Uwashimaayi ni liyokha
12
1 Baheene ishimanyilo ishikhome shawonekha kushaanya.
Kukhandi kuna washimaayi yuna wáfwasiiwe ilijuva,
nu mwesi gukhandi pansi pa magulu gaakwe.
Khanji ku mutwe gwakwe akhandi afwele injoola ya wutwa ya nondwe ishumi na sivili.
2 Uwashimaayi uyo akhandi ayansiise kisava,
mbakha wáava ikhoola kwa wuvafi.
3 Baheene ishimanyilo ishinji shawonekha kushaanya.
Naawona iliyokha ilikhome iliduuhu,
lina likhandi na matwe fungati na mapembe ishumi,
shila mutwe gukhandi ni njoola ya shitwa.
4 Iliyokha ilyo,
lyagupilimya umushila gwakwe,
gwalugwisa uluvala lumo mu mbali sitatu isa nondwe ku nyi.
Iliyokha ilyo lyayiima pa washimaayi yula yuna akhandi isakula kisava,
pina wámusava umwana,
baheene limumile.
5 Baheene uwashimaayi yula wáasava umudiimi.
Umwana uyo akhatema avaanu va nyi soona,
na kivamena avalugu vaakwe woona.
Iliyokha pina lisinamumile umwana uyo,
akhatoliilwe kiluta kwa Nguluvi na ku shitengo shaakwe isha Wutwa.
6 Uwashimaayi yula wásijila ku mbanda,
kuna uNguluvi akhandi amunosesiise uluvala ulunofu ulwa kimusunga kwa luhaavi lwa nsiku magana ishumi limo na magana gavili na mashumi mutanda (1,260).
7 Baheene kwava nu wulugu kwa Nguluvi.
Umalayikha umukhome yuna itambulwa Mikayeli,
a lumo na vamalayikha vaakwe,
vatovana ni liyokha lila na vamalayikha vaakwe.
8 Leelo iliyokha lila na vamalayikha vaakwe,
vamenwagwa na kidagwa kwa Nguluvi.
9 UMikayeli na vamalayikha vaakwe valitaaga mu nyi iliyokha ilyo,
lumo na vamalayikha vaakwe.
Iliyokha ilyo ilya pawukuulu,
litambulwa Ibiliisi awu Shetaani,
likivajanga avaanu va nyi soona.
10 Baheene napulikha ishawuti nkhome kihuma kwa Nguluvi yiijova,
“Lino,
uNguluvi weesu wávakulusa avaanu vaakwe!
Wáwonensa uwutawulilwa waakwe na kitema ngaja Mutwa!
Woope uMukulusaajib waakwe akhawonensa uwutawulilwa waakwe,
kwa kiiva wátaagwa pansi
yuna akhandi ikivasitaakha avahuvililaaji vayeesu pa Nguluvi
ishilo ni shiminsi.
11 Avahuvililaaji vayeesu vamumena kwa danda ya Mwana Nkholo,
na kwa liswi lya wubedelo waanave,
kiiva vasikhawusajiile uwuumi waanave,
ndeeno vasikhatiilile kiifwa.
12 Lino,
shendeevaji omwe woona,
vina mwikhala kwa Nguluvi ukho!
Leelo,
aka omwe vaanu va mu nyi ni bahali,
kiiva uShetaani wátaagwa pansi kunyeenyu.
Akhaleele mandu,
kiiva ameenye kiija,
uluhaavi lwakwe lufupi.”
13 Baheene iliyokha ilyo,
lyaganaga kiwona lyataagwa mu nyi,
lyamufwata uwashimaayi yula yuna akhandi asavile umudiimi.
14 Leelo uNguluvi wámupeela uwashimaayi yula amapapanikho gavili aga nkhalukwangala inkhome,
baheene agulushe kiluta ku mbanda kula kuna uNguluvi akhandi amunosesiise,
ave kutali ni liyokha.
Apo papeene pa luvala pina wásungwagwa kwa nsiku iso magana lishumi limo na magana gavili na mashumi mutanda (1,260).
15 Iliyokha lyahumya amalenga minshi ngaja mukhoga kihuma mu mulomo gwakwe kiija,
uwashimaayi uyo amilwe nu mukhoga ugo.
16 Leelo inyi yamutanjilisa uwashimaayi yula,
yayigubutula ngaja mulomo,
yaamila amalenga goona kihuma mu mulomo gwa liyokha.
17 Ino iliyokha lyamukhalalila mandu uwashimaayi yula,
lyawuukha na kiluta kitovana na vanaakwe avanji.
Avaana awo vaveene vina vikisiyinatila indaji sa Nguluvi na kivabedela avaanu injowo sa Yeesu Kilisito.
Ilikhanu ilikhali ilya wutasi
18 Baaho iliyokha ilyo,
lyayiima pa luhankha mu mbalamo ya bahali.