KITOB
LUKAS
Pangitadan da Kitob
Kitob Lukas gitu tinulis amala da sajoo nu ulun da dunia gitu, gama nilo apaanai da Yesus gitu Laja Anyalamot, pongo jinanji nu Maangun Yampuon da bangsa nu Islael baya da sajoo nu ulun da dunia gitu. i Lukas gitu duktul, oyo gitu badangan da lasul Paulus am ilo apasuku da kabol onsoi intad da Maangun Yampuon (Kolose 4:14; 2 Timotius 4:11; Filemon 1:24). i Lukas gitu nanulis da mudil nu bayag nu Yesus kono da ulun-ulun nanulis da asol-usul baya da adat, da jomon paguulu li. i Lukas nanimpuun da kalaja no gitu, nagilong naneekul bonsoi-bonsoi gulu, da atu pongo dinagu nu Yesus da ulun-ulun inaya Joo da woktu gino li. Pongo nu Lukas nagilong naneekul da sajoo no gino, bagu yo nanulis da Kitob Injil gitu di Teopilus. i Teopilus gitu ulun mintopot da Maangun Yesus, lati nu ingalan no gitu da nalom nu bahasa Yunani oyo gino dangan nu Yampuon. Sino ulun minagu, i Teopilus gitu nangkalaja da pamalintahan nu Loma, sino po bookon minagu, oyo gitu ulun logoon am oyo nangungkus da biaya nu ulun nanulis da Kitob Injil Lukas.
Da nalom nu Kitob gitu, i Lukas namala kulo Yesus gino inatong da nalom nu dunia gitu. Yesus inatong guang aguyum am anyalamot da sajoo nu ulun badusa (Lukas 19:10). Da nalom nu Kitob Injil Lukas gitu, sino sonto-sonto nu Maangun Yesus, napeelong da koonsoi nu pinyawo No da ulun-ulun munsikin, ulun-ulun inanggop kaa apanting, daanu nabalu, ulun-ulun nadualan, am ulun-ulun bokon nu ulun Yahudi, baya da anak-anak.