Wugubutulo 21

Uwulanga uwupya ni nyi imya

1 Baheene nawaaga uwulanga uwupya ni nyi imya. Uwulanga wula uwa wutasi ni nyi yila iya wutasi fisikhandi fikwali, kwava kugaya bahali khanji. 2 Nalyaga ilijumbi ilibaagule, iYelusalemu imya, liyiikha kihuma kwa Nguluvi. Ilijumbi ilyo likhandi ngaja uwashimaayi yuna akogwelwe kwa mugoosi waakwe, pina itoolwa.

3 Baheene napulikha ishawuti nkhome kihuma mu shitengo sha Wutwa yiija ndeeni, “Loleela! Uwiikhasi wa Nguluvi wuli lumo na vaanu, umwene asiikhale lumo na woope. Awo vakhava vaanu vaakwe, woope akhava Nguluvi waanave. 4 Umwene akhavafyangula amaanyosi gaanave goona. Imfwa yisikhawonekha khanji, wala uwuvafi, wala kikhoola, wala kiyaalama, kwa kiiva aga wutasi, gaashila!”

5 Baheene uNguluvi yuna wákhalaga pa shitengo isha Wutwa wáaja, “Lino shila shiinu nikishigaha kiiva shipya.” Khanji wáaja, “Yandikha aga, kwa kiiva amaswi aga ga shiyooli khanji ga kihuviililwa!” 6 Wánijovela khanji, “Gasenjekha! One yuune Alufa khanji yuune Omega, uluganulo lwakwe one nili wa Wutasi, khanji nili wa Wudugo. Shila muunu umunya nkhawu, nisimupeele amalenga bule, angʼwe kihuma mu shisansa sha malenga gina giihumya uwuumi. 7 Umuunu yuna akhamena, nikhamupeela aga. One nikhava Nguluvi waakwe, woope akhava mwanangu. 8 Leelo avaanu awooga na vina vasikimuhuviilila uNguluvi, avanya njendo sina sikimukhalasa uNguluvi, avabudaaji, avashemi, avahavi, vina vifuunya amanguluvi, avadehi, awo woona uluvala lwanave lukhava mu lilamba ilikhome lina liveekha umooto mukhali mandu. Iyo yiyeene mfwa ya wuvili.”

IYelusalemu imya

9 Baheene umunyaayumo mu vamalayikha vala fungati, vina vakhandi ni sebeti sila fungati sina sikhandi na malava fungati isa wudugo, wáyinsa wánijovela, “Yinsa, nikuwonense uwashimaayi umunya kitoolwa, yuna asiive mudala wa Mwana Nkholo!” 10 Baheene, pina uNumbula wa Nguluvi akhandi ikinilongosa, umalayikha yula wánitwala mbakha pashaanya ya shidunda ishikhome, khanji shitali mandu. Wániwonensa ilijumbi ilibaagule ilya Yelusalemu, liyiikha kihuma kwa Nguluvi. 11 Ilijumbi ilyo likhandi lingʼaala kwa wutupikho wa Nguluvi. Ulungʼaalo lwakwe lukhandi ngaja lingʼanga lya lifungu likhome ilya yasipi, khanji lingʼaala ngaja shilole. 12 Ilijumbi likhandi nu luhengo lutali khanji lukhome, luna lukhandi ni fikwilo ishumi na fivili. Mu fikwilo ifyo, kukhandi na vamalayikha ishumi na vavili. Shila shikwilo shikhandi shiyandiikhwe ilitaawa limo ilya fikholo ishumi na fivili, ifya Isilaheli. 13 Imbali soona sina, sikhandi ni fikwilo fitatu, ulubali lwa kunena fikwilo fitatu, kunyiikho fikwilo fitatu, kunyagamo fikwilo fitatu na kusikha koope, fikwilo fitatu. 14 Uluhengo ulwa lijumbi ilyo, lukhandi lusenjiilwe pashaanya ya mangʼanga ishumi na gavili aga luutu. Shila lingʼanga likhandi liyandiikhwe ilitaawa lya munyaayumo wa vanandeje vala ishumi na vavili ava Mwana Nkholo.

