Lukas 3

Yohanes Amaptis

1 Da nalom nu musim apulu limo da pamalintahan tinongoi ni Kayisal Tibelius, paat ni Pontius Pilatus najadi da gubelnul da Yudia, laja Elodes nanongoi da pamalintahan da Galilia, laja Pilipus, pagaka intad da laja Elodes, namalinta poyo da alial nu Itulia baya da Talakonitis, sodongkon laja Lisanias namalinta da Abilene, 2 am woktu ni Yanas baya di Kayapas najadi da Imam Maayo, datong nu baabala nu Yampuon di Yohanes, anak ni Jakalia da lapangan nu agis. 3 Lakow ni Yohanes da sajoo nu alial nu siang Yoldan napasuku da baabala nu Maangun. Yohanes minagu, “Akiampun kau da dusa-dusa mi am anduli da daalan nu Yampuon, am akau alus baptison. Maangun guang angampun damiun, 4 kono da sino tinulis da nalom nu kitob nubuat-nubuat nu nabi Yesaya,

‘Sino dagu ampaluap-ampaluap da lapangan nu agis,

siapon no daalan nu Maangun, lateen daalan Joo.

5 Sajoo gaana tutubin

am sajoo nu tidong baya da tiidong ajadi alata.

Am aliku-liku botoson tolodongon,

daalan agiliiyuntud lateen.

6 Am sajoo nu ulun akeelong da kasalamatan intad da Yampuon.’ ”

7 Bagu oyo minagu da ulun suang inatong ampolok akibaptis joo giatu, dagu kono, “Uuy akau ulun alaat! Nos mi maapo da akau baptison gino, akau aseelan da ukuman nu Maangun da odow sangilan? Kaano! 8 Jadi, peeleen kalakuan mi sobop akau pongo nakiampun da dusa-dusa mi am anduli da daalan nu Yampuon. Peen minyo bapikil da nalom nu pinyawo mi, i Yabalaham gino, yama mai! Nos mi maapo kaano akau ukumon. Sobop dakon minagu damiun, Maangun bisa yak apajadi da baatu-baatu gitu da sulut ni Yabalaham. 9 Maangun siap angukum, kono da kapak pongo nasadia pantaagad da puun nu toon suku da bulakat-bulakat no. Sajoo puun nu toon ingkaano angasil da bua onsoi, tagadon am tapidin da nalom nu apuy.”

10 Ulun suang giatu angkibala joo. “Kono poyo deeno, atu alus lakuin mai?”

11 Taamo ilo ni Yohanes, “Atu yak sino da babadu saaduo anaak yo da doono da ingkaano da babadu, am ulun sino da inakano alus anaak poyo.”

12 Datong po nu ulun ansiingil da pajak gitu di Yohanes ampolok akibaptis, ilo angkibala, “Gulu, atu alus kalajeen mai?” 13 Taamo ni Yohanes, “Peen mi pajaayi pansiingil da pongo tinantu.”

14 Am palajulit-palajulit poyo angkibala joo, “Am akai, atu alus kalajeen mai?” Taamo ilo ni Yohanes, “Peen pamagaau da uwong nu ulun am peen pangalalaa dilo gama nilo anaak damiun da uwong, sukupon miyak bayag mi da gaji mi.”

15 Woktu gino li ulun suang giatu agalung am miman da kadatangan nu Laja Anyalamot pongo jinanji nu Yampuon, gino sobop no ilo angkibala da nalom nu pinyawo lo, “Yohanes gitu ki ngaku Laja Anyalamot inalungan lo?” 16 Taamo ni Yohanes, am ininagu da sajoo nu ulun giatu, “Aku amaptis damiun da timug, maapo sino ulun matong labi bakuasa intad dakon. Amuka da duukug nu sandol baawis Noyak kaano aku apantos. Oyo amaptis damiun da Alingu Alisi baya da apuy maapo. 17 Yampuon pongo apansuuwai da ulun alaat baya da ulun pongo nakiampun am nanduli da daalan nu Yampuon, anggilad da liaaban, sino noyo da tanilu No, angaliab da gandum pongo inunu am angalulud da gandum No da nalom nu liitan. Tapi ampo baya da kalugu, solobon No da nalom nu apuy ingkaa panai alasa.”

