Ishitengo sha Nguluvi isha Wutwa
4
1 Gaganile kishila ago,
nagwaga umulyango gudindwishe kwa Nguluvi!
Baheene napulikha ishawuti yila ngaja shawuti ya balagumu yina nayipulikhaga ulwa wutasi yiijova kiija,
“Yinsa,
taana kuno kushaanya,
na yuune nisikuwonense gina gisakulwa mbakha gawoneshe mu luhaavi luna luyinsa.”
2 Baaho,
pina uNumbula wa Nguluvi ikinilongosa,
nashaaga ishitengo sha Wutwa kwa Nguluvi,
shina umuunu yumonga ashikhaliile.
3 Uyo akhandi ingʼaala ngaja lingʼanga lya mafungu makhome ilya yasipi ni lya akiki.
Ilipingangʼombe lya noonya lina lingʼaala ngaja sumalidi,
a lyapilimaga ishitengo shila.
4 Khanji ifitengo mashumi gavili na gana,
fyashipilimaga ishitengo shila sha Wutwa.
Mu fitengo ifyo vakhalaga avagosiivaha mashumi gavili na vana.
Vakhandi vafwele amenda mavalafu ni njoola isa kitema isa sahaabu mu matwe gaanave.
5 Mu shitengo shila sha Wutwa sahumaga imuli ni ngulumo sa noonya.
Pamwandi ya shitengo isho,
saveekha imuli fungati isa sahaabu,
iso siseene Numbula fungati isa Nguluvi.
6 Khanji,
apo pakhandi ngaja bahali ya shilole,
yina yikhandi ngaja lingʼanga lina lingʼaala mandu.
Paakhati ya shitengo isha Wutwa na vagosiivaha vala,
pakhandi pana fiwumbwa fina (4),
ifya wuumi.
Fikhandi fipilima imbali soona isa shitengo sha Wutwa.
Fikhandi na meeho shila luvala.
7 Ishiwumbwa sha wutasi shahwananaga ni nyalupala,
isha wuvili shahwananaga ni ngwada,
isha wutatu ku weeni shahwananaga nu muunu na isha wuna shahwananaga ni nkhalukwangala yina yigulukha.
8 Fyope ifiwumbwa fina (4) ifyo,
shila shimo shikhandi na mapapanikho mutanda.
Khanji amapapanikho ago,
gakhandi na meeho mu mbali soona.
Ifiwumbwa ifyo,
fikhandi fiyimba ishilo ni shiminsi fisisisima fiijova,
“Munofu,
Munofu,
Munofu,
yu Mutwa uNguluvi,
uMunya Ngufu Soona,
yuna akhandi akwali,
akwali na akhava akwali.”
9 Umwene yuna ashikhaliile ishitengo sha Wutwa,
yumwene uNguluvi yuna muumi shiluta na shiluta.
Ifiwumbwa ifyo luhaavi loona pina fikimutupikha,
fikimutiila na kimuhonjesa,
10 woope avagosiivaha vala mashumi gavili na gana,
vayigwisa pansi,
vagubama pamwene yuna akhaliile ishitengo sha Wutwa na kimufuunya yuna muumi shiluta na shiluta.
Woope vikimuhumisa injoola saanave pa shitengo sha Wutwa viijova ndeeni,
11 “UMutwa weesu,
Nguluvi weesu,
wifwaya owe kitupikhwa,
kitiilwa na kiiva ni ngufu,
kwa kiiva wawumbaga ifiinu fyona,
wawumbaga kwa lugano lwakho,
khanji fikwali.”