Nagipusan di Yesus
2
1 Sino odow gili, Kayisal Agustus namalinta da sajoo nu ulun da nalom nu pamalintahan kalajaan nu Loma, angadaptal da dili lo kabaata, da sensus panduduk. 2 Gitu no sensus timpuun, woktu ni Kilenius najadi da gubelnul da negeli nu Silia. 3 Sajoo nu ulun inuoi nangadaptal da tana asol nu akion lo kabaata.4 Gino po Yusup inakow intad da Nasalet da Galilia, da Betlehem am Yudia, intokon asol nu Laja Daut. Sobop Yusup anak sulut nu Daut. 5 Yusup inakow nangadaptal nambaya da tunangana no i Malia nagali gitu. 6 Paat lo da Betlehem, pangkuliman ni Malia. 7 Am i Malia nagipus da anak kuusoi, anak no kinatuan, am lopoto no da goonob, am pokoolongo no-Yo da nalom nu juulang pangaangkanan nu kiiyum pialeen maal da tuumuu apua. Sobop kaano bagu baloi intokon lo inudong, napanu nyo nu ulun.
Ulun-ulun amaajaga da kiiyum domba
8 Sino lonom gili gu da intokon nu alial gitu, ulun amaajaga da kiiyum domba giatu, gu da lapangan maayo batuumuu. 9 Datong nu maleekot binansuk nu Maangun gitu, pilik no da kiing lo, am liputi ilo nu nalaang intad da Maangun, nakatikog no ilo am nangkalaa. 10 Tapi dagu kono bagu nu maleekot gitu dilo, “Peen mi pangkalaa! Sobop dakon gitu angubit da kabol onsoi da sajoo nu ulun. 11 Odow gitu gu da Betlehemb asol nu Laja Daut, pongo inipus Laja Anyalamot damiun, Oyo gino Klistus, Maangun. 12 Gino no taanuan no, Akau maapo akaamot da laagang dabagu inipus, linopot da goonob, pinakoolong da juulang pangaangkanan nu kiiyum pialeen maal da tuumuu apua.”
13 Datong kono nopo nu maleekot gitu, baya da maleekot bookon giatu poyo, ilo namuji da Yampuon. Dagu kolo,
14 “Pujion no Yampuon nu bayag gitu, guu da sawat,
baya da asonong bonsoi no sajoo nu ulun mintopot da Maangun, da tana gitu!”
15 Pongo gino maleekot-maleekot giatu nangidu dilo, am inakow nanduli da sulga, dagu kono bagu nu ulun amaajaga da domba giatu, “Joo, makow takau no da Betlehem, agilong da kajadian gino, kono da dagu nu Maangun gino li ditakau.”
16 Bagu ilo natikas-tikas inakow nagamot di Malia baya di Yusup, am laagang pinakoolong da nalom nu juulang pangaangkanan nu kiiyum pialeen.
17 Pongo nu ulun amaajaga da domba giatu nagilong da laagang gitu, ulito lo bagu kabol pinasuku nu maleekot da mudil nu laagang gino noli. 18 Am sajoo nu ulun nangkinoog da salita nu ulun amaajaga da domba giatu nasobop. 19 Tapi i Malia nabapiikil am nanawi da nalom nu pinyawo no da sajoo nu kajadian gino noli. 20 Ulun amaajaga da domba giatu li nanduli da intad lo, ilo namuji da Yampuon nu bayag gitu am napakasawat da ingalan No. Sobop sajoo nu neelong lo am nadingog lo, baya da binala dilo, sajoo no monong.
Yesus sinunot am pasambeen da Maangun—Sumion baya di Yana
21 Nagonop noyo balu odow, Anak gino sinunot anulut da atulan nu Musa, ingalani lo-Yo di Yesus, ingalan binala nu maleekot di ina No da oyo kaapo nagali. c
22 Pongo ni Malia nagipus apat pulu odow, agonop no bagu woktu pangalisian di Malia, anulut da atulan nu Musa, Yusup baya di Malia makow da Yelusalem angubit da Yesus, pasambeen da Maangun. d 23 Sobop tinulis da atulan nu Musa, “Anak-anak kuusoi kinatuan alus pasambeen da Maangun.” e 24 Am ilo apasamba da maanuk tingkukul tandaa baya da upo, atau saaduo anak nu maanuk melpati pangalisian di Malia, kono da pongo tinantu da atulan nu Musa.