18 Am asuang baabala Kabol Onsoi intad da Yampuon pinasuku ni Yohanes da ulun suang giatu. 19 Pongo gino, i Yohanes namopol baya da nanaak da baabala di Elodes, panguasa nu Galilia. Sobop Elodes nangandu di Elodias, andu nu pagaka no, am sajoo kalaatan no bookon pongo binala ni Yohanes. 20 Laja Elodes gitu bakin baduang yak bagu laat no, am poonsopo no i Yohanes da nalom nu sipil.

Yesus, Anak nu Yampuon binaptis

21 Woktu ni Yohanes kaapo sinipil, asuang nopo ulun binaptis no, Yesus gitu poyo binaptis no. Am Oyo basambayang, siga nu kawanan gitu nabuka 22 am tuun nu Alingu Alisi gitu anggilad da maanuk melpati, tinumuun da sawat No. Sino dagu intad da kawanan gitu nadingog bagu, “Okow no Anak inumpada-Ku, am Okow napasonong da pinyawo-Ku.”

Ingalan-ingalan nu akion nu Yesus

23 Woktu gili Yesus nanimpuun da kalaja No, umul No kila-kila talum pulu musim. Am anulut da salita nu ulun da woktu gino li, Oyo gitu anak ni Yusup, i Yusup anak ni Eli, 24 i Eli anak ni Matat, i Matat anak ni Lewi, i Lewi anak ni Malki, i Malki anak ni Yanai, i Yanai anak ni Yusup, 25 i Yusup anak ni Matisa, i Matisa anak ni Yamus, i Yamus anak ni Nahum, i Nahum anak ni Esli, i Esli anak ni Nagai, 26 i Nagai anak ni Maat, i Maat anak ni Matisa, i Matisa anak ni Simei, i Simei anak ni Yosek, i Yosek anak ni Yoda, 27 i Yoda anak ni Yohanan, i Yohanan anak ni Lesa, i Lesa anak ni Selubabel, i Selubabel anak ni Sitil, i Sitil anak ni Neli, 28 i Neli anak ni Malki, i Malki anak ni Yadi, i Yadi anak ni Kosam, i Kosam anak ni Elmadam, i Elmadam anak ni El, 29 i El anak ni Yesua, i Yesua anak ni Elisel, i Elisel anak ni Yolim, i Yolim anak ni Matat, i Matat anak ni Lewi 30 i Lewi anak ni Sumion, i Sumion anak ni Yahuda, i Yahuda anak ni Yusup, i Yusup anak ni Yonam, i Yonam anak ni Elyakim, 31 i Elyakim anak ni Milia, i Milia anak ni Mina, i Mina anak ni Matata, i Matata anak ni Natan, i Natan anak ni Daut, 32 i Daut anak ni Isai, Isai anak ni Obet, i Obet anak ni Buas, i Buas anak ni Salmon, i Salmon anak ni Nahason, 33 i Nahason anak ni Yaminadap, i Yaminadap anak ni Yadmin, i Yadmin anak ni Yalni, i Yalni anak ni Eslon, i Eslon anak ni Peles, i Peles anak ni Yahuda, 34 i Yahuda anak ni Yakup, i Yakup anak ni Isak, Isak anak ni Yabalaham, i Yabalaham anak ni Tela, i Tela anak ni Nahol, 35 i Nahol anak ni Selug, i Selug anak ni Lehu, i Lehu anak ni Peleg, i Peleg anak ni Ebel, i Ebel anak ni Salmon, 36 i Salmon anak ni Kenan, i Kenan anak ni Yalpasat, i Yalpasat anak ni Sem, i Sem anak ni Nuu, i Nuu anak ni Lamek, 37 i Lamek anak ni Metusala, i Metusala anak ni Enok, i Enok anak ni Yalet, i Yalet anak ni Mahalaleel, i Mahalaleel anak ni Kenan, 38 i Kenan anak ni Enos, i Enos anak ni Set, i Set anak ni Yadam, am i Yadam anak nu Yampuon.