UMalayikha umunya litaafili linangʼana
10
1 Baheene namwaga umalayikha uyunji umunya ngufu,
iyiikha kihuma kwa Nguluvi.
Umalayikha uyo akhandi apiliimwe na mafunde,
pashaanya ya mutwe gwakwe kukhandi kuna lipingangʼombe lya noonya,
uweeni waakwe wukhandi wingʼaala ngaja lijuva,
amagulu gaakwe gakhandi ngaja nsimbili sa mooto.
2 Mu liwokho lyakwe wákhataga ilitaafili ilinangʼana lina likhandi lidindwilwe.
Woope wáakhanya iligulu lyakwe ilya kundiilo mu bahali,
iligulu ilya kunshiji wáakhanya mu nyi inyuumu.
3 Wályova ilyowo kwa shawuti nkhome,
ngaja nyalupala yina yiguluma.
Wáganile kilyova ilyowo,
ishawuti fungati isa kiguluma sapuliisikha.
4 Iso saganaga kipuliisikha,
nayipinyangaga kiyandikha gala gina gajowaagwa nu lugulumo,
leelo napulikha ishawuti kihuma kwa Nguluvi yiija,
“Amaswi ago aga lugulumo,
usikhagayandikhaga!
Mbuusa.”
5 Baheene umalayikha yula yuna namwagaga akheenye mu bahali na mu nyi inyuumu,
wányenyula kushaanya iliwokho lyakwe ilya kundiilo.
6 Wáyiyiiga kwa litaawa lya Nguluvi yuna ali muumi shiluta na shiluta,
yuna wáwumbile ukho ku wulanga na fina fikwali ukho,
inyi na fina fikwali umo,
ibahali na fina fikwali umo.
Wáyiyiiga wáaja,
“Uluhaavi ulwa kihepelesa,
lwasila.
7 Mu nsiku sila pina umalayikha uwa fungati akhatova ibalagumu yaakwe,
uNguluvi akhakwisa ulugoto lwakwe ulwa mbuusa,
ngaja shina wávajovelaga avakuwamalago,
avavanda vaakwe.”
8 Baheene ishawuti yila yina nayipulikhaga kihuma kwa Nguluvi yaaja noone khanji kiija,
“Lutaga ulitoole ilitaafili lila lina lidindwilwe mu liwokho lya malayikha yula,
yuna akheenye mu bahali na mu nyi inyuumu.”
9 Baheene naaluta kwa malayikha yula namujovela kiija,
“Nipeela ilitaafili ilinangʼana ilyo.”
Wánijovela wáaja,
“Litoola ulye,
nda ulye lisiive linoneela ngaja wuushi mu mulomo,
leelo mu wutumbu lisiive likhali.”
10 Nalitoola ilitaafili ilinangʼana lila,
lina likhandi mu liwokho lya malayikha yula,
nalilya.
Lyope lyava linoneela ngaja wuushi mu mulomo gwangu,
leelo naganaga kilimila lyava likhali mu wutumbu wangu.
11 Baheene najovelwa kiija,
“Wisakulwa kikuwa amalago khanji ulwa fikholo finshi,
inyi nyinshi,
ifilogolo finshi nu lwa vatwa vinshi.”