Kibojolwa kwa lijumbi lya Babeeli
18
1 Gaganile kishila ago,
namwaga umalayikha uyunji iyiikha kihuma kwa Nguluvi,
akhandi nu wutawulilwa wukhome.
Akhandi ingʼaala,
uwuvalafu waakwe wukhandi wukiyimulikha inyi.
2 Woope wákhoosa ishawuti mandu wáajova,
“Lyagwa!
Ilijumbi ilikhome ilya Babeeli,
lyagwa khabisa!
Lino,
lyava wiikhasi wa kityejela shila lilungu.
Lyava wiikhasi wa shila nyuni inyaafu iya kikhalasa mandu.
3 Lyagwa kwa kiiva avaanu woona va nyi soona,
vangʼwesaga idivaayi inkhosi iya wushemi waakwe,
woope avatwa va nyi iso vashemwishe nalyo.
Woope avagusaaji va mu nyi vatajiliishe
kwa wupafu waakwe wuna wushilile mandu.”
4 Baheene napulikha ishawuti iyinji kihuma kwa Nguluvi yiija,
“Wuushi kunyaakwe,
omwe vaanu vangu,
baheene musikhahangaji nalyo mu wunansi waakwe,
wala musikhayambulilaji mu malava gaakwe.
5 Uwunansi waakwe wukhome mandu,
mbakha wufishile kwa Nguluvi,
uNguluvi asililafye kwa kiiva ya njendo saakwe isa wunansi.
6 Mulihigaje ilijumbi ngaja shina lyavagahilaga,
shiyooli mulihombese mala khavili ya wunansi wuna lyavagahilaga avanji.
Mu khoomasi yaakwe shina lyavahansaaga,
omwe mulihanse mala khavili.
7 Yili ngaja shina likiyihala na kikhala uwiikhasi wa wupafu,
shiisho ndeeno,
mulilafye na kiligaha liyaalame.
Likiyihala mu numbula yaakwe kiija,
‘One niikhala mu shitengo shangu
na kitema ngaja mutwa wa shidala.
One nisili mufwile,
khanji nisikhayaalama kaa!’
8 Kwa ago,
likhapeelwa amalava gaakwe kwa lijuva limo,
amalava ga wutamu,
kiyaalama ni njala.
Khanji likhalalila khabisa kwa mooto,
kwa kiiva uMutwa uNguluvi yuna ikilihiga,
yumwene ana ngufu.”
9 Avatwa va mu nyi soona vina vashemwishe nalyo na kikwava uwusi lumo nu mwene,
woope vakhaliyaalama na kikhoola,
pina vakhalyaga ilyosi lya lijumbi ilyo lina liveekha na kilalila.
10 Vakhayiima kutali,
kwa kiiva vitiila amalava gaakwe na kilogola kiija,
“Aka,
aka,
owe Babeeli,
ilijumbi ilikhome ilinya ngufu!
Kwa luhaavi lwa lisala limo hela,
waahigwa.”
11 Woope avagusaaji va mu nyi soona vakhakhoola na kiyaalama,
kwa kiiva ya lijumbi lila,
kiiva kusiina umuunu yoyoona yuna iigula ifiinu fyanave.
12 Lulwene kiija kusiina umuunu yuna iigula isahaabu saanave,
ihela,
amangʼanga ga lifungu likhome,
iluulu,
a amenda amanofu aga kitaani,
amenda amanofu aga mwalaala na ga haliili,
amenda amanofu amaduuhu,
inkhonkholo sa mapishi ni nkhonkholo sa mapembe ga jungwa ni sa mapishi aga lifungu likhome,
ni fya shaaba ni shuuma ni malumaalu.
13 Khanji kusiina avagulaaji va mudalasiini,
b ifilungo ifinji,
ifya kitinshilisa ingaagulwa sina sinunshilila,
amafuta gina ginunshilila wunofu awu wuudi,
wala divaayi,
amafuta ga kiteleshela,
uwutine uwunofu,
ni ngano.
Khanji kusiina umuunu uwa kigula ingʼombe,
inkholo,
ifalaasi,
imutukha isa kikwehwa ni falaasi,
avavanda,
hata uwiikhasi wa vaanu.
14 Avagusaaji vakhamujovela kiija,
“Ifiinu fyona fina ukhandi widobokha,
fyayaga,
uwusi na kikutukha kunyaakho,
fyayaga.
Usikwiliile kifyaga khanji kaa!”
15 Avagusaaji va fiinu ifyo fyona vina vatajiliishe kihuma mu lijumbi ilyo,
vakhayiima kutali kwa kiiva vitiila amalava gaakwe.
Vakhakhoola na kiyaalama,
16 viijova,
“Aka!
Aka lijumbi likhome!
Waava umanyeene kifwala amenda amanofu aga kitaani,
aga mwalaala na maduuhu,
na kiyikogola kwa sahaabu
na mangʼanga ga lifungu likhome ni luulu!c
17 Kwa luhaavi lwa lisala limo hela,
uwusi waakho wananjikha!”
Avaanu woona vina vijensa ifipugo ifikhome,
na vina vishuula nafyo,
na woona vina visenga insengo mu bahali,
vakhayiima kutali.
18 Pina vakhalyaga ilyosi nu mooto gula guna gwilalisa,
vakhalyova kwa shawuti nkhome kiija,
“Kusiina kaa,
ilijumbi ngaja ilijumbi ilikhome lila!”
19 Vakhayikunulila amankundid mu matwe gaanave,
kuno vikhoola na kiyaalama,
“Aka!
Aka lijumbi likhome!
Ilijumbi lina lyatugahaga woona vina tina fipugo fikhome ifya mu bahali,
titajiliishe kihuma mu wusi waakwe.
Kwa luhaavi lwa lisala limo hela,
fyananjikha ifiinu fyona!
20 Shendeevaji omwe,
muna mwikhala kwa Nguluvi,
kwa kiiva ya lijumbi lila.
Shendeevaji omwe vabaagule va Nguluvi,
omwe vanandeje na omwe vakuwamalago!
UNguluvi wálihiga ilijumbi ilyo
kwa kiiva ya gala gina lyavagahilaga omwe!”
21 Baheene umalayikha umunya ngufu wányenyula ilingʼanga lina lili ngaja lyala ilikhome,
wálitoosa mu bahali wáajova,
“Kwa ngufu nyinshi ndawuli ndeeni,
ilijumbi ilikhome ilya Babeeli,
likhataagwa pansi na kiyaga khabisa.
22 Ishawuti sa malimba ni sa kiyeyema,
ishawuti sa ndemo ni sa balagumu,
sisikhapuliisikha kaa kunyaakho!
Kusikhava nu munosaaji yoyoona wa nsengo yoyoona,
yuna akhawonekha kunyaakho khanji,
wala ishawuti iya lyala ilya kihawulila,
yisikhapuliisikha khanji mukhati yaakho.
23 Umo munyaakho,
musikhaveekha ulumuli ulwa taala khanji.
Wala musikhava ni fiwungo ifya vaanu kitoolana khanji kaa.
Ukhagahilwa ndeeni,
kwa kiiva avagusaaji vaakho vakhandi vakhome va nyi yoona.
Khanji kwa kiiva avaanu va nyi yoona vajangwa kwa wuhavi waakho!
24 Ilijumbi ilya Babeeli likhabojolwa,
kwa kiiva mukhati yaakwe,
yikhawoneeshe idanda ya vakuwamalago,
ni danda ya vabaagule va Nguluvi,
lumo ni danda ya vaanu woona,
vina vabudwagwa mu nyi.”