25 Woktu da Yelusalem, sino ulun beengalan di Sumion. Oyo ulun bonol, oyo angkalaa da Maangun, am agalung da Yampuon matong anyalamot da bangsa nu Islael. Alingu Alisi sino da nalom nu pinyawo no, 26 am Alingu Alisi pongo namala joo, “Kaano okow matoi nu ingkaano okow akeelong da Mesias,f oyo gino Laja Anyalamot, pongo jinanji nu Maangun.” 27 Sumion inatong da Baloi nu Yampuon, inubit nu Alingu Alisi. Paas Yesus inubit inumpos nu matuo No, apalakow da atulan nu Musa, 28 napo no-Yo, kapuuto, am namuji da Yampuon. Dagu kono,
29 “Deeno gitu Maangun, gama nyo nu ulipon-Mu gitu matoi,
asonong bonsoi no aku kono da dagu-Mu,
30 sobop matoku pongo noyo nakeelong da Ulun Anyalamot intad Juun.
31 Am Okow pongo nanyadia da tingkuangon nu sajoo nu bangsa.
32 Oyo gino kono da alaang apakalaang da daalan nu bangsa-bangsa bookon muoi Juun,
am alaang gino apajadi da umat-Mu Islael logoon.” g
33 Yama baya di ina No asiinutan da dinagu no gitu. 34 Bagu i Sumion namolokot dilo am ininagu di Malia, matuo nu Anak gitu, “Anak gitu inalut noyo nu Yampuon, angukum am anyalamot da suang nu ulun nu Islael. Oyo gino kono da taanu palingatan intad da Yampuon da dusa lo, am ilo maapo angapu am anyikag Joo, 35 sobop napanayan no udan nu pinyawo lo alaat. Duol nu pinyawomu Malia, kono da natobok nu gayang atagu.”
36 Paat po sino i Yana, ulun nabi daanu, anak ni Panuel intad da suku Asyel. Natuo noyo, paguulu tulu musim yak buoi no nagandu da andu no. 37 Deeno gitu oyo nabalu, am umul no balum pulu apat musim, tulus-tulus yak oyo muoi da kaapul nu Baloi nu Yampuon. Oodow alonom oyo anyamba da Maangun, basambayang am bapuasa deeno. 38 Paat da woktu gili, oyo inatong da Baloi nu Yampuon am amuji da Yampuon, am basalita yo da mudil nu Anak gino da sajoo nu ulun nagalung da woktu nu Maangun nangolopos da Yelusalem.
39 Libos ni Yusup di Malia napalakow da atulan nu Musa gino li, panduli bagu ilo da pagun asol lo da kuta Nasalet gu da Galilia. h 40 Anak gino bakin maayo, akotog, am tinaakan nu Yampuon da kapanayan onsoi intad Joo. Oyo inumpada bonsoi nu Yampuon.
Yesus umul apulu duo musim da Baloi nu Yampuon
41 Tiap musim matuo nu Yesus makow da Yelusalem, beelau da odow Paska nu ulun Yahudi. i 42 Paat nu Yesus umul apulu duo musim, ilo inakow beelau kono da kabiasaan nu ulun Yahudi. 43 Kapongo nu ilau Paska gitu li, uli nilo, Yesus gitu kaano Yo inaya dilo, tinumatang Yo da Yelusalem. Am Yusup baya di Malia kaano po ilo napaanai da Yesus tinumatang gitu. 44 Nos ni Yusup di Malia inaya no-Yo da suang lo gino noli. Sangodow-ngodow ilo inakow, liman lo kaano bagu Yesus da suang lo gitu. Bagu ilo naguyum Joo da suang nu pagaaka lo, am dangan-dangan lo. 45 Tapi kaano po ilo nakatamu di Yesus. Kolo po duo nanduli da Yelusalem naguyum Joo. 46 Kataluan ilo naguyum, kaano Yo natanga lo. Keelong lo-Yo bagu da Baloi nu Yampuon, Oyo nantudung am angkinoog da Gulu-gulu agama nu ulun Yahudi. Asuang po kibaleen No dilo. 47 Sajoo nu ulun nangkinoog Joo nasobop. Oyo gitu apintol bonsoi am paas yak pangajaawap No dilo. 48 Matuo nu Yesus nasobop Joo. Dagu nina No, “Abuuk, kulo gitu lakuo-Mu damon? Nalaabo no akai da uyum Juun!”
49 Yesus tinumaam dilo, “Ama, ina, kulo kau paguyum Dakon? Kaano ki akau apaanai, Dakon gitu alus mudong da Baloi ni Yama-Ku?” 50 Am kaano ilo nakalati da dinagu nu Yesus gitu.