Umukhoga gwa malenga gina giihumya uwuumi
22
1 Baheene umalayikha wániwonensa umukhoga gwa malenga gina giihumya uwuumi,
na gukhandi gwihuma mu shitengo sha Wutwa sha Nguluvi nu Mwana Nkholo.
Amalenga ga mukhoga ugo,
gakhandi mavalafu pee.
2 Umukhoga ugo gukhandi gwinyelema paakhati naakhati ya nsila inkhome iya lijumbi ilyo.
Shila luvala lwa mukhoga pakhandi nu mupishi guna gwihumya uwuumi.
Amapishi ago giikhoma amakhomo mala ishumi na khavili kwa mwakha,
ndeeno shila mwesi giikhoma gwalimo.
Amahamba ga mapishi ago mugoda gwa kiponia avaanu va nyi soona.
3 Ilijumbi ilyo lisikhava ni shiinu shoshoona shina shiyijiilwe.
Mu lijumbi umo,
ishitengo sha Wutwa sha Nguluvi ni sha Mwana Nkholo shikhava shikwali.
Avavanda vaakwe vakhamufuunya,
4 vakhamwaga na shila muunu akhayandikhwa ilitaawa lyakwe uNguluvi,
pa weeni waakwe.
5 Mukhati ya lijumbi ilyo,
kusikhava ni shilo khanji.
Avaanu vasikhasakula ulumuli lwa lijuva wala itaala,
kwa kiiva uMutwa uNguluvi yumwene akhava lumuli lwanave.
Avaanu awo vakhatema shiluta na shiluta.
6 Umalayikha uyo wánijovela ndeeni,
“Amaswi aga ga shiyooli,
khanji ga kihuviililwa.
UMutwa uNguluvi yuna ikivapeela avakuwamalago uNumbula uMunofu waakwe,
a woope wámufilikhaga umalayikha waakwe kivawonensa avavanda vaakwe amaswi gina mbakha gawoneshe lilino ndeeni.”
Kitina kwa Yeesu Kilisito
7 UYeesu iijova,
“Puliisa!
Niyinsa lilino ndeeni.
Ayimiliilwe yuna iyinatila amaswi ga wukuwamalago uwa litaafili ili.”
8 One Yohana nikhagaajile na kigapulikha amaswi ago goona.
Naganaga kipulikha na kiloleela,
nayigwisa pansi,
nagubama pa malayikha uyo yuna wániwonensaaga amaswi ago,
kiija nimufuunye.
9 Leelo wánijovela wáaja,
“Lekha!
One na yuune nili muvanda muyaago,
lumo na vahuvililaaji vayaago avakuwamalago,
na vala vina viyinatila amaswi gina gakwali mu litaafili ili.
Lino,
mufuunyaji uNguluvi mwene duguli!”
10 Baheene umalayikha uyo wánijovela wáaja,
“Usikhagafihaga amaswi aga wukuwamalago aga mu litaafili ili,
kwa kiiva goona gina galogwelwe muno,
giisa kisenjekha lilino ndeeni.
11 Lino,
umuunu yuna iigaha amavi,
ayitenekhaje kigaha amavi,
na yuna iigaha aga nsoni,
ayitenekhaje kigaha gaago aga nsoni.
Umuunu yuna iigaha amagolofu,
woope ayitenekhaje kigaha amagolofu,
umubaagule wa Nguluvi,
ayitenekhaje kigaha ngaja mubaagule wa Nguluvi.”
12 UYeesu ilogola iijova ndeeni,
“Puliisa!
Niyinsa lilino ndeeni.
Niyinsa kimuhomba shila muunu kwa gala gina wágahaga.
13 One yuune Alufa khanji yuune Omega,
b uluganulo lwakwe,
one nili wa Wutasi khanji nili wa Wudugo,
one yuune yuna nikisiyansa injowo soona na kisimaliisa.”
14 Vayimiliilwe avaanu vina vikhansa inkhansu saanave inali imbalafu,
kiija vakhayiitikhwa kiyinjila mu lijumbi ilipya ilyo,
kishilila ifikwilo fyakwe na kiilya amakhomo ga mupishi ugwa wuumi.
15 Leelo avahavi woona,
avashemi,
avabudaaji,
vina vifuunya amanguluvi na woona vina vidobokha aga wudehi na kigaha,
vakhakhala kunja ya lijumbi ilyo ngaja mbwa.
16 “One Yeesu,
yuune shisafi shikhome sha mutwa uDawudi,
khanji ningʼaala ngaja nondwe ya lwamilaawu.
c Yuune namufilikhaga umalayikha wangu,
ayinse avabedele omwe imola isi,
kiiva ya fipuga fya vahuvililaaji.”
17 UNumbula wa Nguluvi nu munya shiwungo isha kitoolwa,
vikimushemeela uMutwa viijova,
“Yinsa!”
Avaanu woona vina vakhapulikha amaswi ago vajove,
“Yinsa!”
Shila muunu umunya nkhawu,
ayinsaje kiingʼwa bule amalenga aga wuumi.
Amaswi aga wudugo
18 UMutwa uYeesu iijova,
one nikivapavila avaanu woona vina vikigapulikha amaswi aga wukuwamalago,
gina gali mu litaafili ili.
Umuunu nda ayonjelese amaswi,
uNguluvi woope akhamuyonjelesa amalava ago,
gina gayandiikhwe mu litaafili ili.
19 Umuunu nda asheepule amaswi gogoona mu mola isa wukuwamalago uwa litaafili ili,
uNguluvi woope akhamushepusisa uwugolofu uwa kikhala mu lijumbi ilibaagule,
nu wugolofu uwa kiilya amakhomo aga mupishi guna gwihumya uwuumi.
20 UMutwa uYeesu iihumya uwubedelo uwa njowo isi iijova,
“Shiyooli niyinsa lilino ndeeni.”
Na yuune Yohana niijova,
“Amina,
yinsa Mutwa Yeesu!”
21 Imota ya Mutwa uYeesu,
yive lumo noomwe woona.