tinulisan,
18 “Alingu nu Maangun sino Dakon,
sobop Oyo namalasaya Dakon, apasuku da baabala onsoi da suang nu ulun munsikin.
Oyo po namansuk Dakon apasuku da baabala
19 apabibas da ulun-ulun tinakub,
am mato nu ulun-ulun abolow akeelong,
am amibas da ulun-ulun ajadi da ulipon,
am apasuku da kabol da woktu nu Maangun
anyalamot da ulun-ulun mintopot Joo.” e
20 Pongo gino tutubi No Kitob Baabala nu Maangun gitu, naaki No padulio da patugas nu baloi sambayang gitu, am nantudung. Sajoo nu ulun da baloi sambayang gitu agilong Joo. 21 Bagu Yesus animpuun angajal dilo, am dagu kono, “Gonop no ayat nu Kitob Baabala nu Maangun gitu, woktu mi akadingog da odow gitu.”
22 Sajoo nu ulun apabonol Joo, ilo asiinutan da Oyo minagu, onsoi yak pagiinagu am daguon No. Dagu kolo bagu, “Anak ni Yusup nga keeli Oyo gitu?”
23 Dagu nu Yesus dilo, “Monong no nga akau guang minagu kono da umpama gitu Dakon, ‘Uu duktul, uwoton-Mu panyakit-Mu kabaata. Lakuin-Mu poyo da gitu gu da intok nu asol-Mu, kono da nadingog mai linaku-Mu da Kapelnaum!’ ” 24 Am dagu No poyo, “Dakon minagu damiun, akau alus apaanai, kaano ulun nabi logoon da intok nu asol no kabaata. f 25 Tapi Dakon minagu damiun, dagu-Ku gitu bonol, woktu ni Elia naayag, kaano yo dinumasam talu musim onom bulan, am bitil maayo sajoo nu negeli nu Islael, woktu gino po asuang daanu nabalu da Islael. g 26 Elia binansuk nu Yampuon, bokon ka muoi da sajoo nu daanu nabalu giatu, tapi oyo binansuk muoi yak da daanu nabalu da Salpat, gu da alial nu Sidon. 27 Gino po woktu nu nabi Elisa naayag, asuang ulun nabapanyakit da kudong da Islael. Doono ka sino nalawo da panyakit nu kudong lo, i Naaman ulun nu Silia gitu yak nalawo da panyakit.” h
28 Sajoo nu ulun da baloi sambayang gitu, mangit da dagu No gitu. 29 Pilik lo, namansuk napalakow da Yesus sinumila da pagun lo, am nangubit Joo da tidong intokon nu pagun lo gitu, guang ilo bagu anyikag Joo da lingkubang. 30 Tapi Yesus nanseel da unod lo am inakow.
Yesus da nalom nu baloi sambayang nu ulun Yahudi da Kapelnaum
31 Bagu Yesus inakow da Kapelnaum, gu da kuta nu Galilia, am nangajal da odow-odow Maayo nu ulun Yahudi. 32 Nasobop no ilo nangkinoog da ajalan nu Yesus, sobop Oyo minagu bakuasa bonsoi. i 33 Da nalom nu baloi sambayang gitu, sino ulun sinulodon nu seetan am nampaluap nantangal, 34 “Ee Yesus, Okow gitu ulun nu Nasalet, atu ulusan-Mu damon? Okow matong guang amatoi damon po? Dakon apaanai atu Okow gitu. Okow gitu utusan alisi intad da Yampuon.”
35 Tapi Yesus namagulotok joo, dagu No, “Mongow! Sumila kow intad da ulun gitu!” Siga nu alingu alaat sinumulod da ulun gitu nagilaapas joo da unod nu ulun suang giatu, am sinumila intad da ulun gitu, tapi kaano yo napakaduol joo bagu.
36 Sajoo nu ulun nasobop, bagu ilo minagu da doono am doono, dagu kolo, “Bokon ka sala-sala dagu No gino noli! Sobop Oyo gitu aagol am bakuasa. Oyo namansuk da alingu-alingu alaat sumila, am ilo po sinumila.” 37 Naago no bagu kabol No da sajoo nu Alial gitu.
Yesus napalawo da panyakit nu ulun suang baya da iwan ni Simon
38 Bagu Yesus nangidu da baloi sambayang gino am inakow da baloi ni Simon. Iwan daanu ni Simon gitu nadualan ginagalan, am ilo ampolok da Yesus akitulung apalawo da panyakit no. 39 Kuoi nu Yesus inimpilik da kiing nu daanu noolong gitu, am napasila da alingu alaat. Sobop oyo gitu nagagalan linaku nu alingu alaat. Siga nu gogol no gitu bagu nalawo. Bagu yo linumuat am nangalayani dilo.
40 Paat da mato nu odow luminyob, sajoo nu ulun nangubit da ulun-ulun nadualan Joo. Masom-masom yak duol inubit lo Joo. Bagu Yesus nanongoi dilo doono am doono napalawo da panyakit lo. 41 Alingu-alingu alaat giatu poyo sinumila intad da ulun suang giatu, baya da ampaluap-ampaluap ilo, “Okow no Anak nu Yampuon!”
Tapi Yesus namagulotok da alingu-alingu alaat giatu, am namopol dilo minagu, sobop ilo apaanai, Oyo gitu Laja Anyalamot.
Yesus nangajal da kuta-kuta bookon
42 Paas da mato nu odow sumila, Yesus inakow intad da kuta Kapelnaum da intok asaagit. Tapi ulun suang giatu totop aguyum Joo. Paas ilo nakatamu Joo, balusaha ilo anagong Joo kaa apalakow. 43 Tapi Oyo minagu dilo, “Da kuta-kuta bookon poyo, Dakon alus apasuku da Kabol Onsoi, oyo gino, Yampuon gitu Laja. Sobop gino no sibonol no, Dakon gitu inutus.”
44 Am Oyo napasuku da Kabol Onsoi intad da Yampuon, da nalom nu baloi-baloi sambayang da Yudia.