Umushemi umukhome ni likhanu iliduuhu
17
1 Baheene umunyaayumo mu vamalayikha vala fungati,
vina vakhandi ni sebeti fungati,
wánijovela wáaja,
“Yinsa,
nisikuwonense ululawo luna akhapeelwa umushemi umukhome,
yuna akhaliile ishitengo sha luvala lwa malenga minshi.a
2 Avatwa va nyi vawafukhaga nawo na vina viikhala mu nyi vagaalile idivaayi inkhosi iya wushemi waakwe.”
3 Baheene pina uNumbula wa Nguluvi akhandi ikinilongosa,
umalayikha wánitoola na kinitwala mu lunyikha.
Ukho namwaga uwashimaayi akheele mu likhanu iliduuhu.
Ilikhanu ilyo likhandi liyandiikhwe koona amataawa aga matofolo,
likhandi na matwe fungati na mapembe ishumi.
4 Uwashimaayi uyo akhandi afwele amenda amanofu aganya langi ya mwalaala ni nduuhu.
Khanji akhandi ayikogwele kwa sahaabu,
amangʼanga ga lifungu likhome,
ni luulu.
b Mu liwokho lyakwe,
wáyikhataga ikhoomasi iya sahaabu,
yina yikhandi yimemile amakhalaso minshi,
ni fiinu ifishaafu fina fiwonensa uwushemi waakwe uwo.
5 Akhandi ayandiikhwe pa weeni waakwe ilitaawa ilinya luganulo lwa wufiho kiija,
UBabeeli uMukhome
Maayi wa Vashemi
AMakhalaso ga Nyi
6 Namwaga uwashimaayi uyo agaalile idanda iya vabaagule va Nguluvi,
ni danda ya vaanu vina vakhandi vikimubedela uYeesu.
Naganaga kimwaga,
naswigaga mandu.
7 Leelo umalayikha yula wánijovela wáaja,
“Usikhaswigaga!
One nisikujovele aga wufiho wa washimaayi uyo ni likhanu ilyo,
lina limubaabile yuna ana matwe fungati na mapembe ishumi.
8 Ilikhanu ilyo lina walyagaga likhandi lyumi,
lino ndeeni lifwile.
Lino lili nkholeela kihuma mu lilindi ilikhome ilya malungu,
leelo uNguluvi akhalibuda.
Avaanu woona ava mu nyi,
vina amataawa gaanave gasikhayandiikhwe mu Litaafili ilya Wuumic kihuma inyi yisinawumbwe,
vakhaswiga.
Vakhaswiga pina vakhalyaga ilikhanu ilyo lina pashiyanso likhandi lyumi,
khanji lyafwa,
lino ndeeni,
lyatina!
9 “Lino,
iliswi ili lisakulwa uwumanyi!
Amatwe fungati ago,
gipyanisa ifidunda fungatid fina uwashimaayi uyo akhaliile.
Amatwe ago khanji,
vatwa fungati.
10 Mu vatwa fungati awo,
vasaanu vafwile,
yumo apiitema,
uyunji yula ashaanali asinayanse.
11 Ilikhanu iliduuhu ilyo lina likhandi lyumi leelo kuunyuma lyafwa,
yu mutwa uwa munaana.
Uyo uwa munaana ngaja munyaayumo wa vatwa vala fungati,
leelo uNguluvi akhamubuda.
12 Amapembe gala ishumi gina wagaaga,
gipyanisa avatwa vina vashaanali vasinayanse kitema.
Leelo vakhapeelwa uwutawulilwa uwa kitema kwa luhaavi lwa lisala limo,
lumo ni likhanu lila.
13 Amahiiva ga vatwa awo ishumi gakhalingaana,
vakhalipeela ilikhanu lila uwutawulilwa waanave ni ngufu soona.
14 Vakhatovana uwulugu nu Mwana Nkholo,
akhavamena kwa kiiva umwene yu Mukhome wa vakhome,
khanji yu Mutwa wa vatwa.
Woope akhava lumo na vaanu vaakwe vala vina vashemelwagwa na kibaagulwa nu Nguluvi,
woope vaanu vayinatifu.”
15 Umalayikha wánijovela khanji wáaja,
“Ukhamwajile umushemi umukhome akhaliile pashaanya ya malenga gala aminshi.
Amalenga ago,
fipuga fya vaanu woona,
nyi soona,
fimyanja fyona ni filogolo fyona.
16 Amapembe gala ishumi gina wagaaga ni likhanu lila,
fikhamukhalalila umushemi yula.
Vasitoole ifiinu fyona fina anafyo na kimulekha bwinda,
vasimulye inyama yaakwe na vasiganyaanye amasigaso.
17 Awo vakhagaha ndeeno,
kwa kiiva uNguluvi yumwene wávagahaga vave nu lugulumilo ulwa kilipeela ilikhanu uwutawulilwa waanave uwa kitema.
Yikhava ndeeno,
mbakha pina gakhakwilana gina wájovaga uNguluvi.
18 Uwashimaayi yula yuna wamwaga,
lilyene lijumbi lila ilikhome,
ilinya wutawulilwa kwa vatwa woona ava nyi soona.”