Wugubutulo 19

UNguluvi isufisiwa

1 Gaganile kishila ago, napulikha ishawuti nkhome ngaja ya shipuga shikhome ukho kwa Nguluvi, shaajova,

“Haleluya!

Uwukulukho, uwutupikho ni ngufu fiihuma kwa Nguluvi weesu,

2 kiiva uwuhigo waakwe wa shiyooli,

asibaniilila vamonga.

Amuhijile umushemi mukhome,

yuna wáyijanjilisaaga inyi kwa wushemi waakwe.

UNguluvi wámuvaalisa

kwa kiiva ya kikunula idanda ya vavanda vaakwe!”

3 Ulwa wuvili shaajova,

“Haleluya!

Ilyosi lya mooto lina lyanyaanya ilijumbi ilyo,

litaana kushaanya shiluta na shiluta!”

4 Avagosiivaha vala mashumi gavili na vana, lumo ni fiwumbwa fina (4) ifya wuumi, fyayigwisa pansi, fyagubama, fyamufuunya uNguluvi yuna akheele pa shitengo isha Wutwa fiijova, “Amina! Haleluya!”

5 Baheene napulikha ishawuti iyinji yiihuma pa shitengo sha Wutwa yiijova,

“Mumusufyaje uNguluvi weesu,

omwe vavanda vaakwe woona.

Musufyaji omwe muna mukimuyinatila,

vakhome na vanangʼana.”

Ishiwungo sha noolana isha Mwana Nkholo

6 Baheene napulikha ishawuti ngaja shawuti ya shipuga shikhome sha vaanu, khanji ngaja shawuti ya nkhokhomo ya malenga minshi, khanji ngaja shawuti sa ngulumo nkhome siija,

“Haleluya,

kiiva uMutwa weesu uNguluvi,

uMunya Ngufu Soona,

atemile!

7 Na yuuse tishendeeve, tiluluutile na kimutupikha,

kiiva ishiwungo isha Mwana Nkholo isha kitoola shaafikha,

khanji yuna itoolwa ayipinyanjile.

8 Umwene umunya kitoolwa apeliilwe kifwala amenda amanofu amavalafu aga kitaani,

khanji gina gingʼaala khabisa.”

Amenda amanofu amavalafu aga kitaani, uluganulo lwakwe injendo ingolofu isa vabaagule va Nguluvi.

9 Baheene umalayikha wánijovela wáaja, “Yandikha amaswi aga, ‘Vayimiliilwe vala vina vayaniilwe mu shiwungo sha kitoola isha Mwana Nkholo!’ ” Khanji wánijovela wáaja, “Aga gina naajova, maswi ga shiyooli ga Nguluvi.” 10 Baaho nayigwisa pansi, nagubama pa magulu gaakwe nimufuunye. Leelo wánijovela wáaja, “Lekha! One na yuune nili muvanda muyaago, lumo na vahuvililaaji vayaago woona vina viihumya uwubedelo wa Yeesu. Mufuunyaji uNguluvi, kiiva woona vina viihumya uwulunjikhaaji ulwa Yeesu, vilogola injowo sa wukuwamalago.”

ULusawo lwa Nguluvi iiluta kihiga na kitovana

11 Paanyuma, nakwaga kwa Nguluvi kudindwishe. Nayaaga ifalaasi imbalafu nu muunu yumonga ayiyangeele pashaanya. Uyo akhandi itambulwa “Muyinatifu wa Shiyooli.” Woope iihiga na kitovana kwa wugolofu. 12 Ameeho gaakwe gakhandi ngaja muli sa mooto, khanji akhandi afwele injoola nyinshi isa shitwa ku mutwe gwakwe. Akhandi ayandiikhwe ilitaawa lina akwasiina yuna alimeenye, leelo yumwene duguli. 13 Akhandi afwele amenda gina gajabiikhwe mu danda, itambulwa ndeeni, “Liswi lya Nguluvi.” 14 Avasulukhali ava kwa Nguluvi, vakhandi vikimufwata kunyuma. Vakhandi vafwele amenda amanofu amavalafu aga kitaani, khanji gina gingʼaala khabisa, woope vakhandi vayangeele ifalaasi imbalafu. 15 Ipanga inemi, yiihuma mu mulomo gwakwe. Kwa panga iyo, akhavatema avaanu va nyi soona, na kivamena avalugu vaakwe woona. Woope ikiyikhanya isabiibu mu shombo sha kihuujila. Ishombo ishi shiwonensa idivaayi iya nkhalasi inkhome iya Nguluvi, uMunya Ngufu Soona. 16 Pa shiima shaakwe, umwenda gwakwe gukhandi guyandiikhwe ilitaawa ili,

Mutwa wa vatwa na Mukhome wa vakhome.

17 Baheene namwaga umalayikha yumonga ayiimile pashaanya ya lijuva. Umalayikha uyo wákhoosa ishawuti, wásishemeela inyuni soona sina sigulukha ku wulanga, wáaja, “Yinsi! Wungaani lumo mu shiwungo ishikhome sha Nguluvi. 18 Yinsi, mulye inyama sa mavili ga vatwa, na ga vakhome va vasulukhali, na ga vaanu avanya ngufu, na ga falaasi na vina vikisiyangala. Yinsi, mulye inyama sa mavili ga vaanu woona, ngaja avavanda na vina vasili vavanda, avakhome na vanangʼana.”

19 Baheene nalyaga ilikhanu ilikhome na vatwa va nyi soona na vasulukhali vakungaana lumo. Awo vakhandi visakula kitovana na uyo yuna akhandi ayangeele ifalaasi, lumo ni shipuga sha vasulukhali vaakwe. 20 Leelo ilikhanu, lumo nu mukuwamalago umudehi yuna wágahaga amabikha kwa kiiva yaakwe, vagalulwagwa. Kwa kigaha amabikha gaakwe ago, umukuwamalago uyo akhandi ikivajanga avaanu vina vakhandi vavishiilwe ishimanyilo isha likhanu ilyo ilikhome, na kiyifuunya isanaamu yaakwe. Baheene woona vavili pina wuumi, vataagwa mu lilamba ilikhome lila ilya mooto umukhali mandu. 21 Umuunu uyo yuna akhandi ayangeele ifalaasi, wávabuda avasulukhali va shipuga shoona kwa panga yina yahumaga mu mulomo gwakwe. Inyuni iso soona, saalya inyama sa mafimba gala, sayikuta khabisa.