13
1 Baheene,
kihuma mu bahali umo nalyaga ilikhanu ilikhome liihuma,
likhandi lina mapembe ishumi na matwe fungati.
Khanji mu mapembe gaakwe lifwele injoola ishumi isa shitwa,
mu matwe gaakwe mukhandi muyandiikhwe amataawa ga kimutofola uNguluvi.
2 Ilikhanu lila lina nikhalyajile likhandi ngaja duuma,
amagulu gaakwe gakhandi ngaja magulu ga dubu,
a nu mulomo gwakwe gukhandi ngaja mulomo gwa nyalupala.
Iliyokha lyalipeela ingufu saakwe,
ishitengo shaakwe isha wutwa nu wutawulilwa wukhome.
3 Umutwe gumo ugwa likhanu ilyo gukhandi guna lweya luvi lwa mfwa.
Leelo ulweya ulo lukhandi luponile!
Lyahonsa avaanu woona mu nyi kiswiga na kilifwata ilikhanu ilyo.
4 Khanji avaanu woona valisungamila iliyokha ilyo,
kwa kiiva lyalipeelaga ilikhanu ilyo uwutawulilwa waakwe uwa kitema,
na valifuunya ilikhanu ilyo,
vaaja,
“Kusiina yuna ahwaneene ngaja ilikhanu ili!
Khanji kusiina yuna akwiliile kitovana nalyo!”
5 Ilikhanu ilyo lyatawulilwa kilogola amaswi ga kiyisufya na kimutofola uNguluvi.
Lyapeelwa uwutawulilwa uwa kitema kwa meesi mashumi gana na gavili.
6 Baheene ilikhanu ilyo lyayansa kimutofola uNguluvi kwa kililiga ilitaawa lyakwe nu luvala luna akheele,
lulwene kivatofola woona vina viikhala kwa Nguluvi.
7 Khanji,
ilikhanu lila lyatawulilwa kitovana na vabaagule va Nguluvi na kivamena.
Lyapeelwa uwutawulilwa uwa kitema avaanu va fimyanja fyona,
ifikholo fyona,
ifilogolo fyona ni nyi soona.
8 Avaanu va nyi soona vakhamusungamila,
leelo,
avaanu vina amataawa gaanave gayandiikhwe mu Litaafili lya Wuumi,
kihuma inyi yisinawumbwe,
awo vasikhamusungamila.
Ilitaafili ili,
litaafili lya Mwana Nkholo yuna wáshinjwagwa.
9 Umuunu yuna ana makutu,
apulishe!
10 Umuunu yuna apanjiilwe kigalulwa,
hambi igalulwa.
Umuunu yuna apanjiilwe kibudwa kwa panga,
hambi iibudwa kwa panga.
Lino,
avabaagule va Nguluvi visakulwa kigugumila na kihuviilila.
Ilikhanu ilikhali ilya wuvili
11 Baheene nalyaga ilikhanu ilinji litwiwukha kihuma mu nyi,
likhandi lina mapembe gavili manangʼana ngaja ga nyana nkholo,
leelo ishawuti yaakwe yikhandi ngaja ya liyokha.
12 Lyawusenjela uwutawulilwa woona uwa likhanu ilya wutasi,
kiiva ya lyene.
Baheene,
lyavakhamiilisa avaanu woona ava mu nyi valifuunye ilikhanu ilya wutasi lina likhandi lina lweya ulwa mfwa,
luna lwaponaga.
13 Ilikhanu ilyo ilya wuvili lyava liigaha amabikha amakhome,
mbakha lyapinsa umooto kiyiikha kihuma kushaanya mbakha mu nyi,
avaanu vikigwaga.
14 Kwa mabikha aga gina lyapelwagwa kigasenga kiiva ya likhanu ilya wutasi,
lyavajanga avaanu woona ava mu nyi.
Lyavajova avaanu kiija vatende isanaamu kwa kiiva ya lishima lya likhanu lila ilya wutasi,
lina likhandi nu lweya ulwa panga,
leelo lyumi.
15 Ilikhanu ilya wuvili,
lyapeelwa uwutawulilwa uwa kipuuhila imuuhila mu sanaamu iya likhanu,
kiija lilogole na kipinsa avaanu woona vina vakhaanaga kiyifuunya isanaamu iyo,
vabudwe.
16 Lyope ilikhanu ilya wuvili lyavakhamilisaaga avaanu woona,
avakhome na vanangʼana,
avanya wusi na vapiina,
avavanda na vina vasili vavanda,
vaviikhwe ishimanyilo mu mawokho gaanave aga kundiilo awu pa weeni waanave.
17 Nda umuunu ave agaya shimanyilo,
asikwiliile kigula awu kigusa.
Ishimanyilo isho,
litaawa lya likhanu ilya wutasi,
awu uwinshi wa helufi soona isa litaawa lyakwe.
18 Iliswi ili lisakulwa uwumanyi.
Umunya wumanyi,
avasaaje uluvaso ulwa likhanu ilyo,
kwa kiiva uluvaso ulo lwa muunu.
Uluvaso lwakwe ulo,
magana mutanda na mashumi mutanda ni mutanda (666).