15 Lino, umalayikha yula yuna akhandi ilogola noone, akhandi nu lukwegu ulwa sahaabu ulwa kijelela, kiija alijele ilijumbi ilyo, ifikwilo nu luhengo lwakwe. 16 Baheene wálijela ilijumbi ilyo, uwutali nu wupapaate nu wutali uwa kiluta kushaanya, wukhandi wulingaanile. Wáganaga kilijela, wáapata sitadi magana mashumi ishumi na magana mashumi gavili (12,000), uwu wukhandi wutali nu wupapaate nu wutali kiluta kushaanya. 17 Wáajela uwupapaate uwa luhengo ulo, lukhandi luna silaa ligana limo na mashumi gana ni sina (144), ngaja umuunu pina ijelela, shiisho ndeeno shina umalayikha wájelaga.

18 Uluhengo ulo lukhandi lusenjiilwe kwa mangʼanga ga lifungu likhome lya yasipi. Ilijumbi lyope likhandi lisenjiilwe kwa sahaabu nofu yina yingʼaala ngaja shilole. 19 Uluutu lwa luhengo ulo ulwa lijumbi lukhandi lukogwelwe kwa mangʼanga ga lifungu likhome gina gali paayo paayo. Ilingʼanga lya wutasi ilya luutu likhandi lya yasipi, ilya wuvili likhandi lya yakuti samawi ni lya wutatu likhandi lingʼanga lina litambulwa kalikedoni. Ilingʼanga ilya wuna, likhandi litambulwa sumalidi, 20 ilingʼanga ilya wusaanu likhandi litambulwa salidoniki, khanji ilya mutanda likhandi litambulwa akiki. Ilingʼanga ilya fungati likhandi litambulwa kilisolito ni lya munaana likhandi litambulwa sabalajadi. Ilingʼanga ilya gonja likhandi litambulwa yakuti ilya langi ya lutolomfu, ilya ishumi likhandi litambulwa kilisopilaso, ilya ishumi na limo likhandi litambulwa hiyakinito, ni lya ishumi limo na gavili lyatambulwagwa ametisito. 21 Ifikwilo fila ishumi na fivili fyona fikhandi fitendiilwe kwa luulu ishumi na sivili. Shila shikwilo shikhandi shitendiilwe kwa luulu yimo hela! Insila inkhome iya lijumbi ilyo, yikhandi yitendiilwe kwa sahaabu inofu, yina yikhandi yingʼaala ngaja shilole.

22 Nisikhayiweene inanda ya Nguluvi mu lijumbi umo, kiiva uMutwa uNguluvi, uMunya Ngufu Soona, nu Mwana Nkholo vaveene viikhala mu lijumbi umo. 23 Ilijumbi ilyo lisisakula ilijuva wala umwesi ugwa kimulishila, kwa kiiva uwutupikho wa Nguluvi wukilimulikha, uMwana Nkholo yumwene lumuli lwakwe. 24 Avaanu va nyi soona vakhakhala mu wuvalafu uwa lijumbi ilyo, na vatwa va nyi soona, vakhayinjila umo kitwala ifiinu fyanave ifya lifungu likhome. 25 Ifikwilo fyona ifya lijumbi ilyo, fikhava mwasi uluhaavi loona, kwa kiiva kusikhava ni shilo. 26 Avatwa va nyi soona, vakhaleeta uwusi waanave ni fiinu fyanave ifya lifungu likhome mu lijumbi umo.

27 Leelo kusiina khabisa shoshoona ishishaafu shina shikhayinjila mu lijumbi umo, wala umuunu yoyoona yuna iigaha aga kikhalasa wala aga wudehi. Leelo avaanu vina vakhayinjila mu lijumbi umo, vala vina amataawa gaanave gayandiikhwe mu Litaafili ilya Wuumi ilya Mwana Nkholo.