Wugubutulo 14

UMwana Nkholo na vaanu vaakwe

1 Baheene namwaga uMwana Nkholo ayiimile pa shidunda sha Sayuni, lumo na vaanu magana ishumi ligana na magana ishumi mashumi gana na magana mashumi gana (144,000). Avaanu awo, vakhandi vayandiikhwe pa weeni waanave ilitaawa lya Mwana Nkholo ni litaawa lya Wiihe. 2 Napulikha ishawuti kihuma kwa Nguluvi, ngaja shawuti ya nkhokhomo ya malenga minshi, khanji ngaja shawuti ya lugulumo lwa noonya. Ishawuti iyo, yikhandi ngaja avaanu vinshi vina viitova imalimba saanave. 3 Avaanu magana ishumi ligana na magana ishumi mashumi gana na magana mashumi gana (144,000) awo, vakhandi vayiimile pamwandi ya shitengo sha Wutwa na pamwandi ya fiwumbwa fina (4) fila, na vagosiivaha mashumi gavili na vana. Vakhandi viyeyema uluyeyemo ulupya, kusiina umuunu uyunji yuna akhakwiliile kiyimanyisa uluyeyemo ulu, ila avaanu awo vina vakulusiwaagwa mu nyi. 4 Vaveene vikimufwata uMwana Nkholo kokoona kuna iiluta. Vasikhayishafwile, kiiva vakhandi ngaja vahinja vina vasinajelaje kijenda na vagoosi. Avaanu awo vakulusiwaagwa mu vaanu avanji, khanji ngaja sadaakha ya nkungulo iya wutasi yina yihumisiwa kwa Nguluvi na kwa Mwana Nkholo. 5 Vasinadehaje kaa, khanji vasipiikhwa.

Imola sa vamalayikha vatatu

6 Baheene namwaga umalayikha uyunji igulukha uwiima wa mutwe gwangu. Umalayikha uyo akhandi ni Mola iNofu isa shiluta isa kivakhoma avaanu vina viikhala mu nyi, awo avaanu va nyi soona, fimyanja fyona, fikholo fyona ni filogolo fyona. 7 Umalayikha uyu wálogola kwa shawuti nkhome wáaja, “Mufuunyaji uNguluvi na kimutupikha, kiiva uluhaavi lwa kivahiga avaanu lwafikha. Mufuunyaji yuna wáwumbaga uwulanga, inyi, ibahali ni fisansa fya malenga.”

8 Umalayikha uyunji uwa wuvili wáfwata, wáaja ndeeni, “Ilijumbi ilikhome ilya Babeeli lyagwa khabisa! Ilijumbi ili lyavagahaga avaanu woona va nyi soona, vangʼwe idivaayi inkhosi yaakwe. Idivaayi iyo, wushemi waakwe wuna wugaya wudugo.”

9 Umalayikha uyunji uwa wutatu wávafwata vavili awo wáajova kwa shawuti nkhome wáaja, “Nda kuna muunu yoyoona yuna ikilifuunya ilikhanu ilyo ni sanaamu yaakwe, na kiviikhwa ishimanyilo pa weeni waakwe, awu mu mawokho, 10 umuunu uyo woope akhangʼwa idivaayi iya nkhalasi ya Nguluvi. Idivaayi iyo nkhosi, ngaja wujimbi wuna wusihansiiwe na malenga. Woope uNguluvi akhamulafya mu mooto umukhali mandu, pa vamalayikha avanofu na pa Mwana Nkholo. 11 Ilyosi ilya mooto lina likhavanyaanya likhataana kushaanya shiluta. Avaanu awo vakhalafisiwa ishilo ni shiminsi, kwa kiiva vakhandi vikilifuunya ilikhanu ni sanaamu yaakwe na kiviikhwa ishimanyilo sha litaawa lyakwe.”

12 Lino, avabaagule va Nguluvi visakulwa kigugumila. Avaanu awo, vaveene vina viyinatila indaji sa Nguluvi na kimuhuviilila uYeesu.

13 Napulikha ishawuti kihuma kwa Nguluvi yiija, “Yandikha aga, kiyansa lino, avaanu woona vina viifwa kuno vikimuhuviilila uMutwa uYeesu, vakhayimiililwa.” Baheene uNumbula wa Nguluvi wáajova, “Eena vakhayimiililwa mandu. Vakhatuuya kihuma mu nsengo saanave inkhamu, kwa kiiva vakhapata ulutono lwa nsengo saanave inofu.”

Kikungula gina gali mu nyi

14 Baheene naloleela khanji, nalyaga ilifunde ilivalafu. Pashaanya ya lifunde ilyo, akhandi akheele umuunu ngaja Lusawo lwa Muunu. Umuunu uyo akhandi afwele injoola ya Wutwa ya sahaabu ku mutwe gwakwe. Mu liwokho lyakwe, akhandi akheete ilihenjelo ilitemi.

15 Baaho umalayikha uyunji wáahuma kwa Nguluvi mu nanda iya Nguluvi, wámujova kwa shawuti nkhome yula yuna akhandi akheele pashaanya ya lifunde, wáaja, “Luta nyangu uhenje inkungulo kwa lihenjelo lyakho, kwa kiiva imbumbulu sayeela, ndeeno lwafikha uluhaavi ulwa kikungula mu nyi.” 16 Baheene yula yuna akhandi akheele pa lifunde wálitoosa ilihenjelo lyakwe mu nyi, wáhenga inkungulo mu nyi yoona.

17 Baheene umalayikha uyunji wáahuma mu nanda imbaagule iya kwa Nguluvi, woope akhandi akheete ilihenjelo ilitemi. 18 Baaho khanji umalayikha uyunji yuna akhandi nu wutawulilwa uwa mooto gwa mafuunyo wátwiwukha, ahumile pa luvala ulwa kihumisa ishadanda. Wámujovela kwa shawuti nkhome umalayikha yula uyunji umunya lihenjelo ilitemi, wáaja, “Ulute nyangu ni lihenjelo lyakho ilitemi, ukungule amahoojo ga sabiibu ga nyi yoona, kiiva isabiibu saakwe sayeela.”

19 Baheene umalayikha yula wálitoosa ilihenjelo lyakwe mu nyi, wásikungula isabiibu isa mu nyi. Wásiviikha mu shombo ishikhome isha kisihuujila. Ishombo isho shiwonensa inkhalasi ya Nguluvi. 20 Kula kunja ya lijumbi, isabiibu mu shombo isho sahuujwa. Saahumya idanda, idanda iyo yaava mukhoga mutali. Uwutali waakwe wukhandi kilomiita magana gatatu (300), ishoogo shaakwe shikhandi miita yimo ni nusu.