Umupulya ugwa fungati
8
1 UMwana Nkholo pina wálamaatula umupulya gwa fungati,
kwava tototo kwa Nguluvi kwa luhaavi lwa nusu lisala ndeeni.
2 Naawona avamalayikha fungati vina viyiima pa Nguluvi,
woope vapeelwa ibalagumu fungati.
3 Woope umalayikha uyunji wáyinsa wáyiima pamwandi pa luvala ulwa kihumisa ishadanda,
wáava akheete mu mawokho isebeti ya sahaabu iya kitinshilisa ingaagulwa sina sinunshilila.
Wápeelwa ifya kitinshilisa finshi,
baheene aviishe lumo na mafuunyo ga vabaagule woona mu luvala ulwa kihumisa ishadanda ulwa sahaabu,
luna luli pamwandi ya shitengo sha Wutwa.
4 Ilyosi ilya kitinshilisa ingaagulwa sina sinunshilila lumo na mafuunyo ga vabaagule va Nguluvi,
lyataana kwa Nguluvi kihuma mu liwokho lya malayikha.
5 Baheene umalayikha uyo wátoola isebeti,
wáamemya amakhala ga mooto pa luvala ulwa kihumisa ishadanda,
wágutaaga mu nyi.
Kwava ni muli ni ngulumo sa noonya nu ludegenkho lwa nyi.
Avamalayikha vana viitova ibalagumu saanave
6 Baheene avamalayikha vala fungati vina vakhandi ni balagumu fungati,
vayipinyanga kitova ibalagumu saanave.
7 UMalayikha uwa wutasi wáatova ibalagumu yaakwe.
Baaho inoonya ya mangʼanga nu mooto guna guhansikheene ni danda,
fyataagwa mu nyi.
Umooto ugo gwanyaanya uluvala lumo mu mbali sitatu isa nyi na mapishi,
gwanyaanya na masole goona.
8 Woope umalayikha uwa wuvili wáatova ibalagumu yaakwe.
Baaho ishiinu shina shili ngaja shidunda shikhome shina shiveekha umooto,
shatoosewa mu bahali.
Baheene uluvala lumo mu mbali sitatu isa bahali,
lwava danda.
9 Uluvala ulo ulwa bahali,
ifiwumbwa fyona ifyumi fina fikwali,
fyafwa.
Khanji ifipugo ifikhome fyananjikha khabisa.
10 Woope umalayikha uwa wutatu wáatova ibalagumu yaakwe.
Baaho inondwe inkhome yaagwa kihuma ku wulanga.
Yikhandi yiveekha ngaja lumuli,
yoope yaagwa uluvala lumo mu mbali sitatu isa makhoga,
nu luvala lumo mu mbali sitatu isa fisansa fya malenga.
11 Ilitaawa lya nondwe iyo yatambulwagwa “Wukhali.”
Baheene uluvala lumo mu mbali sitatu isa malenga gaseetukha,
gaava makhali.
Avaanu vinshi vaafwa kwa malenga ago,
kwa kiiva gakhandi makhali mandu.
12 Woope umalayikha uwa wuna,
wáatova ibalagumu yaakwe.
Baheene uluvala lumo mu mbali sitatu isa lijuva,
nu luvala lumo mu mbali sitatu isa mwesi,
nu luvala lumo mu mbali sitatu isa nondwe satowaagwa,
imbali iso saava nshiisi.
Uluvala lumo mu mbali sitatu isa paminsi,
ilijuva lisikhamuliishe,
khanji uluvala lumo mu mbali sitatu isa paashilo,
goope umwesi gusikhamulikha.
13 Baheene naloleela,
napulikha inkhalukwangala yimonga yigulukha uwiima wa mutwe gwangu,
yikhandi yilyova yiijova ndeeni,
“Aka!
Aka!
Aka omwe muna mwikhala mu nyi,
kwa kiiva ishawuti sa balagumu sina avamalayikha avanji vatatu vali nkholeela kisitova.”