Isebeti fungati
16
1 Napulikha ishawuti nkhome kihuma umo mu nanda ya Nguluvi,
yikivajovela avamalayikha vala fungati ndeeni,
“Luti mukunule mu nyi,
isebeti fungati iso isa nkhalasi ya Nguluvi.”
2 Baheene umalayikha wa wutasi wáaluta wákunula pa nyi isebeti yaakwe iya nkhalasi ya Nguluvi.
Baaho avaanu woona vina vana shimanyilo sha likhanu lila na vina vakhandi vikiyifuunya isanaamu yaakwe,
vaatamwa amalonda amavi aga kilemasa mandu.
3 Baheene umalayikha uwa wuvili wákunula isebeti yaakwe mu bahali.
Amalenga ga bahali gaseetukha gaava ngaja danda ya muunu yuna afwile,
ifiwumbwa fyona ifyumi mu bahali fyafwa.
4 Baheene umalayikha uwa wutatu woope wákunula isebeti yaakwe mu makhoga na mu fisansa fya malenga,
baaho amalenga gaseetukha gaava danda.
5 Napulikha umalayikha umuyimililaaji wa malenga iijova ndeeni,
“Wee Nguluvi,
yuna ukwali na ukhandi ukwali,
uli Munofu,
owe yuuwe Shiyooli,
kwa gina wiihiga.
6 Avaanu avanansi vakunulaga idanda sa vabaagule va Nguluvi na vakuwamalago,
owe wávapeela idanda vangʼwe.
Awo visakulwa vagahiilwe ndeeno!”
7 Baheene napulikha ishawuti kihuma pa luvala ulwa kihumisa ishadanda yiija,
“Eena Mutwa Nguluvi,
uMunya Ngufu Soona,
uwuhigo waakho wa shiyooli,
usibaniilila vamonga!”
8 Baaho umalayikha uwa wuna,
wákunula isebeti yaakwe pa lijuva.
Ilijuva lyapeelwa ingufu isa kivanyaanya avaanu kwa mooto gwakwe.
9 Avaanu vanyaanywa fivi mandu.
Vamutofola uNguluvi,
kiiva akhandi ana wutawulilwa wa malava ago.
Leelo vasikhalambisiile wala kimutupikha.
10 Baheene umalayikha uwa wusaanu wákunula isebeti yaakwe pa shitengo sha wutwa uwa likhanu lila.
Shitu inshiisi yagubikha uwutwa waakwe,
avaanu vakhandi vana manga kwa kiiva ya wuvafi.
11 Vamutofola uNguluvi uwa kushaanya,
kwa kiiva ya wuvafi na malonda gaanave.
Leelo vasikhalambisiile injendo saanave imbi.
12 Baheene umalayikha woope uwa mutanda wákunula isebeti yaakwe mu mukhoga umukhome ugwa Efulaati,
goope amalenga gaakwe gayuuma.
Ndeeno insila yatendwa kwa vatwa kihuma kunena.
13 Baheene nagaaga amalungu gatatu gina gahwaneene ngaja nyuula.
Limo lyahuma mu mulomo gwa liyokha,
ilinji lyahuma mu mulomo gwa likhanu ilikhome,
na ilinji lyahuma mu mulomo gwa mukuwamalago yula umudehi.
14 Amalungu ago gakhandi nu wutawulilwa uwa kigaha amabikha.
Vaava viiluta kwa vatwa woona ava nyi,
kiija vavakungaanie kiiva ya wulugu wuna wukhava ilisiku ilikhome ilya Nguluvi,
uMunya Ngufu Soona,
pina akhavamena avalugu vaakwe.
15 UYeesu iijova,
“Puliisi!
Nikhayinsa ngaja umuhiiji shina iyinsa!
Ayimiliilwe umuunu yuna iigona meeho na afwele amenda gaakwe kiija,
asilaave ajende bwinda na kihonga insoni.”
16 Baheene amalungu ago gavakungaania avatwa woona na vasulukhali vaanave uluvala luna lutambulwa kwa Shihebulaniya Halimagedoni.a
17 Baheene umalayikha wa fungati wákunula isebeti yaakwe mu wulanga.
Ishawuti nkhome yapuliisikha kihuma ku shitengo isha Wutwa,
mu nanda ya Nguluvi,
yiijova ndeeni,
“Uwudugo wa Babeeli,
waafikha!”
18 Kwava muli ni ngulumo sa noonya nu ludegenkho lwa nyi lukhome mandu.
Uludegenkho ulu,
lukhandi lukhome mandu kishila uludegenkho loloona,
kihuma umuunu awumbwe.
19 Baheene ilijumbi ilikhome ilya Babeeli lyabagunkhana mbali sitatu na majumbi amakhome aga fimyanja gananjikha goona.
Ndeeno,
uNguluvi asikhalisamiilwe ilijumbi ilikhome ilya Babeeli,
wálikhamiilisa lingʼwe idivaayi iya nkhalasi yaakwe inkhome,
mu khoomasi yaakwe.
20 Uludegenkho lula,
lwahonsaaga ifigunguli fyona ifya paakhati ya bahali fyayaga,
ni fidunda fyona fisikhawoneeshe khanji.
21 Inoonya ya mangʼanga yatoonya.
Amangʼanga amakhome aga balaafu,
shila limo likhandi ni kilo ngaja mashumi gasaanu ndeeni,
gakhandi gikivagwila avaanu.
Avaanu vamutofola uNguluvi kiiva ya malava ga noonya iyo,
kiiva gakhandi makhome mandu.