UShetaani idindilwa maakha magana lishumi (1,000)
20
1 Baheene namwaga umalayikha yumonga iyiikha kihuma kwa Nguluvi,
akheete mu mawokho gaakwe ifungulo ya lilindi ilikhome ilya malungu nu munyololo umukhome.
2-3 Wálikhata iliyokha lila ilya pawukuulu,
lina litambulwa Ibiliisi awu Shetaani,
wálipinya kwa munyololo umukhome na kilitaaga mu lilindi ilikhome ilya malungu.
Wádinda umulyango,
wáviikha ishimanyilo sha mupulya,
kiija asilaave avajanje khanji avaanu va nyi soona.
Lidindilwe kwa luhaavi lwa maakha magana lishumi (1,000).
Pina lwasila uluhaavi ulo,
mbakha lidindulilwe kwa luhaavi lufupi hela.
4 Baheene nafyaga ifitengo ifya Wutwa fikhaliilwe na vaanu vina vakhandi vapeliilwe uwutawulilwa uwa kihiga na kitema.
Awo vakhandi vaanu vina vadumulwagwa amatwe kwa kihumya uwubedelo uwa Yeesu na kiyalaalisa iLiswi lya Nguluvi.
Vasikhalifuunyile ilikhanu ilikhome lila wala isanaamu yaakwe.
Vasikhayanushiile ishimanyilo sha likhanu ilikhome ilyo pa weeni waanave wala mu mawokho gaanave.
Avaanu ava vafyukhaga,
vaatema lumo nu Kilisito kwa maakha magana lishumi (1,000).
5 Avaanu avanji vina vafwile vasikhafyushile mbakha pina lwashilaga uluhaavi lwa maakha magana ishumi (1,000).
Ulo lulwene lufyukho lwa wutasi.
6 Avaanu vina vafyukhaga vakhandi vayimiliilwe mandu,
khanji vabaagule va Nguluvi,
kwa kiiva imfwa iya wuvili yisikhava ni ngufu kuveene.
Woope vakhava vatambule va Nguluvi,
vakhatema lumo nu Kilisito uluhaavi ulo ulwa maakha magana lishumi (1,000).
UShetaani iibudwa
7 Pina gakhasa kishila amaakha magana lishumi (1,000),
akhadindulilwa uShetaani kihuma mu shifungo shaakwe.
8 Lino,
pina akhahuma panja,
akhaluta kivajanga avaanu woona vina vayalaliile mu mbali soona isa nyi,
uluganulo lwakwe Googu na Magoogu.
UShetaani akhavakungaania lumo kwa kiiva ya wulugu,
avaanu awo vina vakhatovana vakhava vinshi ngaja luhankha lwa mu bahali.
9 Woope vakhayinsa kihuma imbali soona isa nyi,
na kilipilima ilijumbi lina uNguluvi aligeene,
pina avabaagule vaakwe viikhala.
Leelo pina vakhagaha ndeeno,
umooto gukhayiikha kihuma kwa Nguluvi na kivabuda.
10 UShetaani yuna akhandi ikivajanga,
akhataagwa mu lilamba ilikhome lila ilya mooto ni shibiliiti.
Apo papeene pina lyatagwagwa ilikhanu nu mukuwamalago yula umudehi.
Woope vakhalafisiwa ukho ishilo ni shiminsi,
shiluta na shiluta.
Uwuhigo uwa wudugo
11 Baheene nashaaga ishitengo ishikhome ishivalafu isha Wutwa na yuna ashikhaliile yu Nguluvi.
Inyi nu wulanga fyawuukha shitu pamwene,
fisikhandi fikwali khanji.
12-13 Ibahali yavahumyaga kunja vina vakhandi vafwiliile umo.
IMfwa nu Wusimu fyope fyavahumya kunja vina vakhandi vafwile.
Nikhavaajile avakhome na vanangʼana,
vayiimile pa shitengo isha Wutwa.
Baaho amataafili gagubutulwa,
khanji ilitaafili ilinji ilya wuumi lyope lyagubutulwa.
Baheene uNguluvi wávahiga kilingana ni njendo saanave,
ngaja shina yiyandiikhwe mu mataafili ago.
14 IMfwa nu Wusimu,
fyatoosewa mu lilamba ilikhome lina liveekha umooto.
Ililamba ilyo ilya mooto,
mfwa ya wuvili.
15 Umuunu yoyoona yuna ilitaawa lyakwe lisikhayandiikhwe mu Litaafili lya Wuumi,
wátagwagwa mu lilamba ilikhome lina liveekha umooto.