Wugubutulo 11

Avalunjikhaaji vavili

1 Napeelwa ililansi lina likhandi ngaja lukwegu lwa kijelela, baheene najovelwa kiija, “Luta uyijele inanda yangu nu luvala ulwa kihumisa ishadanda. Khanji uvavase avaanu woona vina vifuunya umo. 2 Leelo usikhalujelaga ulukeeke lwa nanda yangu, kwa kiiva uluvala ulo, valesheelwe avaanu vina vasili Vayahuudi. Woope vasilikhanye ilijumbi ilibaagule kwa luhaavi lwa meesi mashumi gana na gavili. 3 Na yuune, nisivapeele uwutawulilwa avalunjikhaaji vangu vavili. Baheene vasiikuwe amalago nsiku magana ishumi na magana gavili na mashumi mutanda (1,260), pina vafwele amenda ga magunila kiwonensa amangʼuulo.”

4 Avalunjikhaaji vavili awo vaveene mapishi ga miseyituni gavili, ni nsimbili isa sahaabu sivili isa muli sina sikwali pa Mutwa uNguluvi yuna atemile mu nyi. 5 Nda umuunu yoyoona isakula kivalemasa, vakhamubuda nu mooto guna gwihuma mu malomo gaanave. Umuunu yoyoona yuna isakula kivalemasa, ndeeno mbakha abudwe. 6 Avalunjikhaaji vavili awo, vana wutawulilwa uwa kisivila inoonya kiija, yisikhatoonyaga uluhaavi luna viikuwa amalago. Uluhaavi loloona luna visakula, vakwiliile kiseetula amalenga gave danda na kileeta ililava lyolyona mu nyi muno. 7 Pina vakhamala kihumya uwubedelo waanave, ilikhanu ilikhali lina liihuma mu lilindi ilikhome ilya malungu likhatovana na woope, lyope likhavamena na kivabuda. 8 Amafimba ga valunjikhaaji gakhava mu nsila inkhome, isa lijumbi lila ilikhome. Lilyene ilijumbi lina uMutwa waanave wákhomelelwagwa pa musalaaba. Avaanu va lijumbi ili vana njendo ngaja sa vaanu va lijumbi lya Sodoma ni nyi ya Misili.

9 Avaanu va fikholo fyona, ifimyanja fyona, ifilogolo fyona ni nyi soona, vakhagaaga amafimba ga valunjikhaaji vavili awo kwa nsiku sitatu ni nusu, kusiina umuunu yuna akhatawulwa kigasiila. 10 Avaanu vina viikhala mu nyi yoona, vakhashendeeva na kishima na kipeelana ulutono kwa mfwa sa valunjikhaaji awo vavili. Vasiigahe ndeeno, kwa kiiva avakuwamalago awo vavalafyaga mandu vina viikhala mu nyi muno.

11 Leelo uluhaavi lwa nsiku sitatu ni nusu lwaganile kishila, imuuhila ya wuumi yina yiihuma kwa Nguluvi yavayinjila, woope vayiima. Avaanu vaganile kivaaga vifyukha, vatiilile mandu. 12 Baheene avakuwamalago vavili vala, vapulikha ishawuti nkhome kihuma kwa Nguluvi yikivajovela kiija, “Taani kuno!” Woope vataana kushaanya mu lifunde kuno avalugu vaanave vikivaloleela. 13 Kwa luhaavi luulo kwava ludegenkho lukhome lwa nyi, uluvala lumo mu mbali ishumi isa lijumbi lwabomokha. Khanji avaanu magana ishumi fungati (7,000) vaafwa, vina vasigalaga vatiilaga mandu, vamutupikha uNguluvi uwa kushaanya.

14 Ililava ilyo ilya wuvili lyashila, ililava ilya wutatu livejeelile kiyinsa.

Umalayikha uwa fungati iitova ibalagumu yaakwe

15 Baheene umalayikha uwa fungati wáatova ibalagumu yaakwe. Ndeeno napulikha ishawuti nkhome nyinshi kihuma kwa Nguluvi, siijova,

“Uwutwa wa mu nyi

wáava Wutwa wa Mutwa uNguluvi weesu

na wa Mukulusaaji waakwe,

woope akhatema shiluta na shiluta.”

16 Woope avagosiivaha mashumi gavili na vana, vina viikhala mu fitengo fyanave pa Nguluvi, vayigwisa pansi, vagubama, vamufuunya uNguluvi, 17 vaajova ndeeni,

“Tikikuhonjesa owe Mutwa Nguluvi, uMunya Ngufu Soona,

yuna ukwali na ukhandi ukwali,

kwa kiiva wasenjela uwutawulilwa waakho uwukhome,

na lilino wiitema.

18 Avaanu vina vasikhakuhuviliile, vakukhalalilaga,

leelo uluhaavi ulwa kihombesa, lwafikha.

Lino uluhaavi lwa vaanu vina vafwile vahigwe.

Lulwene luhaavi lwa kivapeela ulutono avavanda vaakho avakuwamalago,

na vabaagule vaakho woona vina vikikuyinatila,

avakhome na vanangʼana.

Ulo lulwene luhaavi lwa kivabuda

avaanu woona vina vinanga nyi.”

19 Baheene gwadindukha umulyango gwa nanda iya Nguluvi yina yikwali kwa Nguluvi. Isandikho iya Nguluvi iya lufingo yawonekha mu nanda iyo. Nasaaga imuli ni ngulumo sa noonya. Inyi yadegenkha, kwava ni noonya inkhome, inya mangʼanga mandu.