UMalayikha uwa wusaanu iitova ibalagumu yaakwe
9
1 Baheene umalayikha wa wusaanu wáatova ibalagumu yaakwe.
Naawona inondwe yina yiihuma ku wulanga yiigwa mu nyi.
Yoope yapeelwa ifungulo ya lilindi ilikhome ilya malungu.
2 Yalidindula,
ilyosi lyasinkha kihuma mu lilindi mula ngaja lyosi lya tanuli nkhome.
Baheene ilijuva nu wulanga kwava kuna nshiisi kwa kiiva ya lyosi lila lina liihuma mu lilindi ilikhome.
3 Inkumbi saahuma mu lyosi mula,
saaluta na kipalankhana mu nyi,
sapeelwa ingufu ngaja ngufu sa nje.
4 Khanji,
sapeelwa indaji kiija sisikhanangaga amasole aga mu nyi,
ifimelo,
wala mupishi gogoona.
Leelo sivalafye avaanu vala,
vina vangaya shimanyilo sha Nguluvi pa weeni waanave.
5 Inkumbi iso sapeelwa indaji kiija,
sisikhavabudaga avaanu awo,
leelo sivalafye kwa luhaavi lwa meesi gasaanu.
Uwuvafi waanave wukhandi ngaja wuvafi wa nje,
pina yiiluma umuunu.
6 Insiku iso avaanu vakhasakula kiifwa,
leelo vasikhafwa kaa.
Vakhadobokha kiifwa,
leelo imfwa yikhavasiga.
7 Amavili ga nkumbi iso gakhandi ngaja falaasi sina sipinyanjiilwe kwa kiiva ya wulugu.
Mu matwe gaanave pakhandi ngaja njoola sa shitwa sa sahaabu.
Khanji uweeni waanave wukhandi ngaja weeni wa vaanu.
8 Soope sikhandi ni nyele ngaja nyele sa washimaayi,
ameeno gaanave gakhandi ngaja meeno ga nyalupala.
9 Mu fifuva fyanave sikhandi sifwalile ngaja ngula sa shuuma.
Pina sikhandi sigulukha gulukha,
amapapanikho gaanave gapulisikhaga ngaja shawuti sa mutukha nyinshi sina sikwehwa ni falaasi,
sina sisijila ku wulugu.
10 Sikhandi sina mashila gana mimfwa ngaja ga nje,
mu mashila umo mukhandi ni ngufu isa kivalemasa avaanu kwa luhaavi lwa meesi gasaanu.
11 Sikhandi nu mutwa yuna akhandi malayikha wa lilindi ilikhome ilya malungu.
Ilitaawa lyakwe kwa Shihebulaniya yu Abadoni na kwa Shiyunaani yu Apoliyoni,
uluganulo lwakwe,
“Umuunu yuna iibuda.”
12 Amalava ago aga wutasi gaashila,
gasigeele amalava aganji gavili gina gakhayinsa.
UMalayikha uwa mutanda iitova ibalagumu yaakwe
13 Baheene umalayikha uwa mutanda wáatova ibalagumu yaakwe.
Napulikha ishawuti yimo yina yiihuma mu mapembe gana gala,
pa luvala ulwa kihumisa ishadanda ulwa sahaabu luna luli pa Nguluvi.
14 Ishawuti iyo yamujovela umalayikha wa mutanda yuna akhandi ni balagumu kiija,
“Uvadindulile avamalayikha vana (4) vina vapinyiilwe ku mukhoga umukhome ugwa Efulaati.”
15 Umalayikha yula wávadindulila avamalayikha vala vana.
Vakhandi vapiyipinyanjile kwa lisala liilyo na lisiku liilyo na kwa mwesi guugo na kwa mwakha guugo kiija,
vabude uluvala lumo mu mbali sitatu isa vaanu.
16 Vakhandi na vasulukhali vinshi,
vina vayangeele ifalaasi.
Napulikha kiija woona vali miliyoni magana gavili (200,000,000).
17 Naganile kisaaga ifalaasi na vina viyangala ifalaasi mu mahilu gangu,
vakhandi ndeeni,
vina viyangala ifalaasi,
vakhandi vafwele ingula mu fifuva fyanave.
Ingula iso,
sikhandi nduuhu nu wumwalaala nu wutolomfu.
Nagaaga amatwe ga falaasi iso gakhandi ngaja matwe ga nyalupala.
Mu malomo gaanave gahumyaga umooto,
ilyosi ni shibiliiti.
18 Uluvala lumo mu mbali sitatu isa vaanu,
vabudwagwa kwa malava gatatu ago,
kwa mooto ugo,
ilyosi ilyo ni shibiliiti isho,
fina fyahumaga mu malomo ga falaasi iso.
19 Ingufu sa falaasi iso sikhandi mu malomo gaanave na mu mashila gaanave,
kwa kiiva amashila gaanave gakhandi ngaja njokha,
gana matwe ga kivalumila avaanu.
20 Avaanu vina vasigalaga,
vina vasikhafwile kwa lilava ilyo lina lyavatovaga avaanu vayaanave,
vasikhalambisiile uwunansi waanave.
Vakhandi vapifuunya amalungu ni sanaamu sina vasitendaga vaveene kwa sahaabu,
ihela,
ishaaba,
amangʼanga na mapishi.
Isanaamu iso sisikwiliile kiloleela,
kipulikha wala kijenda.
21 Khanji vasikhalambisiile uwubudaaji waanave,
wala uwuhavi waanave,
wala uwushemi waanave,
wala uwuhiiji waanave.