Avabaagule va Nguluvi viviikhwa ishimanyilo
7
1 Gaganile kishila ago,
nagaaga amahilu aganji.
Nikhavaajile avamalayikha vana,
na shila yumo ayiimile palubali lumo ulwa mbali sina,
isa nyi.
Woope vakhandi visivila ilipepo kihuma imbali soona sina (4),
isa nyi,
kiija lisikhakutukhaga kiyinsa ku nyi inyuumu wala kiluta ku bahali wala hata kisunkha ilipishi lyolyona.
2 Naawona umalayikha uyunji itaana kihuma kunena,
akhandi nu mupulya ugwa Nguluvi yuna muumi.
Wávajovela kwa shawuti nkhome avamalayikha vana (4) vala,
vina vapeliilwe ingufu isa kiyinanga inyi ni bahali,
3 wáaja,
“Musikhanangaji inyi nyuumu awu ibahali awu amapishi,
mbakha pina tikhavabandikha ishimanyilo avavanda va Nguluvi weesu pa weeni waanave.”
4 Baheene napulikha uwinshi waanave vina vabandiikhwe ishimanyilo sha Nguluvi pa weeni.
Avaanu woona vakhandi magana ishumi ligana na magana ishumi mashumi gana na magana mashumi gana (144,000).
5 Ishikholo sha Yuuda,
vaanu magana mashumi ishumi na magana mashumi gavili (12,000).
Ishikholo sha Lubeni,
vaanu magana mashumi ishumi na magana mashumi gavili (12,000).
Ishikholo sha Gaadi,
vaanu magana mashumi ishumi na magana mashumi gavili (12,000).
6 Ishikholo sha Asheeli,
vaanu magana mashumi ishumi na magana mashumi gavili (12,000).
Ishikholo sha Nafutaali,
vaanu magana mashumi ishumi na magana mashumi gavili (12,000).
Ishikholo sha Manaase,
vaanu magana mashumi ishumi na magana mashumi gavili (12,000).
7 Ishikholo sha Simiyoni,
vaanu magana mashumi ishumi na magana mashumi gavili (12,000).
Ishikholo sha Laawi,
vaanu magana mashumi ishumi na magana mashumi gavili (12,000).
Ishikholo sha Isakaali,
vaanu magana mashumi ishumi na magana mashumi gavili (12,000).
8 Ishikholo sha Sabulooni,
vaanu magana mashumi ishumi na magana mashumi gavili (12,000).
Ishikholo sha Yusufu,
vaanu magana mashumi ishumi na magana mashumi gavili (12,000),
khanji ishikholo sha Benyamini,
vaanu magana mashumi ishumi na magana mashumi gavili (12,000).
Ishipuga sha vaanu va mu nyi yoona
9 Gaganile kishila ago,
naawona ishipuga ishikhome mandu sha vaanu vina kusiina yuna akwiliile kivavasa.
Avaanu va nyi soona,
ifimyanja fyona,
ifikholo fyona ni filogolo fyona,
vayiimile pamwandi ya shitengo sha Wutwa na pa Mwana Nkholo.
Vafwele inkhansu inali imbalafu,
khanji vakheete amansambala ga mapunga mu mawokho gaanave.
10 Vakhandi viijova kwa shawuti nkhome kiija,
“Uwukulukho wiihuma kwa Nguluvi weesu,
yumwene yuna akhaliile ishitengo shaakwe isha Wutwa,
na kwa Mwana Nkholo.”
11 Avamalayikha woona vayiimile vashipiliime ishitengo sha Wutwa na vagosiivaha ni fiwumbwa fina (4).
Vayigwisa pansi,
vagubama pamwandi ya shitengo sha Wutwa na kimufuunya uNguluvi,
12 vaajova,
“Amina!
Ulusufyo nu wutupikho nu wumanyi,
khanji kihonjesa ni lishima nu wutawulilwa ni ngufu,
five nu Nguluvi weesu shiluta na shiluta.
Amina!”
13 Mu vagosiivaha awo,
yumonga wániposa wáaja,
“Avaanu ava vina vafwele inkhansu inali imbalafu,
vava naani?
Vahumile kwi?”
14 Namuyankha naaja,
“Wee mutwa,
owe umeenye.”
Baheene woope wáaja,
“Awo vaveene vina vahumile mu malava amakhome,
vakhansile inkhansu saanave inali kwa danda ya Mwana Nkholo na kiiva mbalafu.
15 Lulwene vali pamwandi ya shitengo sha Wutwa wa Nguluvi.
Vikimufuunya uNguluvi ishilo ni shiminsi mu nanda yaakwe,
woope yuna akheele mu shitengo sha Wutwa,
akhava lumo nawo ikivadiima.
16 Vasikhava ni njala kaa,
wala nkhawu,
khanji ilijuva lisikhavanyaanya wala lifushe,a
17 kwa kiiva uMwana Nkholo yuna ali nkholeela ya shitengo sha Wutwa,
akhavadiima.
Woope akhavatwala ku fisansa fya malenga,
gina giihumya uwuumi.
Khanji uNguluvi akhavafyangula amaanyosi goona mu meeho gaanave.”b