Uluyeyemo lwa Mwana Nkholo nu Musa
15
1 Baheene nashaaga ishimanyilo ishinji kushaanya.
Shikhandi shimanyilo shikhome,
khanji sha kiswiga.
Nikhaweene ndeeni,
avamalayikha fungati vakhandi vileeta amalava fungati aga wudugo.
Amalava ago gakhandi gikwisa inkhalasi ya Nguluvi.
2 Nashaaga ishiinu shina shikhandi ngaja bahali ya shilole,
shina shihansinkheene nu mooto.
Palubali apo vakhandi vayiimile avaanu vala vina vakhandi valimenile ilikhanu ilikhome lila,
isanaamu yaakwe,
lumo nu luvaso lwa litaawa lyakwe.
Avaanu awo vakhandi vakheete imalimba saanave sina vakhandi vapeliilwe nu Nguluvi kiija vamufuunye.
3 Vakhandi viyeyema uluyeyemo lwa Musa,
a umuvanda wa Nguluvi,
nu luyeyemo lwa Mwana Nkholo,
viijova ndeeni,
“UMutwa uNguluvi,
uMunya Ngufu Soona,
insengo saakho nkhome,
khanji sa kiswiga mandu!
Owe yuuwe Mutwa wa nyi soona,
insengo saakho ngolofu,
khanji sa shiyooli!
4 Wee Mutwa Nguluvi,
avaanu woona visakulwa kiliyinatila na kilisufya ilitaawa lyakho,
kiiva,
yuuwe duguli uli Munofu!
Avaanu va nyi soona vakhayinsa na kikufuunya!
Kiiva insengo saakho sa shiyooli,
siwonekha bahawuvalafu.”
5 Gaganile kishila ago,
naloleela,
nalwaga ludindukha uluvala ulwa nanda ya Nguluvi,
lulwene kiija iliheema ilya kimufuunyila uNguluvi.b
6 Baheene avamalayikha vala fungati vina vakhandi na malava fungati,
vapoola umo.
Vakhandi vafwele amenda ga kitaani gina gakhandi gingʼaala,
vayipinyile ni nkhova imapaate isa sahaabu mu fifuva fyanave.
7 Umunyaayumo wa fiwumbwa fina (4) fila,
wávapeela shila yumo wa vamalayikha vala fungati,
isebeti yimo iya sahaabu,
yina yimemile inkhalasi ya Nguluvi yuna muumi shiluta na shiluta.
8 Mukhati ya nanda iyo iya Nguluvi,
paamema ilyosi lina lihonsiiwe nu wutupikho wa Nguluvi ni ngufu saakwe.
Ndeeno,
akwasiina yuna akwiliile kiyinjila mu nanda ya Nguluvi khanji,
mbakha amalava fungati aga vamalayikha vala,
pina gakwilana.